ایتھوپیا میں سنگل کنٹری نمائش کے انعقاد پراتفاق
کراچی(بزنس ڈیسک)جمہوریہ ایتھوپیا کے سفارت خانے اور ٹریڈ ڈیولپمنٹ اتھارٹی آف پاکستان (ٹڈاپ)نے۔
اگلے سال ادیس ابابا (ایتھوپیا) میں سنگل کنٹری نمائش کے انعقاد پر تعاون کرنے پر اتفاق کیا ہے ۔یہ اتفاق رائے پاکستان میں ایتھوپیا کے سفیر ڈاکٹر جمال باقر عبد اللہ اورٹڈاپ کے چیف ایگزیکٹو زبیر موتی والا کے درمیان ملاقات کے دوران طے پایا۔اس موقع پر ٹڈاپ کے سیکرٹری شہریار تاج، ڈی جی عبدالکریم میمن اور کراچی میں ایتھوپیا کے اعزازی قونصل جنرل ابراہیم تواب بھی موجود تھے ۔سفیر ڈاکٹر جمال باقر نے ایتھوپیا کے اسٹریٹجک فوائد پر روشنی ڈالی۔ انہوں نے پاکستانی سرمایہ کاروں کو ایتھوپیا کی بڑھتی معیشت میں مواقع تلاش کرنے کی دعوت دی۔زبیر موتی والا نے زراعت، فارماسیوٹیکل اور تعمیراتی مواد جیسے شعبوں میں ملک کی طاقتوں پر زور دیتے ہوئے دیکھو افریقہ اور انگیج افریقہ پالیسی کیلئے پاکستان کے عزم کا اعادہ کیا۔ انہوں نے ایتھوپیا کو دوطرفہ تجارت کو مضبوط بنانے میں پاکستان کی طرف سے مکمل تعاون کا یقین دلایا۔نمائش کا مقصد تجارتی تعلقات کو گہرا کرنا اور دونوں ممالک میں کاروبار کے لیے نئے مواقع کو کھولنا ہے ۔
