ختم نبوت ﷺ کی اہمیت

ستمبر کا پہلا عشرہ ہمارے ذہنوں میں عقیدہ ختم نبوت کی اہمیت کو اجاگرکرتا ہے۔ 7ستمبر1974ء کو پاکستان کی قومی اسمبلی نے عقیدہ ختم نبوت سے انحراف کی وجہ سے قادیانیوں کو دائرہ اسلام سے خارج قراردیا تھا۔ ختم نبوت سے انکارکرنے والے لوگ درحقیقت قرآن وسنت کے واضح دلائل کو نہیں مانتے۔ نبی کریم ﷺ اللہ کے آخری رسول ہیں۔ اللہ نے نبی آخرالزمان کو مشرق و مغرب، شمال و جنوب،کالوں اورگوروں، امیر و غریب اور قیامت تک آنے والے ہر انسان کی رہنمائی کے لیے مبعوث فرمایا اور سورہ اعراف کی آیت 158اور سورہ سبا کی آیت 28 میں واضح فرما دیا کہ رسول اللہﷺ جمیع انسانیت کے لیے اللہ کے پیغمبر ہیں اور تمام انسانیت کے لیے خوشخبری دینے والے اور ڈرانے والے بنا کر بھیجے گئے ہیں۔

مذکورہ آیات واضح کرتی ہیںکہ جمیع انسانیت کی ہدایت اور نگہبانی کے لیے اب کسی رسول اور نبی کی ضرورت نہیں،اس لیے کہ یہ فریضہ اللہ تعالیٰ جناب رسول اللہ ﷺ کو تفویض فرماچکے ہیں۔ اللہ تعالیٰ نے سورہ احزاب کی آیت 40 میں بھی واضح فرمادیا کہ'' محمد(ﷺ ) تم میں سے کسی مرد کے باپ نہیں لیکن اللہ کے رسول اور آخری نبی ہیں اور اللہ ہر چیزکو جاننے والا ہے‘‘۔ یعنی جس طرح وہ کسی مردکے باپ نہیں،اسی طرح آپﷺ کے بعدکوئی نبی بھی نہیں ہوسکتا۔ ختم نبوت کا انکارکرنے والے گروہ نے آیت میں''خاتم النبیین‘‘ کا ترجمہ نبیوںکی مہرکرکے لوگوں کو دھوکہ دینے کی کوشش کی حالانکہ ہرذی شعوراس بات سے اچھی طرح واقف ہے کہ کسی چیز پر مہر اس کی تکمیل کے بعد ہی لگائی جاتی ہے۔ جب کسی پیمانے یا دستاویز کو سیل بند کردیا جاتا ہے تو مہرکوتوڑے بغیراس میںکسی چیزکو داخل نہیں کیا جاسکتا۔ جب نامکمل چیز پر مہر نہیں لگ سکتی اور مہر لگ جانے کے بعد اس میںکوئی چیز داخل نہیں ہوسکتی تو یہ بات بھی بالکل واضح ہوگئی کہ رسول اللہ ﷺ کے آنے کے بعد نبوت کا دروازہ بند ہوگیا ہے اور آپ ؐکی آمدکے بعدکوئی دوسرا نبی نہیں ہوسکتا۔ یہی گروہ حضرت عیسیٰ علیہ السلام کی دوبارہ دنیا میں تشریف آوری کو بنیاد بناکر لوگوںکو دھوکہ دینے کی کوشش کرتا ہے کہ اگرحضرت رسول اللہﷺکے بعد کوئی نبی نہیں ہوسکتا تو حضرت عیسیٰ علیہ السلام کیونکرآئیںگے۔ انہیں معلوم ہونا چاہیے کہ حضرت عیسیٰ علیہ السلام کو نبوت حضرت رسو ل اللہ ﷺ سے پہلے ملی اور آپ کے زندہ آسمانوں کی طرف اٹھائے جانے کے بعد اس دنیا میں دوبارہ نازل ہونے سے حضرت رسول اللہ ﷺ کے بعدکسی نئے شخص کو نبوت ملنے کا ثبوت نہیں ملتا۔ جب نبوت کا دروازہ بند ہوا تو اس سے پہلے حضرت عیسیٰ علیہ السلام نبی بن چکے تھے۔ نبوت کا دروازہ بند ہوجانے کے بعدکسی کو نبوت ملنے کی کوئی گنجائش باقی نہیں رہی۔

جہاں قرآن مجید نے مسئلہ ختم نبوت کو واضح کردیا، وہیں احادیث مبارکہ سے بھی اس مسئلے کی خوب وضاحت ہوتی ہے۔ بعض احادیث درج ذیل ہیں :

صحیح بخاری و صحیح مسلم ، مسند احمد بن حنبل اور سنن الکبریٰ للبیہقی میںحضرت ابو ہریرہ رضی اللہ عنہ سے روایت ہے کہ رسول اللہ ﷺ نے فرمایا میری اور سابق نبیوںکی مثال ایک شخص کی ہے جس نے ایک خوب صورت گھر بنایا مگر ایک کونے میں ایک اینٹ کی جگہ خالی چھو ڑ دی۔ لوگ اس گھرکو دیکھ کراس کی خوبصورتی پر تعجب کرتے ہیں مگر کہتے ہیں کہ کیا خوب ہو اگر اینٹ اپنی جگہ پر لگا دی جائے، پس میں وہ اینٹ ہوں اور میں آخری نبی ہوں، صلی اللہ علیہ وآلہ وسلم۔ صحیح بخاری اور صحیح مسلم میںحضرت ابوہریرہ رضی اللہ عنہ سے روایت ہے کہ قیامت اس وقت تک نہیں آئے گی جب تک تیس بڑے جھوٹے نہیں آئیں گے اور ان میں سے ہر ایک کا یہ دعویٰ ہوگاکو وہ اللہ کا رسول ہے۔ صحیح بخاری میں حضرت سعد ؓ سے روایت ہے کہ رسول اللہ ﷺ جب جنگ تبوک کے لیے نکلے تو آپ ﷺ نے حضرت علیؓ کو مدینہ میں اپنانائب مقررکیا۔ حضرت علی ؓ نے عرض کی کہ کیا آپ مجھے بچوں اور عورتوں کے پاس چھوڑکرجانا چاہتے ہیں تو رسول اللہ ﷺ نے فرمایاکہ اے علی! کیا آپ اس بات پر خوش نہیںکہ آپ کو مجھ سے وہی نسبت ہو جو موسیٰ ؑکی ہارون ؑ سے ہے مگر میرے بعدکوئی نبی نہیں۔ صحیح بخاری میں حضرت ابو ہریرہ رضی اللہ عنہ سے روایت ہے کہ بنی اسرائیل کے لوگوں پر انبیا حکومت کرتے رہے اور ان کی رہنمائی بھی کرتے رہے۔ جب ایک نبی کا انتقال ہوجاتا تو دوسرا نبی ان کی جگہ لے لیتا۔ میرے بعدکوئی نبی تو نہیں ہوگا تاہم خلفاء ہوںگے اورتعداد میں بہت ہوںگے۔ صحیح بخاری میں حضرت جبیر بن مطعم رضی اللہ عنہ نے رسول اللہ ﷺ سے ایک روایت نقل کی جس میں نبی ﷺ نے اپنے متعدد نام بتائے جن میں سے ایک نام عاقب ہے جس کا مطلب نبی ﷺ نے یہ بتلایا کہ عاقب وہ ہے جس کے بعدکوئی نبی نہ ہو۔ صحیح بخاری میں ہے کہ حضرت ابی عوفہ رضی اللہ عنہ نے رسول اللہ ﷺ کے لخت جگر حضر ت ابراہیم رضی اللہ عنہ کی وفات کا ذکرکرتے ہوئے کہا کہ اگر رسو ل اللہ ﷺ کے بعدکوئی نبی ہوتا تو آپ کے بیٹے جناب ابراہیم زندہ رہتے مگر ان کے بعدکوئی نبی نہیں ہے۔ صحیح مسلم میں حضر ت ابوہریرہ رضی اللہ عنہ نے نبی کریم ﷺ سے ایک روایت نقل کی ہے جس میں آپ نے سابق انبیاء پر اپنی فضیلت کے چھ اسباب بیان کیے اوران میںسے دواسباب یہ ہیں کہ آپ کو پوری انسانیت کے لیے بھیجاگیا اور آپ پر سلسلہ نبوت بند کردیاگیا۔ سنن ترمذی،مسند احمد اور مستدرک حاکم میں حضرت انس بن مالک رضی اللہ عنہ سے روایت ہے کہ رسول اللہ ﷺ نے فرمایا رسالت اور نبوت ختم ہوچکی اور میرے بعد کوئی نبی اور رسول نہیں ہوگا۔ سنن ترمذی میں جناب عقبہ بن عامررضی اللہ عنہ سے روایت ہے کہ نبی کریم ﷺ نے فرمایا کہ اگر میرے بعدکوئی نبی ہوتا تو عمر ہوتا۔ سنن ترمذی میں ہی ایک حدیث ہے کہ نبی کریم ﷺ نے فرمایا کہ میرے بعد تیس بڑے جھوٹے آئیں گے اور ان میں سے ہر ایک کا یہ دعویٰ ہوگا کہ وہ نبی ہے جبکہ میں خاتم النبیین ہوں اور میرے بعد کوئی نبی نہیں۔

سنن ابن ماجہ میں حدیث ہے کہ نبی کریم ﷺ نے فرمایا : میں آخری نبی ہوں اور تم (مسلمانو) آخری امت ہو۔ سنن دارمی کی ایک طویل حدیث کے راوی حضرت جابر رضی اللہ عنہ ہیں۔ نبی کریم ﷺ نے فرمایا کہ میں نبیوںکا امام ہوں اوراس میںکو ئی فخر نہیں اور میںآخری بنی ہوں اس میںکوئی فخر نہیں۔ مسند احمدکی ایک حدیث میں جس کے راوی حضرت عبد اللہ بن عمر رضی اللہ عنہ ہیں، آپ بیان کرتے ہیںکہ ایک مرتبہ نبی ﷺ ہمارے پاس اس انداز میں تشریف لائے گویا وہ ہم سے رخصت ہونے والے ہوں۔ آپ نے اس موقع پر تین مرتبہ ارشاد فرمایا:''میں محمد ﷺ نبی امی ہوں اور میرے بعدکوئی نبی نہیں ہے‘‘۔کنز العمال میں حضرت ابوذرغفاری رضی اللہ عنہ سے روایت ہے کہ نبی ﷺ نے انہیں بتایا :''آدم پہلے نبی اور آخری نبی محمد ﷺ ہیں‘‘۔ مصنف ابن ابی شیبہ میں قتادۃ رضی اللہ عنہ سے روایت ہے کہ نبی ﷺ نے فرمایا میں نبیوں میں سے آخری ہوں۔ ابن عدی کی الکامل میں روایت ہے کہ نبی ﷺ نے ارشاد فرمایا، حضرت ابو بکر رضی اللہ عنہ بہترین انسان ہیں مگر وہ نبی نہیں ہیں۔

ان احادیث سے ثابت ہوجاتا ہے کہ رسو ل اللہ ﷺ اللہ کے آخری نبی ہیں اور آپ کے بعد نہ کوئی نبی ہے اور نہ ہی کوئی امت ۔ اگر آپ کے بعدکوئی نبی ہوتا تو حضرت ابو بکر،حضرت عمر، حضرت علی یا آپ کے فرزند حضرت ابراہیم رضی اللہ عنہم ہوتے، لیکن اللہ تعالیٰ نے آپ کی ذات پر نبوت اور رسالت کا دروازہ بندکرکے آپ کو خاتم النبیین بنا دیا۔ اب پوری انسانیت کوکسی نبی کی ضرورت نہیں بلکہ ان کے لیے قیامت تک کے لیے قرآن و سنت کافی ہے۔ اللہ ہمیں عقیدہ ختم نبوت کا صحیح فہم اور شعور نصیب فرمائے اور وہ لوگ جو اس عقیدے کا انکار کرتے ہیں یا قرآن و سنت کے دلائل میں تحریف اور تاویل کرتے ہیںان کو ہدایت نصیب فرمائے۔ آمین!