نوڈیرو میں زمین کے تنازعے پرفائرنگ، ایک شخص ہلاک
نوڈیرو ،اندرون سندھ (نمائندگان دنیا) نوڈیرو کے نواحی گاؤں موریا میں زمین کے تنازعے پر فائرنگ سے ایک شخص جاں بحق، دو زخمی ہوگئے۔۔
جب کہ ایک شخص کو اغوا کرلیا گیا۔ پولیس کے مطابق جاں بحق شخص کی شناخت ہمت موریو کے نام سے ہوئی جبکہ زخمیوں میں محمد حسین موریو اور ریاض موریو شامل ہیں، مغوی شخص کی تصدیق قیصر موریو کے نام سے کی گئی، فائرنگ زمینوں پر کام کے دوران کی گئی۔ پولیس کے مطابق واقعہ موریا اور آگانی برادری کے مابین زمین کے تنازعے کا نتیجہ ہے۔ دولت پور میں قومی شاہراہ پر صادق آباد سے کراچی آنے والا گندم سے لدا ٹریلر الٹ گیاجس کے زد میں کراچی سے ملتان جانے والی مسافر کو چ آگئی جس کے 5مسافر زخمی ہوگئے ۔ اطلاعات کے مطابق صادق آباد سے کراچی جانے والے ٹرالر ڈرائیور کو اچانک نیند آ گئی تھی اور ٹرالر رانگ سائیڈ پر جاکر الٹ گیا ،زخمیوں میں ٹرالر ڈرائیور اور کلینر بھی شامل ہیں۔ محراب پور میں دو گروہی تصادم میں 10افراد زخمی ہوگئے ۔ پہلا گروہی تصادم ٹھارو شاہ تھانہ کی حدود ہری پور محلے میں گلی میں گزرنے کی تکرار پر سولنگی اور بروہی برادر میں ہو اجس میں عمر، احسان ، شہ میرعلی، غلام مصطفی بروہی اور دیگر زخمی ہوگئے۔ دوسری طرف ہالانی تھانہ کی حدود گاؤں پیر وتو میں معمولی تکرار پر سید اسد علی شاہ اور سید نیاز علی شاہ گروپ کے درمیان تصادم ہوگیا جس میں متعدد افراد زخمی ہوگئے۔
