زمینی حقیقت

اس میں کیا شک ہے کہ جڑواں شہروں میں چلائی جانے والی میٹرو بس ریاست کے اثاثوں میں ایک قابلِ قدر اضافہ ہے۔ تنصیب اور تعمیر جدید ترین انداز میں کی گئی ہے۔ سٹاپ (یا سٹیشن) خوبصورت بنائے گئے ہیں۔ اس سے پہلے جو کاوشیں یا تجربے‘ نجی شعبے نے یہاں کیے‘ ان کا مقابلہ میٹرو سے نہیں کیا جا سکتا اس لیے کہ معیار اور سکیل دونوں یکسر مختلف ہیں۔ آمدورفت کی سہولت کے علاوہ‘ اس جدید ترین ذریعے کا ایک بڑا فائدہ یہ بھی ہوگا کہ عوام کی تربیت ہوگی۔ سوک سینس میں اضافہ ہوگا۔ خودکار دروازوں سے‘ وقت کی پابندی سے اور کئی جدید پہلوئوں سے تعارف ہوگا۔ کیا خبر یہ تعارف یہ تربیت‘ آئندہ کسی ایسے ذریعۂ آمدورفت میں کام آئے جو قسامِ ازل نے لکھ رکھا ہے اور ابھی ہمارے بخت میں در نہیں آیا!

ایک بہت اہم سوال جو اس علاقے کے عوام پوچھنا چاہتے ہیں یہ ہے کہ کیا یہ خوبصورت اور جدید ترین سہولت اُن لوگوں کو بھی مہیا کی جائے گی جو دارالحکومت میں آنے کے لیے صدر اور مری روڈ کا راستہ استعمال نہیں کرتے؟ اس وقت وفاقی دارالحکومت میں آنے کے لیے پانچ روٹ استعمال ہو رہے ہیں۔ سب سے بڑا‘ جس پر سب سے زیادہ مسافر سفر کرتے ہیں‘ ایکسپریس روڈ کا روٹ ہے۔ ایکسپریس وے روات سے شروع ہوتی ہے اور فیض آباد فلائی اوور کے پاس جا کر‘ دوسری شاہراہوں سے مل جاتی ہے۔ یہ کہنا مبالغہ نہ ہوگا کہ اسلام آباد کا جسم ایکسپریس وے پر منتقل ہو چکا ہے اور پرانے اسلام آباد میں اب صرف سَر باقی رہ

گیا ہے۔ ایکسپریس وے کے دونوں طرف جس قدر لوگ آباد ہو چکے ہیں‘ غالباً پرانے (اور اصل) اسلام آباد میں اتنے نہیں۔ اس کی دو بڑی وجوہ ہیں۔ ان میں سے ایک دارالحکومت کے ترقیاتی ادارے کی ناکامی‘ نااہلی اور کرپشن ہے۔ عالم یہ ہے کہ پانی کا ہر گھر اپنا انتظام کر رہا ہے جس پر ایک وقت میں اڑھائی تین لاکھ روپے لگتے ہیں اور خدانخواستہ پانی نہ نکلے تو یہ خرچ دوبارہ کرنا پڑتا ہے۔ کوڑے کرکٹ کے جا بجا ڈھیر دکھائی دیتے ہیں۔ فوڈ پارک اور میلوڈی مارکیٹ میں‘ جو مرکزی جگہ ہے‘ جانا ہو تو غلاظت کے انبار دیکھ کر ابکائی آتی ہے۔ کورنگ دریا‘ جو راول جھیل میں گرتا ہے جس سے بیس لاکھ افراد پانی حاصل کرتے ہیں‘ آلودگی کا جہنم بن چکا ہے جس میں غلاظتیں بہہ رہی ہیں۔ سکیورٹی کا یہ عالم ہے کہ ہر سیکٹر کے لیے ڈاکوئوں کے الگ گروہ ہیں۔ گاڑیوں کی چوری کا گراف بھیانک بلندی کو چُھو رہا ہے۔ ہزاروں نجی پہریدار پولیس کی نااہلی کا جیتا جاگتا ثبوت ہیں۔ اس کے باوجود چیف کمشنر ہے یا ترقیاتی ادارے کا سربراہ‘ کسی کے کان پر جوں نہیں رینگتی۔ ایئرکنڈیشنڈ دفتروں میں افسریاں ٹھاٹھ سے چل رہی ہیں۔ زمیں جنبد‘ نہ جنبد گل محمد۔ بھائی گل محمد کے اس ناقابل یقین جمود سے تنگ آ کر خاندان کے خاندان پرانے اسلام آباد کو چھوڑ کر بحریہ اور ڈی ایچ اے کا رُخ کر رہے ہیں اور زبانِ حال سے حافظ شیرازی کا یہ شعر پڑھ رہے ہیں ؎

ما آزمودہ ایم درین شہر بختِ خویش

بیرون کشید باید ازین ورطہ رختِ خویش

یا دوسرے لفظوں میں ؎

جبیں سے بخت آخر اڑ گیا یہ کہہ کے اظہارؔ

یہاں اب ختم میرا آب و دانہ ہو رہا ہے

بحریہ کے چھ فیز ایکسپریس وے پر ہیں۔ عسکری کالونی بھی یہیں ہے۔ یہاں کا معیارِ زندگی‘ سکیورٹی‘ صفائی‘ پانی کی بہم رسانی‘ مساجد کا نظم و نسق‘ سب کچھ یوں سمجھیے کہ اگر پرانے اسلام آباد میں دس ہے تو ان جدید آبادیوں میں ایک سو دس ہے۔ ایکسپریس وے پر ہی پی ڈبلیو ڈی‘ نیول اینکریج‘ کورنگ ٹائون‘ پاکستان ٹائون‘ پولیس فائونڈیشن‘ میڈیا ٹائون‘ گلبرگ اور کئی اور آبادیاں قائم ہیں۔ جہلم تک سے لوگ روزانہ دارالحکومت کا سفر کرتے ہیں اور ایکسپریس وے اُن کا روٹ ہے۔ سہالہ‘ کہوٹہ‘ ہمک‘ کاک‘ روات‘ مندرہ‘ گوجر خان‘ دینہ‘ منگلہ‘ میّہ کسوال‘ ڈومیلی اور بے شمار دوسری بستیوں کے رہنے والے ایکسپریس وے ہی کے راستے دارالحکومت آتے ہیں اور شام کو واپس جاتے ہیں۔ دوسرا بڑا روٹ وہی ہے جس پر میٹرو بس چلائی گئی ہے یعنی صدر اور مری روڈ۔ یہ ٹنچ بھاٹہ‘ دھیال‘ صدر اور مری روڈ کے دونوں کناروں پر آباد گنجان آبادیوں کی ضروریات پوری کرتا ہے۔ تیسرا روٹ ترنول اور کشمیر ہائی وے ہے جو ایبٹ آباد‘ ہری پور‘ حسن ابدال‘ واہ‘ اٹک‘ فتح جنگ‘ ٹیکسلا اور سرائے خربوزہ کے مسافروں کے زیر استعمال ہے۔ یہ مسافر ترنول سے کشمیر ہائی وے پر چڑھتے ہیں۔ انہیں میٹرو بس اس لیے وارا نہیں کھاتی کہ جتنی دیر میں یہ صدر پہنچیں گے‘ اتنی دیر میں کشمیر ہائی وے کے ذریعے اسلام آباد پہنچ سکتے ہیں۔ چوتھا روٹ آئی جے پی روڈ ہے جو پیر ودھائی کے اڈے پر اترے ہوئے ہزاروں مسافروں کو اسلام آباد لاتا ہے۔ اس روٹ کو استعمال کرنے والے‘ فیض آباد پہنچ کر میٹرو پر سوار ہو سکتے ہیں۔ پانچواں بڑا روٹ بارہ کہو سے گزرنے والی شاہراہ ہے جس پر مری اور اسلام آباد کے درمیان کثیر تعداد میں آباد قریوں کے عوام دارالحکومت آتے جاتے ہیں۔

اب زمینی حقیقت یہ ہے کہ میٹرو بس پانچ روٹوں میں سے صرف ایک روٹ پر چل رہی ہے۔ جیسا کہ تفصیل بیان کی گئی ہے‘ گنجان ترین روٹ ایکسپریس وے ہے جسے میٹرو سے کوئی علاقہ نہیں۔ اس روٹ کی بے مائگی کا یہ عالم ہے کہ گھنٹوں نہیں بلکہ پہروں ٹریفک رکی رہتی ہے۔ اربابِ اختیار کی ''عقل مندی‘‘ کا یہ عالم ہے کہ ایئرپورٹ چوک پر ایک انڈر پاس یا فلائی اوور تک نہیں بنایا گیا۔ اس چوک سے روات تک شاہراہ ازکار رفتہ ہے اور اذیت کا سبب ہے۔ ایکسپریس وے پر صرف دو انڈر پاس ہی بن جاتے تو لاکھوں عوام سکھ کا سانس لے سکتے تھے۔ اسی طرح بارہ کہو کے گنجان‘ بے ہنگم‘ بازار پر فلائی اوور کی شدید ضرورت ہے۔ جب وزیراعظم یا کوئی اور حکمران عازمِ مری ہوتا ہے تو ٹریفک روک دی جاتی ہے اور عوام شاہراہ کے کناروں پر عملی طور پر قید کر دیے جاتے ہیں‘ اس لیے حکمرانوں کو اُس تکلیف کا احساس نہیں جو مسافروں کو دن میں کئی بار پیش آتی ہے!

یہاں ایک بار پھر وضاحت کی جاتی ہے کہ میٹرو بس جس روٹ پر بھی چلائی گئی ہے‘ قابلِ ستائش ہے۔ کہا جا رہا ہے کہ اخراجات زیادہ اٹھتے ہیں۔ اس پہلو کو بھی یہاں زیر بحث نہیں لایا جا رہا کہ یہ الگ منطقہ ہے اور کالم میں تمام منطقوں کی گنجائش نہیں ہوتی۔

فرض کیجیے کل لاگت چالیس ارب روپے آئی ہے تو اس حساب سے پانچ روٹوں پر میٹرو چلائی جائے تو کم از کم لاگت دو سو ارب بنتی ہے۔ یوں آخری تجزیے میں ہم اپنے آپ کو بند گلی میں پاتے ہیں۔ اس الجھن کا حل کیا ہے؟ اس بارے میں ہم اپنی معروضات اگلی نشست میں پیش کریں گے۔