کس قدر حوصلہ ‘ہارے ہوئے انسان میں تھا

احسن اختر ناز (''مرحوم ‘‘لکھتے ہوئے کلیجہ منہ کو آتا ہے)کی ایک غزل کا شعر ہے ؎

ہم زندگی کی تلخیوں سے لڑ رہے تھے آج

آکر ترے خیال نے اچھا نہیں کیا

اس کی زندگی کے چند آخری سال تلخیوں سے لبریز تھے لیکن دوستوں میں شیرینی بانٹنے والے شخص کی کوشش رہی کہ دوستوں کو ان تلخیوں میں کم سے کم شریک کرے۔ بیشتر آزمائشیں وہ تنہا جھیلتا رہا، جواں سال بلال اور ابوذر یا پھر ہمت اور حوصلے والی ہماری بھابھی جو تادمِ آخر اس کا حوصلہ بڑھاتی رہیں۔ خدا پر سچا ایمان اور پختہ یقین بدترین حالات میں بھی انسان کے کام آتا اور اس کی ڈھارس بندھاتا ہے۔

احسن چند برسوں سے ذیابیطس کا شکار تھا۔ ماہرین اس کے ایک سے زیادہ اسباب بتاتے ہیں، ذہنی اضطراب کو بھی ان میں شمار کیا جاتا ہے۔ جنازے پر بھی احباب اس کا ذکر کرتے رہے،تعزیتی کالموں میں بھی اس کا بیان ہوا۔ اِسے پنجاب یونیورسٹی شعبہ ابلاغیات کے اساتذہ کی سیاست بازی کا کرشمہ قرار دیا گیا، احسن اختر ناز جس کا بطورِ خاص نشانہ تھا۔ وی سی صاحب کی بیگم صاحبہ، میڈم شازیہ انگلینڈ سے پی ایچ ڈی کر کے واپس آئیں تو معاملات سنورنے لگے(معاملہ فہم ، صلح جو اور دور اندیش خاتون اِن دنوں یونیورسٹی لاء کالج کی پرنسپل ہیں)۔ گزشتہ سال بلال کے ولیمہ کا دعوت نامہ احسن نے وی سی صاحب کو بھی بھیجا تھا۔ ان کی آمد سب کے لیے خوشگوار حیرت کا باعث تھی، بیگم صاحبہ بھی آئی تھیں۔ احسن اپنی علالت کے آخری دِنوں میں ہسپتال میں تھا، تو ان کی عیادت کے لیے آنے والوں میں بیگم شازیہ بھی تھیں۔ وہ بہت دیر تک وہاں موجود رہیں۔ یونیورسٹی لاء کالج کے ایک استاد بھی، اسی ہسپتال میں عارضۂ قلب کے باعث داخل تھے۔ وہ ان کے مخالف دھڑے میں سرگرم ہیں لیکن انہوں نے ان کی عیادت بھی ضروری سمجھی۔

شعبہ ٔ ابلاغیات سے ڈاکٹر مغیث کی فراغت کے بعد، احسن ان کے جانشین بنے لیکن اِن کی ڈائریکٹرشپ ''دلِ یزداں‘‘ میں کانٹے کی طرح کھٹک رہی تھی۔ انہیں یہاں سے فارغ کر کے انکوائریوں کا ڈول ڈال دیا گیا۔ اِسی دوران فُل پروفیسر کے لیے ان کا سلیکشن بورڈ بھی ہوگیالیکن نوٹیفکیشن میں انکوائریاں روکاوٹ بن گئیں۔ کہا جاتا ہے، احسن کے ساتھ روا رکھی جانے والی زیادتیوں کا احساس ہوگیا تھا۔ انہوں نے انکوائریوں کو تیزی سے مکمل کرنے کی ہدایت کی گئی۔ انکوائری کمیٹی کے ایک رُکن کے بقول فیصلہ لکھا جارہا تھا لیکن احسن کی قسمت میں یہ خوشی نہیں لکھی تھی۔ یہ الگ بات کہ اپنے رب پر ایمان اور آخرت کے انصاف پر یقین رکھنے والا احسن اپنے ضمیر کے روبرو مطمئن تھا۔

وہ مجلسی آدمی تھا۔ دوستوں میں خوش رہنے اور انہیں خوش رکھنے والا آدمی۔ آخری برسوں میں ذیابیطس کی شدت نڈھال کردیتی، پاؤں میں زخم ہوجاتے لیکن جوں ہی طبیعت قدرے سنبھلتی ، وہ دانشورانِ لاہور کی تنظیم ''کونسل آف نیشنل افیئرز‘‘ کے ہفتہ وار اجلاس میں چلا آتا۔ (اس میں اس کا شاگردِ رشید حذیفہ سہارابنتا)۔زیربحث موضوع اس کی دلچسپی کا ہوتا تو اس میں بھرپور حصہ لیتا۔

گزشتہ سال جون میں ذیابیطس کا حملہ شدید تر تھا۔ بائیں ٹانگ کا زخم پھیلتا گیا۔ دُعائیں کام آئیں ، نہ دوائیں کارگر ہوئیں تو ڈاکٹروں نے اِسے گھُٹنے کے نیچے کاٹنے کا فیصلہ سنادیا۔ یہ نہایت تکلیف دہ مرحلہ تھا لیکن احسن نے اسے قبول کرنے میں لمحہ بھر تاخیر نہ کی، وہ یہاں بھی راضی بہ رضا تھا ۔ احسن کے والد، معروف شاعر جناب مجذوب چشتی (مرحوم) بھی برسوں بیماری کا شکار رہے تھے لیکن سخت ترین آزمائش کے یہ دِن انہوں نے بڑے حوصلے کے ساتھ بسر کئے تھے۔ ''کوئی آہ، نہ وائے، نہ حیف، نہ اُف ہیـ‘‘ کی کیفیت تھی۔ وہ اپنے اس شعر کی تصویر تھے ؎

مجھ پہ ہے مجذوب سرکارِ دوعالمؐ کا کرم

میں نے دیکھی ہی نہیں کوئی گھڑی تکلیف کی

احسن بھی اسی ہمت و حوصلے کا پیکر تھا۔ اِسے ہسپتال سے گھر آئے دوسرا دِن تھا، جب مجھے اس المیے کی خبر ہوئی، قیامت کی خبر۔ڈاکٹر امان اللہ ملک اور ڈاکٹر سلیم مظہر بھی ساتھ تھے، جب میں اس کی عیادت کے لیے حاضر ہوا۔ تینوں کی کیفیت یکساں تھی۔ راستے بھر سوچتے رہے اس المیے سے دوچار اپنے عزیز ترین دوست کا سامنا کیسے کریں گے، عیادت کے الفاظ کہاں سے لائیں گے؟دوستوں کے لیے آسانیوں کا سامان کرنے والے احسن نے یہاں بھی ہمارا کام آسان کردیا۔ ہم اس کا حوصلہ بڑھانے ، اس کی ڈھارس بندھانے گئے تھے لیکن وہ اپنی روایتی مسکراہٹ کے ساتھ ہمیں تسلی دے رہا تھا،'' پریشانی کی کوئی بات نہیں۔ زخم بھرجانے کے بعد، مصنوعی ٹانگ لگوالوں گا۔ یہ بالکل ایسے ہی ہوتا ہے جیسے آدمی جراب پہن لیتا ہے‘‘۔ اس کی روایتی بذلہ سنجی یہاں بھی موجود تھی۔ ان ہی دِنوں جناب مجذوب چشتی کا مجموعۂ کلام چھپ کر آیا تھا۔ اس کی تیاری میں اس نے خوب محنت کی تھی۔ اس کی کاپی اپنے دستخط کے ساتھ پیش کرتے ہوئے اس نے فقرہ چُست کیا، تم بھی اس کے لیے ایک ، آدھ صفحہ لکھ دیتے، تو اسی بہانے لائبریری میں تمہارا نام بھی محفوظ ہوجاتا۔ مجھے یاد آیا، وہ یہ کتاب ترتیب دے چکا تو اس کے لیے مجھے بھی چند سطور لکھنے کے لیے کہا، میرا کہنا تھا کہ یہ کام تو شعرو ادب کے لوگوں کا ہے، اصحابِ نقد و نظر کا ۔ اور اس سلسلے میں اپنا معاملہ بس اتنا سا ہے کہ اللہ تعالیٰ نے کسی شعری وادبی شہ پارے سے لطف اندوز ہونے کی کچھ صلاحیت ودیعت کردی ہے۔ احسن جوابی دلیل لایا، میں نے اس کے ادبی جائزے کے لیے تو نہیں کہا۔ تمہیں یاد ہے، والد صاحب 2005میں عُمرے کے لیے جدہ میں تھے، تو تمہارے ساتھ سرور پیلس بھی گئے تھے، جہاں میاں صاحب کے ساتھ ڈنر کے علاوہ مختصر سی شعری نشست بھی ہوئی تھی، اُسی کا مختصر احوال لکھ دو۔ میں نے وعدہ کر لیا لیکن اس کی تکمیل نہ ہو پائی۔

کٹی ہوئی ٹانگ کا زخم بھرنے لگا۔ احسن اسی دوران راولپنڈی سی ایم ایچ کے چکر بھی لگا آیا۔(جہاں مصنوعی اعضا کا الگ شعبہ بھی موجود ہے)۔ ڈاکٹر وںکا کہنا تھا، مصنوعی ٹانگ لگانے کے لیے ابھی کچھ اور انتظار کرنا پڑے گا۔ احسن کے لیے اب گھر پڑے رہنا محال تھا۔ ایک دن ابوذر اسے گاڑی میں شعبہ ابلاغیات لے گیا۔ پارکنگ سے آگے وہیل چیئر کام آئی۔ وہ دیر تک طلبا و طالبات اور اپنے رفقا کے ساتھ وہاں رہا۔ یوایم ٹی والوں نے عمرانہ مشتاق کے تعاون سے ، ہر مہینے کے پہلے اتوار کو لاہوری ناشتے اورا دبی نشست کا سلسلہ شروع کیا ہے۔ جس میں ہر نقطۂ نظر اور ہر دھڑے کے شعرا وادباپائے جاتے ہیں۔ اسلم خاں اسلام آباد سے آیا تو احسن کو گاڑی میں( اور پھر وہیل چیئر پر)یہاں لے آیا۔ یہاں احسن کو خیال آیا، کیوں نہ کسی آئندہ نشست میں مجذوب صاحب کے مجموعہ کلام پر بھی بحث ہوجائے۔

احسن زندگی کی سرگرمیوں کی طرف لوٹ رہا تھا۔ ایک شام معلوم ہوا، وہ پھر ہسپتال میں ہے۔ اب اس کے پیٹ میں پانی بھر گیا تھا۔ تو کیا گردوں نے کام چھوڑ دیا ہے؟ میرے چہرے پر تشویش کے سائے سے لہرا گئے۔ دوستوں کے چہرے پڑھ لینے والے احسن سے میرے دِل کی کیفیت چھپی نہ رہی، کہنے لگا پریشانی کی کوئی بات نہیں، لوگ ڈائلیسس پر بھی برسوں جی لیتے ہیں لیکن اس نے اپنے حصے کا جی لیا تھا، اپنے حصے کے سانس لے لئے تھے۔ جمعرات کی شب 9بجے بلاوا آگیا۔ احسن آخرت کے سفر پر روانہ ہوگیا تھا۔

جمعہ کی سہ پہر یونیورسٹی کے جوگنگ گراؤنڈ میں لمبی لمبی قطاریں دور تک پھیل گئی تھیں۔ یوں لگتا تھا، سارا شہر احسن کو الوداع کہنے اُمڈ آیا ہے۔ ایک ایسے شخص کو الوداع کہنے جس سے، اِن کاکوئی دُنیاوی مفاد، کوئی غرض ، کوئی لالچ وابستہ نہ تھا۔ پنجاب یونیورسٹی میں زندگی کے آخری برس اس کے لیے بڑے تکلیف دہ رہے تھے۔ اب مادرِ مہرباں نے اپنا سینہ اس کے لیے کھول دیا تھا۔ وہ یونیورسٹی کے قبرستان میں، آسودۂ خاک ہوا۔ دورِ طالبِ علمی سے پنجاب یونیورسٹی اس کے خوابوں کی سرزمین رہی تھی۔ ان میں سے بعض خواب شرمندۂ تعبیر ہوئے، بعض تشنۂ تکمیل رہے۔ اسی کا نام زندگی ہے۔