یہیں پہ روزِ حساب ہو گا۔۔۔!

حکمران مسلم لیگ (ن) پاکستان کے سرمایہ داروں کی نمائندہ جماعت ہے اور انہی کے مفادات کو آگے بڑھانے کی خاطر انتہائی جارحانہ نیو لبرل معاشی پالیسیاں لاگو کی جا رہی ہیں جن سے امیر، امیر تر اور غریب عوام معاشی طور پر کچلے جا رہے ہیں۔ سامراجی اداروں اور معاشی درجہ بندی (ریٹنگ) کرنے والی ایجنسیوں نے پاکستان کی کسی بھی حکومت کو اتنا نہیں سراہا جتنی تعریفیں موجودہ حکومت کی ہو رہی ہیں۔ آئی ایم ایف نے جولائی کی رپورٹ میں لکھا کہ''ماضی کے پروگراموں پر کمزور ریکارڈ کے باوجود پاکستان 'اصلاحات‘ کے معیاروں پر مسلسل ترقی کر رہا ہے‘‘۔

مسلم لیگ کی حکومت آقائوں کی اس شاباش کو معیشت کی بہتری کا ثبوت قرار دے رہی ہے۔کہا جا رہا ہے کہ امن و امان میں بہتری آ رہی ہے اور معیشت ترقی کے راستے پر گامزن ہے، لیکن اگر موڈیزکی ریٹنگ رپورٹ کو غور سے پڑھا جائے تو کچھ مختلف تصویر سامنے آتی ہے۔ اس رپورٹ کے مطابق '' تنائو کی وجہ سے قومی اداروں کی فعالیت متاثر ہوئی ہے اور حالیہ 'استحکام‘ کے باوجود سیاسی واقعات کا خطرہ بدستور زیادہ ہے۔ قرضوں کی بلند سطح اور محصولات کے آمدن کی محدود بنیاد کی وجہ سے ان قرضوں کو لوٹانے کی زیادہ صلاحیت نہ ہونے کی بنا پر پاکستان مالیاتی طور پر بہت کمزور ہے۔ یہ کمزوری پاکستان کی کریڈٹ ریٹنگ میں کمی کے دبائو کا موجب بن رہی ہے۔ فی الوقت اس ریٹنگ کو صرف قرضوں نے 'سہارا‘ دے رکھا ہے اور اگلے برس آئی ایم ایف کے پروگرام کے خاتمے اور اسلام آباد اورواشنگٹن کے درمیان موجودہ تلخی کی وجہ سے کئی سوالات جنم لے رہے ہیں۔ زرِ مبادلہ کے ذخائر میں اضافے کے باوجود حکومت کے بیرونی قرضوں کا حجم ایک سنجیدہ خطرہ ہے‘‘۔ موڈیزکا یہ تجزیہ وزیرخزانہ کی من گھڑت کہانیوں کے بالکل بر عکس ہے۔

نام نہاد ''معاشی استحکام‘‘ میکرو اکنامک اعداد و شمار تک ہی محدود ہے جنہیں اتنا توڑ موڑکر پیش کیا جاتا ہے کہ وزارتِ خزانہ کو گزشتہ برس جھوٹے اعداد و شمار پیش کرنے پر آئی ایم ایف سے معافی مانگنا پڑی؛ تاہم عوام کی وسیع اکثریت جس معاشی اذیت اور سماجی خلفشارکی شکار ہے وہ تباہ کن شکل اختیار کر چکا ہے۔ ستمبر کے اوائل میں ایک چوٹی کے سرمایہ دارانہ معیشت دان نے اعتراف کیا کہ ''پاکستان کا تجارتی خسارہ 22 ارب ڈالر تک جا پہنچا ہے۔ جولائی میں ماہانہ تجارتی خسارہ 1.77ارب ڈالر تک پہنچ گیا تھا جو گزشتہ برس اسی ماہ کے مقابلے میں 34 فیصد زیادہ ہے۔ بر آمدات میں کمی آ رہی ہے۔ مالی سال 2015ء میں برآمدات سے حاصل ہونے والی آمدن 24 ارب ڈالر تھی جو ہدف سے3 ارب ڈالر کم ہے۔ ٹیکسٹائل سے تعلق رکھنے والی برآمدات جوکُل برآمدات کا60 فیصد ہیں، میں11.79فیصد کمی ہوئی ہے۔ خدشہ ہے کہ سال کے آخر تک ان میں 15فیصد تک کمی ہو جائے گی‘‘۔

تیل اور اجناس کی قیمتوں میں شدید کمی کے باوجود مجبور عوام کسی بھی طرح کے معاشی فوائد سے محروم ہیں۔ قرضوں کی ادائیگی کی صورت میں سامراجی مالیاتی اداروں کی لوٹ مار اور مسلم لیگ سمیت تمام سیاسی اشرافیہ کی منظم کرپشن بلا روک ٹوک جاری ہے۔ صحت و تعلیم کے شعبوں سمیت ریاستی ادارے نجکاری کی بھینٹ چڑھائے جا رہے ہیں۔ چونکہ کوئی بھی سیاسی جماعت محنت کشوں اور غریبوں کی نمائندگی نہیں کر رہی،اس لیے تمام بڑی پارٹیوں کے پروگرام میں نجکاری جیسے نسخوںکو ہی''معاشی ترقی‘‘ کی ترکیب قرار دیا گیا ہے۔ ہر کسی نے اس انسان دشمن منصوبے کے آگے سر جھکا دیا ہے۔ اس سے مصنوعات اور خدمات مزید مہنگی ہوںگی، ساتھ ہی بڑے پیمانے پر برطرفیاں ہو رہی ہیں جس سے پہلے سے موجود بے روزگاری کا سمندر وسیع تر ہو رہا ہے اور پہلے سے تباہ حال عوام 'منڈی کی قوتوں‘ کے ہاتھوں تاراج ہو رہے ہیں۔

بڑے سرمایہ دار اور ملٹی نیشنل کمپنیاں خوشی سے پھولے نہیں سما رہے کیونکہ مسلم لیگ کی حکومت نے انہیں کارپوریٹ ٹیکسوں میں بہت چھوٹ دی ہے جس سے ان کی شرح منافع بڑھ گئی ہے۔ معیشت کے باقی شعبوںکی طرح بینکوں کے طفیلی مالکان نے بے پناہ منافع کمایا ہے۔ سٹیٹ بینک کی 23 ستمبر کی رپورٹ کے مطابق ''مضبوط سودی اور غیر سودی آمدن کی بنیاد پر، دوسری سہ ماہی (اپریل تا جون ) کے دوران بینکاری کے شعبے کے منافعے میں گزشتہ برس کے مقابلے میں 52 فیصد اضافہ ہوا۔ اس عرصے میں بینکاری کے شعبے میں قبل از ٹیکس منافع171ارب روپے رہا۔ اگرچہ 2015ء کے دوران پالیسی ریٹس میں کمی بینکوں کی سودی آمدن پر اثر انداز ہوگی تاہم پالیسی ریٹس میں کمی سے قبل حاصل کیے گئے طویل مدت کے بانڈز کے وسیع ذخائر اور اے ایف ایس نوعیت کی ایسی سکیورٹیز پر حاصل ہونے والے کیپیٹل گینز (سودی منافع) بینکاری کے نظام کی شرح منافع کو برقرار رکھیں گے‘‘۔

عمر بھر کی جمع پونجی بینکوں میں رکھ منافع پر گزر بسر کرنے والے درمیانے اور نچلے طبقے کی بیوائوں، بزرگوں اور سماج کے دیگر کمزور حصوں کی آمدن 50 فیصد سے زائد گر چکی ہے۔ گزشتہ اڑھائی برسوں میں یہ حکمران شرح سود 12 فیصد سے گھٹا کر5.5 فیصد پر لے آئے ہیں۔ حیرت ہے کہ تمام 'معیشت دان‘ اور بورژوا ماہرین اس ظالمانہ اقدام کو معیشت میں بہتری کا شاندار کارنامہ قرار دے رہے ہیں۔ لیکن نجی قرضوں کے ذریعے یہ سستے قرضے پیداواری معیشت میں سرمایہ کاری کے لئے استعمال نہیں کئے جا رہے ہیں بلکہ بڑے سرمایہ دار اس سستے سرمائے سے سٹاک مارکیٹ اور رئیل اسٹیٹ میں سٹہ بازی کر رہے ہیں۔ پوری دنیا میں یہی صورت حال ہے۔ شرح سود میں کمی سرمایہ داری کی صحت مند ترقی کی بجائے اس کے عالمی بحران کی شدت کا اظہار ہے۔ بینک آف انگلینڈکا چیف اکانومسٹ اینڈی ہالڈین واشنگٹن پوسٹ میں چھپے ایک مضمون میں لکھتا ہے: ''آج شرح سود فرینکلن روزویلٹ یا نپولین یا ہنری ہفتم یا چنگیز خان یا شارلمین یا جولیس سیزر یا سکندر یہاں تک کہ حمو رابی کے دور سے بھی کم ہے۔ مالیاتی بحران کوئی نئی بات نہیں لیکن بین الاقوامی بحران نئی چیز ہے۔ اس سے پہلے عالمی بحران صرف1930ء کی دہائی میں دیکھا گیا تھا۔ دنیا میں جب کوئی بھی مالیاتی رسک لینے پر تیار نہ ہو تو آپ برآمدات کے ذریعے بھی بحران سے باہر نہیں نکل سکتے کیونکہ ان برآمدات کو خریدنے والا کوئی نہیں ۔ شرح سود صفرتک گر کر وہاں جم گئی ہے۔ 1930ء کی دہائی میں معاشی دلدل سے باہرنکلنے کے لیے جو محرکاتی پروگرام بروئے کار لایا گیا وہ دوسری عالمی جنگ تھی جسے کوئی بھی دہرانا نہیں چاہے گا، لیکن آج ایسا کوئی راستہ بھی نہیں ہے‘‘۔

درمیانے طبقے کی گرتی ہوئی قوتِ خرید حکمران اینڈ کمپنی کے لیے نقصان دہ ہے کیونکہ پیٹی بورژوازی کے بڑے حصے نواز لیگ سے تحریک انصاف کی جانب جا رہے ہیں۔ محنت کش طبقے اور غریبوں کی اذیت شدید ہوتی جا رہی ہے اور سطح کے نیچے ایک بغاوت پک رہی ہے۔ معیشت کی کمزوری کا سیاسی اظہار حکومت کی کمزوری کی شکل میں ہو رہا ہے۔ کہنے کو تو میاں نواز شریف ملک کے 'جمہوری‘ حکمران ہیں لیکن تمام فیصلے کوئی اور مقتدر قوت کر رہی ہے۔ معاشی استحکام ایک فریب، سماجی ترقی ایک جعل سازی اورغربت میں کمی ایک دھوکہ ہے۔ بحران، خلفشار بنتا جا رہا ہے اور غربت اور اذیت میں اضافہ ہو رہا ہے۔ سرمایہ دارانہ جمہوریت ناکام ہو چکی ہے۔ نظام میں اسے چلانے کی صلاحیت ہی نہیں رہی۔ فوج کی براہ راست حکمرانی کی گنجائش آج موجود نہیں ہے۔

حکمران طبقے کے تمام حصے کم سے کم وقت میں زیادہ سے زیادہ لوٹ مارکرنے کی بھگدڑ میں ایک دوسرے کو روندتے چلے جا رہے ہیں۔ وہ جانتے ہیں کہ ان کا وقت ختم ہو چکا ہے۔ وہ ایک آتش فشاں پر بیٹھے ہیں جس کے پھٹنے میں زیادہ دیر نہیں۔ ان کا میڈیا، ان کی سیاسی شعبدہ بازی حتیٰ کہ ان کے ریاستی ادارے انہیں بچا نہیں سکتے۔ یہ صورت حال زیادہ دیر نہیں چل سکتی۔ ایک انقلابی تبدیلی کے لیے حالات پک کر تیار ہیں بلکہ گل سڑ رہے ہیں۔کمی صرف محنت کشوں اور نوجوانوں کے تاریخ کے میدان میں اترنے کی ہے۔ ایک مرتبہ جب وہ متحرک ہوگئے تو سرمایہ دارانہ جبر کے یہ فوجی اور جمہوری ڈھانچے ریت کی دیوار ثابت ہوںگے۔ تحریک اپنی انقلابی قیادت اور پارٹی خود تراشے گی!

یہیں سے اٹھے گا شور محشر

یہیں پہ روز حساب ہو گا!