گلشن ِ اقبال پارک سے ڈی چوک تک

گلشن ِ اقبال پارک سانحہ کے متعلق وہی پرانی بات دہرائی جا سکتی ہے، یہ ایک مختلف اور مشکل جنگ ہے جس کا محاذ پورے ملک پر محیط ہے۔ اس میں انیشی ایٹو فریقِ مخالف (دہشت گرد) کے پاس ہوتا ہے کہ وہ کب، کہاں اور کس طرح حملہ آور ہو گا اور یہ بھی کہ دہشتگردوں کی کمر ٹوٹ چکی، وہ بھاگ رہے ہیں اور موقع پا کر، پلٹ کر حملہ آور ہو جاتے ہیں۔ لیکن اسی شام وفاقی دارالحکومت میں جو کچھ ہوا کیا اس کے متعلق بھی اسی منطق سے کام لیا جاسکتا ہے؟کیا یہ سب کچھ بھی امن و امان کے ذمہ داروں کے لئے ''اچانک‘‘ (سرپرائز) تھا، جس کے لئے قبل از وقت تیاری نہیں تھی، یا اس کی ضرورت محسوس نہیں کی گئی تھی اور اُدھر ملک کے سب سے بڑے شہر میں پریس کلب جیسے حساس اور اہم ادارے پر جو بیتی؟

ابھی چار دن قبل وفاقی دارالحکومت میں یومِ پاکستان پر شاندار فوجی پریڈ کا اہتمام کیا گیا تھا جس کا مقصد قوم کو نئے حوصلوں سے سرشار کرنا تھا کہ سرزمینِ پاک پر دہشتگردی کی جنگ آخری مرحلے میں داخل ہو چکی۔ صدرِ مملکت یہی بات ایک اور انداز میں کہہ رہے تھے، پاکستانی قوم اور مسلح افواج نے بے مثال قربانیاں دے کر دہشتگردی کے خلاف اس محاذ پر شاندار کامیابی حاصل کی ہیں، اور یہ کہ آپریشن ضربِ عضب اس وقت تک جاری رہے گا جب تک آخری دہشتگردکا صفایا نہیں ہو جاتا۔ لیکن آخری دہشتگرد کا صفایا اتنا قریب نہیں۔ وزیرستان میں اس کے ٹھکانے، اس کے اسلحہ خانے اور اس کی تربیت گاہیں تباہ کی جا چکیں لیکن سرحد کے اس پار ابھی پاکستان میں دہشتگردی کے لئے سب کچھ موجود ہے۔ اِدھر اندرون ملک بھی ان کے سلیپنگ سیلز بیدار و مستعد ہیں، جن کے خاتمے کے لئے کارروائیاں جاری ہیں۔ بعض نامی گرامی دہشتگرداپنے متوقع جانشینوں سمیت اگلے جہان پہنچا دئیے گئے لیکن خطرہ ابھی ٹلا نہیں۔ ایک رائے یہ بھی ہے کہ یہ عمل ردِ عمل کو جنم دیتا ہے اور یوں اس شیطانی سلسلے کا دائرہ پھیلتا چلا جاتا ہے۔ 27 مارچ کی اس بدقسمت شام سے ایک روز قبل لاہور میں ایم اے او کالج سے شاہدرہ تک میٹرو بس کی سروس معطل کر دی گئی تو اس کا سبب بھی یہی تھا۔

وزیرِ اعلیٰ پنجاب کے متعلق عمومی رائے یہ ہے کہ وہ اپنے تینوں کاؤنٹر پارٹس کی نسبت زیادہ سرگرم و فعال ہیں۔ کاؤنٹر ٹیرر ازم فورس کے قیام سمیت نیشنل ایکشن پلان کے بیشتر نکات پر ملک کے سب سے بڑے صوبے میں باقی صوبوں کی نسبت زیادہ عمل ہو رہا ہے۔ ابھی دو دن قبل ''ڈولفن‘‘ کی پاسنگ آؤٹ پریڈ ہوئی۔ برادر ملک ترکی کے تعاون اور تربیت کے ساتھ یہ نئی فورس لاہور کو سیف سٹی بنانے کے منصوبے کا حصہ ہے جس کا دائرہ دوسرے بڑے شہروں تک بھی پھیلایا جائے گا۔ 27 مارچ کے اس بدنصیب دن ، شالامار باغ میں مادھو لال حسین کا میلہ تھا، الحمرا میں صوفی فیسٹیول منعقد ہو رہا تھا، ایسٹر کی وجہ سے کرسچن کمیونٹی اپنے گرجا گھروں میں مصروفِ دعا تھی ، پولیس اور امن و امان کے ذمہ دار سول اداروں کی تمام تر توجہ ان مقامات پر مرکوز تھی ایسے میں گلشنِ اقبال پارک دشمن کے لئے سافٹ ٹارگٹ تھا۔ ضیأالحق دور میں گورنر پنجاب جنرل غلام جیلانی نے لاہور کو پارکوں کا شہر بنا دیا تھا۔ جیل روڈ پر سروسز ہسپتال کے سامنے ریس کورس گراؤنڈ کو خوبصورت پارک میں تبدیل کر دیا گیا۔ ماڈل ٹاؤن اورجلّو کے خوبصورت پارک بھی اسی دور کی یادگار ہیں۔ 1600 ایکڑ پر محیط علامہ اقبال ٹاؤن میں گلشنِ اقبال پارک بھی اہلِ لاہور کے لئے جنرل جیلانی کا تحفہ ہے (جس کا افتتاح جنرل ضیأالحق نے کیا تھا)۔ یہ مڈل اور لوئرمڈل کلاس کا پارک ہے جہاں اتوار کو شہر کے مختلف علاقوں سے سینکڑوں فیملیز آتی ہیں۔ بیرونِ شہر سے آنے والے مہمانوں کے لئے بھی یہ دلچسپی کا مرکز ہوتا ہے۔ 27 مارچ کے سانحہ کا شکار ہونے والوں میں سانگھڑ (سندھ) کی ایک فیملی بھی تھی۔ اس شام بھی یہاں ہمیشہ کی طرح میلے کا سماں تھا۔ ایسٹر کے باعث قرب و جوار سے کچھ کرسچن فیملیز بھی آئی ہوئی تھیں لیکن یہ ایسٹر فیسٹول نہیں تھا جسے کرسچن کمیونٹی کی وجہ سے ہدف بنایا گیا ہو۔ پھر تجزیہ کاروں اور تبصرہ نگاروں نے اس دہشتگردی کو ایسٹر سے کیوں جوڑ دیا؟ ایک اخبار نے تو اسے ان 100 برسوں میںایسٹر پر تیسرا بڑا حملہ قرار دے دیا تھا۔ فاضل ''محقق‘‘ تاریخ کے اوراق سے گزشتہ دو بڑے حملوں کی تفصیل بھی ڈھونڈ لایا جس کے مطابق پہلا حملہ اپریل 1916 ء میں آئرلینڈ میں ہوا، جس میں 500 افراد مارے گئے، اور دوسرا حملہ اپریل 2012ء میں نائیجیریا میں، جہاں مرنے والوں کی تعداد 66 تھی۔ تادمِ تحریر گلشن اقبال پارک سانحۂ کے ہلاک شدگان کی تعداد 72 کو پہنچ گئی، جن میں 10 افراد کرسچن ہیں اور باقی تمام مسلمان۔ ظاہرہے دہشتگرد کا ہدف ایسٹر (کرسچن کمیونٹی) نہیں تھی۔ اسے تو دہشت پھیلانا تھی جس کے لئے اس نے گلشنِ اقبال کا انتخاب کیا اور یہاں بھی اس جگہ کا جہاں خواتین اور بچوں کی تعداد زیادہ تھی (72 ہلاک شدگان میں 29 بچے، 7 خواتین اور 36 مرد ہیں)۔

یہ سانحۂ یقینا نہایت سنگین ہے، جس پر انٹیلی جنس سسٹم اور سکیورٹی لیپس کے حوالے سے سوالات فطری ہیں۔ گزشتہ شام اسی طرح کے سوالات پر رانا ثنا اللہ، رؤف کلاسرا سے الجھ پڑے ۔ وہ اسے ''مخصوص ایجنڈے ‘‘کا حصہ قرار دے رہے تھے۔ یہ بات درست کہ دہشت گردی کی اس جنگ میں اہلِ سیاست اور اربابِ صحافت کو بھی اپنا کردار ادا کرنا ہے۔ انہیں قوم کو بے حوصلہ نہیں کرنا، لیکن اگر کہیں کوئی خامی، کوئی کوتاہی نظر آتی ہے تو اس کی نشاندہی بھی تو ان کی ذمہ داری ہے، لیکن لاہور کا ممتاز قانون دان اور پارلیمنٹ کے ایوانِ بالا کا رکن یہاں بھی پولیٹیکل پوائنٹ سکورنگ کرتا نظر آیا۔ وہ یہاں بھی اورنج لائن ٹرین کا رونا رو رہا تھا۔ ادھر ایک ریٹائرڈ عسکری دانشور آئین کو ہدف بنائے ہوئے تھا۔ اس کے بقول ، ہمیں آئین سے کیا لینا دینا جو ہمیں سکیورٹی فراہم نہیں کرتا۔ جو ہسپتالوں میں صحت اور تعلیمی اداروں میں تعلیم کی سہولتیں بہم نہیں پہنچاتا، تو کیا اس دہشت گردی پر ملکی آئین کو موردِ الزام ٹھہرایا جائے گا؟ یہ دلچسپ اتفاق ہے کہ دہشت گردوں اور علیحدگی پسندوں کا ہدف بھی یہی آئین ہے اور

بعض دانشور بھی اسی کو تمام خرابیوں کی جڑ قرار دیتے ہیں۔ مسلح افواج دہشت گردی کی جنگ لڑ رہی ہیں تو ان کی تمام تر توجہ اسی پر مرکوز رہنی چاہیے۔ اس کے لئے سول اور ملٹری کا ایک صفحے پر ہونا بھی بنیادی ضرورت ہے۔ ایسے میں دہشت گردوں، تخریب کاروں اور علیحدگی پسندوں کی اس سے بڑی خواہش کیا ہو گی کہ فوج کو دہشت گردی کے ساتھ دیگر سنگین مسائل کی دلدل میں بھی اتار دیا جائے۔

اس اتوار کو وزیرِ اعظم اپنے ہفتہ وار معمول کے برعکس اسلام آباد میں ہی تھے۔ وفاقی دارالحکومت کے ہائی سکیورٹی ریڈ زون میں ریاست کی رٹ عمران + قادری دھرنوں کی طرح ایک بار پھر سنگین چیلنج سے دو چار تھی۔ امن و امان کے ذمہ دار سول ادارے ناکام ہو گئے تو حکومت فوج کو طلب کرنے پر مجبور ہو گئی (جو اس کا آئینی اختیار ہے)، لیکن سوال یہ ہے کہ نوبت یہاں تک کیوں پہنچی؟ لاہور میں دہشت گرد حملہ تو سرپرائز تھا لیکن راولپنڈی ، اسلام آباد میں معاملہ ایسا نہ تھا۔ لیاقت باغ راولپنڈی سے اسلام آباد کا ڈی چوک تقریباً 15 کلو میٹر کے فاصلے پر ہے ۔ اس کے لئے عشاق کے قافلوں کی آمد بھی غیر متوقع نہیں تھی، پھر فیض آباد تک انہیں Safe passage کیسے مل گیا؟ اور اس کے آگے وہ رستے کی ہر رکاوٹ کو روندتے ہوئے پیش قدمی کیسے کرتے چلے گئے؟ میٹرو بس اسٹیشنز، سرکاری و نجی گاڑیاں اور کنٹینر، جو بھی رستے میں آیا تباہ ہوتا چلا گیا۔ کہا جاتا ہے آئی جی پنجاب بھی اس روز صبح ہی سے راولپنڈی میں موجود تھے۔ وفاقی وزیرِ داخلہ چوہدری نثار علی خان میاں صاحب کی کابینہ کے فعال اور مستعد ارکان میں شمار ہوتے، پھر اس روز جو کچھ ہوا ، وفاقی دارالحکومت جس طرح تماشا بن گیا، اس کی ذمہ داری کس پر عائد ہوگی؟