سہ روزہ سندھ بیچ گیمز کی رنگا رنگ اختتامی تقریب

کراچی(اسٹاف رپورٹر)سندھ حکومت کے محکمہ کھیل کے تحت سہ روزہ سندھ بیچ گیمز رنگا رنگ تقریب کے ساتھ ختم ہو گئے ،کلفٹن کے ساحل پر ہونے والے تین روزہ سندھ بیچ گیمز میں کراچی ڈویژن نے 14 گولڈ میڈلز کے ساتھ اپنی سبقت ثابت کرتے ہوئے جنرل ٹرافی حاصل کی۔۔۔
کراچی کے 14 گولڈ میڈلز میں سے 8 باکسنگ میں حاصل کیے ،حیدرآباد نے دوسری اور سکھر ڈویژن نے تیسری پوزیشن حاصل کی،نشان پاکستان پر منعقدہ اختتامی تقریب میں سندھ کے وزیر توانائی سید ناصر حسین شاہ مہمان خصوصی تھے ، سیکرٹری کھیل و امور نوجوان عبدالعلیم لاشاری نے استقبالی کلمات ادا کیے ،اس موقع پر پارلیمانی سیکرٹری برائے کھیل صائمہ آغا، جنوبی ایشیا کی تیز ترین خاتون کھلاڑی رہنے والی انٹرنیشنل ایتھلیٹ نسیم حمید ،سندھ اولمپک ایسوسی ایشن کے اصغر بلوچ اور دیگر بھی موجود تھے ، سید ناصر حسین شاہ کا کہنا تھا کہ سندھ حکومت نے کھیلوں کو بہت سپورٹ کیا ہے ،حکومت سندھ کھیلوں کے فروغ کے لیے کوشاں ہے ،سندھ کے نوجوانوں میں کھیلوں کے حوالے سے بہت ٹیلنٹ موجود ہے ، باصلاحیت نوجوانوں کو ٹریننگ دے رہے ہیں۔سندھ حکومت نے کھیلوں کے فروغ کے لیے سندھ پریمیئر لیگ، سندھ جونیئر پریمیئر لیگ شروع کیں، جس میں بڑا ٹیلنٹ دیکھنے کو ملا، بیچ گیمز میں نوجوانوں نے اچھی کارکردگی کا مظاہرہ کیا جو ہارے وہ مزید محنت کریں۔