خوداحتسابی

کبھی کبھی کوئی ایک لفظ یاجملہ جودل سے نکلتا ہے سننے والوں کے دل میں ترازو ہوجاتا ہے اور عمر بھر کے لئے ان کا دم ساز بن جاتا ہے۔اس روز بھی ایسے ہی ہوا۔ ایوان ِصدارت میں انسدادِبدعنوانی کے حوالے سے ایک تقریب تھی جس میں صدرِمملکت جناب ممنون حسین اور نیب کے سربراہ جناب جسٹس جاوید اقبال شریک تھے۔ مقررین میں غیرملکی تنظیموں کے سربراہ بھی شریک تھے یہ تقریب انسدادِ بدعنوانی کے عالمی دن کے حوالے سے تھی۔ جسٹس جاوید اقبال نے اپنے ادارے کے طریقِ کار کی وضاحت کی جس میں بدعنوانی کے خاتمے کیلئے تین مختلف سطحوں Prevention,Awareness اور Enforcement پرکام کیاجارہاہے۔ اس کے بعد جسٹس صاحب نے لکھی ہوئی تقریرسے ہٹ کر گفتگو شروع کی اوریہی وہ مقام تھا جہاں دل سے نکلنے والی آواز سننے والوں کے دلوں میںگھر کرجاتی ہے۔وہ کہہ رہے تھے معاشرے میں بدعنوانی ختم کرنے کاسب سے اہم نکتہ خوداحتسابی ہے۔جس میں باہر کی سزا سے زیادہ ضمیر کی خلش کاخوف ہو اوراگر ہرشخص، چاہے وہ کسی بھی شعبے میںہو، ہر لمحے اپنا احتساب خودکرے تومعاشرے میں بدعنوانی کی شرح نیچے آسکتی ہے۔یہ آواز مجھے کئی برس پیچھے لے گئی۔ مجھے یوں لگا میں گورڈن کالج میں ایم اے انگلش کی کلاس میں بیٹھا ہوں۔ آج ہمارے سیشن کا آخری دن ہے۔ سجاد شیخ صاحب ہمیں آخری لیکچردے رہے ہیں لیکن آج کالیکچر انگریزی ادب کے حوالے سے نہیںبلکہ زندگی کے حوالے سے ہے۔ سجاد شیخ صاحب کاذکرآتے ہی ایک آئیڈیل ٹیچر کاتصور ذہن میں آتاہے۔شیخ صاحب محنت، دیانت اور شرافت کا مرقع تھے۔ ہمیشہ کلاس میں لیکچر کی بھرپور تیاری کے ساتھ آتے۔ کلاس میں کبھی کسی کا مضحکہ نہ اڑاتے۔ مجھے یادنہیں ہمارے ایم اے کے پورے سیشن میں انہوںنے کبھی چھٹی کی ہو ۔ہم اکثر دعاکرتے کبھی تو ایسا دِن آئے جب شیخ صاحب کالج نہ آئیں۔ آخر وہ دن آہی گیا جس کا ہمیں مدتوں سے انتظار تھا اس دن ہماری دعا قبول ہوتی نظرآئی۔ صبح سے روز موسلادھار بارش ہورہی تھی‘ ہماری کلاس جوبلی ہال کی بالائی منزل سے متصل کمرے میںہوتی تھی۔جہاں کے روشن دان سے باہر کا منظر نظر آتا تھا۔ شیخ صاحب کو سیٹیلائٹ ٹاؤن سے آنا ہوتا تھا‘ کبھی ویگن‘ کبھی ٹیکسی‘ کبھی بس میں۔ اس روز سارے راستے جل تھل تھے۔ آسمان پر سیاہ گھٹاؤں نے گردوپیش کو تاریک کر دیا تھا۔ دن میں بھی رات کا گماں ہوتا تھا۔ ہمیں یقین ہو چلا تھا آج شیخ صاحب کا آنا محال ہے۔ یہ تصور بھی کتنا خوش کُن تھا کہ آج کلاس نہیں ہو گی ا ور ہم کالج روڈ پر واقع زم زم کیفے میں جائیں گے جہاں شیشے کے چھوٹے گلاسوں میں چائے ملتی تھی اور جہاں ہم چھوٹی چھوٹی چٹوں پر فرمائشی گانے لکھ کر دیتے اور گراموں فون ریکارڈ پر ہماری پسند کے گیت چلائے جاتے۔ ہم سوچ رہے تھے کہ بارش میں توچائے اورگیتوں کا لطف اور بڑھ جائے گا ۔ لیکن ہمارے تصور کا شیش محل اچانک ایک چھناکے سے ٹوٹ جاتا ہے جب ہمارے ایک ہم جماعت کی چیختی ہوئی آواز آتی ہیـ''شیخ صاحب‘‘۔ ہم سب روشن دان سے باہر کا منظر دیکھتے ہیں جہاںموسلا دھار بارش میں تیز ہوا کے زور سے الٹی سیدھی ہوتی چھتری کے ہمراہ شیخ صاحب آ رہے تھے۔ اس روز شیخ صاحب کوہمارے ایک دوست نے کہا سر ہم توسمجھے تھے آج آپ نہیں آسکیں گے ۔ شیخ صاحب مسکرائے اور کہنے لگے Only death can part us (صرف موت ہی ہمیں جدا کر سکتی ہے) اور پھر ایک دن واقعی موت نے ان کو ہم سے جدا کر دیا، لیکن یہ اُس دن کی بات ہے جب ہمارے سیشن کا آخری دن تھا اور شیخ صاحب ہمیں کا رزار ِحیات کے لیے تیار کر رہے تھے۔شیخ صاحب نے ہمیں تین چیزوں کی تلقین کی۔ وہ بولے: سب سے پہلی چیز پابندی وقت ہے۔ آپ زندگی کے کسی بھی شعبے میں جائیں وقت کی پابندی کو اپنے اوپر لازم کر لیں۔ دوسری اہم چیز اپنے کام سے لگن اور پیشگی پلاننگ ہے۔ کبھی اپنے کام کو Taken for grantedنہ لیں۔ شیخ صاحب کے مطابق تیسری اہم چیز دوسروں کی عزت نفس کا احترام کرنا ہے۔ شیخ صاحب کا کہنا تھا کہ ہر انسان چاہے وہ چھوٹا ہویا بڑا ، امیر ہو یا غریب اس کی عزت نفس ہوتی ہے آپ کسی بھی منصب پر پہنچ جائیں پوری کوشش کریں کہ آپ کی کسی حرکت، کسی بات اور عمل سے دوسروںکی عزت نفس مجروح نہ ہو۔ ان تین باتوں کا ذکر کرنے کے بعد شیخ صاحب نے کہا اور اب میں آپ کو سب سے اہم بات بتانے لگا ہوں اور وہ یہ کہ ان تین نصیحتوںپر عمل درآمد کسی بیرونی خوف اور لالچ کے بجائے آپ کے اندر کی آواز پر ہونا چاہیے دوسرے لفظوں میں آپ کے اندر ایک مانیٹر آپ کو صحیح اور غلط میں فرق بتاتا رہے جو آپ کو ان تین نصیحتوں کو ہمہ وقت یاد دلاتا رہے۔ جب آخری دن کا آخری لیکچرختم ہوا اور ہم کمرے کی سیڑھیاں اتررہے تھے تو دل کی عجیب سی کیفیت تھی۔ میں نے پلٹ کر دیکھا اور سوچا اب ان سیڑھیوں پر شاید ہمارے قدم دوبارہ نہیں پڑیںگے۔ اس دن کوبیتے تقریباً چاردہائیاں ہونے کو آئی ہیں۔ اس عرصے میں شیخ صاحب کی تین نصیحتیں ہمیشہ میری ہم سفررہیں۔ میں سوچتا ہوں کیسے ایک استاد کی باتیں اوراس کاعمل اس کے شاگردوں کو متاثرکرتاہے۔ کیسے احتساب کا اندرونی مانیٹر ہمیں اقدارسے جوڑ کر رکھتا ہے۔ کئی سال پہلے مجھے کینیڈا کی براک یونیورسٹی (Brock University) میں ایک کانفرنس میں جانے کااتفاق ہوا۔ کانفرنس کے دوران چائے کے وقفے میں وہاں کے ایک نوجوان پر وفیسر سے ملاقات کا ہوئی۔ تفصیلی ملاقات کے لیے اگلے روز چار بجے کاوقت طے ہوا۔میں وقت مقررہ پر تیسری منزل پرواقع پروفیسر کے آفس پہنچا تو وہ بند ملا۔ میں نے سوچا شایدوہ میٹنگ کے بارے میں بھول گیا ہو۔ میںجانے کے لیے واپس مڑ ہی تھاتو دیکھا کہ نوجوان پروفیسر تقریباً دوڑتا ہوا آفس کی طرف آرہاتھا۔لفٹ آنے میںدیر تھی وہ سیڑھیاںپھلانگتا ہوا آیاتھا۔اس کی سانس پھولی ہوئی تھی۔ مجھے دیکھ کر کہنے لگا‘ معاف کرنا مجھے دیر ہوگئیI hate to miss the appointments اس بات کو کئی برس گزر چلے ہیں اب بھی میرے حافظے میں اس دن کی یاد آج تک روشن ہے۔ یہ ہے وہ اندر کا مانیٹر جو آپ کو وعدے کے ایفا پرمجبور کرتاہے۔ پاکستان میں کئی بار ایسے واقعات سننے کوملتے ہیں کہ سواریاں ٹیکسی اور رکشے میں اپنا قیمتی سامان بھول جاتی ہیں اور ٹیکسی ڈرائیور یارکشے والا یہ سامان بحفاظت ان کو واپس پہنچادیتاہے۔ یہ سب کچھ ایک اندر کے مانیٹر سے ممکن ہے۔

خوداحتسابی کے تصور کو پروان چڑھانے میںہمارے سماجی ادارے اہم کردارادا کرسکتے ہیں۔ اس میں خاندان، تعلیمی و مذہبی اداروں اور میڈیاکامرکزی کردار ہے۔بچے کی شخصیت انہی اداروں سے تشکیل پاتی ہے لیکن اس کے لیے ایک کڑی شرط ہے اور وہ یہ کہ استاد بچوں کوجس بات کی نصیحت کرے وہ اوصاف خود اس کے اندر پائے جاتے ہوں ۔بالکل اسی طرح جیسے سجاد شیخ خودبھی وقت کے پابندتھے‘ ہمیشہ لیکچرتیار کرکے کلاس میں آتے تھے اورکبھی کلاس میں کسی کی تضحیک نہیںکرتے تھے۔ اسی لیے جب انہوںنے تین نصیحتوں کوہمارے پلوسے باندھا توہمیشہ کے لیے ہماری شخصیت کاحصہ بن گئیں۔

آج کئی دہائیوں بعد ایوانِ صدر کی تقریب میں جناب جسٹس جاوید اقبال کے خوداحتسابی کے تصور نے مجھے سجادشیخ اوران سے جڑی ہوئی باتوں کی یاد دلادی۔ کبھی کبھی کوئی ایک لفظ یاجملہ جو دل سے نکلتا ہے‘ سننے والوں کے دل میں تراز و ہوجاتاہے او ر عمر بھر کے لئے ان کا دم ساز بن جاتا ہے۔