جنرل راوت کا درس اور کیمیکل بم

انڈین آرمی چیف جنرل بپن راوت جب مقبوضہ کشمیر سے ایجنسیوں کے منتخب کردہ مدرسوں کے طالب علموں کو قرانی آیات کے حوالے سے تشدد پسندی سے دور رہنے کا درس دے رہے تھے تو عین اسی وقت ان کی فوج کشمیریوں کے گھروںاور مساجد کو کیمیکل بموں سے نمازیوں سمیت جلا کر راکھ کر رہی تھی۔ کاش کہ مقبوضہ کشمیر کی سرکار کے بھیجے گئے طلبا کے گروپ کو پندو نصائح کا درس دینے سے پہلے وہ جان لیتے کہ قرآن میں غاصب اور خائن کے بارے میں اﷲ تعالیٰ نے کس قسم کے شدید عذاب کا حکم دے رکھا ہے۔ مقبوضہ کشمیر پر قابض بھارتی فوج 70 برسوں سے کشمیریوں کی آزادی کی بھیک مانگنے کی درخواستوں تو کبھی آزادی کیلئے جدو جہد کرنے والوں کو پیلٹ گنوں سے زندگی بھر کیلئے اندھا کررہی ہے تو کہیں کشمیر کی نوجوان بیٹیوں اور مائوںپر ظلم و بر بریت کے پہاڑ توڑ رہی ہے کہیں ایک لاکھ سے زائد نوجوانوں کو ٹارچر سیلز میں موت کی وادیوں میں پھینک رہی ہے تو کہیں فاسفورس بموں سے انہیں اپنے گھروں سمیت جلا کرراکھ کر رہی ہے۔۔۔ کہیں80 ہزار سے زائد کشمیر کی بیٹیوں کی جبری آبرو ریزی کی کالک اپنے چہروں پر مل رہی ہے ۔

بے شرمی کی حد دیکھئے کہ اسی فوج کا سپہ سالار ''پیغام امن‘‘ کے نام سے ایک نیا ڈھونگ رچاتے ہوئے بھارتی فوج اور پولیس سمیت محبوبہ مفتی سرکار کے تعاون سے مقبوضہ جموں کشمیر سے اکٹھے کئے گئے کم عمر ذہن کے طلباء کے گروپ کو بھارت کی اہم اور تاریخی عمارات میںلے جا کر جہاد کے الفاظ کو قرآن سے الٹ ثابت کرنے کیلئے ان کی برین واشنگ کر رہا ہے۔ ایسے ہی طلبا کا ایک منتخب گروپ نئی دہلی میں آرمی چیف کے دفتر بھی لایا گیا جہاں جنرل بپن راوت نے جموں وکشمیر کے ان نوجوان طلباسے اپنی خصوصی ملاقات کے دوران پوچھا کہ آپ میں سے کتنے لڑکوں نے قرآن کا مطالعہ کیا ہوا ہے؟۔ 12 دسمبر کو جنرل راوت کے دفتر میں آئے ہوئے مدرسوں کے طلباء پر مشتمل یہ گروپ جن کی عمریں13 سے22 برس کے درمیان تھیں اور ان میں سے کئی ایسے تھے جو اپنی زندگی میں پہلی مرتبہ دہلی دیکھ رہے تھے انہوں نے جنرل راوت کو بتایا کہ ہم سب قرآن پڑھ چکے ہیں اور اب بھی پڑھتے ہیں تو اس پر جنرل بپن راوت نے سوال کیا کہ آپ جانتے ہو کہ قرآن نے مذہبی انتہا پسندی کو سخت ناپسند کیا ہے ‘کاش اس وقت کوئی ایک نوجوان جنرل راوت سے پوچھتا کہ جناب آپ کی گیتا میں ہمارے ماں باپ اور بہن بھائیوں پر فاسفورس بم مارنے کا کہاں ذکر ہے ۔

جنرل بپن راوت اپنے لہجے کو بڑا نرم اور میٹھا بناتے ہوئے مدارس سے آئے ان طلبا سے کہنے لگے کہ اگر جموں کشمیر کے تمام نوجوان قرآن کی تعلیمات اور پیغام کی روح پر توجہ دیں او ر اپنے دوسرے ساتھیوں اور دوستوں سمیت اپنے خاندان کے بچوں اور لڑکوں کو قرآن کی اصل تعلیمات سے آگاہ کریں تو اس وقت جموں وکشمیر میںمذہبی انتہا پسندی کے نام سے جہاد کے نام سے جو دہشت گردی پھیل رہی ہے اس کا وجود ہی نہ رہے؟

جنرل راوت نے کہا قرآن میں امن اور برداشت کا سبق جس خوبصورتی سے بیان کیا گیا ہے بد قسمتی سے آپ لوگ اس پر پوری طرح عمل نہیں کر رہے اور نہ ہی اس پیغام کی اصل روح کو سمجھنے کی کوشش کرتے ہیں قران کے امن و آشتی کے پیغام کو آج کی نوجوان نسل کیلئے مشعل راہ بنا دیا جائے تو کشمیر سمیت اس پورے خطے میں پھیلے ہوئے بہت سے مسائل ہمیشہ کیلئے دفن ہو کر رہ جائیں گے۔ سب سے دلچسپ بات جو دیکھنے میں آئی وہ یہ تھی کہ مقبوضہ کشمیر سے لائے گئے ان طلبا سےGHQ میں آرمی چیف جنرل بپن راوت نے فوجی وردی میں نہیں بلکہ نیلے رنگ کا سوٹ پہنے ہوئے سول ڈریس میں ملاقات کی تھی۔۔۔انڈین آرمی چیف نے اپنے دفتر میں آئے سب طلبا سے فرداًفرداً ہاتھ

ملاتے ہوئے ہر ایک سے پوچھا کہ آپ نے نئی دہلی اور کشمیر میں کیا فرق محسوس کیا ہے؟۔جنرل راوت کا کہنا تھا کہ بدقسمتی سے جگہ جگہ بنے ہوئے فوجی بنکر جو آپ کشمیر میں دیکھتے ہیں نئی دہلی میں ان کا وجود ہی نہیں ہے لوگ یہاں ساری ساری رات امن اور آزادی سے گھومتے ہیں آپ کی فوج کی کوشش ہے کہ کشمیر میں بھی آپ اسی طرح آزادی سے جہاں چاہیں گھومیں پھریں آپ کو نئی دہلی اور کشمیر کا ماحول ایک جیساہی لگے۔۔۔لیکن اس کیلئے ضروری ہے کہ آپ جیسی نوجوان نسل شدت پسندی اور جہادی عناصر کی کوششوں کو ناکام بناتے ہوئے ان گمراہ لڑکوں کی نشاندہی کرے تاکہ ان کو بھی آپ کی طرح سیدھی راہ پر لایا جا سکے۔ جنرل راوت سے ملاقات کے بعد ان طلباء کو تاج محل، دہلی کی جامعہ مسجد اور لال قلعہ کی سیر کرائی گئی۔

انڈین آرمی چیف جنرل بپن راوت نے دینی مدرسوں سے تعلق رکھنے والے مقبوضہ جموں و کشمیر کے 25 طالب علموں پر مشتمل گروپ سے بات چیت کرتے ہوئے کہا کہ قرآن کبھی بھیViolence کی ترغیب نہیں دیتا‘ اس لئے آپ جیسے نوجوانوں کو ایسے اداروں اور لوگوں سے دور رہنا چاہئے جو آپ کو جہاد کا درس دیتے ہیں۔۔۔۔لیکن وہ یہ بھول گئے کہ مسلمانوں کا قرآن اور ہندو کی گیتا بے گناہوں کے گھروں پر کیمیکل بم پھینکنے کا حکم بھی نہیں دیتا۔آپ ایسے لوگوں کے ورغلانے پر خود کو اور اپنے خاندان بھر کو تکلیفوں اور پریشانیوں میں ڈالنے کی بجائے اپنی تعلیم اور درس قرآنی کے بعد کرکٹ اور فٹ بال جیسے کھیلوں کی جانب توجہ دیا کریں تاکہ آپ کی یہ خوبصورت وادی کشمیر امن کا گہوارہ بن کر دنیا بھر کو ایک بار پھر اپنی جانب متوجہ کر لے۔

Part of Integration Tour کے نام سے آئے ان طلبا ء سے گفتگو کرتے ہوئے جنرل راوت نے کہا کہ قرآن کا پیغام سوائے امن اور آپس میں بھائی چارے کے ا ور کچھ نہیں ۔۔۔ قرآن کو سمجھنے کے بعد میں اس نتیجے پر پہنچا ہوں کہ مذہبی منافرت کی بجائے Quran has given the lessons on human values اس لئے ذہن نشین کر لیں کہ آپ کو قرآن کے اس پیغام پر ہمیشہ کیلئے کاربند رہ کر زندگی گزارنی ہو گی نہ کہ لشکر طیبہ، حزب المجاہدین اور ISIS کے مذہبی حوالوں پر۔

جنرل بپن راوت نے پنجگرام کے تیرہ سالہ طالب علم عبد الحمید کے کندھے پر ہاتھ رکھتے ہوئے کہا '' میں نے سنا ہے کہ بجائے کرکٹ اور فٹ بال کھیلنے کے Youth play hide - and - seek with weapons۔۔۔ چھپن چھپائی میں ہتھیاروں کے کھیل کی بجائے۔جس دن آپ سب لڑکوں نے کرکٹ اور فٹ بال کی جانب توجہ دینی شروع کر دی تو کشمیر کے ہر گھر میں امن ہو جائے گا۔ جنرل راوت نے اپنے ساتھ ملٹری سیکرٹری کو مخاطب کرتے ہوئے کہا کہ انڈین آرمی کی جانب سے جموں کشمیر کے نوجوانوں کیلئے ہزاروں کی تعداد میں کر کٹ کا سامان اور فٹ بال مہیا کئے جائیں اور جب یہ واپس کشمیر جائیں تو یہ سامان ان کے ساتھ ہو نا چاہئے۔

اپنے اس مضمون کے ذریعے جنرل بپن راوت سے کہنا چاہوں گا کہ جناب امن کا راستہ اگر کرکٹ اور فٹ بال میں ہے تو پھر آپ کی حکومت نے اپنی ٹیم پر پاکستان سے کرکٹ کھیلنے پر پابندی کیوں لگائی ہوئی ہے؟۔ اگر آپ سمجھتے ہیں کہ کرکٹ کھیلنے سے دہشت گردی ختم ہو سکتی ہے تو دونوں ممالک خطے میں دہشت گردی کے خاتمے کیلئے ایک دوسرے کے ہاں جا کر کرکٹ کیوں نہیں کھیلتے؟۔ جب آپ تسلیم کرتے ہیں کہ آپ نے بھی قرآن پڑھا ہے جس میں صرف امن اور بھائی چارے کا پیغام ہے تو آپ اس پیغام پر عمل کرتے ہوئے خود اپنی فوج کو کیوں حکم نہیں دیتے کہ ہمارے زیر قبضہ کشمیرکے معصوم بچوں، عورتوں کو کیمیکل بموں سے ہلاک مت کرو؟۔۔!!