مہران ہائی وے پر ٹرک اور کار میں تصادم،3افراد جاں بحق
پڈعیدن،محراب پور(نمائندگان دنیا)مہران ہائی وے پر سوئی گیس کے مقام پر تیز رفتار ٹرک اور کار میں خوفناک تصادم ہو گیا جس کے نتیجے میں کار میں سوار دو خواتین سمیت تین افراد شدید زخمی ہوگئے ۔
واقعے کی اطلاع پر علاقہ مکین اور پولیس نے موقع پر پہنچ کر زخمیوں کو اسپتال پہنچایا جہاں پر زخموں کی تاب نہ لاتے ہوئے دو خواتین کائنات بی بی زوجہ منصور شر اور حضوراں بی بی زوجہ صالح شر اور ڈرائیور بشیر احمد شر جاں بحق ہوگئے جبکہ ٹرک ڈرائیور موقع سے فرار ہو گیا۔اطلاعات کے مطابق بدنصیب خاندان خاتون کائنات بی بی کو زچگی کے لئے اسپتال لے کر جارہاتھا کہ حادثے کا شکار ہو گیا،متوفی خاندان کے افراد گاؤں میر علی شر کے رہائشی بتائے جاتے ہیں ، پولیس نے ضروری کارروائی کے بعد لاشیں ورثا کے حوالے کردیں۔ نوڈیرو کے پنجودیرو کے مقام پر تیز رفتار وین اور کار میں تصادم کے باعث پیپلز پارٹی کی رہنما سید ارشد شاہ راشدی کی فیملی کی دو خواتین سمیت 6 افراد زخمی ہوگئے۔ جیکب آباد میں ملیریا نے 8سالہ ظہیراں کی جانے لے لی جب کہ جیکب آباد میں ہی دیرینہ دشمنی کی بناپر مسلح افراد نے فائرنگ کرکے نوجوان شہزادو بنگلانی کو قتل کردیا اور فرار ہوگئے۔ محراب پور میں حادثے کا زخمی نوجوان دانش زندگی کی بازی ہار گیا۔
