ضلع کونسل کا غیر قانونی تعمیرات، تجاوزات کیخلاف آ پریشن، 7 دکانیں مسمار
ملتان (سٹاف رپورٹر) ضلع کونسل نے غیر قانونی تعمیرات اور تجاوزات کے خلاف گرینڈ آپریشن شروع کر دیا ، جس کے دوران 7 غیر قانونی دکانوں کو مسمار کر دیا گیا۔
تفصیلات کے مطابق ڈسٹرکٹ آفیسر ریگولیشن و چیف آفیسر ضلع کونسل انعم معصوم ضلع کونسل کی زیر نگرانی غیر قانونی تعمیرات کے خلاف بڑے پیمانے پر کارروائیاں شروع کر دی گئی ہیں ، گزشتہ روز انہوں نے لینڈ آفیسر امتیاز چٹھہ ، جاوید اقبال اور بلڈنگ انسپکٹر سیف الرحمان سمیت دیگر عملے کے ساتھ بستی گاگرا کچور ، چائنہ چوک ، علی والا ، ناگ شاہ اور کائیاں پور میں آپریشن کیا ، جس کے دوران نقشہ منظوری کے بغیر تعمیر کی گئی 7 دکانوں کو گرا دیا گیا جبکہ سامان قبضہ میں لے لیا ۔
ضلع کونسل ٹیم نے تجاوزات کے خلاف کارروائی کرتے ہوئے متعدد سائن بورڈ ، کاونٹرز وغیرہ بھی قبضے میں لئے اور بھاری جرمانے عائد کرتے ہوئے تھانہ مظفرآباد میں استغاثہ جات بھی جمع کروا دئیے ، چیف آفیسر ضلع کونسل انعم معصوم کا کہنا ہے کہ ضلع کونسل کی حدود میں غیر قانونی تعمیرات کو کسی صورت برداشت نہیں کیا جائے گا۔