ڈپٹی کمشنرجھنگ کا ڈی ایچ کیو ہسپتال کا دورہ ،ہدایات جاری

جھنگ (ڈسٹرکٹ رپورٹر )ڈپٹی کمشنرجھنگ علی اکبر بھنڈر نے ڈسٹرکٹ ہیڈ کوارٹر ہسپتال کا دورہ کیا اورمریضوں کو دی جانے والی طبی سہولیات کا جائزہ لیا۔
ڈپٹی کمشنر نے ہسپتال کے انتظامی اموربارے انتظامیہ سے بریفنگ لی اور مختلف وارڈز کے معائنہ کے دوران زیر علاج مریضوں کو فراہم طبی سہولیات اور علاج معالجہ کیلئے ادویات کے سٹاک کو چیک کیا۔اس موقع پر ڈپٹی کمشنرجھنگ نے گفتگو کرتے ہوئے کہا کہ وزیر اعلیٰ پنجاب مریم نواز کے ویژن کے تحت ضلع بھر میں صحت عامہ کیلئے سروس ڈیلیوری کے معیار کو بہتر بنایا جا رہا ہے ، عوام کو بہتر سے بہتر علاج معالجہ فراہم کرنا ہماری اولین ترجیح ہے ،عوام کو معیاری طبی سہولتوں کی فراہمی یقینی بنانے کیلئے ہر ممکن وسائل بروئے کارلائے جا رہے ہیں۔ انہوں نے ڈاکٹرز سمیت دیگر طبی عملہ کی حاضری کو سو فیصد یقینی بنانے اور صفائی ستھرائی کو مزید بہتر بنانے سمیت وارڈزاور رومز میں بیڈ شیٹس تبدیل کرنے اور واش رومز کی صفائی کا بھی خاص خیال رکھنے کی ہدایات جاری کیں۔بعد ازاں ڈپٹی کمشنر نے دیہی مرکز صحت باغ کا دورہ کیا اورصحت کی سہولیات کو چیک کیا،انہوں نے ڈاکٹرز و سٹاف کی حاضری سمیت مریضوں کو دی جانے والی طبی سہولیات و ریکارڈ کا بھی جائزہ لیا اور مریضوں کو ادویات کی فراہمی کے حوالے سے ہدایات جاری کیں۔ اس موقع پر انہوں نے گفتگو کرتے ہوئے کہا کہ ضلع کے تمام مراکز صحت پر ہر قسم کے علاج کی سہولت مہیا کرنے کیلئے بھرپور اقدامات کئے جا رہے ہیں،مرکز صحت انتظامیہ حکومتی اقدامات کے ثمرات عام مریضوں تک پہنچنانے میں کوئی کسر اٹھا نہ رکھیں۔