جرائم کی تشہیر

ہمارا گھرانا پانچ افراد پر مشتمل ہے، میرے علاوہ میری بیوی، بیوہ بہو، دس سالہ پوتا اور چھ سالہ پوتی شامل ہیں۔ ٹیلی ویژن پر بچے عام طور پر کارٹون دیکھتے ہیں اور بڑے خبریں وغیرہ دیکھ لیتے ہیں۔ کل میں اندرونِ ملک سفر سے رات دیر گئے گھر واپس پہنچا۔ میں نے ٹیلی ویژن کا ریموٹ ہاتھ میں لیا کہ کچھ تازہ خبریں اور ٹِکرز وغیرہ دیکھ لوں تو میری بیوی نے کہا کہ کچھ دنوں کے لیے ٹی وی بند کر دیں اور ریموٹ بچوں کی پہنچ سے دور رکھیں۔ میں نے پوچھا: کیا بات ہے؟، انہوں نے بتایا: محمد انیس الرحمن آج پوچھ رہا تھا کہ بچوں کے ساتھ جنسی زیادتی کیا ہوتی ہے؟‘‘۔ یہ اس لیے ہو ا کہ قصور میں رونما ہونے والے واقعات کے حوالے سے تقریباً تین ہفتوں سے ٹیلی ویژن چینلز میں سنسنی خیزی کا مقابلہ چل رہا ہے اور کسی طور ختم ہونے میں نہیں آ رہا۔ مزید یہ کہ ہماری ساری خرابیوں کا سبب یہ بتایا جا رہا ہے کہ سکولوں میں جنسی تعلیم نہیں دی جا رہی، لہٰذا ترقی یافتہ قوموں کی دوڑ میں شامل ہونے کے لیے نصابِ تعلیم کو جنسیات سے آلودہ کرنا ضروری ہے۔

یقینا ہمارے میڈیا مالکان اور کارکنا ن کے علاوہ پاکستان کے کروڑوں گھرانوں میں آٹھ سے بارہ سال تک کے بچے ہوں گے اور خون کو گرمانے والی ان خبروں کو وہ بھی سنتے اور دیکھتے ہوں گے اور ان کے ذہنوں میں بھی طرح طرح کے سوالات پیدا ہوتے ہوں گے، کیونکہ گھروں میں ٹیلی ویژن سیٹ عام طور پر کامن روم یعنی عام نشست گاہ میں ہوتا ہے اور سب چھوٹے بڑے بیٹھ کر ٹی وی دیکھتے ہیں اور بالخصوص حالاتِ حاضرہ سے متعلق خبریں دیکھتے ہیں۔ بعض مؤقر کالم نگاروں نے لکھا ہے کہ فحاشی کے مناظر کی تصاویر و ویڈیوز بنائی جاتی ہیںاور پھر ان کے ذریعے شرفا کے خاندانوں کو بلیک میل کیا جاتا ہے، مزید یہ کہ ان تصاویر اور ویڈیوز کے عالمی فحاشی کی مارکیٹ میںمنہ مانگے دام ملتے ہیں، سوال یہ پیدا ہوتا ہے کہ کیا یہ جنسی جرائم پیشہ لوگ اتنے بااثر اور عالمی روابط کے حامل ہیں؟

گزشتہ دنوں پیمرا نے ٹیلی ویژن چینلز کے نام ایک ہدایت نامہ جاری کیا تھا، اس کی دفعہ چھ میں لکھا ہے ''جرائم کے پروگراموں کی منظر کشی جو کہ جرم کی تشہیر کا باعث ہوں‘‘۔ ظاہر ہے کہ پیمرا ہدایت نامہ تو جاری کر سکتا ہے، لیکن نحیف و نزار پیمرا اس پر عمل درآمد نہیں کرا سکتا۔ انسانیت کے مجرموں کو قرار واقعی بلکہ عبرت ناک سزا دینا اشد ضروری ہے اور اس طرح کے تمام مطالبات درست ہیں، لیکن ''اشاعتِ فاحشہ‘‘ اور سنگین اخلاقی و قانونی جرائم کی تشہیر کے نوخیزاور ناپختہ ذہنوں پر مرتب ہونے والے اثرات کے سدّباب کی بھی کوئی تدبیر ہونی چاہیے۔ ہمارے الیکٹرانک میڈیامیں اس کا کوئی اہتمام نہیں ہے اور انتہائی طاقتور الیکٹرانک میڈیا کے سامنے اہلِ اقتدا ر کی بے حِسی اور بے بسی نوشتۂ دیوار ہے۔ نوعمر اورناپختہ ذہن بچے سگریٹ، شیشہ، ہیروئین، کچی شراب اور مشروباتِ خبیثہ کی وبا میں اسی طرح تو مبتلا ہوتے ہیں کہ جب کسی چیز کا ذکر کثرت سے ہو تو فطری تجسّس انہیں یہ جاننے کی طرف مائل کرتا ہے کہ آخر اس میں کشش کیا ہے؟ الغرض پہلا کش یا پہلا گھونٹ اسی کیفیت کو جاننے کے لیے ہوتا ہے، ابتدا میں جرم کے ارتکاب کا یا مجرم بننے کا ارادہ نہیں ہوتا، لیکن بد قسمتی سے یہ وہ بند گلی ہے کہ جس میں داخلے کا راستہ تو ہوتا ہے، واپس بچ کر نکلنے کا راستہ نہیں ہوتا۔

اس لیے میری درد مندانہ اپیل ہے کہ الیکٹرانک میڈیا پر جرائم کی تشہیر یا فواحش کی اشاعت کے سدّباب کا کوئی نہ کوئی اہتمام ہونا چاہیے۔ اللہ تعالیٰ کا ارشاد ہے:

(1) ''بے شک جو لوگ یہ چاہتے ہیں کہ ایمان والوں میں بے حیائی کی بات پھیلے، ان کے لیے دنیا اور آخرت میں درد ناک عذاب ہے اور اللہ تعالیٰ (ہر بات کے انجام کو) جانتا ہے اور تم نہیں جانتے۔ (النور:19)‘‘، (2) ''وہ (شیطان) تمہیں برائی اور بے حیائی کا حکم دیتا ہے اور یہ کہ تم اللہ تعالیٰ کے بارے میں ایسی بات کہو ،جس کو تم نہیں جانتے۔ (بقرہ:169)‘‘، (3) ''لوط علیہ السلام نے اپنی قوم سے کہا: بے شک تم بے حیائی کا کام کرتے ہو، جو تم سے پہلے جہان والوں میں سے کسی نے نہیں کیا، کیا تم مردوں سے شہوت پوری کرتے ہو اور راہزنی کرتے ہو اور اپنی مجلس میں برا کام کرتے ہو۔ (العنکبوت:29)‘‘۔

علامہ ابو عبداللہ محمد بن احمد قرطبی نے لکھا ہے ''فاحشہ انتہائی قبیح فعل کو کہتے ہیں‘‘، حضرت عبداللہ بن عباس سے روایت ہے ''ہر وہ برا کام جس پرشریعت نے کوئی حد مقرر نہ کی ہو''سُوئ‘‘ ہے‘‘۔ ابن جریر طبری نے لکھا ''فحشاء ہر وہ برائی ہے جس کا بیان کرنا اور سننا دونوںقبیح ہوں اور بے حیائی کے زمرے میں آتے ہوں‘‘۔ '' قرآن مجید نے زنا اور قومِ لوط کے فعل پر بھی فاحشہ کا اطلاق کیا ہے‘‘۔

آج کل ہم الیکٹرانک میڈیا کی وجہ سے بڑے پیمانے پر ''اشاعتِ فاحشہ‘‘ کے دور سے گزر رہے ہیں اور اس پر ریاست و حکومت کا تحدید و توازن کا کوئی نظام نہیں ہے اور نہ ہی نظارت یعنی Vigilance کا کوئی نظام ہے۔ بس اس حوالے سے ہم ایک اندھی مسابقت کے دور سے گزر رہے ہیں۔ مغربی ممالک میں جہاں ''اشاعتِ فاحشہ‘‘ اخلاقی برائی یا قانونی جرم کے زمرے میں نہیں آتی، کم ازکم اتنا اہتمام ضرور ہے کہ الیکٹرانک میڈیا پر فحش فلمیں یا ڈرامے رات گئے اُس وقت چلائے جاتے ہیں جب سکول جانے والے بچے سو جائیں، لیکن ہمارے ہاں چوبیس گھنٹے اس پر کوئی پابندی نہیں ہے۔

اب تو اردو زبان کی نفاست و لطافت، فصاحت و بلاغت اور ادبیت بھی قصۂ پارینہ بنتی جا رہی ہے، ٹیلی ویژن چینلز کے اینکر پرسنز نت نئے محاورے اور اصطلاحات وضع کر رہے ہیں اور وہی امامُ اللُّغات ہیں۔ چند دن پہلے ایک ادبی کالم نگار کا کالم پڑھنے کو ملا، جس میں وہ اسی طرح کے روز مرّہ اور محاوروں پر تبصرہ فرما رہے تھے، جن سے اردو لغت بورڈ والے محققین بھی آشنا نہیں ہیں، انہیں بھی شاید ان اینکرز پرسنز کی شاگردی اختیار کرنی پڑے مثلاً ''پولیس کی دوڑیں لگ گئیں‘‘ اور ''وزیراعظم کو ماموں بنا دیا‘‘ وغیرہ۔ ہماری عاجزانہ گزارشات کا مقصد یہ ہے کہ میڈیا مالکان، پالیسی سازوں، پروگرام ڈائریکٹرز اور اینکر پرسنز کے لیے تربیتی نشستوں کا اہتما م ہونا چاہیے، جن میں انہیں وطنِ عزیز کی دینی، اخلاقی اور معاشرتی اقدار کا شعور دیا جائے اور ماہرینِ نفسیات کا بھی اس میں کوئی نہ کوئی کردار ضروری ہے کہ کسی سانحے، حادثے، وقوعے، خبر یا جرم کو کس طرح پیش کیا جائے‘ کہ ہماری نئی نسل اس کے برے اثرات سے ممکن حد تک محفوظ رہے۔

اسلام نے مقاصدِ شرعیہ میںاخلاقی مفاسد اور جرائم کے سدِّباب کے لیے ''سدِّ ذرائع‘‘ کی حکمت کو اختیار کیا ہے اور اس کی شریعت میں کئی مثالیں موجود ہیں، رسول اللہﷺ نے بعض اوقات دین کی عظیم تر حکمت کی خاطر مستحب اور اَولیٰ کام کو بھی ترک فرمایا ہے، بعض اوقات کسی رخصتِ شرعی پر عمل کرنے میں صحابہ کرامؓ کو تحفظ یا انقباض ہوتا تھا، تو رسول اللہﷺ نے رخصتِ شرعی کی اباحت کے لیے خلافِ اَولیٰ کام بھی کیا اور یہ بحیثیتِ شارع آپﷺ پر واجب تھا، جیسے سفرِ جہاد میں عصر کے بعد سرِعام رمضان کے روزے کو توڑنا۔ رسول اللہﷺ نے فرمایا ''حلال واضح ہے اور حرام (بھی) واضح ہے اور ان دونوں کے درمیان مُشتبہ امور ہیں، جن کو اکثر لوگ نہیں جانتے، سو جو مشتبہ امور سے بچا رہا، اس نے اپنے دین اور آبرو کو بچا لیا اور جو مشتبہ امور میں پڑ گیا، تواس کی مثال ایسی ہے جیسے کوئی ممنوعہ چراگاہ کے ارد گرد اپنے مویشی چرائے۔ پس اس بات کا اندیشہ رہتا ہے کہ اس کے مویشی چراگاہ میں گھس جائیں گے، سنو! ہر بادشاہ کی کچھ ممنوعہ حدود ہوتی ہیں، سنو! اللہ کی ممنوعہ حدود اس کے مُحرّمات ہیں، سنو! جسم میں گوشت کا ایک لوتھڑا ہے، جب وہ لوتھڑا صحیح ہو تو سارا جسم صحیح رہتا ہے اور جب و ہ بگڑ جائے تو سارے جسم کا نظام بگڑ جاتا ہے، سنو! وہ دل ہے (صحیح مسلم:52)۔ آج ہمیں جو مسئلہ درپیش ہے اس کے بارے میں رسول اللہﷺ نے یہ احتیاطی حکم جاری فرمایا ''جب تمہاری اولاد سات سال کی ہو جائے تو انہیں نمازکا حکم دو اور جب وہ دس سال کے ہو جائیں تو ان کے بستر الگ کر دو۔ (سنن ابوداؤد:495)۔ برائی کے محرّکات سے بچنے کے لیے آپﷺ نے فرمایا: بے شک اللہ نے ابنِ آدم پر اُس کے حصے کا زنا لکھ دیا ہے، وہ اسے لازماً پائے گا، پس آنکھ کا زنا (اجنبی عورت کو) دیکھنا ہے اور زبان کا زنا (فحش) باتیں کرنا ہے اور نفس (گناہ کی) تمنا کرتا ہے اور خواہش کرتا ہے اور شرمگاہ اُس کی تصدیق کرتی ہے اور تکذیب کرتی ہے۔ (بخاری:6243)۔ المستدرک للحاکم :3751 میں بعض محرکاتِ زنا کا اضافہ ہے اور وہ یہ ہیں ''غیر محرم کو بوسہ دینا، گناہ کی طرف دست درازی کرنا اور گناہ کی طرف چل کر جانا، سوائے اس کے کہ گناہ میں مبتلا ہونے سے بچ جائے‘‘۔ اللہ تعالیٰ کا ارشادہے ''جولوگ کبیرہ گناہوں اور بے حیائی کے کاموں سے بچتے ہیں، ماسوا چھوٹے گناہوں کے، بے شک آپ کا رب وسیع مغفرت والا ہے۔ (النجم:32)‘‘۔ یعنی اگرگناہِ کبیرہ کے ان محرِّکات سے آگے بڑھ کر صریح گناہ میں مبتلا نہ ہوا، تو یہ صغیرہ گناہ ہے اور ان پر بھی اللہ تعالیٰ سے توبہ کرتے رہنا چاہیے۔