شُگون

لُغت میں اِس کے معنیٰ ہیں : اچھی یا بری فال نکالنا ۔ ہندو معاشرت کے اثرات کے تحت ہمارے ہاں نیک وبَد شُگون کی بہت سی روایات چلی آرہی ہیں ۔صَفرالمُظفر قمری سال کا دوسرا مہینہ ہے ،ظہورِ اسلام سے پہلے اہلِ عرب میں بھی اِس مہینے کے بارے میں بہت سی روایات موجود تھیں ،بعض لوگ اِس کی طرف بیماری یامالی نقصان یا مصیبتوں کے نزول کی بدشُگونی منسوب کرتے تھے ۔رسول اللہ ﷺ نے اِن تمام باتوں کی نفی فرمائی۔ اس حوالے سے کُتبِ احادیث میں متعدد روایات ہیں ،ہم اُن تمام روایات کو یکجا کرکے درج کررہے ہیں۔آپ ﷺ نے فرمایا : '' بدشُگونی کی کوئی حقیقت نہیں ،کوئی مرض اپنی ذات سے مُتعدی نہیں ہوتا،اُلّو کی نحوست کی کوئی حقیقت نہیں ،ماہِ صفر کی نحوست کی کوئی حقیقت نہیں ،ستاروں (کی چالوں )کا انسانوں کی تقدیر میں کوئی دخل نہیںاور بھوت پریت کی تاثیر کی کوئی حقیقت نہیں ہے ‘‘۔

قرآن مجید میں بد شگونی کے معنیٰ میں ' 'نَحس‘‘ اور ''طِیَرَہ‘‘ کے کلمات آئے ہیں، اللہ تعالیٰ کا ارشاد ہے: (1)ترجمہ:'' بے شک ہم نے اُن پر تُند وتیز مسلسل چلنے والی آندھی منحوس دن میں بھیجی ،جو اُن کو اٹھاکر اِس طرح مارتی تھی جیسے وہ جڑسے کٹے ہوئے کھجور کے تنے ہیں،(القمر :19-20)‘‘۔(2):'' سوہم نے (اُن کے )منحوس دنوں میں اُن پر خو ف ناک آواز والی آندھی بھیجی تاکہ ہم اُنہیں دنیاکی زندگی میں ذلّت کے عذاب کا مزا چکھائیں اور آخرت کا عذاب سب سے زیادہ رُسواکُن ہے ،(حم ٓ السجدہ:16)‘‘ ۔ (3):'' اور رہے عاد ،تو اُن کو گرجتی ہوئی تیز آندھی سے ہلاک کردیاگیا ،(اللہ نے) اِس آندھی کو اُن پرمسلسل سات راتیں اور آٹھ دن تک مُسَلّط رکھا،پس تم دیکھتے کہ یہ لوگ زمین پر کھجور کے کھوکھلے تنوں کی طرح گر گئے ،(الحاقّہ:6-7)‘‘۔(4):''پس جب اُن پر خوشحالی آتی تو وہ کہتے یہ ہماری وجہ سے ہے ۔او راگر اُن پر کوئی بدحالی آتی ،تووہ موسیٰ اور اُن کے ساتھیوں کی نحوست قرار دیتے ، سنو!اِن کافروں کی نحوست اللہ کے نزدیک ثابت ہے ،لیکن اِن میں سے اکثر نہیں جانتے ،(اعراف:131)‘‘۔(5): ''کافروں نے (مُرسَلین سے)کہا: ہم تم سے براشگون لیتے ہیں اوراگر تم باز نہ آئے توہم تم کو سنگسار کردیں گے اور ہماری طرف سے تم کو ضرور دردناک عذاب پہنچے گا ،اُنہوںنے کہا :تمہاری بدشگونی تمہارے ساتھ ہے،کیا تم نصیحت کو براسمجھتے ہو بلکہ تم حد سے گزرنے والے ہو،(یس:18-19)‘‘۔

ابتدائی تین آیات میں ''نَحس‘ کا کلمہ آیاہے ۔ اِن آیات میں قومِ عاد پر عذاب کے دنوں کو منحوس قراردیاگیا اورحضرت عبداللہ بن عباس سے روایت ہے کہ قومِ عادپر عذاب بدھ کے دِن آیاتھا اوروہ اِس دن کومنحوس کہتے تھے۔اس کی تفسیر میںعلامہ محمود آلوسی لکھتے ہیں : '' میں کہتاہوں کہ تمام ایام برابر ہیں اور بدھ کا دن نحوست کے لئے خاص نہیں ہے (یعنی اُن پر عذاب اُن کی سرکشی اوربغاوت کی وجہ سے آیانہ کہ بدھ کے دن کی وجہ سے۔ )اورہر گزرنے والی ساعت کسی شخص کے لئے اچھی اور مبارک ہوتی ہے اوروہی ساعت دوسرے شخص کے لئے بری اور منحوس ہوتی ہے اور ہر دن کسی شخص کے لئے خیر اور دوسرے شخص کے لئے شَر ہوتاہے(یعنی ایک ہی دِن کہیں جنازہ اٹھتاہے اورکہیں شادیانے بج رہے ہوتے ہیں) یعنی نحوست یا ناسازگار ہونے کاتعلق زمانے سے نہیں ہوتا ،بلکہ افراد کے اعتبار سے ہوتاہے ۔اور اگر کسی شخص پر عذاب یا کوئی مصیبت نازل ہونے کی وجہ سے بدھ کا دن منحوس ہے تو ہردن بلکہ ہرساعت میں کسی نہ کسی شخص پر کوئی نہ کوئی مصیبت اوربلا نازل ہوتی ہے ،تواِس طرح توتمام ساعتیں منحوس قرار پائیں گی، (روح المعانی ، جلد 27، ص:86)‘‘۔

آخری دو آیات میں کُفار نے بالترتیب دعوتِ حق دینے والوں اور حضرت موسیٰ علیہ السلام اور اُن کے ساتھیوں کی طرف نحوست کی نسبت کی ، تو اُنہیں جواب دیاگیاکہ تمہاری نحوست ، تمہاری بداعمالیوں کے سبب اللہ تعالیٰ کے یہاں مُقدر ہے ۔

حدیث پاک میں فرمایا : ''لَاطِیَرَۃَ‘‘ یعنی کسی خاص مقام ،دِن یا وقت کے حوالے سے شریعت میں نحوست یا بدشگونی کا کوئی تصور نہیں ہے ،بلکہ ایک روایت میں آپ ﷺ نے فرمایا:''جوشخص کسی چیز سے بدشُگونی لے کر اپنے مقصد سے لوٹ آیا ،اُس نے شرک کیا ‘‘۔یہ اُس صورت میں ہے کہ اُس کا یہ عقیدہ ہوکہ اِس چیز یا واقعے کے ظاہر ہونے سے یقیناً ناکامی ہوگی اور اِس کی بناپر اُس نے اپنا پروگرام ملتوی کردیا ،تو گویا اُس نے اعتقادی طورپر شرک کا ارتکاب کیاکہ غیر اللہ کو مؤثر بالذات مانا ،جیسے ہمارے ہاں بلی کے راستہ کاٹنے کو بھی نحس سمجھاجاتاہے۔

اِس کے برعکس رسول اللہ ﷺ نے فرمایا:'' اسلام میں بدشگونی تونہیں ہے ،(البتہ )نیک فال لینا بہترہے۔ صحابہ نے پوچھا :'' نیک فال کیاہے ؟ آپ ﷺ نے فرمایا:ہروہ اچھی بات جو تم میں سے کوئی سنے ،(صحیح بخاری:5754)‘‘۔

چنانچہ جب صلح حدیبیہ کے موقع پر سہیل بن عمروقریشِ مکہ کے نمائندے کے طورپر مذاکرات کے لئے آیا تو آپ ﷺ نے اُس کے نام سے نیک فال لیتے ہوئے فرمایا:'' تمہاراکام آسان ہوگیا ہے ‘‘۔سہیل کا مادّہ ''سہل ‘‘ ہے ،جس کے معنی ہیں آسانی ۔ اِسی طرح رسول اللہ ﷺ کے سفرِ ہجرت کے موقع پر کفارِ مکہ نے آپ کو گرفتارکرنے والے کے لئے سو اونٹ کا انعام مقرر کیا ، بُرَیدہ انعام کی لالچ میں قریش کے 70شہسواروں کے ساتھ روانہ ہوااور راستے میںآپ تک جا پہنچا۔آپ ﷺ نے پوچھا:تم کون ہو؟اُس نے کہا: بُرَیدہ،آپ نے اپنے رفیق سفر حضرت ابوبکر کی طرف مُتوجہ ہوکر فرمایا: ہمارے معاملے میں ٹھنڈک مقدر ہوگئی ،پھر آپ نے اُس سے پوچھا : تمہارا خاندان کیاہے ؟اُس نے کہا:''اسلم‘‘ ،اِس پرآپ ﷺ نے فرمایا:ہمیں سلامتی مل گئی ‘‘(کیونکہ اسلم کا مادّہ'' سَلْم ‘‘بمعنیٰ سلامتی ہے)پھرآپ نے پوچھا : تمہارا قبیلہ کیا ہے؟اُس نے جواب دیا : بنوسہم ،آپ نے فرمایا: تمہارا تیر نکل گیا (سہم کے معنیٰ ہیں :تیر)،چنانچہ بُرَیدہ اور اُن کے سب ساتھی اسلام لے آئے ، (سُبُل الھدی والرشاد، جلد9،ص:356)‘‘۔

رسول اللہ ﷺ اچھے ناموں کو پسندفرماتے تھے اور بعض مواقع پر ناموں کو تبدیل فرمایا ۔آپ نے ''بَرّہ‘‘ نام کو تبدیل کرکے زینب اور جویریہ رکھا ، اَصرم کو بدل کر زُرعہ رکھا ۔اِسی طرح آپ ﷺ نے ''عاص،عزیز ،عَتَلہ ،غُراب ،حُباب اور شِہاب‘‘ ناموں کو بھی بدلا ۔سعید بن مُسیّب نے بتایاکہ اُن کے دادا کا نام ''حَزن‘‘ تھا۔وہ حضور کے پاس آئے۔،آپ ﷺ نے فرمایا: تمہارا نام سَہل ہے ،اُنہوں نے کہا : میں اپنے باپ کے رکھے ہوئے نام کو نہیں بدلوں گا، چنانچہ اِسی کا اثرہے ہمارے خاندان کے مزاج میں سختی چلی آرہی ہے ۔

رسول اللہ ﷺ کا یہ فرمان کہ ''صفر کی کوئی حقیقت نہیں ہے ‘‘،اِس کے معنی یہ ہیں کہ ماہِ صفر کو جو لوگ منحوس تصور کرتے ہیں اور اِس ماہ کی تیرہ تاریخ کو بعض لوگ تیرہ تیزی کہتے ہیں اور اِس مہینے میں شادی نہیں کرتے ،شریعت کی رُوسے یہ سب باتیں بالکل بے اصل اور باطل ہیں ۔ امام احمد رضا قادری سے سوال ہوا کہ صفر کے آخری بدھ کے متعلق لوگوں میں مشہور ہے کہ اُس دن رسول اللہ ﷺ نے صحت پائی تھی ،لہٰذا وہ اِس خوشی میں شیرینی تقسیم کرتے ہیں ،بعض لوگ اِس دن کو نَحس جان کر برتن توڑتے ہیں ۔ اُنہوں نے جواب دیا :آخری بدھ کی شریعت میں کوئی اصل نہیں اور اس دن برتن توڑنا مال ضائع کرنا ہے اور گناہ کا سبب ہے۔اُس دن آپ کی صحت یابی کا بھی کوئی ثبوت نہیں ،بلکہ جس مرض میں آپ کا وصال ہوا،اُس کاآغاز صفر 11ھ کے آخری بدھ کے دن ہواتھا اور ایک روایت کے مطابق حضرت ایوب علیہ السلام کی ا بتلا بھی بدھ ہی کے دن شروع ہوئی تھی‘‘۔

رسول اللہ ﷺ کایہ فرمان کہ'' ستارے کی کوئی اصل نہیں ‘‘، اِس کے معنی یہ ہیں کہ بعض نجومیوں کے یہ نظریات کہ ستاروں کی چالیں انسانوں کی تقدیر پر اَثر انداز ہوتی ہیں یا یہ کہ فلاں کا ستارہ یہ ہے اور برج یہ ہے اور اُس کا دن یاسال اِس طرح گزرے گا ،یہ سب باتیں شریعت کی نظر میں باطل ہیں، علامہ اقبال نے کہاہے ؎

ستارہ کیا مِری تقدیر کی خبردے گا؟

وہ خود فراخیٔ ِ افلاک میں ہے، خوار و زبوں

یعنی جوستارہ اپنی مرضی سے حرکت نہیں کرسکتا،وہ خود قادرِ مُطلق کے حکم کا پابندہے اور کسی کی کیامجال ،کہ اُس کے حکم سے سرتابی کرے یا بال برابر اِنحراف کرے ،اِسی لئے اُنہوں نے کہاتھا : ؎

ترے دریا میں طوفاں کیوں نہیں ہے؟

خودی تیری مسلماں کیوں نہیں ہے؟

عَبَث ہے شکوۂ تقدیرِِ یزداں

تو خود تقدیرِ یزداں کیوں نہیں ہے؟