نیپال: ’کمیونسٹ‘ حکومت کا امتحان

اپنے جغرافیائی محل وقوع کی وجہ سے چھوٹی سی ہمالیائی ریاست نیپال نے پچھلی چند دہائیوں میں خاصی اہمیت اختیار کر لی ہے۔ پچھلے ہفتے کے انتخابات کے نتائج کے مطابق نیپال کے 'کمیونسٹ‘ اتحاد کو واضح کامیابی ملی ہے۔ 2015ء میں نئے جمہوری آئین کے نفاذ کے بعد یہ پہلے پارلیمانی انتخابات تھے۔ کمیونسٹ پارٹی آف نیپال (یونیفائیڈ مارکسسٹ لیننسٹ) اور کمیونسٹ پارٹی آف نیپال (مائوسٹ سینٹر) نے ایک اتحاد تشکیل دیا تھا۔ 275 ارکان پر مشتمل وفاقی پارلیمان میں (165 نشستوں پر براہ راست مقابلہ اور 110 پر متناسب نمائندگی کی بنیاد پر انتخاب ہوتا ہے) یونائیٹڈ مارکسسٹ لیننسٹ کمیونسٹ پارٹی نے 80 جبکہ مائواسٹوں نے 36 نشستیں جیتی ہیں۔ نیپالی کانگریس نے صرف 21 نشستیں حاصل کی ہیں۔

2006ء میں عوامی سرکشی کے بعد نیپال میں تھیوکریٹک بادشاہت منہدم ہوئی تھی اور اس کی جگہ ایک نیم جمہوری پارلیمانی حکومت نے لی تھی۔ دو سال بعد صدیوں پرانی بادشاہت کا باقاعدہ خاتمہ ہوا اور ایک وفاقی پارلیمانی نظامِ حکومت قائم ہوا۔ لیکن عدم استحکام اور بحران جاری رہا۔ بوسیدہ نیپالی سرمایہ داری ملک کے محکوم طبقات کے لیے کسی طرح کی ترقی یا خوشحالی نہیں لا سکی۔ گیارہ سالوں میں نیپال میں دس وزرائے اعظم تبدیل ہوئے۔ نیپال دنیا کے غریب ترین ملکوں میں شامل ہے اور آبادی کا وسیع حصہ شدید غربت کا شکار ہے۔ غذائی عدم تحفظ، ناقص رہائش، کم شرح خواندگی، قدرتی آفات اور نسلی تعصبات کی بھرمار ہے۔ اگرچہ نیپال میں زراعت ہی بنیادی ذریعہ معاش ہے، لیکن آبادی کی اکثریت پہاڑی علاقوں میں رہتی ہے جہاں سنگلاخ اراضی اور بنجر زمین زراعت کو مشکل بنا دیتی ہے۔ اِس بار اکثریتی رائے دہندگان کا حکومت سے مطالبہ تھا کہ 2015ء کے زلزلے (جس میں نو ہزار لوگ مر گئے تھے) میں تباہ ہونے والے ہزاروں گھروں کو دوبارہ تعمیر کیا جائے۔ اب تک ان میں سے صرف چار فیصد گھر ہی تعمیر ہوئے ہیں۔

چین اور ہندوستان نیپال میں اپنے اثر و رسوخ کے لیے باہم دست و گریباں ہیں اور انتخابات کے نتائج کو قریب سے دیکھ رہے ہیں۔ ان انتخابات میں بھارت نے نیپالی کانگریس کی حمایت کی تھی۔ دوسری طرف کمیونسٹ اتحاد کے نئے متوقع وزیر اعظم 'کھڈگا پراساد اولی‘ کے ہندوستان کے ساتھ تعلقات کشیدہ رہے ہیں۔ چین سے قریبی تعلقات کی وجہ سے بھارت اُس پر اعتبار نہیں کرتا۔ اولی کی حکومت کا جھکائو یقینا چین کی طرف بڑھے گا۔ مالدیپ اور سری لنکا پہلے ہی بحر ہند میں چینی بحری جہازوں کو لنگر اندازی کی سہولیات فراہم کر رہے ہیں اور چین کے سمندری شاہراہِ ریشم منصوبے کا حصہ ہیں۔ اب لگتا ہے کہ نیپال بھی چین کے 'ون بیلٹ ون روڈ‘ منصوبے کا حصہ بننے جا رہا ہے۔ اِس صورتحال کو بھارت کی نیپال پالیسی کی ناکامی کے طور پر دیکھا جا رہا ہے۔ بحیثیت وزیر اعظم اپنی پچھلی حکومت میں اولی نے ایندھن، ادویات اور دوسری اجناس کے حوالے سے ہندوستان پر انحصار کم کرنے کے لئے چین کے ساتھ معاہدے کیے تھے‘ جن کے تحت ملک کی پٹرولیم ضروریات کا ایک تہائی چین سے خریدا جائے گا۔

خشکی میں محصور نیپال پٹرولیم مصنوعات اور دوسری بنیادی ضروریات کے لیے مکمل طور پر چین اور ہندوستان پر منحصر ہے۔ دونوں بڑے ممالک میں تنازعے کا خمیازہ نیپالی عوام کو بھگتنا پڑ رہا ہے۔ ستمبر 2015ء میں بھارت کی جانب سے نیپال کی غیر اعلانیہ ناکہ بندی کے آغاز کے بعد اولی مدد کے لیے چین گیا اور بیجنگ نے بخوشی اُس کا استقبال کیا۔ اِس کے بعد بھی اُس نے ہندوستان کے خلاف چینی پتے کا استعمال جاری رکھا ہے۔ بھارت کے زیادہ تر ہمسایے دہلی کے اثر و رسوخ کو کم کرنے کے لیے چین کا رُخ کرتے ہیں۔ اِس سے قبل نیپالی بادشاہتیں بھی سیاسی پارٹیوں پر بھارت کے وسیع اثر و رسوخ کو متوازن کرنے کے لیے چین کا رخ کرتی تھیں۔ اولی کی چین نواز پالیسی سے تنگ آ کر بھارت نے اسے نیپالی کانگریس کے لیڈر شیر بہادر دیوبا کی قیادت میں ایک خفیہ آپریشن کے ذریعے اقتدار سے فارغ کرنے کی کوشش بھی کی تھی تاہم سرکاری طور پر دہلی ان الزامات کو مسترد کرتا ہے اور اسے نیپال کا اندرونی معاملہ قرار دیتا ہے۔ اب اگر اولی اِس بھاری اکثریت کے ساتھ اقتدار میں آتا ہے تو چین‘ بھارت کے پچھواڑے میں اپنا اثر و رسوخ مزید بڑھائے گا۔ تاریخی طور پر نیپال میں بھارتی ریاست کا اثر و رسوخ بہت زیادہ رہا ہے اور ہندوستانی حکمران اسے اپنی کالونی ہی گردانتے ہیں۔

ہندوستان اور نیپال کے درمیان کھلی سرحد ہے اور ہزاروں نیپالی پورے ہندوستان، بالخصوص مشرقی اور شمالی ریاستوں میں رہتے اور کام کرتے ہیں۔ یہ حقیقت دونوں ممالک کے باہمی تعلقات میں ایک اہم عنصر ہے۔ ہندوستان کے ساتھ تعلقات میں مزید بگاڑ سے لاکھوں نیپالیوں کی زندگیاں متاثر ہوں گی اور ہندوستان سے آنے والا زر مبادلہ ختم ہو سکتا ہے۔

جہاں چین کی سرمایہ کاری پر مبنی سفارت کاری ایک کارآمد ہتھیار ہے‘ وہیں جغرافیہ بھی اہمیت رکھتا ہے۔ چین اور نیپال کی سرحد بہت دشوار گزار ہے۔ اولی کی پچھلی حکومت میں بھی چین کے ساتھ پٹرولیم کی رسد کے معاہدے پر عمل درآمد کوئی آسان کام نہیں تھا۔ ناقص مواصلاتی نظام اور ٹرانسپورٹ کے زیادہ اخراجات اجناس کی قیمتوں کو آسمان پر پہنچائیں گے۔ پٹرولیم مصنوعات کے علاوہ چین سے دوسری درآمدات کو بھی ہمالیہ کے دشوار گزار راستوں سے آنا پڑے گا‘ لہٰذا کوئی بھی نیپالی قیادت اپنے ملک میں وسیع غربت اور بوسیدہ سرمایہ داری کے ہوتے ہوئے بھارت کے سامراجی تسلط سے چھٹکارا نہیں پا سکتی۔ اس لیے یہ 'کمیونسٹ‘ اتحادی حکومت بھی دونوں ایشیائی طاقتوں کے درمیان توازن قائم کرنے کی کوششوں کی پالیسی جاری رکھے گی۔

المیہ یہ ہے کہ کمیونسٹ پارٹی آف نیپال (مائوسٹ سینٹر) کے سابقہ باغیوں (جنہوں نے 1996ء سے 2006ء کے دوران ریاست کے خلاف مسلح جنگ لڑی تھی) نے بھی نیپال سے سرمایہ داری کے خاتمے کی انقلابی پالیسی کو نہیں اپنایا۔ ایک لمبی گوریلا جدوجہد اور انفرادی دہشت گردی کے بعد وہ اقوام متحدہ کی سربراہی میں امن معاہدے کے تحت نیپال کی بوسیدہ سرمایہ دارانہ ریاست اور سیاست کا حصہ بن گئے۔ پشپا کمال دہل، جسے پراچندا بھی کہا جاتا ہے اور جو مائوسٹ 'نظریہ دان‘ اور گوریلا سرکشی کا لیڈر تھا، 2008ء سے 2009ء اور پھر 2016ء سے 2017ء تک نیپال کا وزیر اعظم بنا‘ اور یوں جابر ریاست کا ہی ایک اوزار بن کر رہ گیا۔ یہ کوئی حیرت کی بات نہیں ہے۔ تاریخ گواہ ہے کہ بائیں بازو کی انتہا پسندی اور مہم جوئی اکثر و بیشتر بد ترین موقع پرستی پر ختم ہوتی ہے۔ حتیٰ کہ مائواسٹ تو ہتھیار ڈالنے کے بعد نیپال کی بورژوا پارٹی نیپالی کانگریس کے ساتھ اتحاد میں چلے گئے تھے۔ اِسی طرح اولی کی پارٹی بھی کوئی حقیقی کمیونسٹ پارٹی نہیں ہے۔ یہ ایک سوشل ڈیموکریٹک پارٹی ہے اور اس کی پالیسیاں سرمایہ داری کو قبول کرتی ہیں‘ لیکن ہندوستان کی کمیونسٹ پارٹیاں بھی تو نسلوں سے یہی کام کر رہی ہے۔

اِس 'کمیونسٹ‘ اتحاد نے ہندوستان اور چین دونوں کے ساتھ اچھے تعلقات قائم کرنے کا عزم کیا ہے‘ لیکن یہ محض ایک خواب ہی ہے۔ چین اور ہندوستان کی ریاستیں اس غریب ملک میں اپنی بالادستی کے لیے لڑتی رہیں گی۔ یہ 'کمیونسٹ‘ اتحاد نیپالی عوام کی زندگی بہتر کرنے کے لیے زیادہ سے زیادہ کچھ اصلاحات ہی کر پائے گا۔ تاہم نیپال کی کمزور اور بوسیدہ سرمایہ داری میں اس طرح کی اصلاحات کی گنجائش ہی نہیں ہے جس سے محنت کشوں اور محکوم عوام کی زندگی میں بہتری آئے‘ لیکن نیپال کے محنت کشوں اور نوجوانوں نے بھی گزشتہ لمبے عرصے کے انتشار سے بہت سے نتائج اخذ کیے ہیں۔ یہاں ایک نئی انقلابی اٹھان سارا سیاسی منظرنامہ ہی بدل سکتی ہیں۔ نیپال کی کم آبادی اور رقبے کے باوجود یہ تبدیلی پورے برصغیر میں انقلابی نتائج کی حامل ہو گی۔