شہر کے مختلف علاقوں میں گھر گھر تلاشی،متعدد مشکوک افراد زیر حراست
کراچی(اسٹاف رپورٹر ) تھانہ شریف آباد اور نیو کراچی انڈسٹریل ایریا کے علاقوں میں پولیس نے کومبنگ/سرچ آپریشن کے دوران علاقے کے داخلی و خارجی راستوں کو سیل کرکے گھر گھر تلاشی لی۔۔
آپریشن کے دوران متعدد مشکوک افراد کو پولیس حراست میں لے لیا گیا۔ ویسٹ پولیس نے تھانہ مومن آباد کے علاقے ضیاء کالونی اور تھانہ پیرآباد کے علاقے بنارس اورنگی ٹاؤن میں سرچ آپریشن کیا، سرچ آپریشنز سے قبل علاقوں کے داخلی و خارجی راستوں کو سیل کیا گیا ہے جبکہ گھر گھر تلاشی لی گئی، مزید ہوٹلوں، دکانوں، گوداموں، خالی پلاٹوں اور دیگر مقامات پر بھی پولیس کی جانب سے سرچ آپریشنز کے دوران بائیو میٹرک تلاش ڈیوائس کی مدد سے مشتبہ افراد کی تصدیق کی گئی۔ قائد آباد تھانے کی پولیس نے قتل کے مقدمہ میں مفرور 2 ملزمان محمد غزن ولد محمد قادر خان اور جمیل اللہ ولد نصیب احمد کو گرفتار کرلیا۔ملزمان روز وقوعہ سے روپوش تھے ۔ کورنگی پولیس نے مفرور کورٹ اشتہاری روپوش ملزمان مرزا سعود بیگ ولد مرزا نیاز بیگ اور ملزم ایوب ولد عبدالسلام کو گرفتار کرلیا۔ کورنگی پولیس نے مفرور و کورٹ اشتہاری 4 ملزمان فیصل ولد عبدالکریم، ملزم عبدالرزاق ولد محمد شفیق، ملزم جاوید بنگالی وال یونس اور مسمات سعدیہ زوجہ خضر محمد کو گرفتار کرلیا۔
