بے لاگ احتساب‘ بھر پور آپریشن

وزیر اعلیٰ سندھ سید قائم علی شاہ اپنی جگہ سچے ہیں ۔ کرپشن پر اب تک کسی نے پوچھا نہیں۔ نیب اور ایف آئی اے دھنیا پی کر سوتے رہے؛ حتیٰ کہ پیپلز پارٹی کی حکومت نے مرکز اور سندھ میں پانچ سال پورے کر لیے‘ اب اچانک رینجرز آپریشن سے حوصلہ پا کر نیب اور ایف آئی اے نے بھی سندھ پر چڑھائی کر دی ہے ۔گلہ بنتا تھا ‘جو شاہ جی نے وزیر اعظم سے کھل کر کیا۔

آپریشن ضرب عضب شروع ہوا تو سب سے زیادہ خوش پیپلز پارٹی‘ اے این پی اور ایم کیو ایم تھی۔ خیبر پختونخوا اور سندھ بالخصوص کراچی میں تحریک طالبان پاکستان اور دیگر عسکری تنظیموں نے اودھم مچا رکھا تھا‘ اس کا مقابلہ ان تنظیموں کے بس کی بات نہ تھی جنہیں پانچ سال تک جمہوریت کے ''فوائد وثمرات ‘‘سمیٹنے سے فرصت تھی نہ پولیس اور انتظامیہ میں مداخلت کے سوا کوئی کام۔ اس مصروفیت کا فائدہ اٹھا کر عسکریت پسند اور دہشت گرد ہر جگہ دندناتے پھر رہے تھے‘ کسی کی جان محفوظ تھی نہ مال اور نہ اولاد۔ کراچی میں تو روزانہ ایک ڈیڑھ درجن افراد ٹارگٹ کلنگ کا نشانہ بنتے اور جو شخص ملازمت‘کاروبار یا شاپنگ کے بعد بخیریت گھر پہنچ جاتا وہ کلمہ شکر ادا کرتا اور اہل خانہ کچھ نہ کچھ بانٹتے۔

آپریشن پر سب سے زیادہ داد و تحسین کے ڈونگرے برسانے والی جماعتوں کو مگر یہ علم نہ تھا کہ ان کی اپنی صفوں میںموجود‘ قانون کو مطلوب افرادبھی آپریشن کی زد میں آئیں گے۔ کہیں بھتہ خور اور ٹارگٹ کلر‘ کہیں معاشی دہشت گرد اور ان کے سہولت کار اور کہیںاسلحہ کے‘ سمگلر اور منشیات فروش۔ لوٹ مار کا بازار تین چار عشروں سے گرم ہے۔ سیاست کی آڑ میں جرم پروان چڑھا اور سنگین جرائم میں ملوث افراد پارلیمنٹ اور حکومت پر قابض ہو گئے مگر کسی نے تعرض تو خیر کیا کرنا تھا‘ اُلٹا حوصلہ افزائی کی۔ جمہوریت کا حسن سمجھا۔

قائم علی شاہ ہوں یا مفاہمتی سیاست کے دیگر کردار‘ بار بار حکمرانی کا مزہ چکھ چکے۔ مگر حکمرانی میں اس قدر مگن رہے کہ آج تک انہیں فوج کی ساخت و پر داخت پر غور کرنے کا موقع مل سکا‘ نہ فوج اور اس سے متعلقہ اداروں کے طریقہ کار کا۔

پاک فوج ملک کا واحد ادارہ ہے جہاں علاقے‘ صوبے‘ قومیت‘ زبان ‘ نسل‘ مسلک حتیٰ کہ مذہب کی بنا پر تعصّب کارفرما ہے‘ نہ اس کی آڑ میں کسی کو اپنے مخالفین سے بدلہ چکانے کی اجازت۔فوج اور اس سے متعلقہ ادارے کسی تفریق اور تعصب کی بنا پر کوئی کارروائی کر ہی نہیں سکتے کیونکہ کسی ایک زبان‘ نسل‘ علاقے یا مسلک سے تعلق رکھنے والے فرد یا گروہ کے خلاف امتیازی سلوک کی صورت میں یہ ادارے داخلی انتشار اور بے چینی کا شکار ہو سکتے ہیں۔ یہی متوازن اور غیر متعصبانہ رویہ ہی فوج اور اس کے متعلقہ ادارں میں نظم و ضبط‘ اتحاد و یکجہتی اور بہتر کارگزاری کی ضمانت ہے جس کا ادراک تعصب اور ذاتی پسند ناپسند کے غیر انسانی جذبے سے مغلوب سیاستدانوں کو نہیں ورنہ وہ فوج‘ رینجرز‘ ایف سی یا دیگر اداروں کے خلاف منفی پروپیگنڈے سے عوام میں اپنی ساکھ خراب نہ کرتے۔ شمالی وزیرستان آپریشن اور ضرب عضب کا یہ منطقی اور فطری تقاضا ہے کہ ملک کے دیگر حصوں میں دہشت گردی‘ تخریب کاری‘ ٹارگٹ کلنگ ‘ بھتہ خوری‘ اغوا برائے تاوان اور دیگر سنگین جرائم میں ملوث افراد اور گروہوں کے خلاف حتمی کارروائی کی جائے تاکہ کسی کو امتیازی سلوک کی شکائت ہو نہ جانبداری کی۔

ہمارے سیاسی گرگے یہ سمجھنے سے بھی قاصر ہیں کہ غربت‘ جہالت اور بے روزگاری نے دہشت گردوں کا کام آسان کیا ہے اور وہ مختلف علاقوں کے مضطرب ‘ بے چین‘ مایوس اور ناراض نوجوانوں کو ریاست کے خلاف اُکسانے اور سنگین جرائم کا راستہ دکھانے میں کامیاب رہے۔ پاکستان میں وسائل کی کمی نہیں۔ ریاست اپنے وسائل سے غربت‘ جہالت اور بیروزگاری کا خاتمہ کر سکتی ہے۔ مگر ہماری وسائل خور حکمران اشرافیہ نے سول انتظامیہ سے مل کر یہ سارے وسائل اپنے عیش و عشرت پر اڑائے یا بیرون ملک منتقل کر دیئے ۔سوئٹزر لینڈ میں پڑے دو سو ارب ڈالر اور دبئی‘ سپین‘ لندن‘ استنبول‘ کینیڈا وغیرہ میں اربوں ڈالر کی جائیدادیں اور کاروبار اسی لوٹ مار کا نتیجہ ہیں۔ فوج کو 1950ء کے عشرے سے اب تک اسی بنا پر بار بار آپریشن کی ضرورت پیش آتی ہے کہ ناانصافی‘ مایوسی ‘ بے چینی اور ناراضگی کا شکار کوئی نہ کوئی گروہ اور طبقہ کہیں نہ کہیں ریاست کے لیے درد سر بن جاتا ہے اور اس کا قلع قمع فوجی آپریشن کے بغیر ممکن نہیں رہتا۔

نیب اور ایف آئی اے کو سندھ میں کارروائیوں کی ضرورت اس لیے پیش آئی کہ یہاں حکومت اور ریاست کے ادارے وسیع پیمانے پر لوٹ مار میں ملوث ہیں۔ صدر آصف علی زرداری‘ مخدوم امین فہیم‘ مخدوم یوسف رضا گیلانی اور راجہ پرویز اشرف کے پیروکاروں نے یہاں وزارت‘ اسمبلی کی رکنیت اور سرکاری عہدوں کو کمائی کا ذریعہ بنا رکھا ہے۔ وزیروں کے گھروں سے اربوں روپے نقد اور ارکان اسمبلی کے گھروں سے اسلحہ برآمد ہوتا ہے۔ لانچیں پکڑی جاتی ہیں اور ایان علی کو سرکاری پروٹوکول ملتا ہے۔ اربوں روپے لوٹنے والے سرکاری افسران کو بھاگنے کی آزادی ہے۔ اب بھی کئی اعلیٰ افسرچھٹی کی درخواستیں لیے وزیر اعلیٰ ہائوس کے چکر لگا رہے ہیں۔ اگر وزیر اعلیٰ یہ چھٹیاں منظور کرنے لگیں تو سندھ سول سیکرٹریٹ کے علاوہ ہر محکمے کے اہم دفاتر میں صرف الّو بولتے نظر آئیں کیونکہ ہر منظور کاکا اب بھاگنے کے موڈ میں ہے۔

1988ء سے 2015ء تک ایک محدود وقفے کے سوا سندھ میں پیپلز پارٹی اور ایم کیو ایم کی حکومت رہی ہے۔ کرپشن‘ بھتہ خوری ‘ چائنہ کٹنگ اور اغوا برائے تاوان میں اضافہ ہوا اور رینجرز کے ہاتھ ثبوت لگے تو انہی کے خلاف‘ جو یہاں حکمران تھے یا ان کے فرنٹ مین اور گماشتے۔ رینجرزایف آئی اے اور نیب باز پرس بھی انہی مجرموں سے کرے گی۔ ''جنہاں کھادیاں گاجراں ڈھڈھ انہاں دے پیڑ‘‘۔ الطاف حسین‘ ڈاکٹر فاروق ستار‘ روئیں پیٹیں یا قائم علی شاہ بھری بزم میں گلہ کریں‘ آپریشن تو رکنے والا نہیں کیونکہ یہ پاکستان کی سلامتی ‘قوم کے مستقبل اور پاک فوج کی ساکھ کا معاملہ ہے۔ بندہ پوچھے کہ جب محکمہ پولیس ایک ارب روپے کے ناکارہ کیمرے خرید رہا تھا‘ جب وزیر روپوں اور ارکان اسمبلی اسلحے کے ڈھیر لگا رہے تھے اور پولیس میں نالائق‘ جرائم پیشہ اور دہشت گردوں کے ساتھی نذرانے لے کر بھرتی کئے جا رہے تھے اور ٹارگٹ کلنگ روز مرہ کا معمول تھا اس وقت تو آپ بولے نہیں‘ ان جرائم پیشہ افراد کا گھیرا تنگ ہواتو آپ شکوہ و شکائت پر اتر آئے ہیں۔ کیا جرائم کی سرپرستی اور لوٹ مار بھی حکمرانوں‘ ارکان اسمبلی اور ان کے چہیتوں کاجمہوری حق ہے اور قانونی اختیار کہ ان سے نیب پوچھے نہ ایف آئی اے چھاپہ مارے۔

لکھ چھوڑیے! نیب اور ایف آئی اے کچھ کرنے سے رہے‘جب تک این آر او سے مستفید ہونے والا ہر سیاسی لیڈر ‘ بیورو کریٹ اور جرائم پیشہ فرد قانون کے شکنجے میں جکڑانہیں جائیگا۔ چھوٹی مچھلیوں کے بجائے مگرمچھوں کی باری نہیں آئے گی اور پارلیمنٹ کو جرائم پیشہ عناصر سے پاک نہیں کیا جائے گا‘ دہشت گردی کا مکمل خاتمہ ممکن نہیں۔ اکاس بیل سے چھٹکارا اس وقت ملتا ہے جب اس کی جڑیں کاٹ کر جلا دی جائیں۔ یہ اکاس بیلیں محفوظ تو ان کی ٹہنیاں(بصورت دہشت گرد‘ را کے ایجنٹ‘ بھتہ خور‘ اغوا کار‘ قبضہ گروپ اور ٹارگٹ کلرز) کاٹنے سے کوئی خاص فرق نہیں پڑے گا‘ جس طرح ماضی کے آپریشنوں سے نہیں پڑا۔ فوج اور رینجرز کو غالباً اس کا احساس ہے مگر مفاہمتی سیاست کے نام پر چاروں صوبوں میں جرائم پیشہ عناصر کے سرپرستوں کو نہیں‘ ورنہ یہ آپریشن ایک سال تک جاری رہنے کے بعد بھی تشنگی کا شکار نہ ہوتا اور میاں صاحب ڈی جی رینجرز کے پیش کردہ حقائق کو نظر انداز کر کے‘ وزیر داخلہ کوقائم علی شاہ کے تحفظات دور کرنے کی ہدایت نہ فرماتے۔ پنجاب میں بھر پور آپریشن فاروق ستار اور قائم علی شاہ کے تحفظات دور کرنے کا معقول اور مناسب طریقہ ہے ۔تاکہ کسی کو امتیازی سلوک کا گلہ نہ ہو۔ شائد اسی بنا پر کچھ ہلچل ہوئی ہے مگر موثر‘ بھر پور اور تیز رفتار آپریشن کے بغیر چارہ نہیں۔