گجرات:بغیر لائسنس میڈیکل سٹورز کیخلاف کارروائی کا حکم

گجرات (نامہ نگار ،سٹی رپورٹر)ڈپٹی کمشنر گجرات صفدر حسین ورک نے ڈسٹرکٹ کوالٹی کنٹرول بورڈ کے اجلاس کی صدارت کرتے ہوئے عطائیوں، جعلی اور بغیر لائسنس ادویات فروخت کرنے والوں کے خلاف سخت کارروائی کا عزم ظاہر کیا۔
انہوں نے کہا کہ شہریوں کی صحت کے ساتھ کھیلنے والوں کو کسی صورت معاف نہیں کیا جائے گا ،ڈیوٹی میں غفلت برتنے والے ڈرگ انسپکٹرز اور عملے کے خلاف بھی کارروائی عمل میں لائی جائے گی۔ اجلاس میں سیکرٹری کوالٹی کنٹرول بورڈ مہوش ابرار، ڈاکٹر افضل چودھری، ڈرگ انسپکٹرز شاہد الحسن، عمران خالد اور اختر علی شریک تھے ۔ اجلاس میں مجموعی طور پر 12 کیسز سماعت کے لیے پیش کیے گئے ۔ سنگین نوعیت کے 3 کیسز کو ڈرگ کورٹ ریفر کر دیا گیا جبکہ معمولی نوعیت کی خلاف ورزیاں کرنے والے میڈیکل سٹور مالکان کو وارننگ جاری کی گئی۔ ڈپٹی کمشنر نے محکمہ صحت اور ڈرگ انسپکٹرز کو ہدایت کی کہ جعلی ادویات کے کاروبار اور عطائی ڈاکٹروں کے خلاف کریک ڈاؤن مزید مؤثر بنایا جائے ۔ انہوں نے کہا کہ بغیر کوالیفائیڈ پرسن کے کسی میڈیکل سٹور کو کام کرنے کی اجازت نہیں دی جائے گی۔