بھارت میں مذہبی جنون کی سیاہی

پاکستان کے سابق وزیر خارجہ خورشید محمود قصوری کی کتاب کی بمبئی میں تقریب رونمائی کے منتظم سدھنیدرا کلکرنی کے چہرے پر کالی سیاہی پھینکنے کی بیہودہ حرکت نے شیو سینا کی بڑھتی ہوئی فسطائیت اور ''سیکولر بھارت‘‘ پر چھائی ہندو بنیاد پرستی کی تاریکی کو بے نقاب کر دیا ہے۔ اس سے چند دن قبل ہی اتر پردیش میں گائے کا گوشت کھانے کے الزام میں ایک مسلمان اخلاق احمد کو ہندو مذہبی جنونیوں نے وحشیانہ انداز میں قتل کر دیا تھا۔ ترقی پسند مصنفین پر حملوں، ان کے قتل یا ہراساں کرنے کے واقعات میں بھی تیزی آ رہی ہے۔ان واقعات کے رد عمل میں ادب سے وابستہ بہت سی نامور شخصیات نے احتجاجاً اپنے قومی ایوارڈ بھی واپس کر دئیے ہیں۔

ایسا نہیں کہ ایسے واقعات بھارت میں پہلے کبھی نہیں ہوئے۔ لیکن تشویش کی بات ان وارداتوں میں آنے والی شدت اور ہندو بنیاد پرستوں کا ریاستی اقتدار میں آنا ہے۔ اور یہ سب زخم ایسے سماج پر لگائے جا رہے ہیں جہاں 80فیصد آبادی پہلے ہی غربت اور محرومی سے کراہ رہی ہے۔ ''چمکتا بھارت‘‘ (Shining India)، ''وکاس‘‘ اور اب ''ڈیجیٹل انڈیا‘‘ کے نعروں سے چلائی جانے والی معیشت کی کوکھ میں پلنے والے استحصال اور طبقاتی تضادات کو چھپانے کے لئے مذہبی درندگی کے ایسے واقعات کو بڑی عیاری سے بنیاد پرستی اور ''سیکولر ازم‘‘ کی لڑائی بنا کر معاشرے پر مسلط کیا جارہاہے۔

1980ء تک بمبئی میں شوسینا کا وجود نہ ہونے کے برابر تھا۔ 1984ء کے انتخابات میں بھارتیہ جنتا پارٹی (BJP)کو پورے بھارت کی 514نشستوں میں سے صرف 2ملی تھیں۔ ہندو بنیاد پرستی کے ابھار میں سب سے بڑی قصور وار محنت کش طبقے کی روایتی قیادتیں ہیں۔ بمبئی میں دتہ سامند جیسے ٹریڈ یونین لیڈروں کی محنت کشوں سے بار بار غداریوں نے اس سلسلے میں اہم کردار ادا کیا۔ مزدور تحریک کو تھکا کر چکنا چور کر دیا گیا اور طبقاتی یکجہتی پر کاری ضربیں لگائی گئیں۔ عالمی سطح پر سوویت یونین کے انہدام سے پھیلنے والی پراگندگی اور مایوسی سے سٹالنسٹ بائیں بازو کی زوال پزیری گہری ہوتی چلی گئی۔ کمیونسٹ پارٹیوں نے پارلیمانی جمہوریت اور اصلاح پسندی میں غرق ہو کر محنت کشوں کی جدوجہد کے راستے مسدود کر دئیے۔ حکمران طبقے نے ان حالات کا بھرپور فائدہ اٹھایا اور نسلی اور مذہبی تعصبات کو بھڑکانے کا عمل تیز تر کر دیا۔

شو سینا بنیادی طور پر ہندومت کا ایسا مسلک ہے جسے شوا جی نلہوڑے کی پرستش کرنے والے مذہبی پیشوائوں نے مہاراشٹر کے حکمرانوں کے لئے مزدور تحریک کے خلاف مہلک ہتھیار کے طور پر منظم کیا تھا۔ دوسری طرف انہی حکمرانوںنے مذہبی تعصبات کو بھڑکانے کے لئے حاجی مستان مرزا جیسے مافیا کے ان داتائوں کو بھی خوب استعمال کیا۔ شو سینا صرف مذہبی دہشت گردی میں ہی نہیں بلکہ بھتہ خوری، قبضہ گیری، سمگلنگ، اغوا برائے تاوان اور دوسرے جرائم میں بھی پوری طرح ملوث ہے۔ سرحد کے اِس پار کی مذہبی بنیاد پرست تنظیموں کی طرح یہ بھی کالے دھن کے مافیا کی اہم کڑی ہے۔ شو سینا کا بانی بال ٹھاکرے مذہبی جنونی غنڈہ تھا جو بالی ووڈ کے اداکاروں اور بڑے سرمایہ داروں کو بھی بلیک میل کرتا تھا اور 'پراپرٹی ٹائیکونز‘ کے لئے غریبوں کی کچی آبادیوں اور جھونپڑ پٹیوں کو بلڈوز کرواتا تھا۔ یہ سلسلہ اب بھی تقریباً 35سال سے جاری ہے۔ جیسے نیویارک میں اطالوی مافیا حاوی ہے بالکل اسی طرح بمبئی اور دہلی میں شو سینا کی غنڈہ گردی زیادہ چلتی ہے۔

ذرا اور گہرائی سے جائزہ لیا جائے تو اس مذہبی تفریق اور سماجی خلفشار کی جڑیں وہاں ہیں جہاں انگریز سامراج مقامی حکمرانوں کے لئے منافرتیں ماخذ کے طور پر چھوڑ کے گیا ہے۔ اس برصغیر کا نام ''ہندوستان‘‘ یہاں کے سب سے بڑے 'دریائے سندھو‘ (Indiaکا لفظ Indusسے ماخوذ ہے) کے نام سے منصوب ہے۔ وادی سندھ کی تہذیب ہندومت، بدھ مت، اسلام اور دوسرے مذاہب کے یہاں آنے یا جنم لینے

سے بھی بہت پہلے موجود تھی۔ لیکن 1947ء کے بٹوارے کے بعد جہاں پاکستان بنا وہاں باقی کا ہندوستان بھی ماضی کا متحدہ ہندوستان قطعاً نہیں تھا۔ یہ تقسیم کروانے میں گاندھی، نہرو، پٹیل اور دوسرے کانگریسی رہنمائوں کا کردار مسلم لیگ سے کہیں زیادہ تھا۔ فروری 1946ء میں رائل انڈین نیوی کے جہازیوں کی بغاوت صرف فوج تک ہی محدود نہیں تھی بلکہ برصغیر کے طول و عرض میں پھیل گئی تھی۔ ٹیکسٹائل اور ریلوے جیسے کلیدی شعبوں کے محنت کش ہڑتال کر رہے تھے۔ انگریزوں کے ہاتھ سے اقتدار سرکتا جا رہا تھا۔ اس بغاوت کو مقامی حکمرانوں کی مدد سے زائل کرنے کے بعد ہی برصغیر کی تقسیم ممکن ہو سکی تھی۔

1947ء میں دوسری عالمی جنگ کی بربادیوں کی تعمیر نو سے عالمی سطح پر سرمایہ داری کے معاشی عروج کا آغاز ہو رہا تھا۔ اس کے کچھ بالواسطہ ثمرات ہندوستان کو بھی حاصل ہوئے۔ نہرو نے ریاستی سرمایہ داری کے معاشی ماڈل کے تحت 70فیصد سے زائد صنعتوں کو نیشنلائز کرکے ریاستی وسائل، مراعات اور انفراسٹرکچر کے ذریعے ٹاٹا، برلا، مہندر، اوبرائے اور دوسرے بڑے سرمایہ داروں کو پروان چڑھایا۔ ایک نئے ہندوستانی سیکولر نیشنل ازم کو ابھارا گیا اور ظاہری طور پر ہندو بنیاد پرستی کو پسپا کرنے کا تاثر دیا گیا۔ لیکن لامتناہی ریاستی وسائل اور پشت پناہی کے باوجود بھی ہندوستان کا سرمایہ دار طبقہ ایک جدید صنعتی معاشرے کی تشکیل میں ناکام رہا۔ یہ کھرب پتی حکمران معاشرے کو مذہبی تعصبات سے پاک تو کیا کرتے، الٹا محنت کشوں کی یکجہتی توڑنے اور تحریکوں کو کچلنے کے لئے اس رجعت کو استعمال کرنے لگے۔ ان کے بورڈ آف ڈائریکٹرز میں آج بھی ہندو پنڈت اور جوتشی بیٹھتے ہیں جس سے پتا چلتا ہے کہ جدید ترین ٹیکنالوجی پر براجمان یہ کارپوریٹ سرمایہ دار طبقہ اپنی ذہنیت میں کتنا رجعتی اور قدامت پرست ہے۔ اس نفسیات کے سیاسی اثرات ناگزیر ہیں۔

کانگریس ہندوستان کے سرمایہ دار طبقے کی روایتی پارٹی ہے جس کا زوال بحیثیت مجموعی سرمایہ دارانہ نظام کے زوال کی عکاسی کرتا ہے۔ کارپوریٹ سرمائے کی جانب سے BJPاور نریندرا مودی کی حمایت کا مقصد ہندو بنیاد پرستی کے جبر کے زور پر مزدور دشمن پالیسیاں، نجکاری اور معاشی لبرلائزیشن کو لاگو کروانا ہے تاکہ شرح منافع میں اضافہ کیا جا سکے۔ شیو سینا، بجرنگ دل، وشوا ہندو پریشت اور راشٹریا سوائم سیوک سنگھ جیسی ہندو فاشسٹ تنظیمیں مذہبی منافرت اور پاکستان دشمنی کے جنون کے ذریعے سماج پر مسلسل رجعت اور خوف مسلط رکھتی ہیں اور اس کے ساتھ ساتھ اپنے کارپوریٹ آقائوں سے خوب مال بھی بٹورتی ہیں۔ دوسرے مذاہب کی انتہا پسندی کی طرح ہندو بنیاد پرستی بھی منافع بخش کاروبار ہے، جسے سیاسی، ریاستی اور مالیاتی طور پر حکمران طبقہ استعمال کرتا ہے۔

محنت کش عوام کی تحریک کے فقدان میں ممبئی جیسے واقعات ان بنیاد پرستوں کی دہشت میں اضافے کا باعث بنتے ہیں۔ ان کے کاروبار کے لئے یہ دہشت سب سے اہم سرمایہ ہے۔ ہندوستان ہو یا پاکستان، ایک ملک میں مذہب جنونیوں کی ایسی نفرت انگیز وارداتوں سے دوسری طرف کے جنونی تقویت پکڑتے ہیں۔ نفرت کا یہ دھندا چلتاہی اس عمل اور رد عمل کے ذریعے ہے۔ ایک کے بغیر دوسری مذہبی بنیاد پرستی ادھوری ہے۔ ریاستیں اپنی داخلی کمزوریوں کے پیش نظر بیرونی محاذ کھولنے اور قومی شاونزم کو ہوا دینے کے لئے اس مذہبی جنون کا خوب استعمال کرتی ہیں۔ یہ کھلواڑ تب تک چلے گا جب تک سرمائے کی کالی دیوی محنت کش عوام کی بَلی مانگتی رہے گی۔ معصوم لہو کی یہ پیاس بڑھتی ہی جاتی ہے۔ حکمرانوں کا کوئی ''سیکولر‘‘ یا ''لبرل‘‘ دھڑا عوام کو اس عذاب سے نہیں نکال سکتا۔ دونوں اطراف کے حکمران طبقے کا ہر حصہ رجعتی اور عوام دشمن ہے۔ تاریخ ایک بار پھر کارل مارکس کے اس قول کو وقت کی کسوٹی پر سچ ثابت کر رہی ہے کہ ''محنت کش طبقے کی نجات کا فریضہ صرف اور صرف محنت کش طبقہ خود ادا کر سکتا ہے۔‘‘