جانے دو…آنے دو

پہاڑی علاقے کے ٹرک کنڈیکٹر اُکھڑی ہوئی تنگ اور تباہ کن سڑک پر ڈرائیور سے یوٹرن مزے سے کرواتے ہیں۔ یو ٹرن کرنے والے ڈرائیورکو پیچھے نہ کھائی نظر آتی ہے نہ آگے کھڈا۔کنڈیکٹر پہاڑی زبان میں جو آوازلگاتا ہے وہ اب ہندکو، پہاڑی، شینا اور کشمیری زبانوں میں محاورہ بن چکا جس کا ترجمہ یہ ہے:

''جانے دو ، جانے دو۔ لگے گی یا گِرے گی تو آواز آئے گی‘‘

اس وقت ملک کی سب سے بڑی جمہوری تاریخ رکھنے والی پاکستان پیپلز پارٹی کے کنڈیکٹر بھی یہی کر رہے ہیں۔ آپ یقین کر لیں کیونکہ جو کچھ میں کہنے لگا ہوں ناقابلِ یقین ہے۔پارٹی کے ایک اہم عہدیدار کو جِسے ضمیر کی تجارت''عرف جوڑ توڑ‘‘کے سوا کچھ نہیں آتا،ایسی ہی شکایت پہنچی تو اس نے کہا جانے دو جانے دو، جو کل جاتے ہیں انہیں آج جانے دو۔ ملک میں جب سے دایاں بازو بمقابلہ دایاں بازو، مساوی دایاں بازو، جمع دایاں بازو، منفی ہے دایاں بازوکی سیاست شروع ہوئی کچھ لوگ سخت فکر مند ہیں، قومی سیاست کو یہ کیا ہوگیا ہے۔ ان بیوقوفوں کی فہرست میں آپ مجھے بھی شامل سمجھیں۔

اب اگلا سوال آپ ضرور پوچھیں گے کہ عقلمند کون ہے؟ اس کا جواب یہ ہے کہ عقلمندوں کی کئی قسمیں ہیں، لیکن ان کا تعارف کرانے سے پہلے بیوقوفوں کا نظریۂ سیاست سن لیں اور ساتھ ساتھ عقل والوںنے اس نظریے کی جو تفسیر یا تشریح کر رکھی ہے وہ بھی دیکھتے چلیں۔

نمبر1۔ بیوقوف کہتے ہیں طاقت کا سر چشمہ عوام۔ یہی پیپلز پارٹی کا تاسیسی نعرہ بھی ہے۔ سرکاری عقلمند عرف آراو+الیکشن کمیشن+عقلمند سیاست دان جوزف سٹالن کے الفاط میں اس کی تفسیریوں کرتے ہیں:'' طاقت کا سر چشمہ ووٹ ڈالنے والے نہیں بلکہ طاقت کا اصل سر چشمہ ووٹوں کی گنتی کرنے والے ہیں‘‘۔

نمبر2 ۔ بیوقوفوں کا خیال ہے ان کی زندگی میں''خلقِ خدا‘‘ راج کرے گی۔ میں بھی یہی کہتا ہوں کہ انقلاب وہی ہے جو میرے زمانے کے لوگوں کی زندگیوں میں آئے اور جس کے بارے میں فیض نے کہا تھا ہم دیکھیں گے۔ عقلمندوں کی رائے ہے کہ پہلے جمہوریت کو مضبوط کرو جس میں بھائی جان، بھابھی، بھتیجا، بھتیجی سارے اکاموڈیٹ ہوجاتے ہیں جبکہ سالے، سالیوں کی نسلیں سالہا سال اور صدیوں تک جمہوریت کا پھل فروٹ کھاتے رہتے ہیں۔ صدی آدھی سے زیادہ گزرگئی پاکستان میں انہی کا تجربہ کامیاب ہے۔

دانشمند طبقہ ایک اور بھی ہے۔ ان کے بڑوں پر علم ''القا‘‘ہوا، فیض کی بارش، نجات کے طریقے اور پرائز بانڈ سے لے کر محبوب آپ کے قدموں تک کے سارے فارمولے وہیںاُترے۔ یہ خوش بخت دانشمند کبھی علّامہ ،کبھی شیخ،کبھی مولانا ،کبھی بادشاہ ،کبھی مفتی،کبھی شاہ زادہ اور نجانے کیا کیا القاب رکھ سکتے ہیں۔ ان میں سے زیادہ سیاسی وہ تھے جنہیں ایک غیر مسلم جج کی دریافت کردہ شریعت بھا گئی۔ پھر One and only یعنی یکہ و تنہا یحییٰ خان کی قیادت میں اس کا نفاذ شروع ہوا۔ 5 جولائی والے ضیاء الحق سے بھی ان کا جی نہ بھر سکا؛ چنانچہ مشرف کو مضبوط کر کے جمہوریت کا بول بالا کر دیا۔آدھے اپوزیشن میں آدھے حکومت میں۔ وکٹ کی دونوں طرف نوسال سے بھی زیادہ عرصہ چوکے کم لگائے، چھکّے زیادہ ما ر دیے۔ ان کے مقابلے میں بیوقوف ٹولے کی نشاندہی شاعرِ مشرق نے یوں کی:

ہم کو تو میّسر نہیں مٹی کا دِیا بھی

گھر پِیر کا بجلی کے چراغوں سے ہے روشن

شہری ہو، دہاتی ہو، مسلمان ہے سادہ

مانندِ بُتاں پُجتے ہیں کعبے کے برہمن

نذرانہ نہیں، سُود ہے پِیرانِ حرم کا

ہر خرقۂ سالوس کے اندر ہے مہاجن

میراث میں آئی ہے انہیں مسندِ ارشاد

زاغوں کے تصّرف میں عقابوں کے نشیمن!

دوسری جانب وہ ہیں جو آنے والوں کو ملتان سے آئی ہوئی آموں کی پیٹی کی''بِلٹی‘‘ سمجھ کر وصول کررہے ہیں۔ وصولیاں ڈالنے والوں کو معلوم ہے ان کے جیالے، طاقتور بھی ہیں اور بیدار بھی۔ جیسے پہلے آنے والے کسی کو ٹکٹ نہیں ملا ایسے ہی اب آنے والے پارلیمانی بورڈ کے باہر بیٹھ کر گایا کریں گے:

دل کے ارماں آنسوؤں میں بہہ گئے

ہم دَغا کر کے بھی تنہا رہ گئے

زندہ اور متحرک سیاسی جماعت میں ہر جگہ کئی کئی گروپ ہوتے ہیں جو الیکشن دوسری پارٹیوں کے خلاف بعد میں لڑتے ہیں لیکن آپس میں ہر روز۔ دوسری پارٹیاں چھوڑ کر آنے والوں کو یہ کارکن دو ناموں سے پکارتے ہیں۔۔۔۔۔ ابابیل اور سکائی لیب۔ ان ناموں میں اشارہ یہ ہے کہ اوپر سے آئے ہیں۔ایسے کسی سکائی لیب یا ابابیل کو ٹکٹ مل بھی جائے تو ساری پارٹی باہمی جھگڑے چھوڑ چھاڑ کر سکائی لیب کے خلاف پنجے جھاڑکر ابابیل بن جاتی ہے۔ اپنے ہی ٹکٹ کی مخالفت کے لیے ایسے کارکنوں کی دلیل بہت مضبوط ہوتی ہے اور وہ یہ کہ ہم آپس میں نمٹ لیں گے باہر والے کو ہَرا دو۔ یہ ہمارے اوپر چڑھ بیٹھا تو پھر ہماری چھٹی پکّی ہے۔ مخالف پارٹی اس دفعہ جیت گئی توکوئی بات نہیں اگلے الیکشن میں اسے شکست دے دیںگے۔ آؤٹ سائیڈر نہ جیت پائے۔

وقت ، حالات ، ذاتی مفاد اور واقعات کمزور دل حضرات کے سیاست میں اِدھر اُدھرآنے جانے کی بڑی وجوہ ہوتی ہیں، لیکن ایک وجہ ان سے بھی بڑی ہے۔ یہ ہیں مرغانِ باد نما یعنی ایسے پرندے جو ہوا کا رُخ دیکھ کر پھڑ پھڑاتے ہیں۔ ان کی کل سیاسی کائنات ہر طرح کے حالات میںمال آنے دو جیالے جانے دو سے آگے نہیں نکلتی۔ ان کا ایمان یا مفاد ''تیرا ای آسرا‘‘ رہا ہے۔جو گُڈی لُٹ گروہ کا مطلب پورا نہ کر سکے اسے یہ کسبی کے بستر کی طرح بدل ڈالتے ہیں۔ مگر اس پالیسی کا نام انہوں نے''جوڑ توڑ‘‘ رکھا ہے۔

سیاست سیاست کی طرح چلتی ہے۔ سیاسی کارکنوں کے بغیرسیاست نہیں چل سکتی۔ تجارت تاجرانہ طریقے سے چلتی ہے صرف دلالوں کے سر پر نہیں۔ جس کا منشور جانے دو آنے دو والا ہووہ مِڈل مین توہو سکتا ہے راہ نماہر گز نہیں:

کوئی شُعلہ نوا اُٹھّے، کوئی درد آشنا نکلے

کبھی تو دامنِ صر صر سے بھی موجِ صبا نکلے

ستاروں کے نشیمن پر کمندیں پھینکنے والو

کبھی سوچا ہے تم اس دور میں پر کھا، تو کیا نکلے؟

بھیا نک ہو چکے ہیں رہزنوں کے خشمگیں چہرے

ضروری ہے کہ ان حالات میں اک رہنما نکلے