جنرل اسد درانی کٹہرے میں ...!

اس دفعہ آئی ایس آئی کے سابق چیف جنرل اسد درانی کٹہرے میں ہیں ۔

کچھ برس قبل جنرل شاہد عزیز کٹہرے میںلائے گئے تھے۔ الزام دونوں پر ایک ہی ہے جو سقراط کے ٹرائل کی یاد دلاتا ہے۔ان دونوں جرنیلوں پر الزام لگا کہ انہوں نے کتابیں لکھیں اور ملکی راز کھول کر رکھ دیے۔ جنرل شاہد عزیز پر بھی شدید تنقید ہوئی تھی کہ کیوں کتاب لکھی؟ ٹی وی کے پروگراموں سے لے کر کالموں تک میں جنرل شاہد عزیز کی مذمت کی گئی۔ اس وقت ہی کتاب کیوں لکھی؟ لعن طعن کی گئی۔ مجھے لگا‘ اب کوئی جنرل بھول کر بھی کتاب نہیں لکھے گا۔ اس وقت بھی میں نے جنرل شاہد عزیز کے حق میں ایک کالم روزنامہ ''دنیا‘‘ میں ہی لکھا تھا کہ جنرل کو بولنے دیں ۔ کچھ تو پتہ چلے جنرل مشرف دور میں کیا ہورہا تھا۔ کون کیا کررہا تھا‘ لیکن ہم سب لٹھ لے کر جنرل شاہد عزیز کے پیچھے پڑگئے اور اس کو گھر تک چھوڑ کر آئے کہ آئندہ کوئی بات لکھنے کی کوشش کی‘ تو تمہاری خیر نہیں۔

اب کی دفعہ جنرل اسد درانی ہاتھ لگ گئے ہیں۔ مجھے امید ہے‘ جو لوگ ان پر گولہ باری کررہے ہیں‘ ان میں سے اکثریت نے وہ کتاب نہیں پڑھی۔ واٹس ایپ گروپس میں یہ کتاب ایک فائل کی شکل میں بہت سارے دوستوں نے بھیجی ہے اور مجھے یہ بھی پوری امید ہے کہ جنہوں نے بھیجی ہے ‘انہوںنے خود کتاب نہیں پڑھی ۔ سارے غصے کی بنیاد وہ ٹی وی خبریں اور اخباری تراشے ہیں‘ جو کتاب سے لے کر شائع کئے گئے۔ جتنا میں نے اب تک اس کتاب میں پڑھا ہے‘ میرا خیال ہے ‘وہ کسی حد تک غلط بھی رپورٹ ہوئے ہیں۔

جنرل درانی اور'' را‘‘ کے چیف کے درمیان ہونے والی گفتگو ہوسکتا ہے کہ بہت ساروں کو اس وجہ سے نہ پسند آئے کہ بھلا کیسے دو دشمن ملکوں کے سابق انٹیلی جنس چیفس اتنے دوستانہ ماحول میں بیٹھ کر بہت اہم ، نازک اور حساس موضوعات پر کھل کر گفتگو کرسکتے ہیں۔

مجھے یہ کتاب بہت دلچسپ لگی ہے۔ جب کتاب ختم ہوگی‘ تو میرے پاس انفارمیشن کا خزانہ ہوگا۔ جہاں مجھے آئی ایس آئی کی ورکنگ کے بارے میں پتہ چل رہا ہے‘ وہیں بھارتی ایجنسی ''را ‘‘کا بھی اندازہ ہورہا ہے کہ وہ کیسے آپریٹ کرتے ہیں۔ مجھے بتائیں اب کتنے ٹی وی چینلز، کالم نگاروں اور اخبارات نے آپ کو یہ بتایا ہے ؛'' را‘‘ کے سابق چیف نے پاکستانی آئی ایس آئی کی تعریف کی ہے۔ بھارت میں کسی نے ''را‘‘ کے سابق چیف کی مذمت کی کہ کیوں دشمن آئی ایس آئی کی تعریف کی ہے؟ جب میزبان صحافی نے جنرل درانی سے وجہ پوچھی کہ آئی ایس آئی اتنے کم وقت میں کیسے دنیا کی بڑی ایجنسی بن گئی؟ تو جنرل درانی نے بہت خوبصورت جوابات دیے ‘ جو دل کو لگتے ہیں۔

زیادہ شور کشمیر میں پاکستانی حمایت کے اعتراف اور ممبئی حملوں کے متعلق کیا جارہا ہے۔ پہلی بات تو یہ ہے جنرل مشرف کھل کر کہہ چکے ہیں کہ کشمیر میں لڑنے والے ہمارے ہیرو ہیں اور وہ ہم نے پیدا کیے تھے ۔ حافظ سعید جنرل مشرف کا ہیرو ہے۔ سابق ڈی جی آئی ایس آئی جنرل ضیاء الدین بٹ نے ٹی وی انٹرویو میں کہا تھا کہ نان سٹیٹ ایکٹرز ہماری فرسٹ ڈیفنس لائن ہیں۔یہ کون سا راز ہے‘ جس کا علم نہیں؟ کون سا ریٹائرڈ فوجی ہے‘ جو ان نان سٹیٹ ایکٹرز‘ جو کشمیر یابھارت میں کارروائیاں کرتے ہیں‘ کا دفاع ٹی وی پر نہیں کرتا یا انہیں 'اون‘ نہیں کرتا؟

دوسرا بڑا اعتراض اسامہ بن لادن پر آرہا ہے۔ جنرل نے کہا: پاکستان نے اسامہ کو امریکہ کے حوالے کیا ۔ اس پر جنرل درانی نے واضح کیا کہ یہ بات میں پہلے ٹی وی پر بھی کہہ چکا ہوں اور یہ میری assessment ہے۔ اندازے اور انفارمیشن میں بھی بہت فرق ہوتا ہے اور جنہوںنے کتاب سے یہ پیراگراف ترجمہ کیا ہے‘ وہ سمجھنے میں ناکام رہے ہیں ۔ اندازہ ہر کسی کا ہوتا ہے‘ جو غلط یا درست ہوسکتا ہے‘ لیکن انفارمیشن کا مطلب ہوتا ہے‘ بات پکی ہے۔ کسی کے اندازے لگانے سے آسمان نہیں گر پڑتا‘ لیکن اگر کوئی یہ کہتا ہے کہ اس کی انفارمیشن ہے ‘تو پھر یقینا آسمان گرنے کے امکانات بڑھ جاتے ہیں۔ ہمارے ہاں اندازے اور انفارمیشن کے فرق کا بھی نہیں پتہ تو پھر دیواروں سے سر ٹکراتے رہیں ‘آپ ۔

جنرل درانی نے کہا: میں ٹی وی پر پہلے کہہ چکا ہوں یا تو اسامہ کو ہم نے چھپا کر رکھا ہوا تھا یا کسی مرحلے پر ہمیں پتہ تھا کہ اسامہ پاکستان میں ہے، بہرحال ہمیں اپر ہینڈ تھا۔ شاید کسی مرحلے پر آئی ایس آئی کو بھی پتہ چل گیا تھا اور امریکہ کو کسی انڈرسٹینڈنگ کے تحت حوالے کیا گیا ہو۔ شاید ہم نے امریکن کو کہا ہو: اسامہ کو لے جائو اور ہم ایسے ظاہر کریں گے‘ جیسے ہمیں پتہ نہیں تھا۔ اگر ہم نے اس میں کسی رول سے انکار کیا ہے ‘تو اس کا مطلب یہ تھا کہ حکومت ِوقت کے لیے مسائل کھڑے ہوسکتے تھے ‘اگر یہ پتہ چلتا کہ ہم نے امریکہ سے تعاون کیا ہے۔

اب ذرا بتائیں‘ اس میں کہاں جنرل درانی نے کہا ہے کہ یہ ان کی پکی انفارمیشن ہے اور یہ سب کچھ ہوا ہے؟ اس نے ہر جگہ لفظ perhapsاور assessment استعمال کیا ہے۔

ویسے یہ بات وکی لیکس میں بھی آچکی ہے۔ یوسف رضا گیلانی نے امریکیوں کو کہا تھا: آپ ڈرون مارتے رہیں‘ ہم مذمت کرتے رہیں گے۔ یہی کچھ جنرل مشرف نے امریکیوں سے طے کیا تھا۔ یہی کچھ جنرل کیانی نے طے کیا :آپ ڈرون مارتے رہیں‘ ہم مذمت کرتے رہیں گے۔ ڈان کی سٹوری تھی کہ جنرل کیانی نے امریکیوں کو ٹارگٹ دیا تھا کہ وہ ڈرون استعمال کریں۔ تو یہ کون سی نئی بات ہے‘ جو جنرل درانی کررہے ہیں کہ ''شاید‘‘ہم نے یہی کچھ اسامہ کے معاملے پر بھی کیا ؟

ممبئی حملوں کے بارے میں بھی یہی شور مچایا گیا ہے۔ کیونکہ ہمارے ہاں کتابیں پڑھنے کا کوئی رواج نہیں ہے‘ لہٰذا پھر چائے کی پیالی میں طوفان اٹھایا گیا ہے۔ اگر کسی نے سابق ڈی جی ایف آئی اے طارق کھوسہ کی چند ماہ پہلے آنے والی کتاب پڑھی ہوتی‘ تو پتا ہوتا کہ وہ تفصیل سے بتا چکے ہیں کہ کیسے یہ سب حملہ پاکستان سے پلان کیا گیا ۔

جب آپ یہ کتاب پڑھنا شروع کرتے ہیں‘ تو آپ کو واضح ہوجاتا ہے کہ یہ جنرل درانی کے اپنے خیالات ، اندازوں اور تبصروں پر مبنی کتاب ہے۔ اس نے اپنے خیالات شیئر کیے ہیں ‘نا کہ اس نے کوئی راز افشاں کیے ہیں ۔ اس کتاب کو پڑھتے ہوئے آپ کو محسوس ہوتا ہے کہ کئی سوالات ایسے کیے گئے‘ جس کا مقصد ان سے انفارمیشن نکلوانا تھا‘ لیکن جنرل درانی نے سمجھداری سے بات کی اور بات موڑ دی۔ سوال کرنے والے کا بھی قصور نہیں ہے کیونکہ جب آپ ایک سابق ڈی جی آئی ایس آئی سے مل رہے ہوتے ہیں‘ تو پھر آپ موسم پر تو گفتگو نہیں کریں گے بلکہ کوشش ہوگی کہ ایسی انفارمیشن نکلے ‘جو لوگوں کے لیے دلچسپی کا باعث ہو۔

اس قوم کو نہ سچ سننے کی عادت ہے اور نہ ہی دلچسپی ۔ ہم ایک ہیرونچی کی طرح جیے جانے پر یقین رکھتے ہیں۔ چند لوگ جو کچھ ہمیں بتا دیں، جو بیانیہ ہمیں دے دیں ‘ ہم نے اس پر زندہ رہنا ہوتا ہے۔ ساری عمر ہم درسی کتب کے علاوہ کوئی کتاب نہیں پڑھتے بلکہ اس کوبھی رٹا لگا کر پڑھتے ہیں کیونکہ ہم نے امتحان دینا ہوتا ہے۔

ویسے اب بڑے عرصے تک کوئی اور جنرل کتاب لکھنے کی جرأت نہیں کرے گا۔ چند لوگ کیا گیمز کھلتے رہتے ہیں‘ ان کا پتہ نہیں چلے گا ۔ جو یہ کھیل کھیلتے رہتے ہیں‘ ان کے اپنے بچے امریکہ لندن رہتے ہیں‘ وہیں پڑھتے اور ہمارے جیسے بدنصیبوں کو اتنا حق بھی نہیں کہ جان سکیں کہ اس خطے میں دونوں ملکوں کے انٹیلی جنس ادارے کیا کیا کھیل رہے تھے۔بہتر ہوتا جنرل درانی اور'' را‘‘ چیف دلت کو استعمال کر کے دونوں ملکوں میں تعلقات بہتر کرنے کی کوشش کی جاتی ۔ اس خطے سے جنگی جنوں اور پراکسی جنگوں کے خاتمے اور مسائل کے حل کے لیے انہیں استعمال کیا جاتا‘ لیکن الٹا ہم توپیں ‘گنیں لے کر ان کے پیچھے پڑگئے ہیں۔ ہمیں بھی کتابیں پڑھنے اور شعور سے ایسی ہی نفرت ہے‘ جیسی سقراط کے زمانے میں یونان میں تھی۔ سقراط کٹہرے میں پیش ہوا‘ تو جج نے پوچھا کیا :الزام ہے؟ جواب ملا: یہ ہمارے بچوں کو اپنی گفتگو سے خراب کررہا ہے۔ پراسیکیوشن کے وکیل نے الزامات لگا کر سقراط کے بولنے سے پہلے ججوں کو خبردار کیا۔ یہ لوگوں کو لچھے دار باتوں میں گھیر لیتا ہے۔ خبرداراس کی باتوں میں نہ آجانا۔

وہی کچھ ہمارے ہاں ہورہا ہے۔جو کتاب چھپتی ہے ‘اس پر رولا پڑ جاتا ہے؛ خبردار نہ پڑھنا‘ آسمان گر پڑے گا ۔ شاہد عزیز کے انکشافات کے بعد بھی آسمان نے گرنا تھا‘ دو برس سے زائد ہوگئے ہیں‘ ابھی نہیں گرا۔ اب دیکھتے ہیں کہ جنرل درانی کے اندازوں اور تبصروں سے آسمان کب گرتا ہے۔