کھیلتا پنجاب :گوجرانوالہ، حافظ آباد کی کبڈی میں فتح
گوجرانوالہ(نیوز رپورٹر) کھیلتا پنجاب گیمز ، گوجرانوالہ، حافظ آباد نے کبڈی اور سیالکوٹ، نارووال نے فٹ بال کے میچز جیت لئے ، آج فٹ بال، ہاکی اور کبڈی کے فائنلز کھیلے جائیں گے ۔
گزشتہ روز پیپلز کالونی فٹ بال گرائونڈ میں کھیلتا پنجاب گیمز کے دو فٹ بال میچ کھیلے گئے پہلے میچ میں سیالکوٹ نے حافظ آباد کو اور دوسرے میچ میں نارووال نے گجرات کو شکست دے کر اپنے اپنے میچ جیت لئے ، اسی طرح کبڈی کے پہلے میچ میں گوجرانوالہ نے گجرات کو شکست دی اور دوسرے میچ میں حافظ آباد نے نارووال کو ہرا کر اپنی پوزیشن کو مضبوط بنالیا ہے ۔ میچز دیکھنے کیلئے شائقین کی بڑی تعداد موجود تھی۔ آج گکھڑ سپورٹس کمپلیکس میں ہاکی اور فٹ بال گرائونڈز پیپلز کالونی میں فٹ بال اور کبڈی کے فائنل مقابلے ہوں گے ۔ فٹ بال اور کبڈی کے مقابلوں کے مہمان خصوصی پنجاب فٹ بال ایسوسی ایشن کے سینئر نائب صدر حافظ ذکا اللہ، ایم پی اے عمر فاروق ڈار، ڈویژنل سپورٹس آفیسر فیصل امیر خان، ڈسٹرکٹ سپورٹس آفیسر رانا سجاد احمد خان، ایڈیشنل چیف وارڈن سول ڈیفنس میاں اکرام تھے ۔جنہوں نے گرائونڈ میں کھلاڑیوں کے ساتھ مصافحہ کیا اور کھلاڑیوں سے خطاب کرتے ہوئے کہا کہ کھیلتا پنجاب گیمز میں کھلاڑیوں نے شاندار کھیل پیش کرکے یہ ثابت کیا ہے کہ پاکستان کے نوجوانوں میں ٹیلنٹ کی کمی نہیں ہے ۔
