ٹیلی کام شعبے کی آمدنی میں17فیصد سے زائد اضافہ
![ٹیلی کام شعبے کی آمدنی میں17فیصد سے زائد اضافہ](https://dunya.com.pk/news/2024/December/12-17-24/news_big_images/2448428_85543735.jpg)
کراچی(مانیٹرنگ ڈیسک)ٹیلی کام سیکٹر نے مالی سال 24-2023 کے دوران مجموعی طور پر 956 ارب روپے کی ریکارڈ آمدنی حاصل کی ہے ۔
اس حوالے سے پاکستان ٹیلی کمیونیکیشن اتھارٹی کی جانب سے پیش کردہ 2024 کی سالانہ رپورٹ میں بتایا گیا ہے کہ مالی سال 23-2022 کے مقابلے میں 24-2023 کے دوران اقتصادی چیلنجز کے باوجود ٹیلی کام شعبے کی آمدنی میں17فیصد سے زائد اضافہ ہوا ہے ۔ رپورٹ میں تکنیکی، بنیادی ڈھانچے کی بہتری، اصلاحاتی جائزہ پیش کیا گیا ہے ۔ رپورٹ کے مطابق مالی سال 24-2023 کے دوران ٹیلی کام شعبے کو 956 ارب روپے کی ریکارڈ آمدنی حاصل ہوئی ہے ۔ رپورٹ میں بتایا گیا ہے کہ موبائل فون سروسز 91 فیصد آبادی تک پہنچ چکی ہیں، فورجی سروسز 81 فیصد آبادی کو دستیاب ہیں، ٹیلی کام سبسکرائبرز کی کل تعداد ستمبر 2024 تک 19 کروڑ 60 لاکھ تک پہنچ گئی ہے ۔رپورٹ کے مطابق براڈ بینڈ صارفین کی تعداد جون 2023 میں 12 کروڑ 76 لاکھ سے بڑھ کر 14 کروڑ 23 لاکھ ہو گئی جبکہ موبائل انٹرنیٹ کی اوسط رفتار میں 28 فیصد اضافہ ہوا اور انٹرنیٹ رفتار 15.65 ایم بی پی ایس سے بڑھ کر 20.02 ایم بی پی ایس تک پہنچ گئی۔رپورٹ کے مطابق سال 24-2023 کے دوران 2 کروڑ 96 لاکھ موبائل ڈیوائسز مقامی سطح پر تیار کی گئی ہیں۔