یہ دریا اتر نہ جائے کہیں!

آنکھوں کا بھی عجیب معاملہ اور عجیب تر مقدر ہے۔ اگر بالکل خشک ہوں تو طعنہ ملتے دیر نہیں لگتی کہ ان کا پانی مرگیا ہے۔ اور اگر ان میں آنسو بھرے ہوں تو لوگ تنقید کرتے نہیں تھکتے کہ یہ تو ذرا سی بات پر بھر آتی ہیں! آنکھیں خواہ کسی حالت میں ہوں، دنیا والے ان سے مطمئن نہیں ہوتے۔
آنکھوں اور آنسوؤں کا جنم جنم کا ساتھ ہے مگر دنیا کہاں مانتی ہے۔ اسے تو بات کا بتنگڑ بنانے کا شوق ہے اور یہ شوق وہ ہر حال میں پورا کرکے ہی سکون کا سانس لیتی ہے۔ دل پر ڈھائی جانے والی ہر قیامت آنکھوں کے ذریعے سے باہر نکلتی ہے۔ رونے کا فلسفہ یہ ہے کہ دل پر جو بھی بوجھ ہے وہ اتر جائے یا اس میں اتنی کمی واقع ہوجائے کہ سکون کا سانس لینا ممکن ہو۔ کسی بھی صورت حال یا حالات کے جبر کو اگر جھیلنے میں کامیابی نصیب ہو یعنی آنکھوں میں آنسو کی رمق تک نہ پیدا نہ ہو تو سمجھ لیجیے بندے کی شامت آگئی۔ سب سے پہلے تو یہ طعنہ ملتا ہے کہ سینے میں دل نہیں پتھر ہے جبھی تو آنکھوں میں آنسوؤں کا نام و نشان نہیں۔ اور اگر کوئی حالات کے جبر سے پگھل جائے یعنی آنکھوں سے آنسو چھلکیں تو جھٹ فرمان جاری کردیا جاتا ہے کہ آنسو تو کمزوری کی علامت اور ثبوت ہیں۔ آنکھیں کریں تو کیا کریں اور آنسو جائیں تو کہاں جائیں؟ ع
ترے آزاد بندوں کی نہ یہ دنیا نہ وہ دنیا
بہت سی قومی پالیسیوں کی طرح پاکستان جیسے معاشروں میں آج تک یہ بھی طے نہیں کیا جاسکا کہ آنسو طاقت ہیں یا کمزوری اور رونا کمزوری کی علامت ہے یا احساس کی پختگی کا ثبوت! خوشی کے موقع پر آنکھیں چھلک جائیں تو لوگ داد دینے والی نظروں سے دیکھتے ہیں۔ ذرا سوچیے، خوشی سے آنسوؤں کا کیا تعلق؟ ہاں، دل کو دھچکا لگا ہو، صدمہ پہنچا ہو تو آنکھوں کے جام سے صہبائِ اشک کا چھلک جانا ذرّہ بھر حیرت انگیز امر نہیں۔ مگر طرفہ تماشا ہے کہ غم کا پہاڑ ٹوٹنے پر بھی لوگ چاہتے یہ ہیں کہ بندے کی آنکھیں پرنم نہ ہوں! اب چاہے آنسوؤں کو روکنے کی کوشش میں بندے کی جان ہی پر کیوں نہ بن آئے۔
ایک بڑی پیچیدگی یہ ہے کہ کوئی اگر دل گرفتہ ہو تو کہاں جاکر روئے، کس طور دل کا غبار نکالے۔ لوگ کہیں بھی چین سے جینے نہیں رہنے دیتے۔ اگر گھر میں روئیے تو اہل خانہ تمسخر اڑاتے ہیں۔ دوستوں میں بیٹھ کر اشک بہائیے تو سب جذباتی اور نفسیاتی ہونے کا طعنہ دینے لگتے ہیں۔ اگر معبد میں جاکر اپنے معبود کے سامنے دل کا بوجھ ہلکا کرنے کی غرض سے کچھ دیر روئیے تو لوگ اس عمل کو اداکاری سمجھ کر محظوظ ہوتے ہیں۔ ان پیچیدگیوں کا حاصل یہ ہے کہ بہت سے لوگ شدید غم زدہ ہوکر بھی رونے سے گریز کرتے ہیں اور اپنے ہی دل پر قیامت ڈھاتے ہیں۔ ؎
کیا دل گرفتہ ہم تری محفل سے آئے ہیں
آنکھوں میں اشک بھی بڑی مشکل سے آئے ہیں
کسی بھی صورت حال میں پلکوں کا پرنم ہونا یا نہ ہونا ہر انسان کا خالص ذاتی معاملہ ہے۔ مگر لوگ پرائیویسی کے تمام پہلوؤں کو سمجھتے ہی کب ہیں؟ کسی کی پلکیں بھیگ جائیں تو تماشا اور اگر آنسوؤں کی جھڑی لگ جائے تو ڈراما! خالص ذاتی نوعیت کے معاملات کے لیے بھی اہل جہاں نے اپنی مرضی کے معیارات متعین کر رکھے ہیں!
ایسے میں دکھی دلوں کے لیے جاپان کا ایک ہوٹل پورے خلوص کے ساتھ سامنے آیا ہے۔ ٹوکیو کے متسوئی گارڈن یوتسویا میں رونے والوں کے لیے بھی کمرے مختص کئے گئے ہیں۔ جو دل کا بوجھ ہلکا کرنا چاہے وہ کمرا کرائے پر لے اور خوب روئے۔ آپ سوچیں گے رویا تو کسی بھی کمرے میں جاسکتا ہے، تو پھر اس ہوٹل میں کیا خاص بات ہے؟ یہ ہوٹل رونے والوں کو موزوں ترین ماحول فراہم کرتا ہے۔ کمرے میں آڈیو، وڈیو سسٹم لگے ہوئے ہیں۔ سسٹم میں ایسی فلمیں رکھی گئی ہیں جن کے دیکھنے سے انسان کا دل بھر آئے اور وہ بے اختیار ہوکر رونا شروع کردے۔ المیہ گیت بھی سسٹم میں بھرے پڑے ہیں۔ یعنی بستر پر سیدھے لیٹ کر جسم کو ڈھیلا چھوڑ دیجیے، المیہ گیت سنتے جائیے اور آنسو بہاتے جائیے! خصوصی ٹشو پیپرز بھی رکھے گئے ہیں تاکہ آپ کو اپنے قیمتی آنسو پونچھنے میں دشواری کا سامنا نہ کرنا پڑے۔ میک اپ کو ڈھنگ سے ڈیلیٹ کرنے کا سامان بھی کمرے ہی میں دستیاب ہے تاکہ رونے سے میک اپ خراب ہو نہ میک اپ کے ہوتے ہوئے آنسوؤں کی وقعت میں کمی واقع ہو۔
قابلِ ذکر بات یہ ہے کہ رونے کے لیے مختص یہ کمرے عمومی طور پر خواتین کے لیے ہے۔ خواتین ہی آتی ہیں، کمرا بک کراتی ہیں، تنہائی میں جی بھر کے روتی ہیں اور دل کا سارا بوجھ ٹشو پیپرز کے حوالے کر جاتی ہیں!
ہم سمجھ نہیں پائے کہ آنسو بہانے کی خاطر بنائے گئے کمرے صرف خواتین کے لیے کیوں مختص ہیں۔ یہ کیوں فرض کرلیا گیا ہے کہ رونے پر صرف خواتین کا اجارہ ہے یا رونا صرف خواتین کو آتا ہے؟ دل تو مردوں کا بھی بھر آتا ہے اور آنکھیں تو ان کی بھی چھلکنے کو بے تاب رہتی ہیں مگر وہ بے چارے مجبور ہیں کہ سب کے سامنے رو بھی نہیں سکتے۔ چار آنسو کیا بہہ نکلیں، لوگ طنز و تشنیع کے تودے لڑھکانا شروع کردیتے ہیں۔ شعراء نے بھی ایسی باتیں کہی ہیں کہ بے چارے مرد سرعام آنسو بہانے سے گریز کرتے ہیں۔ مثلاً احمد ندیمؔ قاسمی فرماتے ہیں ؎
چھپ چھپ کے روؤں اور سرِ انجمن ہنسوں
مجھ کو یہ مشورہ مرے درد آشنا کا تھا!
یعنی دل میں آنسو بھرے بھی ہوں تو آنکھوں تک آنے سے روکیے ورنہ دنیا والے کیا کہیں گے؟ یہ کیا بات ہوئی؟ دوسری طرف احمد فرازؔ جیسے شعراء نے صاف کہا ہے کہ جو کچھ دل میں ہے وہ آنسوؤں کے ذریعے بہا ڈالو ورنہ جان پر بن آئے گی۔ ؎
ضبط لازم ہے مگر دکھ ہے قیامت کا فرازؔ
ظالم اب کے بھی نہ روئے گا تو مر جائے گا!
رونے کے معاملے میں مرد بہت حد تک ع
''رویم‘‘ مشکل، وگر ''نرویم‘‘ مشکل
کے مرحلے میں پھنس کر رہ گئے ہیں۔ خواتین رونا بھی روتی رہتی ہیں اور رو بھی لیتی ہیں۔ مرد کی آنکھ سے دو آنسو بھی ٹپک جائیں تو قیامت آجاتی ہے، ساری کی ساری ''شانِ مرداں‘‘ داؤ پر لگ جاتی ہے! فلم 'مقدر کا سکندر‘ کا یہ گانا تو سب نے سُن رکھا ہوگا:
روتے ہوئے آتے ہیں سب، ہنستا ہوا جو جائے گا
وہ مقدر کا سکندر جانِ من کہلائے گا!
یعنی مرد کے لیے ہر جگہ ایک ہی آپشن بچا ہے، یہ کہ دل و نظر پر قیامت ہی کیوں نہ گزر جائے اسے آنکھوں کو پرنم ہونے سے بچاتے ہوئے ہونٹوں پر ہنسی سجانی ہے۔ یہ امتیازی رویّہ ہے۔ مرد آخر کب تک خواتین کے لیے ٹشو پیپر کا اہتمام کرنے تک محدود رہیں گے؟ سکون سے مزیّن چند ایک گوشے ایسے بھی ہونے چاہئیں جہاں مرد اپنے روکے ہوئے آنسو آسانی سے بہاسکیں۔ آخر تک کب تک صرف انہی کے لیے رویا جائے گا! انہیں بھی رونے اور دل کا بوجھ ہلکا کرنے کا حق ملنا چاہیے۔ اور ان کے آنسوؤں کو کمزوری کی علامت سمجھنے کا رجحان اب ختم ہونا چاہیے۔
مرد ہوکر بھی ناصرؔ کاظمی نے کیا خوب مشورہ دیا ہے ؎
آؤ کچھ دیر رو ہی لیں ناصرؔ
پھر یہ دریا اتر نہ جائے کہیں!
آج تک یہی ہوتا آیا ہے کہ دریا چڑھا ہوا ہو تو خواتین کچھ دیر روکر کنارے تک پہنچ جاتی ہیں اور مرد اپنی ''شوکتِ مردانہ‘‘ کو تنقید سے بچانے کے لیے آنکھ میں آئے ہوئے آنسو دل پر بہاکر مزید پیچیدگیوں کو گلے لگالیتے ہیں۔ ہر معاملے کی طرح اس معاملے میں بھی تبدیلی کا وقت آگیا ہے۔ دنیا بھر کے مردوں کو ہمارا مشورہ ہے کہ احمد فرازؔ اور ناصرؔ کاظمی کے مشورے پر عمل کرکے دل اور آنکھوں کے لیے سکون کا سامان کریں۔ ایک ذرا سا رو لینے سے مرد کی شان کچھ گھٹ نہیں جاتی۔