انٹرکامرس کے نتائج ،سرکاری کالج پوزیشنز سے محروم
کراچی (مانیٹرنگ ڈیسک)اعلیٰ ثانوی تعلیمی بورڈ نے بارہویں جماعت کامرس ریگولر گروپ کے سالانہ امتحانات برائے 2024 کے نتائج کا اعلان کردیا ہے ۔
تینوں پوزیشنز نجی کالجوں نے حاصل کیں سرکاری کالج پوزیشن لینے سے محروم رہے ۔ چیئرمین انٹر بورڈ پروفیسر امیر حسین قادری نے نتائج کا اعلان کرتے ہوئے بتایا کہ کامرس ریگولر گروپ کے امتحانات میں تابانیز کالج کے طالبعلم محمد سمیع ولد محمد الطاف نے 1100میں سے 983 نمبر کے ساتھ پہلی پوزیشن حاصل کی۔کامکس کالج کی طالبہ رابعہ بنت عمران چھاپرا نے 975 نمبر کے ساتھ دوسری پوزیشن جبکہ بحریہ کالج کارساز کی طالبہ جویریہ تاج بنت محمد سلیم جھارا نے 970 نمبر کے ساتھ تیسری پوزیشن حاصل کی۔ ناظم امتحانات زرینہ راشد نے نتائج کی تفصیلات بتاتے ہوئے کہا کہ کامرس ریگولر گروپ کے امتحانات میں 34 ہزار 451 امیدواروں نے رجسٹریشن کروائی۔جبکہ 33ہزار 610 امیدوار امتحانات میں شریک ہوئے اور ان میں سے 12ہزار 87 امیدوار کامیاب قرار پائے ، اس طرح کامیابی کا تناسب 35.96 فیصد رہا۔ان امتحانات میں 169 امیدوار اے ون گریڈ، 1123 اے گریڈ، 2306 بی گریڈ، 4450 سی گریڈ، 3760 ڈی گریڈ جبکہ 279 امیدوار ای گریڈ میں کامیاب ہوئے ۔چیئرمین پروفیسر امیر حسین قادری نے کامیاب ہونے والے طلبہ کو مبارکباد دیتے ہوئے کہا ہے کہ انٹرمیڈیٹ کے تمام نتائج کے اعلان کے بعد پوزیشن ہولڈرز طلبہ کی حوصلہ افزائی کیلئے ان کے اعزاز میں ایک بڑی تقریب منعقد کی جائے گی ۔
