ٹوٹے

دو ہزار ارب کی کرپشن پکڑنے کا طریقہ
اخباری اطلاع کے مطابق نیب نے دو ہزار ارب سالانہ کی کرپشن پکڑنے کا طریقہ تجویز کردیا ہے جس میں درجن بھر سے زائد تجاویز پیش کی گئی ہیں جن کے ذریعے صرف ٹیکس چوری کی مد میں فیڈرل بورڈ آف ریونیو کی اوورہالنگ کر کے خُردبُرد ہونے والی یہ رقم بچائی جا سکتی ہے۔ واضح رہے کہ یہ کرپشن صرف ٹیکس چوری کے حوالے سے ہے جبکہ کمیشن‘ کک بیکس‘ بجلی چوری اور ناجائز سبسڈی وغیرہ کی مدات اس کے علاوہ ہیں۔ سردست صرف اسی رقم پر غور کیا جائے تو ہوش گم کرنے کے لیے یہی کافی ہے۔ سپریم کورٹ اور ہائیکورٹس کے علاوہ خود صدرِ مملکت اس کرپشن کے خلاف دہائی دیتے رہتے ہیں جو ملک کو گھن کی طرح چاٹ رہی ہے۔ سوال یہ نہیں کہ اس ناسور کے قلع قمع کے لیے پہلے سے کوئی قانون ہے یا نہیں بلکہ ہر طرح کے انسدادی قوانین موجود ہونے کے باوجود یہ کاروبار انتہائی دیدہ دلیری کے ساتھ جاری ہے۔ ان تجاویز کو عملی جامہ پہنانا تو دور کی بات ہے‘ ان پر توجہ دینا ہی ایک دیوانے کے خواب سے زیادہ کی حیثیت نہیں رکھتا کیونکہ جنہوں نے ان تجاویز کو تشکیل دے کر ان پر عملدرآمد کرنا ہے وہ خود کرپشن کے سرچشمہ اور منبع کی حیثیت رکھتے ہیں۔ اس لیے چوروں سے یہ امید رکھنا کہ وہ چوروں کے ہاتھ کاٹیں گے‘ سے زیادہ بڑی حماقت اور کیا ہو سکتی ہے۔ نیز جن حکومتوں کی بنیاد ہی کرپشن پر ہو‘ وہ اس کے خاتمے میں کس حد تک دلچسپی رکھ سکتی ہیں۔ اس لیے نیب والے اپنا معمول کا کام ہی ثابت قدمی سے جاری رکھ سکیں تو وہ بھی بسا غنیمت ہے‘ مثلاً بڑی مچھلیوں پر ہاتھ ڈالنے کی جو خبریں آئے روز سنائی جاتی ہیں انہیں کسی منطقی انجام تک پہنچتے کم ہی دیکھا گیا ہے کیونکہ اوّل تو ایسے مقدمات اور انکوائریاں ابتداء ہی میں غتربود ہو جاتی ہیں‘ اور اگر نیب کا کوئی سرپھرا سربراہ راست روی سے آگے بڑھنے کی کوشش کرے بھی تو اس کا جو حشر کیا جاتا ہے‘ طارق ملک سمیت اس کی ایک سے زیادہ روشن مثالیں موجود ہیں۔
الیکشن این اے 246
جب تک یہ سطور شائع ہوں گی‘ الیکشن این اے 246 کے نتائج سامنے آ چکے ہوں گے جن میں ایم کیو ایم‘ پی ٹی آئی اور جماعت اسلامی بھرپور حصہ لے رہی تھیں جبکہ عمران خان کے بلند بانگ دعووں کی نسبت جماعت اسلامی کا یہ کہنا کہ کراچی کو ایسا کراچی بنانا چاہتے ہیں جس میں الطاف حسین اطمینان سے واپس آ سکیں‘ زیادہ معقول اور مناسب تھا۔ اگرچہ بسیار کوشش کے باوجود نہ تو جماعت اسلامی پی ٹی آئی کے حق میں دستبردار ہونے کو تیار ہوئی اور نہ خود پی ٹی آئی نے پسپائی اختیار کی۔ دراصل فتح و شکست سے قطع نظر دونوں جماعتیں وہاں اپنی اپنی طاقت کا اندازہ لگانا چاہتی تھیں اور یہ کہ ایم کیو ایم پر مشکلات کے دنوں میں یہ دونوں اس کے کتنے ووٹ توڑ سکتی ہیں۔ یعنی یہ دونوں جماعتیں جتنے بھی ووٹ حاصل کریں گی‘ اجتماعی طور پر وہ ایم کیو ایم ہی کے توڑے ہوئے ووٹ ہوں گے۔ اگرچہ حالیہ برسوں میں ایک تو پی ٹی آئی نے کراچی میں ایک قابلِ ذکر گنجائش اپنے لیے پیدا کر لی ہے اور جماعت اسلامی بھی وہاں ایک سیاسی حیثیت کا دعویٰ رکھتی ہے بلکہ اسی حلقہ سے ایک آدھ
بار کامیاب بھی ہوتی رہی ہے اور مصطفی کمال کی میئر شپ کے زمانے میں اس نے وہاں کام بھی کر کے دکھایا ہے۔ علاوہ ازیں اس نتیجے سے ایم کیو ایم کو بھی نئے سرے سے اپنی صف بندی پر توجہ دینے کا موقعہ میسر آئے گا۔
حکومت کو زیادہ ڈھیل نہ دی جائے!
موجودہ حکومت نے ملکی معاملات میں عسکری حلقوں کو جو غیر معمولی سپیس دے رکھی ہے‘ ایک تو ایک طبقے کی طرف سے اس پر اصولی اعتراض اور تحفظات بالکل بجا ہیں اور اس کے مثبت نتائج برآمد ہونے کے باوجود اس سے سو فیصد اتفاق نہیں کیا جا سکتا۔ دوسرا جس سب سے بڑے نقصان کا خدشہ ہے وہ یہ ہے کہ حکومت اپنے ان کاموں پر زیادہ سہولت کے ساتھ توجہ دینے کے قابل ہو جائے گی جن کی وجہ سے وہ روزِ اول سے بدنام چلی آ رہی ہے بلکہ اس سے بھی بڑھ کر یہ خطرہ موجود ہے کہ یہ غیر معمولی باہمی تعاون اس بدنامِ زمانہ مفاہمت پر نہ منتج ہو جائے جو ساری خرابیوں کی جڑ کی حیثیت اختیار کر چکی ہے اور جو حکومت ہی نہیں‘ دونوں فریقوں کے لیے نقصان رساں ثابت ہوگی۔ بلکہ خود ملک پر اس کے ناقابل تلافی اثرات مرتب ہو سکتے ہیں۔ یعنی حکومت اگر بے لگام ہو جاتی ہے اور اپنے آپ کو کسی بھی خطرے سے آزاد محسوس کرنے لگتی ہے تو نہ صرف بدحکومتی کے نت نئے انداز سامنے آئیں گے بلکہ یہ اس کے لیے کرپشن اور زراندوزی کی کھلی چھٹی کے بھی مترادف ہوگا بلکہ یہی صورت حال پیدا ہو جائے گی کہ ع
گلیاں ہو جان سُنجیاں وچ مرزا یار پھرے
اس لیے بہتر یہی ہے کہ حکومت اپنے کام خود کرے اور اپنی ناکامی کی ذمہ دار بھی خود ہو۔
ریٹائرڈ لوگوں کی مشکلات
پنشنر طبقہ دوہری مصیبت سے دوچار ہے۔ ایک تو یہ کہ پنشن کی رقم اس قدر برائے نام ہوتی ہے کہ کمر توڑ مہنگائی کے اس زمانے میں ان کی گزراوقات انتہائی صبر آزما بلکہ ناممکن ہو چکی ہے کیونکہ عرصے سے پنشن کی رقم میں کوئی اضافہ دیکھنے میں نہیں آیا جس پر حکومت کو سارے کام چھوڑ کر توجہ دینی چاہیے اور ان بزرگوں کو اس کڑی آزمائش سے نکالنا چاہیے۔ دوسرے‘ پنشن کی وصولی کا مرحلہ اس قدر تکلیف دہ بنا دیا گیا ہے کہ جسے دیکھ کر رحم تو آتا ہی ہے‘ شرم بھی آتی ہے کہ ہمارے یہ ماں باپ سخت گرمی‘ دھوپ یا شدید سردی میں قطاروں میں لگے عبرت کی تصویر بنے نظر آتے ہیں جہاں ان کے لیے کوئی سہولت موجود نہیں ہوتی۔
آج کا مطلع
وہ ایک طرح سے اقرار کرنے آیا تھا
جو اتنی دور سے انکار کرنے آیا تھا