اعترافات (حصہ سوم)

اس سے پہلے دو کالم میں نے تمہید کے طور پر لکھے ہیں اور اصل مقصد آج بیان کر رہا ہوں ۔اعلیٰ اخلاقی اَقداراورپاکیزہ خصلتیںاُس معاشرے میں پروان چڑھتی ہیں جہاں انہیں قدر کی نگاہ سے دیکھا جاتا ہواوراور ایسے لوگوں کو عزت واحترام عطا کیا جاتا ہو، لیکن جب سے ہم ہر قید وبند سے آزاد الیکٹرانک میڈیا کے دور میں داخل ہوئے ہیں ،اَقدار ومعیارات بدل گئے ہیں اور کاروباری وتشہیری صنعت نے ترجیحات بدل دی ہیں اور ہر چیز کولذتِ نظر ،لذتِ سماع ،ذہنی آوارگی اور شہوت رانی کے معیار پر پرکھا جاتا ہے ۔ ایسے ماحول میں پاکیزہ فطرت انسانوں کا وجود خارقِ عادت، اللہ تعالیٰ کی نعمت اور اُس کے دین کی برکت کی بدولت ہی ممکن ہے ۔

رسول اللہ ﷺ نے جو معاشرہ تشکیل دیا تھا ، اُس میں اگر کسی شخص سے بشری کمزوری کے تحت کوئی گناہ یا خطا سرزد ہوجاتی ، تو جب تک اُس کا شرعی اصولوں کی روشنی میں ازالہ نہ ہوجاتا، اُس کے نفس کی تطہیر اور تزکیہ نہ ہوجاتا، اسے قرار نہیں آتا تھا۔ اسی لیے رسالت مآب ﷺ کے عہدِ مبارک میں ہمیں مجرمین کے اِقرار واعتراف کی حیرت انگیز مثالیں ملتی ہیں ۔

حضرت حنظلہ رضی اللہ عنہ بیان کرتے ہیں :''ہم رسول اللہ ﷺ کی مجلس میں موجود تھے ،آپ ﷺ نے ہمارے سامنے جنت اور جہنم کا ذکر کیا ،یہاں تک کہ ہمیں ایسا لگا جیسے جنت وجہنم ہماری نگاہوں کے سامنے ہیں،وہاں سے میں اٹھ کر اپنے بیوی بچوں کے پاس گیااوراُن کے ساتھ دل لگی میں مشغول ہوگیا ۔وہ بیان کرتے ہیں :(اچانک) مجھے اُس کیفیت کا خیال آیا جو رسول اللہ ﷺ کی مجلس میں مجھ پر طاری تھی ۔ میں (فوراً) نکلا اور حضرت ابوبکر رضی اللہ عنہ سے ملااور اُن سے مُکَرَّرکہا:میں تو منافق ہوگیا۔ حضرت ابوبکر رضی اللہ عنہ نے میرے اس اضطراب کوجان کر کہا: اس کیفیت میں تو ہم بھی مبتلا ہوجاتے ہیں،تو حنظلہ رسول اللہ ﷺ کی خدمت میں حاضرہوئے اور اپنی پریشانی بیان کی، آپ ﷺ نے فرمایا: اے حنظلہ! قلبی حضور ی کی وہ کیفیت جو تمہیں میری مجلس میں نصیب ہوتی ہے ،اگر مسلسل رہے ،تو تمہارے بستروں پر اور تمہاری راہوں میں آکر فرشتے تم سے مصافحہ کریں، اے حنظلہ!ایسی پُرنور کیفیات ہر وقت نہیں رہتیں، (سنن ابن ماجہ: 4239)‘‘۔الغرض رسول اللہ ﷺ کی باتیں اُن کے دل ودماغ میں جذب ہوجاتیں ،ان پر انہیں پختہ یقین ہوجاتا اور اُن کے دل ودماغ کی اسکرین پر یہ سارے مناظر بصری منظر کی طرح گھوم جاتے۔یہی وجہ ہے کہ اگراُن کے دل ودماغ کی پاکیزہ اسکرین پر گناہ یاخطا کا کوئی دھبا پڑ جاتا ،تو جب تک اس کا ازالہ نہ ہوتا، انہیں چین نہ آتا،پس اُن کے اعترافات کا سبب یہی تھا ۔ذیل میں ہم احادیثِ مبارکہ سے چند مثالیں پیش کرتے ہیں:

(1)حضرت عبداللہ بیان کرتے ہیں :ایک شخص نبی ﷺ کی خدمت میں حاضر ہوا اور عرض کی:یارسول اللہ!میں نے شہر کے پرلے کنارے ایک اجنبی عورت کوپکڑلیا اور میں نے مباشرت تو نہیں کی ،لیکن بوس وکنار کیا۔ سو میں اب آپ کی بارگاہ میں حاضر ہوں ، میرے بارے میں آپ جیسے چاہیں فیصلہ فرمائیں ۔حضرت عمر رضی اللہ عنہ نے اُن سے کہا: اللہ نے تمہارے عیب پر پردہ ڈالا تھا، کاش کہ تم نے خود بھی اپنی پردہ پوشی کی ہوتی۔راوی بیان کرتے ہیں :نبی ﷺ نے اُسے کوئی جواب نہ دیا ،سو وہ شخص اٹھ کر چلا گیا۔ پھر نبی ﷺ نے ایک شخص کے ذریعے اُسے بلا بھیجا اور یہ آیت پڑھ کر اُسے سنائی: ''دن کے دونوں کناروں اور رات کے کچھ حصے میں نماز قائم کرتے رہا کرو ،بے شک نیکیاں برائیوں کے اثر کو زائل کردیتی ہیں ،یہ نصیحت حاصل کرنے والوں کے لیے نصیحت ہے (ہود:114)‘‘ ، حاضرین میں سے ایک شخص کھڑا ہوا اور عرض کی: اے اللہ کے نبی!کیایہ رعایت اِس کے لیے خاص ہے ؟،آپ ﷺ نے فرمایا: سب لوگوں کے لیے ہے،(صحیح مسلم: 2763)‘‘۔اس حدیث سے ایک تو یہ معلوم ہوا کہ اُس نے گناہِ کبیرہ کا ارتکاب نہیں کیا تھا اور نماز اور نیکیوں کی برکت سے اللہ تعالیٰ صغیرہ گناہوں کو معاف کردیتا ہے اور دوسری بات یہ معلوم ہوئی کہ کسی بھی درجے کی خطا ہو، صحابہ کرام اس کا ازالہ ہونے تک قلبی طور پر بے چین رہتے تھے۔

(2)حضرت ثعلبہ انصاری رضی اللہ عنہ بیان کرتے ہیں :عمرو بن سمُرَہ رسول اللہ ﷺ کی خدمت میں حاضر ہوئے اور عرض کی: یارسول اللہ!میں نے بنی فلاں کا اونٹ چوری کیا ہے ،سو مجھے (اس گناہ کی آلودگی سے )پاک کردیجیے۔رسول اللہ ﷺ نے اُن لوگوں کو بُلایا،انہوں نے عرض کی:بے شک ہمارا اونٹ گم ہوگیا ہے ،سو (اقرارِ جرم کی بناپر )رسول اللہ ﷺ نے حَدِّسَرِقہ جاری کرنے کا حکم فرمایا اور اُس کا ہاتھ کاٹ دیا گیا، حضرت ثعلبہ بیان کرتے ہیں: میں دیکھ رہا تھا کہ جب اُس کا ہاتھ کاٹا گیا تو اُس نے (اپنے ہاتھ کومخاطَب کر کے )یہ کلمات کہے: ''اُس اللہ کا شکر ہے کہ اُس نے مجھے تجھ سے پاک کردیا ،تو نے تو چاہا تھا کہ میرے پورے جسم کو جہنم میں داخل کردے،(سنن ابن ماجہ:2588)‘‘۔اس حدیث سے معلوم ہوا کہ پاکیزہ فطرت صحابۂ کرام سے اگر بشری کمزوری کے تحت کوئی جرم یا خطا سرزد ہو جاتی،تو آخرت کے عذاب کے خوف سے وہ خود آکر رسول اللہ ﷺ کی بارگاہ میں اقرارِ جرم کرتے ، کیونکہ اُن کا نظریہ یہ تھا کہ اس دنیا کی سزا، خواہ کتنی ہی سنگین کیوں نہ ہو ،آخرت کی سزا کے مقابلے میں کم تر ہے۔ لہٰذا وہ آخرت کے عذاب سے بچنے کے لیے خود اپنے آپ کو پیش کرتے اور ظاہر ہے کہ جو شخص خود اپنے آپ کو رسول اللہ ﷺ کی بارگاہ میں حاضر ہوکر اللہ تعالیٰ کی حد نافذ کرنے کے لیے پیش کر رہا ہے، تو اُس کا یہ عمل اس بات کی دلیل ہے کہ وہ اپنے جرم پر نادم ہے اور وہ دل سے اللہ کی بارگاہ میں تائب ہوچکا ہے ۔

اس کے برعکس ہم جس معاشرے اور ماحول میں رہ رہے ہیں، اس میں جرم سے کسی بھی حیلہ وتدبیر یا فریب سے بچ نکلنا کمال سمجھا جاتا ہے اوراس کا سبب یہ ہے کہ آخرت کی جواب دہی اور جزا وسزا کا خوف ہمارے دلوں سے نکل چکا ہے ۔جرم کا سرزد ہونا تو بہت بڑی بات ہے ،صحابۂ کرام کے ذہن میں اگر برے خیال آجاتے تووہ اُس سے بھی بے چین ہوجاتے اور انہیں خدشہ لاحق ہوتا کہ کہیں ان برے خیالات پر ہماری گرفت نہ ہوجائے ۔حضرت عبداللہ بن عباس بیان کرتے ہیں :''ایک شخص نبی ﷺ کی خدمت میں حاضر ہوا اور عرض کی :یارسول اللہ!میرے دل میں ایسے ایسے برے خیالات آتے ہیں کہ میں آپ کے سامنے انہیں زبان پر لانے کی بجائے جَل کر کوئلہ ہونا پسند کروں گا، تو رسول اللہ ﷺ نے تین مرتبہ اللہ اکبر کہا اورفرمایا: اُس اللہ کا شکر ہے کہ جس نے اس کے خیال کو(عملی صورت میں ڈھلنے کی بجائے )وسوسے میں بدل دیا، (سنن ابودائود:5112)‘‘۔ حضرت ابوہریرہ رضی اللہ عنہ بیان کرتے ہیں :کچھ لوگ رسول اللہﷺ کی خدمت میں حاضر ہوئے اور عرض کی: ہمارے دلوں میں اتنے برے خیالات آتے ہیں کہ (اُن پرعمل کرناتو درکنار )ہم ایسے خیالات کو زبان پر لانا بھی بہت بڑا گناہ سمجھتے ہیں ۔رسول اللہﷺ نے فرمایا: کیا واقعی تم اپنے دل میں ایسی کیفیت محسوس کرتے ہو؟،انہوں نے عرض کی: جی، آپﷺ نے فرمایا: یہ خالص ایمان کی دلیل ہے، (صحیح مسلم:132)‘‘۔ حدیث پاک کا منشا یہ ہے کہ برے عمل کاارتکاب تو درکنار،برے خیالات پر ضمیر کا بے چین ہوجانا ،یہ خالص ایمان کی دلیل ہے۔

احادیثِ مبارکہ میں ایسی متعدد مثالیں موجود ہیں کہ رسول اللہﷺ کے بار بار موقع دینے کے باوجود ایک شخص اپنے آپ کو سزا کے لیے پیش کرتا ہے :

حضرت بریدہ بیان کرتے ہیں :''ماعز بن مالک رسول اللہﷺ کی خدمت میں حاضر ہوئے اور عرض کی: یارسول اللہ !مجھے پاک کیجیے، رسول اللہ ﷺ نے فرمایا: تجھ پر افسوس ، اللہ سے توبہ استغفار کرو،وہ تھوڑی دور گیا اور پھر واپس آیااور عرض کی:یارسول اللہ! مجھے پاک کردیجیے، رسول اللہ ﷺ نے اُس کو پھر وہی جواب دیا۔یہاں تک کہ جب وہ چوتھی مرتبہ آیا،تو آپ ﷺ نے پوچھا: میں تجھے کس چیز سے پاک کروں؟،اُس نے عرض کی: زنا کے جرم سے، آپ ﷺ نے صحابہ سے پوچھا: کیااس کا دماغی توازن درست ہے؟، توآپﷺ کو بتایا گیا کہ اس کے ہوش وحواس ٹھیک کام کر رہے ہیں،آپ ﷺ نے پوچھا: اس نے شراب تو نہیں پی ؟،ایک شخص نے اٹھ کر اسے سونگھا اور بتایا کہ اس نے شراب نہیں پی ،آپ ﷺ نے فرمایا: تم شادی شدہ ہو؟،اس نے عرض کی: جی ہاں!،حضور نے اس کو رجم کرنے کا حکم دیا ۔اس پر لوگوں کی رائے اُن کے بارے میں مختلف ہوگئی ۔ایک گروہ نے کہا کہ ماعز کے بدترین فعل نے اُسے ہلاک کردیا اور اس کے گناہ نے اس کو گھیر لیا ۔دوسرے گروہ نے کہا: کیا ماعز کی توبہ سے بھی بڑی توبہ کسی کی ہوسکتی ہے کہ وہ خود حضور کی خدمت میں حاضر ہوئے، آپ کے ہاتھ میں ہاتھ دیا اور اپنے آپ کو سنگسار کرنے کے لیے پیش کردیا۔دو تین دن کے بعد نبی ﷺ صحابہ کی مجلس میں آئے اور فرمایا: ماعز بن مالک کے لیے اللہ سے استغفار کرو،پس تمام صحابہ نے اُن کے لیے استغفار کیا ۔پھر رسول اللہ ﷺ نے فرمایا: اس نے ایسی توبہ کی ہے کہ اگر پوری امت کے گناہگاروں میں تقسیم کردی جائے تو اُن سب کے لیے کافی ہوجائے، (سنن دار قطنی:3129)‘‘۔

ان گزارشات کا مقصد یہ ہے کہ انسانوں کی اصلاح کا سب سے بڑا ذریعہ مذہب ،خوفِ خدا اور فکرِ آخرت ہے ۔لیکن آج کل مذہب کو کٹہرے میں کھڑا کردیا گیا ہے ،یہاں تک کہ کسی سے کوئی جرم سرزد ہوجائے تو ہمارا میڈیا اس کوشش میں رہتا ہے کہ کسی طرح اس کا رشتہ مذہب سے جوڑ دیا جائے اور اس کا سبب مذہب اور اہلِ مذہب کو قرار دے کر ایک مہم شروع کردی جائے ۔ لِلّٰہ! اِ س شعار کو ترک کیجیے !اور اگر کسی مذہبی شخص سے کوئی بے تدبیری یا بے احتیاطی ہوئی ہے یا اُس نے مذہب کی غلط تعبیر کی ہے ،تو اُسے اُس فرد کا قصور سمجھا جائے نہ کہ مذہب اور اہلِ مذہب کے خلاف ایک پروپیگنڈا مہم شروع کردی جائے ، سوچیے اور غور کیجیے!۔