کشمیر ی اور کشمیر کا مقدمہ

سپریم کورٹ آزاد کشمیر کے سابق جج جسٹس منظور حسین گیلانی کا تعلق سر ی نگر سے ہے۔ وہ وہیں پیدا ہوئے ، تعلیم مکمل کی اور وکالت کرنے لگے۔1976ء میں مظفرآباد آئے تو خاندان کے اصرار پر یہیں مقیم ہوگئے۔آزاد کشمیرمیں وکالت شروع کی اور پھر وقت آیا کہ سپریم کورٹ کے جج بن گئے ۔ ریٹائرمنٹ کے بعد میاں نواز شریف کی درخواست پر مسلم لیگ ن میں شامل ہوئے مگر الیکشن وغیرہ کے جھنجھٹ میں پڑنے کی بجائے اپنی توجہ آزاد کشمیر اور پاکستان کے درمیان قانونی تعلق مضبوط بنانے پر ہی مرکوز رکھی البتہ یہ ضرور ہوا کہ اسی برس آزاد کشمیر کے الیکشن ان کی جماعت نے جس منشور پر لڑے وہ انہی کا لکھا ہوا تھا۔الیکشن کے بعد جب آزاد کشمیر کے صدر کے انتخاب کا مرحلہ آیا تو ان کا نام بھی صدارت کے ممکنہ امیدواروں میں شامل تھا لیکن پھر وہی ہوا جو ہوتا ہے، نجانے کہاں سے پاکستانی وزارتِ خارجہ کے سابق افسر مسعود خان کا نام سامنے آگیا اوروہ منصبِ صدارت پر فائز ہوگئے۔ ذرا تصور کیجیے کہ آج کل کے حالات میں مقبوضہ کشمیر سے تعلق رکھنے والا کوئی شخص آزاد کشمیر کا صدر ہوتا تو پاکستان کو دنیا میں کتنا فائدہ ہوتا اور کشمیر کی تحریک آزادی کو کتنی تقویت پہنچتی، بہرحال میدانِ سیاست ہمیشہ سے ایسا ہی تھا اور ایسا ہی رہے گا کہ یہاں قابلیت سے زیادہ نقصان پہنچانے کی صلاحیت فیصلہ کن ہوتی ہے۔

جسٹس صاحب سری نگر آتے جاتے رہتے ہیں ۔ برہان وانی کی شہادت سے کچھ عرصہ قبل وہ سری نگر گئے تو ان کے دوست وکلاء انہیں کھینچ کھانچ کر ڈسٹرکٹ بار میں لے گئے جہاں بحث چل پڑی تھی کہ پاکستان جموں کشمیر کی بھارت سے آزادی کے لیے کیا کرسکتا ہے۔کچھ وکلاء کا خیال تھا کہ پاکستان کو کشمیر کے لیے جنگ سے بھی گریز نہیں کرنا چاہیے اور کچھ سوچ رہے تھے کہ عسکری جنگ نہ سہی تو سفارتی جنگ تو ضرور بالضرور شروع کرنی چاہیے۔اس ''جنگی‘‘ اختلاف کے باوجود دونوں مکتبہء فکر سے تعلق رکھنے والے وکلاء اس بات پر متفق تھے پاکستان کشمیر کی آزادی کے لیے جو کچھ بھی کررہا ہے وہ مقبوضہ کشمیر میں رہنے والوں کی توقعات سے بہت کم ہے۔ 'پاکستان کو کیا کرنا چاہیے ‘ کا موضوع کھنچتا چلا گیا اور بار روم وکلاء سے بھرتا گیا۔ آخر میں تجویز ہوا کہ آزاد کشمیر سے آئے مہمان پاکستان کی صورتحال واضح کریں۔ اس دعوت پر جو کچھ جسٹس صاحب نے کہا اس کا خلاصہ یہ تھا کہ پاکستا نی کشمیر کی آزادی کے لیے جنگ کر چکے، اپنا آدھا وجود گنوا چکے لہذا اب پاکستان سے کوئی شکوہ کشمیریوں کا بنتا نہیں، البتہ کشمیریوں کا کیس دنیا کے سامنے پیش کرنے کا کام جس انداز سے ہورہا ہے اس پر بات ہوسکتی ہے کہ یہ کام زیادہ مؤثر انداز میں کس طرح ہوسکتا ہے۔ انہوں نے اپنے مخاطبین کو بتایا کہ کشمیر کی آزادی کشمیریو ں کے ہاتھ میں ہے جتنی بڑی تحریک آزادی مقبوضہ کشمیر میں چلے گی اتنی ہی زیادہ سفارتی و اخلاقی مدد پاکستان سے ملتی جائے گی۔

جسٹس صاحب کی بات درست ثابت ہوئی اوربرہان وانی کی شہادت کے بعد کشمیر میں آزادی کی تحریک ایک نئی آب و تاب سے ابھری اور پاکستان نے بھی مسئلہ کشمیر کو دنیا بھر میں اٹھانے کی اپنی سی کوشش کی ۔پاکستان کی ان تازہ سفارتی کوششوں کے باوجود مقبوضہ کشمیر میں رہنے والا کا یہ شکوہ بے وزن نہیں کہ پاکستان ان کی پوری سفارتی مدد نہیں کررہا۔ اس تاثر کی ایک وجہ تو یہ ہے کہ پاکستان کے ریاستی نظام میں شاید ہی کوئی ایسا شخص باقی بچا ہے جس کا تعلق مقبوضہ کشمیر سے ہو۔ کسی ایسے شخص کی عدم موجودگی کی وجہ سے جہاں دوسری طرف کے کشمیریوں سے ہمارے رابطے نہیں ہیں وہاں دارالحکومت اسلام آباد میں کسی کے پاس مقبوضہ کشمیر کے بارے میں پوری خبر بھی نہیں ہے۔ ہماری حکومت کے پاس مقبوضہ کشمیر سے آنے والی خبروں کا نظام پہلے ہی کوئی زیادہ اچھا نہیں تھا لیکن اب تو حالت یہ ہے کہ سوشل میڈیا سے کچی پکی خبریں اٹھا کر ہی کام چلالیا جاتا ہے۔ مصدقہ خبر کا نہ ہونا اتنی بڑی کمزوری ہے جو پاکستان کے مؤقف کو دنیا میں تہہ وبالا کرسکتی ہے۔ لارڈ نذیر احمد راوی ہیں کہ 1990ء کی دہائی میں برطانوی اور نارویجین اراکینِ پارلیمنٹ کا ایک وفد لے کر وہ پاکستان آئے تاکہ انہیں کشمیر کی اصل صورتحال سے آگاہ کیا جاسکے۔ خیر یہ وفد وزیراعظم آزاد کشمیر سے لے کر صدرِ پاکستان تک سب سے ملا ، ہر ایک نے کشمیر میں بھارت کے ظلم و ستم پر ڈٹ کر بات کی مگر ہر اعلیٰ عہدیدار نے کشمیر میں شہدا کی تعداد مختلف بتائی گویا کسی کو کشمیری شہدا کی اصل تعدا د کا سرے سے علم ہی نہیں تھا۔ بیانات یا بیانیے کی اس غلطی کا اثر یہ ہوا کہ یورپ کے منتخب لوگ پاکستانی مؤقف کو مبالغہ آمیز قرار دے کر رخصت ہوگئے۔ مقبوضہ کشمیر کے بارے میں متفقہ اعدادوشمار اور مصدقہ خبریں وہ پہلا قدم ہے جو حکومت کو اٹھانا ہے اور اس کے لیے سرمائے کی ضرورت ہے نہ دفاتر کی بس وزارتِ اطلاعات میں کوئی ڈھنگ کا آدمی ڈھونڈ کر اس کی ذمہ داری لگانی ہے اور یقینی بنانا ہے کہ صرف اسی ایک ذریعے سے آنے والی خبریں بین الاقوامی سطح پر اپنے مؤقف کے حق میں استعمال ہوں گی۔

وزیراعظم نے پارلیمنٹ کے اراکین کے ذریعے دنیا کے سامنے مسئلہ کشمیر اجاگرکرنے کی جو کوشش کی اس کا صرف ایک فائدہ ہوا ہے کہ ہمیں آئندہ ایسے کام سے پرہیز کرنا چاہیے اور کرنا ہی ہے تو پھر ارکان کا انتخاب خوب سوچ سمجھ کر کرنا چاہیے۔ ہمارے جتنے بھی اراکین پارلیمنٹ باہر گئے وہ رانا افضل کی طرح میزبان ملک کے اعتراضات سن کر گھبرا گئے یا سید مشاہد حسین کی طرح امریکہ میں بدلتے ہوئے ورلڈ آرڈر پر بے فائدہ گفتگو فرماتے رہے ۔ مسئلہ یہ نہیں کہ ہمارے سیاستدانوں میں اہلیت نہیں ، معاملہ یہ ہے کہ مسئلہء کشمیر کی نزاکتوں سے یہ لوگ پوری طرح آگاہ نہیں ہیں۔ اگر یہی کام مقبوضہ کشمیر سے تعلق رکھنے والے کسی شخص کے سپرد کیا جاتا اور ہمارے اراکینِ پارلیمنٹ اس کے ساتھ اظہارِ یکجہتی کے لیے ساتھ جاتے تو دنیا کے سامنے مسئلہ کشمیر زیادہ بہتر انداز میں اجاگر کیا جاسکتا تھا۔ بھارتی مقبوضہ کشمیر میںچلنے والی تحریک آزادی کے لیے پاکستان کی طرف سے بہترین مدد یہی ہوگی کہ جہاں ہم نے بھانت بھانت کے وزیر مشیر مقرر کررکھے ہیں وہاں مقبوضہ کشمیر سے تعلق رکھنے والے ایک شخص کو وزیراعظم کا معاون یا ایلچی مقرر کرکے دنیا کے ہر چھوٹے بڑے دارالحکومت میں بھیجا جائے تاکہ اس معاملے پر ہماری سفارتی جارحیت دنیا کے ساتھ ساتھ مقبوضہ کشمیر کے عوام کو بھی نظر آئے۔

مقبوضہ کشمیر سے تعلق رکھنے والے کسی شخص کو وزیراعظم کا معاون بنانا کوئی نیا تصور نہیں ہے، پاکستان ماضی میںسری نگر سے تعلق رکھنے والے یوسف بچ صاحب پاکستان کی مدد سے دنیا بھر میں کشمیریوں کا مقدمہ لڑتے رہے ہیں اور ذوالفقار علی بھٹونے انہیں معاون خصوصی کا درجہ دے رکھا تھا بعد میں انہیں سوئٹزر لینڈ میں پاکستان کا سفیر بھی لگایا لیکن جنرل ضیاء کے مارشل لاء نے انہیں کسی قابل نہ سمجھ کر سفارت سے ہٹا دیا۔ انہوں نے پاکستان کے پہلے وزیرخارجہ سر ظفراللہ خان سے لے کر وزیراعظم ذوالفقار علی بھٹو تک سب کے ساتھ کام کیا اور پاکستان کی مدد سے اقوامِ متحدہ میں فری کشمیر سنٹر بھی چلاتے رہے اور جب پاکستان نے ان سے دامن چھڑا لیا تو وہ اقوام متحدہ کے سیکرٹری جنرل کے مشیر ہوگئے اور کشمیر کا مقدمہ لڑتے رہے۔یہ مقدمہ لڑنے کے لیے آج بھی یوسف بچ جیسا کوئی شخص بھی مل سکتا ہے، شرط صرف یہ ہے کہ کوئی ذوالفقار علی بھٹو اس کی مدد کے لیے تیار ہو۔