وقت بچانا درست ہے، مگر …

ہر دور کا انسان ایک بنیادی مقصد کے لیے کوشاں رہا ہے ... یہ کہ زندگی میں ہر قدم پر آسانیاں ہوں، کچھ بھی کرنے کے لیے کچھ زیادہ نہ کرنا پڑے۔ آسانیاں تلاش کرتے رہنا اچھی بات ہے۔ زندگی کو آسان ہی ہونا چاہیے۔ کسی بھی معاملے میں غیر ضروری طور پر مشکلات سے دوچار رہنا کسی بھی اعتبار سے کوئی پسندیدہ بات نہیں۔ ساری دنیا میں زیادہ سے زیادہ آسانیاں یقینی بنانے کی دوڑ سی لگی ہوئی ہے۔

زندگی کو آسان سے آسان تر بنانے کی تگ و دو اپنی جگہ بالکل درست اور قابل ستائش سہی مگر ایک بنیادی سوال یہ ہے کہ آسانیوں سے کیا ہوتا ہے؟ زیادہ سے زیادہ سہولتیں یقینی بنانے سے کیا زندگی آسان ہوجاتی ہے؟ مشکلات سے بچنے کی کوشش کیا واقعی زندگی کو سہل بنانے میںکامیاب رہتی ہے، اُس کا معیار بلند ہوتا ہے؟

تاریخ شاہد ہے کہ جب بھی انسان نے اپنے لیے آسانیاں یقینی بنانے کی کوشش کی ہے، مشکلات نے اُس کا بھرپور تعاقب کیا ہے۔ انسان زندگی بھر آسانیوں کی تلاش میں رہتا ہے اور مشکلات اُس کا پیچھا چھوڑنے پر آمادہ نہیں ہوتیں۔ تلخ حقیقت یہ ہے کہ آسانیوں کے بڑھنے سے مشکلات بھی بڑھتی جاتی ہیں۔

ہم ایک ایسے دور میں جی رہے ہیں جس میں ہر طرف آسانیاں ہی آسانیاں اور اُن سے کہیں زیادہ مشکلات ہی مشکلات ہیں! تحقیق کا بازار گرم ہے۔ ہر طرف لوگ اِس کوشش میں جُتے ہوئے ہیں کہ زندگی کے ہر معاملے کو زیادہ سے زیادہ آسان بنادیں۔ اِس مقصد کے حصول کے لیے وہ کسی بھی حد تک جانے کو تیار ہیں۔ گویا بڑی مشکل سے آسانیاں پیدا کی جارہی ہیں۔ مگر سوال یہ ہے کہ آسانیوں نے ہمیں کیا دیا ہے؟ کیا ہماری زندگی میں مجموعی طور پر ایسا کچھ پیدا ہوا ہے، سامنے آیا ہے جس سے اندازہ لگایا جاسکے کہ زندگی بسر کرنا آسان ہوگیا ہے؟ ایمان داری کی بات تو یہ ہے کہ ایسا کچھ دکھائی نہیں دے رہا۔ سہولتیں بڑھتی جارہی ہیں اور اُن کے ساتھ مشکلات بھی دوچند ہوتی جارہی ہیں۔ اصغرؔ گونڈوی نے کہا تھا ؎

چلا جاتا ہوں ہنستا کھیلتا موجِ حوادث سے

اگر آسانیاں ہوں زندگی دشوار ہو جائے!

یہ بات جتنی عجیب لگتی ہے اُتنی ہی سچ ہے۔ زندگی کا حُسن مشکلات سے نبرد آزما ہونے میں ہے۔ ہر انسان کے لیے زندگی کا حقیقی لطف اُسی وقت پیدا ہوتا ہے جب وہ مشکلات پر قابو پاکر اپنے لیے آسانیاں پیدا کرتا ہے۔ سب کچھ اچھا چل رہا ہو تو زندگی کے رنگ پھیکے پڑ جاتے ہیں۔ چیلنجز کا سامنا کرنے اور اُنہیں شکست دینے ہی سے زندگی معنویت پاتی ہے۔

آج کی دنیا میں ہر طرف سہولتوں کا چرچا ہے۔ ہر کام کو زیادہ سے زیادہ آسان بنانے کے لیے بازار میں نئی نئی چیزیں آتی رہتی ہیں۔ یہ زمانہ ''ملٹی ٹاسکنگ‘‘ کا ہے یعنی ایک ہی چیز کئی کام کرتی ہے یا پھر ایک ہی پلیٹ فارم پر بہت سی سہولتیں جمع کرکے فراہم کی جارہی ہیں۔ موبائل فون سیٹ ہی کی مثال لیجیے۔ بات کرنے کے علاوہ یہ جامد اور متحرک تصویر بنانے، آواز ریکارڈ کرنے، گانے سُننے، فلمیں دیکھنے، گیمز کھیلنے، ضرورت کے مطابق بیدار کرنے کے کام آتا ہے۔ اور بھی کئی کام ہیں جو موبائل فون سیٹ کی مدد سے آسان کردیئے گئے ہیں۔ جب جی میں آئے، دنیا کے کسی بھی مقام پر بیٹھے ہوئے شخص سے بات کرلیجیے۔

سفر بھی آسان ہوگیا ہے۔ کئی دنوں میں جو فاصلہ طے ہو پاتا تھا وہ طیارے کے ذریعے ایک ڈیڑھ گھنٹے میں طے کرلیا جاتا ہے۔ گھریلو سطح پر بہت سے کام اب نہایت آسانی سے کرلیے جاتے ہیں۔ کچن کے لیے ایسے کئی آلات میسر ہیں جو کھانا پکانے کے عمل کو آسان سے آسان تر بنارہے ہیں۔

مگر یہ سب کچھ مرزا تنقید بیگ سے ہضم نہیں ہو پارہا۔ وہ کہتے ہیں کہ آسانیوں نے الجھنیں بڑھادی ہیں۔ جب تک زندگی مشکلات سے دوچار تھی، انسان مزے میں تھا۔ اُس کے سامنے چیلنجز تھے جن سے نمٹ کر وہ بہتر زندگی کی راہ ہموار کرنے میں رہتا تھا مگر اب ایسا کچھ نہیں ہے۔ مرزا کا استدلال ہے کہ انسان نے آسانیاں بڑھانے کی کوشش میں مشکلات کا حجم بڑھالیا ہے۔

کل کی بات ہے، ہم نے مرزا سے عرض کیا کہ آج کی دنیا میں ایسے بہت سے آلات موجود ہیں جو وقت کی بھرپور بچت کا اہتمام کر رہے ہیں۔ کل تک جو کام ایک ایک ہفتے میں ہو پاتا تھا وہ آج کل محض دو ڈھائی گھنٹے میں ہو جاتا ہے۔ اِسی طور پورا دن کھا جانے والا کام اب ایک آدھ گھنٹے میں کرلیا جاتا ہے۔ ایسی آسانیاں تو گزرے ہوئے زمانوں کے شہنشاہوں کو بھی میسر نہ تھیں۔ اُنہیں پیغام پہنچانے اور اُس کا جواب پانے کے لیے ایک ایک ماہ انتظار کرنا پڑتا تھا۔ اب خیر سے وڈیو کال بھی ہو جاتی ہے۔ ہماری معروضات سُن کر پہلے تو مرزا ''زیر لب کے نیچے‘‘ مسکرائے اور پھر ہونٹوں پر طنزیہ ہنسی سجاتے ہوئے بولے ''وقت کی بچت خوب ہے مگر بھائی، اِتنا سارا وقت کس لیے بچایا جارہا ہے؟ کیا اچار ڈالنا ہے؟ اللہ نے انسان کو 24 گھنٹے کا دن عطا کیا ہے۔ اگر اِس دن کو ڈھنگ سے گزارنا ہے تو ہر کام کے لیے ایک خاص حد تک وقت مختص کرنا پڑے گا۔ اُس حد سے زیادہ اور کم وقت دینا خطرناک ثابت ہوسکتا ہے اور ہو رہا ہے۔ مختلف آلات کے ذریعے وقت بچانا اچھی بات ہے مگر سوال یہ ہے کہ بچائے ہوئے وقت کا کیا بنتا ہے؟ اب تک ہم صبح نو سے شام پانچ بجے تک کی دنیا میں جی رہے ہیں۔ یہ اچھی بات ہے۔ کام پر آنے اور جان کے دو گھنٹے لگائے جائیں تو انسان مجموعی طور پر 14 گھنٹے فارغ رہتا ہے۔ اگر نیند کے 7 گھنٹے خارج کردیں تو بہرحال 7 گھنٹے کی خالص فراغت تو اب بھی میسر ہے۔ اب تم ہی بتاؤ اِن سات گھنٹوں میںہم کیا کرتے ہیں، سوائے فضول باتوں اور کاموں میں مشغول رہنے کے؟‘‘

ہم مرزا کا سوال سُن کر تذبذب میں مبتلا ہوگئے۔ یہ تو ہم نے سوچا ہی نہ تھا کہ زندگی کو آسان بنانے والے آلات کے استعمال سے جو وقت بچ رہتا ہے اُس کا ہم کیا کرتے ہیں؟ ہم نے اپنے ماحول میں یہ دیکھا ہے کہ لوگ کام پر ڈیڑھ دو گھنٹے کی تاخیر سے پہنچتے ہیں اور پھر وہاں سے ایک آدھ گھنٹہ جلد نکل آتے ہیں! اس صورت میں جو وقت بچ رہتا ہے وہ اور معمول کے مطابق میسر ہونے والی سات آٹھ گھنٹے کی فراغت کو ملالیں تو زندگی میں فراغت ہی فراغت ہے مگر اِس کا مصرف کچھ بھی نہیں۔ زندگی کو آسان بنانے والی اشیاء کے استعمال کی بدولت بچ رہنے والا وقت ہماری زندگی کو مزید مشکل بنا رہا ہے کیونکہ اِس وقت کو موزوں طریقے سے بروئے کار لانے کا کوئی نظام ہمارے پاس نہیں۔ دولت کے بارے میں کہا جاتا ہے کہ جتنی آسانی سے آتی ہے اُتنی ہی آسانی سے جاتی بھی ہے۔ یہی معاملہ وقت کا بھی ہے۔ اگر کوئی واضح اور حقیقی مصروفیت نہ ہو تو بچایا ہوا وقت ہاتھوں سے پھسل جاتا ہے۔ ہم وقت بچانے کی کوششوں میں تو مصروف رہتے ہیں مگر بچائے ہوئے وقت کو بہتر اور بارآور ڈھنگ سے بروئے کار لانے کے بارے میں سوچنے کی زحمت گوارا نہیں کرتے۔ اصغرؔ گونڈوی نے آسانیوں کے نتیجے میں زندگی کے دشوار ہو جانے کی بات شاید ایسی ہی کیفیت کے حوالے سے کہی تھی۔