ہالا میں باپ کے ہاتھوں قتل لڑکی کی قبر کشائی کا حکم
میرپورخاص میں عید کے دن لاپتہ نوجوان کے قتل کا معمہ حل،دو ملزم گرفتار
ہالا،میرپورخاص(نمائندہ دنیا، بیورو رپورٹ) تین روز قبل نیو سعیدباد کے نواحی گاؤں بہشت باغ میں فون پر غیر محرم سے بات کرنے پر نوجوان حاملہ لڑکی یاسمین کو گلا گھونٹ کر قتل کرنے میں ملوث باپ ٹوھ حاجانو کو عدالت میں پیش کیا گیا جہاں اسے چار روزہ جسمانی ریمانڈ پر پولیس کے حوالے کردیا گیا جبکہ اس موقع پر مقتولہ یاسمین کی والدہ بھاگل نے عدالت کو بتایا کہ قتل کے بعدبیٹی کے منہ میں زہریلی زرعی دوا ڈالی گئی تاکہ لگے کہ لڑکی نے خودکشی کی ہے اور قاتل بچ جائیں ،مقتولہ کی والدہ کے بیان اور پولیس کی جانب سے قبر کشائی کے بعد لاش کے پوسٹ مارٹم کی درخواست پر عدالت نے ڈی جی اور سیکریٹری ہیلتھ کو لیٹر جاری کردیا جس میں کہا گیا کہ فوری میڈیکل ٹیم تشکیل دے کر اور قبرکشائی کرکے لاش کا پوسٹ مارٹم کرنے کے بعد 10 روز میں رپورٹ عدالت میں جمع کرائی جائے دوسری جانب پولیس کا کہنا ہے کہ مقتولہ کے چچا نواب حاجانو کو بھی جلد گرفتار کرلیا جائے گا۔ میرپورخاص سے نمائندے کے مطابق عید کے دن 21جولائی کو گھر سے لاپتہ ہونے والے نوجوان زاہد کنبھار،جس کی لاش دو دن بعد چودھری افتخار جٹ کی غیر آباد زمین نزد بیلاڑو سے ملی تھی،کے قتل کا معمہ سی آئی اے پولیس اور ایس ایچ او میرواہ نے حل کرتے ہوئے قتل میں ملوث دو ملزمان کو گرفتار کرکے آلہ قتل اور مقتول کی موٹر سائیکل بر آمد کرلی۔ ملزمان سورج نارائن اور الہٰی بخش رند نے جرم کا اعتراف کرلیا ہے ۔دوران تفتیش ملزمان نے بتایا کہ ہم نے زاہد کنبھار کو غیرت کے نام پر کلہاڑی کے وار کر کے قتل کیا اور لاش چودھری افتخار جٹ کی غیر آباد زمین کی جھاڑیوں میں چھپا دی تھی۔
