ٹوٹے

الیکشن میں زبردست کامیابی

قوم کو مبارک ہو کہ اس کے محبوب وزیراعظم الیکشن میں بے مثال کامیابی حاصل کر کے پانچ سال کے لیے اپنی ہر دلعزیز جماعت کے صدر منتخب ہو گئے ہیں جس میں الیکشن کے تمام تقاضے پورے کئے گئے جبکہ ان کے مقابلے میں پرنس عبدالقادر بلوچ نے کاغذاتِ نامزدگی داخل کیے لیکن وہ اس وجہ سے مسترد کر دئیے گئے کہ ان کا نام ووٹرز لسٹ میں شامل نہیں تھا ورنہ یہ بہت زوردار مقابلہ ہونا تھا اور اسی سے ثابت ہوتا ہے کہ ملک میں بادشاہت نہیں بلکہ جمہوریت ہے۔ اب حکومت اس امر کی تحقیقات کر رہی ہے کہ ان کا نام ووٹرز لسٹ میں سے کیوں کاٹ دیا گیا۔ چنانچہ ذمہ داران کا تعین کرنے کے لیے کمیٹی قائم کر دی گئی ہے تا کہ دودھ کا دودھ اور پانی کا پانی ہو سکے۔ مخالفین کی طرف سے جو یہ کہا گیا ہے کہ تقریر کرتے وقت وزیراعظم کے چہرے پر خوف نمایا ںتھا اور یہ حقیقت بھی ہے کیونکہ وہ خوفِ خدا تھا جو وزیراعظم میں بدرجہ اُتم پایا جاتا ہے۔ جمہوریت کی اس شاندار فتح کو ایک طویل عرصے تک یاد رکھا جائے گا۔

اسلام آباد میں غیر موجود

ہمارے دوست اور وفاقی وزیر اطلاعات و نشریات پرویز رشید نے کہا ہے کہ جس روز اسلام آباد بند کرنے کا اعلان کیا گیا ہے، اس دن عمران خان اسلام آباد میں موجود نہیں ہوں گے۔ جولاہے کی بیٹی نے پچھلی رات اپنے آشنا کے ساتھ بھاگ جانا تھا۔ رات کو سوتے وقت اس نے اعلان کیا کہ کل ہم میں سے ایک آدمی یہاں نہیں ہو گا۔ سب یہ سن کر سوچ میں پڑ گئے کہ آخر وہ کون ہو گا جو کل ان کے ساتھ موجود نہیں ہو گا۔ صبح جب اس کے باپ کو پتا چلا تو اس نے کہا کہ کم بخت چلی تو گئی ہے لیکن تھی تو اولیاء۔ رات ہی کہہ رہی تھی کہ صبح کو آپ میں سے ایک آدمی نہیں ہو گا۔ ہم اپنی محبوب جماعت نواز لیگ کی اولیائی پر مکمل یقین رکھتے ہیں، اب دیکھیں کہ اس دن عمران خان اسلام آباد کی بجائے کہاں پائے جاتے ہیں۔ ہو سکتا ہے کہ وہ گھر میں سوتے ہی رہیں اور سارا دن یوں ہی گزر جائے۔ البتہ اگر احتیاطی حفاظت میں لے لیا جاتا ہے تو زیادہ بہتر ہو گا کیونکہ جلسے کے بھیڑ بھڑکے میں ان کے کچلے جانے کا بھی زبردست اندیشہ موجود ہے، وغیرہ وغیرہ۔

کرپشن کے خلاف

عمران خان کہتے ہیں کہ وہ کرپشن کے خلاف جدوجہد کر رہے ہیں اور 2 نومبر کو اسلام آباد بند کرنا بھی اسی مقصد کے لیے ہے۔ صورتِ حال یہ ہے کہ دوسری سیاسی جماعتیں جو تمام کی تمام عمران خان کے ساتھ شامل ہونے سے انکاری ہیں تو وہ کرپشن کو کوئی اتنا بڑا مسئلہ نہیں سمجھتیں۔ اب جمہوری قدروں کا تقاضا تو یہ ہے کہ اکثریت کی رائے کا احترام کیا جائے اور عمران خان اپنی ڈیڑھ اینٹ کی مسجد بنانے سے باز آ جائیں اور تیز رفتار ترقی کے اس سفر میں کوئی رکاوٹ پیدا کرنے کی کوشش نہ کریں اور ہماری مقبولِ عوام حکومت کو عوام کی فلاح و بہبود کے لیے دن رات ایک کرنے میں مزاحم نہ ہوں ورنہ تمام سیاسی برادری میں وہ نکو بن کر رہ جائیں گے اور یہ جو وزیراعظم نے انہیں ڈگڈگی بجانے والا کہہ دیا ہے تو اسی پر قدرے قومی حمیت کا مظاہرہ کرتے ہوئے ڈگڈگی بجانا بند کر دیں کیونکہ اس پر کوئی بھی بندر ناچنے کے لیے تیار نہیں ہو گا، اور سجدۂ سہو کر لیں کیونکہ توبہ کا دروازہ تو ہر وقت کھلا رہتا ہے۔

مک مکا کی منڈی...؟

پبلک اکاؤنٹس کمیٹی نے نیب کو مک مکا کی منڈی قرار دیا ہے۔ یہ نہایت زیادتی کی بات ہے۔ اگر ملکی اداروں کی ہم ہی عزت نہیں کریں گے تو اور کون کرے گا۔ زیادہ افسوسناک بات یہ ہے کہ نیب کو ہر طرف سے تنقید کا نشانہ بنایا جا رہا ہے، حتیٰ کہ عدلیہ بھی اسے معاف کرنے کو تیار نہیں ہے جبکہ اس پر ایک الزام یہ بھی ہے کہ یہ چھوٹی مچھلیوں کو پکڑتی ہے اور مگر مچھوں کو ہاتھ تک نہیں لگاتی۔ اب آپ ہی کہیے کہ مگر مچھ کو ہاتھ لگانا کوئی مذاق ہے جبکہ یہ خونخوار جانور تو آدمی کو سالم ہی نگل جاتا ہے۔ حقیقت یہ ہے کہ شریف برادران سے لے کر کئی دیگر حضرات کی فائلیں تیار رکھی ہیں اور اپنی باری آنے پر ان پر بھی پیش رفت ضرور ہو گی کیونکہ ہر کام اپنی باری پر ہی ہونا چاہیے کہ ڈسپلن کا تقاضا بھی یہی ہے جبکہ حکومت کی طرف سے بھی اس پر کوئی دباؤ نہیں ہے اور یہ ایک آزاد اور خودمختار ادارہ ہے، لہٰذا ہمیں اپنے خودمختار اداروں کا احترام کرنا چاہیے۔

ریڈر کا سر پھاڑ دیا!

ایک اخباری اطلاع کے مطابق لاہور میں وکلاء نے جج کا نام نہ بتانے پر ریڈر کا سر پھاڑ دیا۔ اس پر مقامی سول عدالتوں کے عملہ نے ہڑتال کر دی۔ ریلی نکالی اور دھرنا دیا۔ اب سر تو پھٹنے والی چیز ہے، اس نے پھٹنا ہی تھا۔ وکلاء عدالت کے معزز افسران میں شمار ہوتے ہیں، کیا وہ ایک گستاخ ریڈرکا سر بھی نہیں پھاڑ سکتے؟ یعنی اگر وہ ججوں کو کمرۂ عدالت میں بند کر سکتے ہیں اور ان کی حسبِ توفیق پٹائی بھی، تو ایک ریڈرکس کھیت کی مولی ہے۔ اب تو معلومات تک رسائی کا قانون بھی بننے والا ہے اس لیے بھی ضروری تھا کہ ان معززین کو جج کا نام بتایا جاتا۔ اور یہ جو انہوں نے ہڑتال کی ہے، ریلی نکالی ہے اور دھرنا دیا ہے تو ظاہر ہے کہ یہ سب عمران خان کی کارستانی ہے جنہوں نے ریلیوں اور دھرنوں کا رواج قائم کیا اور جس کا جی چاہتا ہے ریلی نکال کر دھرنا دینے بیٹھ جاتا ہے۔ حکومت کو اس شخص کا کوئی مستقل بندوبست کرنا چاہیے۔ اگرچہ وہ ملک کو ترقی کی بلندیوں تک پہنچانے میں بیحد مصروف ہے اور اسے سرکھجانے کی بھی فرصت نہیں ہے تاہم یہ کام بھی بے حد ضروری ہے۔

حاسدوں کا منہ کالا

جب سے ہم نے انشاء اللہ حکومت کی ہاں میں ہاں ملانا شروع کی ہے، حاسدوں کا باقاعدہ ایک طبقہ پیدا ہو گیا ہے جن کے پیٹ میں مروڑ اُٹھنے لگے ہیں حالانکہ جتنا رزق جس کسی کی قسمت میں ہوتا ہے اس نے کھانا ہی ہوتا ہے، میرا پیٹ کوئی دوسروں سے بڑا بھی نہیں ہے جبکہ حکومت نے بھی میری خدمات کو سراہنا شروع کر دیا ہے اور مجھے کسی شایانِ شان طریقے سے اکا موڈیٹ کرنے کے بارے میں سنجیدگی سے غور کر رہی ہے جبکہ وزیراعظم کا غور و خوض تو ویسے بھی ایک مثالی حیثیت اختیار کر چکا ہے۔ سب سے زیادہ اطمینان بخش بات یہ ہے کہ میرا سویا ہؤا ضمیر جاگ اُٹھا ہے اور ماضی کے اپنے رویے پر پشیمانی بھی ہے۔ تاہم، ہر کسی کے راہِ راست پر آنے کا بھی ایک وقت مقرر ہے جو آگے پیچھے نہیں ہو سکتا اور اس تبدیلی پر میں اپنے آپ کو مبارک باد کا مستحق سمجھتا ہوں۔ یعنی ع

شادم از زندگی خویش کہ کارے کردم

آج کا مطلع

کس کس نئے خواب میں رہتا ہوں ڈبویا ہوا میں

مدتیں ہو گئیں جاگا نہیں سویا ہوا میں