سینیٹر روبینہ خالد کا بی آئی ایس پی ادائیگی مرکز کادورہ
کراچی(اسٹاف رپورٹر)چیئرپرسن بینظیر انکم سپورٹ پروگرام (بی آئی ایس پی)سینیٹر روبینہ خالد نے ابراہیم حیدری ملیر میں بی آئی ایس پی ادائیگی مرکز کا دورہ کیا اورمستحق خواتین کے مسائل سنے ۔انہوں نے بی آئی ایس پی حکام کو مسائل حل کرنے کی فوری ہدایت کی۔
ادائیگی مرکز پر POS ایجنٹس کی کمی کا سختی سے نوٹس لیا اور متعلقہ بینک کو فوری ہدایت جاری کی۔ اس موقع پر صوبائی وزیر ترقی نسواں شاہینہ شیر علی بھی ان کے ہمراہ تھیں۔ سینیٹر روبینہ خالد نے ادائیگی مرکز پر بینک عملے اور ڈیوائسز کی کمی کا سختی سے نوٹس لیا اور اس کمی کو کل تک پورا کرنے کے احکامات دیئے تاکہ غریب خواتین کو رقم وصولی کے دوران قطاروں میں انتظار نہ کرنا پڑے ۔چیئرپرسن روبینہ خالد نے مستحق خواتین سے مخاطب ہوتے ہوئے کہا کہ میرے یہاں آنے کا مقصد آپ سے بات چیت کرنا اور آپ کو درپیش مسائل سے آگاہی حاصل کرنا ہے ۔ انہوں نے کہا کہ 8171 بی آئی ایس پی کا سرکاری نمبر ہے اس کے علاوہ کسی دوسرے نمبر سے آنے والے پیغام فراڈ ہے ۔انہوں نے خواتین کو تاکید کی کہ وہ اپنی رقم پوری گن کر وصول کریں اور کٹوتی کی صورت میں فوری طور پر شکایت کریں۔سینیٹر روبینہ خالد نے بی آئی ایس پی عملے کو غریب خواتین کو شفاف اور باعزت طریقے سے ادائیگی کرنے کی ہدایت بھی دی۔
