تعلیماتِ امام احمد رضا

25صفر المظفر ان کا یومِ وصال ہے ،اس دن یا پورے ماہِ صفر المظفر میں اہلِ عقیدت ومحبت آپ کا عرس مناتے ہیں ، یہ سعادت کی بات ہے ۔ عظمتِ باری تعالیٰ ،عشق ومحبتِ رسول ﷺ ،تکریمِ اولیائے کرام رحمہم اللہ اور حمیتِ دینی اُن کی رگ وپے میں پیوست تھی، اس لیے عشق مصطفی ﷺ اُن کی پہچان اور اُن کی شخصیت کا عنوان بن گیا ۔اہلِ عقیدت نے اسے آگے بڑھایا ، خطابت کے شہسواروں اور نعت خواں حضرات نے اس کی مارکیٹنگ کواوجِ کمال تک پہنچادیا۔عشق برتنا تو یقینا دشوار ہے ،اس راستے میں طائف ، بدر ،اُحداور احزاب کی منزلیں آتی ہیں ، اُحُد میں آپؐ خود زخمی ہوئے، آپؐ کے دندانِ مبارک شہید ہوئے ، غزوۂ احزاب میں آپؐ کی چار نمازیں قضا ہوئیں اور اس کے ہولناک منظر کو قرآنِ کریم نے ان کلمات میں بیان فرمایا ہے:(1) ''(اس وقت کو یاد کرو)جب کفار تمہارے اوپر سے اور تمہارے نیچے (یعنی ہرجانب )سے تم پر حملہ آور ہوئے، جب (دشمن کی ہیبت سے )تمہاری آنکھیں پتھرا گئی تھیں اور کلیجے منہ کو آنے لگے تھے اور تم اللہ کی (نصرت کے بارے میں)طرح طرح کے گمان کرنے لگے تھے ، اس موقع پر مومنوں کی آزمائش کی گئی تھی اور ان کو شدت سے جھنجھوڑ دیا گیا تھا، (الاحزاب :10-11) ‘‘ ۔ (2)''کیا تم نے یہ گمان کرلیا ہے کہ تم (یونہی) جنت میں داخل ہوجائو گے، حالانکہ ابھی تم پر وہ(مصیبتیں ) نہیں آئیں جو تم سے پہلوں پر بیت چکیں، ان پر آفتیں اور مصیبتیں پہنچیں اور وہ (اس قدر )جھنجھوڑ دیے گئے کہ (اس وقت کے )رسول اور ان کے ساتھ ایمان لانے والے پکار اٹھے کہ اللہ کی مدد کب آئے گی؟، سنو! بے شک اللہ کی مدد قریب ہے ،(البقرہ:214)‘‘۔

اس سفرِ عزیمت میں صحابۂ کرامؓ کی ناقابلِ تصور مثالیں آتی ہیں۔ عشقِ مصطفی ﷺکے تقاضوں پر پورا اترنے کے لیے باپ کو بیٹے، بیٹے کو باپ اور بھائی کو بھائی کے مقابل کھڑا ہونا پڑتا ہے۔ حضرت طلحہؓ اپنے وجود کوحفاظتِ نبوت ﷺ کے لیے ڈھال بنالیتے ہیں اور ستّر سے زیادہ تلواروں، نیزوں اورتیروں کے زخم اپنے وجود پر سہہ کربھی کوہِ استقامت بنے رہتے ہیں ، حضرت ابودجانہ کی پیٹھ نیزوں سے بھر جاتی ہے لیکن اپنی جگہ سے سرِ مُو بھی حرکت نہیں کرتے۔ رسول اللہ ﷺ کے پیارے چچا حضرت حمزہ رضی اللہ عنہ کی لاشِ مبارک کا مُثلہ کیا جاتا ہے اور آپ کے دل اور کلیجے کواپنے انتقام کی آگ کو ٹھنڈا کرنے کیلئے ابوجہل کی بیوی ہند اپنے گلے کا ہار بنا لیتی ہے ، الغرض عشق بیان کرنا آسان ہے ،برتنا بہت مشکل ہے ۔ عشق فروشی میں بلند آہنگ نعرے لگتے ہیں ،دادوتحسین ملتی ہے ،لوگ رقصاں ہوتے ہیں۔ رشوت خور، اسمگلر اور ملاوٹ کرنے والے بھی نوٹ نچھاور کر کے عشق مصطفیﷺ سے سرشار ہوجاتے ہیں ، دست بوسی ہوتی ہے اور نذرانے ملتے ہیں ، جبکہ عشق برتنے میں جان سے ہاتھ دھونا پڑتا ہے ،اپنے ہی خون میں نہانا پڑتا ہے ، لہو لہان ہونا پڑتا ہے ،آنکھیں پتھرا جاتی ہیں ، کلیجہ منہ کو آجاتا ہے ،جگر پارہ پارہ ہوجاتا ہے ،مفادات کی قربانی دینی پڑتی ہے ،فارسی شاعر نے کیا خوب کہا ہے:

بناکردند خوش رسمے بخاک وخون غلطیدن

خدا رحمت کند ایں عاشقانِ پاک طینت را

ترجمہ:(اہلِ عشق ومحبت نے راہِ حق میں )خاک وخون میں لتھڑ جانے کی کیا ہی حسین رسم ایجاد کی ہے ،اللہ ان پاک طینت عاشقانِ (باصفا) پر اپنی (بے پایاں )رحمتیں نازل فرمائے۔یہی وہ لوگ ہیں کہ اللہ تعالیٰ انہیں بشارتیں دیتا ہے اور ان پر انعامات ونوازشات کا دلکش منظر ان آیات میں بیان فرماتا ہے :''بے شک جن لوگوں نے (ایک بار)کہہ دیا :ہمارا رب اللہ ہے ،پھر اُس پر ثابت قدم رہے ، فرشتے ان پر (یہ کہتے ہوئے) نازل ہوتے ہیں :تم نہ خوف کرو اور نہ غمگین ہو اور اُس جنت کی بشارت سنو جس کا تم سے وعدہ کیا گیا ہے ، ہم دنیا کی زندگی میں تمہارے مددگار ہیںاور آخرت میں بھی اور تمہارے لیے اُس (جنت )میں ہروہ چیز (دستیاب )ہے جس کو تمہارا جی چاہے اور اُس میں ہر وہ چیز(موجود )ہے جس کو تم طلب کرو، (یہ سب)ضیافت ہے اُس بہت بخشنے والے ،بے حد۔ مہربان (رب)کی طرف سے(حم السجدہ: 30-32)‘‘۔

میں امام احمد رضا قادری سے محبت کے دعویداروں سے ببانگ دہل یہ کہنا چاہتا ہوں کہ اُن کی زندگی بدعات ومنکَرات کے سَدِّباب میں گزری ،ہم انہیں بجا طور پرحامیِ سنت اور ماحیِ بدعت یعنی سنتِ مصطفی ﷺ کا اِحیاء اور بِدعاتِ ضالّہ کو مٹانے والا کہتے ہیں ، لیکن اس شعبے میں ہمارے واعظین اور خطباء ان کی تعلیمات کو عام کرنے کے لیے تیار نہیں ہیں ،کیونکہ اس پر وہ دادوتحسین نہیں ملتی جو عشقِ مصطفی ﷺ کے عنوان سے ملتی ہے ،سو اصل مسئلہ سادہ لوح مسلمانوں کی عقیدت کو مہمیز دے کر نذرانے سمیٹنا اور مارکیٹ بنانا ہے ،اُن کو میرا مشورہ ہے کہ کبھی کبھی مارکیٹ میں مندی بھی آجاتی ہے،سو کچھ وقت اس ذمے داری کو بھی پورا کیاکریں ۔علمائے حق کی سہل پسندی کے سبب ان بِدعات ومنکرات اور خرافات کو اہلسنت وجماعت سے جوڑ دیا گیا ہے ،یہ بھی اپنی جگہ علمی خیانت اور زیادتی ہے ۔ اس لیے میں امام اہلسنت کی تعلیمات کی جانب متوجہ کرتا رہتا ہوں۔

امام احمد رضا قادری لکھتے ہیں:''مسلمان اے مسلمان !اے شریعتِ مصطفوی کے تابعِ فرمان! جان کہ سجدہ حضرتِ عزت جَلَّ جَلَالُہُ کے سوا کسی کے لیے نہیں ،اُس کے غیر کو سجدۂ عبادت تو یقینا اِجماعاً شرکِ مُھِین وکفرِ مُبین ہے اور سجدۂ تَحِیَّتْ (تعظیمی) حرام اور یقینا گناہِ کبیرہ ہے ،اس کے کفر ہونے میں علمائے دین کا اختلاف ہے (یعنی گناہِ کبیرہ ہونے میں اختلاف نہیں ہے ) ، ایک جماعتِ فقہاء سے اس کی تکفیر نقل کی گئی ہے ‘‘۔غیر اللہ کے لیے سجدۂ عبادت تو مومن کے لیے ناقابلِ تصور ہے ،انہوں نے سجدۂ تعظیمی کے حرام ہونے پر قرآن وسنت کی نصوص سے استدلال کرتے ہوئے ''اَلزُّبْدَۃُ الزَّکِیَّۃ لِتَحْرِیْمِ سُجُوْدِ التَّحِیَّۃ‘‘کے نام سے ایک باقاعدہ رسالہ لکھا اور اس میں آپ نے فقہِ حنفی کی مسلّمہ کتبِ فتاویٰ و ائمۂ احناف کے حوالے سے لکھا: ''عالموں اور بزرگوں کے سامنے زمین چومنا حرام ہے اور چومنے والا اور اس پر راضی ہونے والا دونوں گناہگار ، کیونکہ یہ بت پرستی کے مشابہ ہے ‘‘۔ آپ مزید لکھتے ہیں: ''زمین بوسی‘‘ حقیقۃً سجدہ نہیں ہے، کیونکہ سجدے میں پیشانی رکھنا ضروری ہے ، جب یہ اس وجہ سے حرام اور بت پرستی کے مشابہ ہوئی کہ صورتاً سجدے کے قریب ہے ،تو اندازہ لگائیے کہ خود سجدہ کس درجہ سخت حرام اور بت پرستی کا مشابہِ تامّ ہوگا، اَلْعِیَاذُ بِاللّٰہِ تَعَالٰی‘‘۔

آپ مزید لکھتے ہیں: ''مزارات کو سجدۂ تعظیمی یا اس کے سامنے زمین چومنا حرام اور حدِّ رکوع تک جھکنا ممنوع ‘‘، اولیائے کرام کے مزارات کی بات تو چھوڑئیے ، وہ لکھتے ہیں: ''زیارتِ روضۂ انور سیِّدِ اَطہر ﷺ کے وقت نہ دیوارِ کریم کو ہاتھ لگائے ، نہ چومے ، نہ اُس سے چمٹے، نہ طواف کرے ، نہ زمین کو چومے کہ یہ سب بِدعاتِ قبیحہ ہیں ‘‘۔

شرحِ لباب کے حوالے سے لکھتے ہیں: ''رہا مزار کو سجدہ ،تو وہ حرامِ قطعی ہے ،زائر جاہلوں کے فعل سے دھوکا نہ کھائے ،بلکہ علمائے باعمل کی پیروی کرے ، مزار کو بوسا دینے میں علماء کا اختلاف ہے اور چھونا، چمٹنااُس کی مثل ،شریعت کا محتاط ترین حکم یہ ہے کہ عوام کو منع کیا جائے اور ممانعت کا سبب خلافِ ادب ہونا ہے‘‘۔لکھتے ہیں: ''مزار کو سجدۂ تعظیمی تو درکنار ،کسی قبر کے سامنے اللہ تعالیٰ کوبھی سجدہ جائز نہیں ،اگرچہ قبلے کی طرف ہو ،(کیونکہ یہ بت پرستی کے مشابہ ہے )، قبرستان میں نماز مکروہ کہ اس میں کسی نہ کسی قبر کی طرف رخ ہوگا اور قبر کی طرف نماز مکروہ ہے ، البتہ قبرستان میں مسجد یا نماز کی جگہ بنی ہو تو اس میں نماز پڑھنے میں حرج نہیں ہے ‘‘۔قبر کی اونچائی کی بابت ان سے سوال ہوا تو لکھا: ''خلافِ سنت ہے ، میرے والد ماجد ،میری والدۂ ماجدہ اور بھائی کی قبریں دیکھیے ،ایک بالشت سے اونچی نہ ہوں گی ‘‘۔مزید لکھتے ہیں:

''اب کمالِ ادب میں ڈوبے ہوئے ،گردن جھکائے ،آنکھیں نیچے کیے ،لرزتے کانپتے ، گناہوں کی ندامت سے پسینہ پسینہ ہوتے ، حضورِ پرنور ﷺ کے عفو وکرم کی امید رکھتے ،حضورِ والا کی پائیں یعنی مشرق کی طرف سے مواجہۂ عالیہ میں حاضر ہوکہ حضورِ اقدس ﷺ مزارِ انور میں روبقبلہ جلوہ فرماہیں، اُس سَمت سے حاضر ہو کہ حضور کی نگاہِ بے کس پناہ تمہاری طرف ہوگی اور یہ بات تمہارے لیے دونوں جہانوں میں کافی ہے ۔خبردار! جالی شریف کو بوسا دینے یا ہاتھ لگانے سے بچو کہ خلافِ ادب ہے بلکہ چارہاتھ فاصلے سے زیادہ قریب نہ جائو یہ اُن کی رحمت کیا کم ہے کہ تم کو اپنے حضور بلایا، اپنے مواجہۂ اقدس میں جگہ بخشی ،اُن کی نگاہِ کریم اگرچہ ہرجگہ تمہاری طرف تھی ، اب خصوصیت اور اس درجہ قُرب کے ساتھ ہے ،وَالْحَمْدُ لِلّٰہ۔نہایت ادب ووقارکے ساتھ بآوازِ حزیں (غمناک) وسوزِ درد آگیں (درد سے پُر) ودلِ شرمناک وجگر چاک چاک ،معتدل آواز سے نہ بلند وسخت نہ نہایت نرم وپست کہ سنت کے خلاف ہے ، اگرچہ وہ تمہارے دلوں کے خیالات تک سے آگاہ ہیں جیساکہ ابھی تصریحاتِ ائمّہ سے گزرا ‘‘، پھر آپ نے آگے صلوٰۃ وسلام لکھا ہے، (فتاویٰ رضویہ ،ج:10،ص:765-766)‘‘۔دین سے محبت رکھنے والے پیر زادہ علامہ فاروق القادری کی کتاب ''فاضل بریلوی اور امورِ بدعت‘‘ اور بھارت سے مولانا یاسین اختر مصباحی کی کتاب ''امام احمد رضا اور ردِّ بدعات ومنکَرات‘‘کا ضرور مطالعہ کریں۔