دوستی دشمنی کے ناٹک

برصغیر کی تقسیم سے جنم لینے والی ریاستوں کے درمیان''لَو ہیٹ‘‘، دوستی دشمنی، مذاکرات اور تنازعات، امن اور جنگ کا گھن چکر آج تک جاری ہے۔ساڑھے تین بڑی جنگیں ہو چکی ہیں اور معاہدوں کا کوئی شمار نہیں۔اقوام متحدہ کی قراردادیں اور مذاکرات کے طویل سلسلے دیرپا امن کے قیام کے لیے بے سود ثابت ہوئے ہیں۔ آج، جوہری ہتھیاروں اور وسیع تباہی کی جدید جنگی ٹیکنالوجی کے پیش نظر، کسی بڑی اور اعلانیہ جنگ کے امکانات نہ ہونے کے برابر ہیں۔ لیکن جدید صنعتی معاشرے کی تعمیر میں ناکام دونوں اطراف کے حکمران دور رس امن قائم کرنے کے قابل بھی نہیں ہیں۔ تعلقات کی تلخیاں زیادہ تر شعوری اور''کنٹرولڈ‘‘ ہوتی ہیں،اس نظام میں داخلی تضادات کو دبانے کے لیے بیرونی دشمن تراشے جاتے ہیں۔

جوہری ہتھیاروںکو مساوات سے نکال دیا جائے تو بھی کھلی جنگ لڑنے کی معاشی صلاحیت دونوں ریاستوں میں نہیں ہے۔جنگ کی عدم موجودگی میں جنگی جنون یا جنگ کے بغیر جنگی صورت حال بہرحال دونوں طرف پیدا کی جاتی ہے۔پھر جب یہ جنگی جنون اور جنگی صورت حال کچھ عرصے میں معمول بن کر ماند پڑنے لگتے ہیں تو غربت، بھوک اور محرومی کے ستائے ڈیڑھ ارب انسانوںکو''امن مذاکرات‘‘ کی بتی کے پیچھے لگا دیا جاتا ہے۔ یوں پچھلی سات دہائیوں کا نچوڑ یہی ہے کہ خطے کے حکمران ایسی نہج پر پہنچ چکے ہیں جہاں امن برقرار رکھ سکتے ہیں نہ جنگ لڑ سکتے ہیں۔

بھارت کی وزیر خارجہ سشما سوراج کا حالیہ دورہ پاکستان، دوستی دشمنی کے اسی سلسلے کی ہی کڑی ہے۔ پچھلے سال مئی میں بھارتیہ جنتا پارٹی کے برسر اقتدار آنے کے بعد سے یہ ڈرامے بڑھ گئے ہیں۔ مذاکرات کا اعلان اور منسوخی ہوئی، دونوں طرف سے الزامات کے جواب میں الزامات کا سلسلہ بھی شدت پکڑ گیا؛ تاہم پیرس میں ماحولیاتی آلودگی پر ہونے والی عالمی کانفرنس میں نریندر مودی اور نواز شریف 'اچانک‘ ایک دوسرے کے قریب آئے اور ملے، یہ ملاقات اتنی بھی 'بائی چانس‘ نہیں تھی۔ بعد ازاں انکشاف ہوا کہ یہ سب امریکی اور برطانوی سفارتکاروں کے دبائو کا نتیجہ تھا جن کے اپنے مفادات کے لیے یہ دشمنی ایک مخصوص سطح سے آگے خطرہ بننے لگتی ہے۔ سشما سوراج کا یہ دورہ، پیرس کی اسی ملاقات کا نتیجہ ہے۔

مغربی سامراج کی مداخلت سے قطع نظر اب 'امن‘ اور'دوستی‘ کا یہ سلسلہ پاکستان اور ہندوستان کے سرمایہ داروں کے مفادات کو بھی پیش نظر رکھ کرشروع کیا جا رہا ہے جو عالمی سطح پر معاشی بحران کے باعث شدید مشکلات اور شرح منافع میں گراوٹ کا شکار ہیں۔دو طرفہ تجارت سے وابستہ سرمایہ داروں کے یہ مفادات 9 دسمبر کو 'ہارٹ آف ایشیا کانفرنس‘ میں سشما سوراج کے خطاب میں بالکل عیاں تھے۔ ان کا کہنا تھا کہ ''میں اس موقع کا فائدہ اٹھاتے ہوئے پاکستان کی طرف دوستی کا ہاتھ بڑھانا چاہوںگی۔ اب وقت آگیا ہے کہ دونوں ممالک بلوغت اور اعتماد کا مظاہرہ کرتے ہوئے ایک دوسرے سے کاروبارکریں اور خطے میں تجارت اور تعاون کو مضبوط بنائیں۔ افغان ٹرک اگر بھارتی مصنوعات کو افغانستان اور وسط ایشیا تک لے جا سکیں تو اس سے آمد و رفت کے اخراجات میں خاطر خواہ کمی آئے گی اور پورے خطے کو فائدہ ہوگا‘‘۔سشما کا یہ بیان ہندوستانی سرمایہ داروں کی تمنائوں کا عکاس تھا جو پاکستان اور افغانستان کے زمینی راستے سے وسط ایشیا کی منڈیوں تک رسائی چاہتے ہیں۔مغربی سامراج کے دبائو کا حوالہ بھی سشما کے خطاب میں موجود تھا کہ ''پوری دنیا اس تبدیلی کی خواہش مند ہے۔ ہمیں انہیں مایوس نہیں کرنا چاہئے...بھارت اپنی طرف سے تعاون بڑھانے کو تیار ہے، ہم اسی رفتار سے قدم بڑھائیں گے جو پاکستان کے لیے اطمینان بخش ہو...'ایشیا کا دل‘ دھڑک نہیں سکتا اگر اس کی شریانیں بند ہوں‘‘۔اس موقع پر سشما سوراج نے یہ اعلان بھی کیا کہ بھارتی وزیر اعظم نریندر مودی اگلے سال 'سارک‘ کے اجلاس میں شرکت کرنے پاکستان آئیں گے اور وہ بھی ان کے ساتھ ہوںگی۔

کرہ ارض پرانسانی آبادی کا پانچواں حصہ برصغیر جنوبی ایشیا میں بستا ہے۔ غربت کی دلدل میں دھنسی یہ مخلوق بہت خوش ہوگی اگر قدیم ترین تہذیبوںکے امین اس خطے میں امن و استحکام آجائے۔ آخر دونوں طرف کے حکمران طبقات کے نمائندہ کئی نامور دانشوروں کی رائے ہے کہ غربت کے خاتمے اور ترقی کے راستے کی بڑی رکاوٹ دو طرفہ تلخ تعلقات ہیں۔ لیکن پھر یہی حکمران اور ان کے بنیاد پرست دم چھلے ہیں جو دشمنی اور نفرت کی فضا قائم کرتے ہیں۔ جنگی جنون کو 'قابو‘ میں رکھنے والی سامراجی قوتیں بھی ہزاروں ارب کا اسلحہ اس دشمنی کے بغیر فروخت نہیں کر سکتیں۔ طرفین کی ریاستی مشینری اور افواج کے مالی مفادات اس تنازعے سے وابستہ ہیں۔ امن اور دوستی ہوتی ہے تو پھر دیوہیکل عسکری اخراجات اور ان میں موجود کمیشن، کک بیکس اور حصہ داریوں کا کوئی جواز باقی نہیں رہے گا۔ لہٰذا جنگی جنون اور تنائو سے وابستہ یہ سیاسی اور مالیاتی مفادات لازم کر دیتے ہیں کہ دوستی اور امن مذاکرات کے بعد دشمنی اور الزام تراشی کی اقساط بھی جاری ہوتی رہیں۔

بارڈر پر خون ریزی، جارحانہ رویوں اور دہشت گردی کے حملوں کی ایک بنیادی وجہ عوامی بغاوت کا وہ خوف بھی ہے جو دونوں ممالک کے حکمران طبقات کو ہمیشہ لاحق رہتا ہے۔ یہ سرمایہ دار حکمران ''آزادی‘‘ کے بعد ترقی پسند معاشی، سماجی یا سیاسی کردار ادا کرنے سے قاصر رہے ہیں۔یورپ سے بالکل مختلف تاریخی طرز ارتقا رکھنے والے اس خطے میں سرمایہ داری اور جاگیر داری کی پیوند کاری انگریز نوآبادکاروں نے کی تھی۔ لہٰذا سامراج کی گماشتگی اور سامراجی ڈاکہ زنی میں کمیشن خوری ہی ان حکمرانوں کا تاریخی کردار ہے جنہوں نے وسائل سے مالا مال اس خطے کو ہر قسم کے استحصال اور محرومی میں غرق کر رکھا ہے۔ ایسے میں جب بھی محنت کشوں اور نوجوانوں کی بغاوت کے آثار پیدا ہوتے ہیں، یہ حکمران بیرونی دشمنی، قومی اور مذہبی شاونزم ابھارکر اسے دبانے کی کوشش کرتے ہیں۔ یہ نفرتیں اور تعصبات ان حکمران طبقات کے اقتدار اور وجود کی بنیادی شرط ہیں۔

سیکولرازم کی تمام تر نعرہ بازی اور لفاظی کے باوجود یہاں کی طرح ہندوستان کا حکمران طبقہ بھی مذہبی تعصبات کو اپنے مفادات کے لیے ہوا دیتا رہا۔ ضیا آمریت کی باقیات اگر یہاں زندگی کو عذاب مسلسل بنائے ہوئے ہیں تو''سب سے بڑی جمہوریت‘‘ میں حکومت بھی آر ایس ایس کے معذرت خواہان کی ہے۔ ریڈ کلف لائن کے دونوں طرف سرمایہ دارانہ نظام نے کسی آسودگی اور ترقی کی بجائے سماج کو پسماندگی اور مسخ شدہ جدت کی اذیت سے ہی دو چار کیا ہے۔ بنیاد پرستی آخری تجزیے میں اسی دیوالیہ معیشت کی سماجی اور سیاسی پیداوار ہے جو جدید صنعتی معاشرے قائم کرنے میں ناکام رہی ہے۔

تاریخ بہت کفایت شعار ہوتی ہے لیکن تاریخی عوامل کے دورانیے انسانوں کی انفرادی زندگی کی نسبت خاصے طویل ہوتے ہیں۔ دونوں ممالک کے عوام نے سماج کو ترقی دینے سے قاصر اس مفلوج سرمایہ داری اور اس کے حکمرانوں کے خلاف کئی بغاوتیں کی ہیں۔ بائیں بازو کا پاپولرازم اور ''مرحلہ وار انقلاب‘‘ پر مبنی سٹالن ازم ان تحریکوں کو زائل کر کے انقلاب کی منزل سے بھٹکاتے رہے ہیں۔ محنت کش طبقے نے کئی تلخ اسباق سیکھے ہیں۔ آج رائج الوقت سیاست سے عوام کی لاتعلقی دونوں ممالک میں اپنے عروج پر ہے۔ ادھر ''جمہوریت کے تسلسل‘‘ نے آمریتوں کے جبر و استحصال کو دھندلا دیا ہے تو اُدھر کانگریس کے بعد بی جے پی ''وکاس‘‘ کا نعرہ لگا کر بدترین نجکاری، لبرلائزیشن، مہنگائی اور معاشی بربریت کی واردات میں مصروف ہے۔لیکن 2ستمبر کی ''بھارت بند‘‘ ہڑتال میں 15کروڑ مزدوروں نے حصہ لے کر ثابت کیا ہے کہ محنت کش طبقہ پھر میدان عمل میں اترنے کو ہے۔ پورے خطے میں اس نظام کے خلاف بغاوت کا لاوا پک رہا ہے۔ طبقاتی جدوجہد کا یہ آتش فشاں پھٹے گا تو حکمران طبقے کے مسلط کردہ تعصبات کو بھی ان کے نظام سمیت غرق کر دے گا۔