تاریخ کی مذہبی تعبیر

کیا تاریخ کی مذہبی تعبیر ممکن ہے؟

میرا جواب اثبات میں ہے مگر یہ اپنی تفصیل اور جزئیات میں اس جواب سے مختلف ہے جو اہلِ مذہب بالعموم پیش کرتے ہیں۔

میں تاریخ کو مذہبی حوالے سے دو ادوار میں تقسیم کرتا ہوں۔ پہلا دور سیدنا آدمؑ سے شروع ہوتا اور سیدنا محمد ﷺ پر تما م ہو تاہے ۔ دوسرا ختمِ نبوت سے قیامت تک ہے۔ان دونوں ادوار کے بارے میں مذہبی تصورِ تاریخ مختلف ہے۔تاریخ کی اس تعبیرکا تعلق مذہب کے بنیادی مقدمے سے ہے۔ مذہب کا اصل مقدمہ یہ ہے کہ دنیا کی یہ زندگی آزمائش ہے۔ ایک دن بندوں کو اپنے رب کے حضورمیں پیش ہونا اور اس دنیاوی زندگی کے اعمال کے بارے میں جواب دہ ہونا ہے۔ خالق نے اس کا شعور انسانوں کی فطرت میں رکھ دیاہے۔ وہ دنیا میں آکر چونکہ بھول جاتے ہیں، اس لیے عالم کا پروردگار اپنے نبی اور رسول بھیج کر یاددہانی کراتااور آخرت کے بارے میں انہیں خبردار کرتا ہے۔

مذہب اپنایہ مقدمہ دلائل کے ساتھ انسانوں کے سامنے رکھتا ہے۔ وہ اسلوب بدل بدل کر لوگوں کو بتاتا ہے کہ نظمِ کائنات میں ان گنت شواہد ہیں‘ جو اس مقدمے کی تائید کر رہے ہیں۔ اﷲ تعالیٰ انہیں اپنی آیات قرار دیتا ہے۔ اس کا کہنا ہے کہ ایک سلیم الفطرت آدمی جب ان پر غور کرتا ہے تو اس کا مشاہدہ اور تفکر اس صدا سے ہم آہنگ ہوجاتا ہے جو اس کے اندر سے اُٹھتی ہے۔ یوں فطرت اور انفس و آفاق کی گواہیاں اسے ماننے پر مجبور کر دیتی ہیں کہ اس عالم کا ایک خالق ہے۔وہی انسان کا بھی خالق ہے۔ دنیا کی اس زندگی کاایک مقصد ہے۔ آخرت ایک ایسا واقعہ ہے جو اگرچہ ابھی ہونا ہے لیکن اللہ تعالیٰ نے انسان کے لیے اس کے گردوپیش ایسے شواہد جمع کر دیے ہیں کہ اس کے لیے انکار ممکن نہیں رہا۔

آخرت کے حق میں اﷲ تعالیٰ نے جو نشانیاں ظاہرکی ہیں،ان کا سب سے بڑا مظہر رسولوں اور نبیوں کی شخصیات ہے۔رسول‘ انبیا میں بھی ممتاز تر ہیں۔ اﷲ تعالیٰ نے ان کو مبعوث کرکے اس قیامت کو بارہاایک محدود سطح پر برپا کردیا، جس کواس دنیا کے خاتمے پر ایک عالمگیر واقعہ بننا ہے ۔ مذہبی لٹریچر دراصل انبیاء ورسل کی اس تاریخ کا بیان ہے۔ قرآن مجید اﷲ کے آخری رسول سیدنا محمدﷺ کی سرگزشتِ انذار ہے۔ انجیل سیدنامسیحؑ کے انذارکی کہانی ہے۔ تورات اور دیگر صحائف بھی اس تاریخ کو بیان کر رہے ہیں۔ آسمانی لٹریچر سے معلوم ہوتا ہے کہ جب تک انبیاء آتے رہے ، امور ِدنیا میںاﷲ تعالیٰ کی مداخلت کاایک اصول رہا ہے۔یہ ان عمومی اصولوں سے مختلف ہے جن کے تحت وہ اس کائنات کو تھامے ہوئے ہے۔یہی نہیں ،انسانی معاشروں کے بارے میں بھی اللہ تعالیٰ نے جو قوانین بنائے ہیں،رسولوں کے دور میں اس نے جب ضروری جانا ،ان کو بدل ڈالا۔ ان کا ذکر ہم انبیا و رسل کے معجزات کی صورت میں سنتے ہیں۔یہ اس لیے ہے کہ قیامت کے بارے میں انسانوں کی اس جماعت پر حجت قائم ہو جائے جو رسولوں کی براہ راست مخاطب ہے...پھر اس نے اپنے صحائف میں اس تاریخ کو محفوظ کر دیا تاکہ وہ لوگ بھی اس سے فائدہ اٹھائیں جو بعد میں آنے والے ہیں۔

یہ تاریخ کا ایک دور ہے جس کا تعلق انبیا و رسل، دونوں سے ہے۔اس میںکچھ باتیں وہ ہیں جو صرف رسولوں کے لیے خاص ہیں۔مثال کے طورپربعض انبیا دشمنوں کے ہاتھوں قتل کر دیے گئے جن کا یہود کے جرائم میں ذکر ہے۔ رسول کے مخالفین کو اللہ تعالیٰ اس کا اختیار نہیں دیتا۔رسول کا غلبہ ہر صورت میں ہو تا ہے۔

ختمِ نبوت کے بعد امورِ دنیا میںاللہ تعالیٰ کی مداخلت کی نوعیت بدل گئی ہے۔ اب یہ نظامِ کائنات ان اصولوں کے تحت چلنا ہے جنہیں ہم قوانینِ فطرت کہتے ہیں۔اب اس دنیا میں اﷲ تعالیٰ کی مداخلت اس طرح نہیں ہوتی جو پیغمبروں کی موجودگی میں تھی۔ مثال کے طور پر بدر کا معرکہ برپا ہوا تو اﷲ تعالیٰ نے اپنے رسول کو بتا دیا کہ اس کا انجام کیا ہونا ہے۔روایات سے معلوم ہو تا ہے کہ رسالت مآبﷺ نے جنگ سے ایک دن پہلے مجاہدین کی صفیں ترتیب دیں۔پھر آپ میدانِ جنگ میں تشریف لے گئے۔وہاں آپ نے ہاتھ سے اشارہ کر کے فرمایا کہ یہ فلاں کا مقتل ہو گا اور یہاں فلاں کی قتل گاہ ہے۔ساتھ ہی آپ فرماتے:'انشاللہ‘۔

قرآن مجید نے بتایا کہ بدر میں لڑنے والے صحابہ کے ساتھ ایک ہزار فرشتے بھی ساتھ لڑ رہے تھے۔ یہ سب اس قانون کے تحت ہے جو رسولوں کے لیے خاص ہے اور جس کا ذکر اﷲ تعالیٰ نے سورہ مجادلہ میں کیا۔ وہاں بتایا گیا کہ اس کے رسولوں نے غالب رہنا ہے اور یہ اللہ تعالیٰ کا فیصلہ ہے۔اسی طرح کی بشارت رسول اﷲﷺ کو اُحد میں دی گئی۔بتا یا گیا کہ تین ہزار فرشتے صحابہ کے ساتھ ہیں اور یہ پانچ ہزار بھی ہوسکتے ہیں۔یہ ہے وہ شان‘ جس کے ساتھ رسولوں کے لیے اللہ کی نصرت کا ظہور ہو تا ہے۔

ختمِ نبوت کے بعد اب ہم اس قانون کا اطلاق عام لوگوں پر نہیں کرسکتے۔ اب جو کچھ ہورہا ہے یا ہو گا، وہ عمومی قانونِ فطرت کے تحت ہوگا۔ اﷲ تعالیٰ نے بعد میں پیش آنے والے بعض واقعات کے بارے میں قرآن مجید میں بتا دیا جیسے یاجوج ماجوج کا ظہور یا رسالت مآب ﷺکی صحیح روایات میں بعض واقعات کا ذکر ہوگیا۔ یہ سب پیش گوئیاں مذہب کے اس بنیادی مقدمے سے متعلق ہیں جس کا تعلق قیامت کے برپا ہونے سے ہے۔ ختمِ نبوت چونکہ ایک طرح سے اعلانِ قیامت بھی ہے۔ اس لیے اب قیامت کا ظہور بہت دور کی بات نہیں۔ اس لیے اﷲ تعالیٰ وقتاً فوقتاً انسانوں کو متنبہ کرتا رہتاہے کہ انہیں اپنے رب کے سامنے پیش ہو نا ہے۔

تاریخ کی مذہبی تعبیر اسی انذارِ قیامت سے متعلق ہے۔بائیبل کا اسلوب یہی ہے۔قرآن مجید بھی اسی کو بیان کر تا ہے۔رہے روزمرہ کے واقعات جن میں انسان اجتماعی یا انفرادی حیثیت میںشریک ہوتا ہے تو ان کا تعلق اسباب و علل سے ہے۔کسی کی فتح وشکست اس باب میں پیمانہ نہیں بن سکتی‘ نہ ہی اب اس پر قرآن سے استدلال کیا جا سکتا ہے۔بدر میں جس اصول کا اطلاق ہوا ،اس کا تعلق عہدِرسالت سے تھا۔ ختمِ نبوت کے بعد اس کا اطلاق نہیں ہو سکتا۔سید احمد شہید کے ساتھیوں کے بارے میں یہ کہا جا تا ہے کہ صحابہ کے بعد ایسا نیک گروہ پھر مجتمع نہ ہوا۔ان کا انجام ہمارے سامنے ہے۔۔غور کیجیے تواس امت میں زیادہ تر پیدا ہونے والے فتنے وہ ہیں جنہوں نے قرآن و سنت میں انبیا کے باب میں بیان کیے گئے قوانین کا غیر انبیاپر اطلاق کیا ۔کوئی مسیح موعود بن بیٹھا اور کوئی مہدی۔

آ ج مسلمانوں کے گروہ ایک دوسرے سے متحارب ہوتے ہیں اور اپنے موقف کے حق میں مذہبی لٹریچر سے دلیل لاتے ہیں۔پھر تاریخی واقعات کی قرآن مجید کی آیات کی روشنی میں توجیہہ کرتے ہیں۔تاریخ کی اس مذہبی تعبیر سے اتفاق نہیں کیا جا سکتا۔ ہمیں ان واقعات کو عمومی قانون ِ قدرت کے تحت سمجھنا ہو گا جن کی روشنی میں قومیں عروج وزوال سے گزرتی ہیں۔اگر ہم یہ بات مان لیں تو ہم سمجھ سکتے ہیں کہ آج امریکہ کیوں غالب ہے اور اور کل بر طانیہ کے اقتدار کا سورج کیوں غروب نہیں ہو تا تھا۔پھر یہ سوال بھی ہمیں پریشان نہیں کرے گا کہ مسلمان ہو تے ہوئے بھی ہم مغلوب کیوں ہیں؟

مذہب کا تاریخ سے استدلال انذارِ قیامت کے لیے ہے۔رہے روز مرہ کے واقعات تو ان کی تفہیم کے لیے ٹوئن بی معاونت کر سکتے ہیں اور سپینگلر بھی۔ابن خلدون بھی اور پال کینیڈی بھی۔