بھارت کا آئین معطل ہو سکتا ہے؟

آئین ہند کاحصہ سوئم اقلیتوں کے بنیادی حقوق سمیت تمام بھارتیوں کو شہری حقوق کی ضمانت فراہم کرتا ہے۔ اسی طرح ریاست کو فرد کی ذاتی آزادی میں مخل ہونے سے باز رکھنے کے ساتھ ساتھ‘ شہریوں کے حقوق کے تحفظ کی ذمہ داری بھی عائد کرتا ہے۔ بھارتی آئین میںسات بنیادی حقوق فراہم کیے گئے ہیں۔ جن میںمساوات ‘ آزادی‘ غصب کے خلاف‘ مذہب‘ ثقافت ‘ تعلیمی آزادی‘ جائیداد اور آئینی چارہ جوئی کے حقوق شامل ہیں‘ تاہم جائیداد کے حق کو 1978ء میں 44 ویں ترمیم کے ذریعہ آئین کے تیسرے حصہ سے ہٹا دیا گیا۔ بنیادی حقوق کا مقصد انفرادی آزادی اور اُن جمہوری اصولوں کا تحفظ ہے‘ جو معاشرے کے تمام افراد کی مساوات پر مبنی ہیں۔ دفعہ 13 کے تحت یہ حقوق مقننہ اور عاملہ کے اختیارات کو محدود کرتے ہیں۔ ان حقوق کی خلاف ورزی پر بھارت کی عدالت ِعظمیٰ اور ریاستی عدالتوں کو یہ اختیار حاصل ہے کہ ایسی کسی قانون سازی یا عاملہ کی کارروائی کو غیر آئینی قرار دے سکیں۔

بنیادی حقوق مطلق نہیں ہیں؛چنانچہ عوامی مفادات کے تحفظ کی خاطر ان پر مناسب پابندیاں بھی عائد کی جا سکتی ہیں۔ 1973ء میںیشوانند بھارتی بمقابلہ کیرالا حکومت کے معاملے میں‘ بھارتی عدالت ِعظمیٰ نے 1967ء کے اپنے سابقہ فیصلے کو منسوخ کرتے ہوئے فیصلہ کیا کہ بنیادی حقوق میں ترمیم کی جا سکتی ہیں؛ اگر اس طرح کی کسی ترمیم سے آئین کے بنیادی ڈھانچے کی خلاف ورزی ہوتی ہو تو عدالتی نظرثانی کے تحت پارلیمنٹ کے ہر ایوان میں دو تہائی اکثریت سے منظور آئینی ترمیم کے ذریعے‘ بنیادی حقوق میں اضافہ یا حذف کیا جا سکتا ہے ۔ ہنگامی صورت حال نافذ ہونے کی صورت میں دفعہ 20 اور 21 کو چھوڑ کردیگر بنیادی حقوق میں سے کسی کو بھی صدر جمہوریہ کے حکم سے عارضی طور پر معطل کیا جا سکتا ہے‘ نیز ایمرجنسی کے دوران صدر جمہوریہ کے حکم سے آئینی چارہ جوئی کے حقوق کو بھی معطل کیا جا سکتا ہے۔

بھارت میں مذہبی اقلیتوں کا ذکر کیا جائے‘ تو برصغیر کی تقسیم کے بعد ان کی اہمیت بڑھ جاتی ہے۔بھارت کی تقسیم ہی مذہبی بنیاد پر ہوئی تھی۔ بھارتی آئین اقلیتوں کے حقوق کے تحفظ کی بات تو کرتا ہے‘ لیکن جو حقوق آئین اقلیتوں کو دیتا ہے‘ ریاست اُن حقوق کے تحفظ کے لئے یا تو بے بس نظر آتی ہے یا وہ خود ان حقوق کے تحفظ کی راہ میں رکاوٹ ہے۔ بھارت کی موجودہ آبادی سوا ایک ارب کے قریب ہے ‘جن میں11.67 فیصد مسلمان‘ 2.32فیصدعیسائی‘ 1.79فیصد سکھــ‘0.77فیصد بُدھ مت اور 4 فیصد پارسی شامل ہیں۔ بھارتی آئین میں پانچ اقلیتوں کو قومی طور پر اقلیت تسلیم کیا گیا ہے۔ مسلمان‘ سکھ‘ بدھ مت اور پارسی سر فہرست ہیں۔ آئین ترتیب دینے والوں نے بھارت میں اقلیتوں کے حقوق کے تحفظ کا مکمل احاطہ کیا ‘لیکن آئینی تحفظ کے باوجود بھارتی حکومت اقلیتوں کو درپیش مسائل کا حل نہیں نکال سکی‘ جس کی وجہ سے اقلیتوں کو آج بھی امتیازی اور عدالتی مسائل کا سامنا ہے۔

مسلمانوں کو بھارتی حکومت کی عدم تعاون کی وجہ سے بے شمار مسائل کا سامنا ہے۔ تعلیم ودیگر شعبوں میں معاشی طور پر حکومت کی طرف سے سہولتیں نہ ہونے کی وجہ سے‘ مسلمان معاشرے کا کمزور ترین نا خواندہ طبقہ بن کر رہ گئے ہیں۔ سِکھ کمیونٹی کاحال بھی کچھ ایسا ہی ہے‘ ان کے بھی سیاسی اور معاشی بہت سے تحفظات ہیں۔بھارتی حکومتوں کی سرپرستی میں ریاستی ایجنسیوں کی کارروائیوں سے اقلیتیں بہت پریشان ہیں۔ بھارتی آئین ‘غیر امتیازی سلوک اور عام شہری ہونے کے تصور کو اقلیتوں کے لئے کوئی خاص مقام نہیں دیتا ۔بھارتی آئین کے آرٹیکل 14 کے تحت ریاست کسی بھی شخص کو مساوی حقوق دینے سے انکار نہیں کرسکتی۔ اس آرٹیکل کے تحت اقلیتی اور اکثر یتی عوام کو ایک جیسے حقوق حاصل ہیں۔بدقسمتی سے حقیقت اس کے برعکس ہے۔ اقلیتوں کو آئین کے تحت جو بنیادی حقوق حاصل ہیں ‘ان کا ایک فیصد بھی نہیں مل رہا‘ عیسائی کمیونٹی کا ذکر کیا جائے تو انہیں بھی بے شمار مسائل کا سامنا ہے۔ آئین کے آرٹیکل 15کے تحت کسی شخص کے ساتھ مذہب کی بنیاد پر امتیازی سلوک بالکل ممنوع ہے اور نہ ہی ذات‘ جنس‘ مقام اور پیدائش کی وجہ سے کسی کے ساتھ امتیازی سلوک روا رکھا جا سکتا ہے ۔ عیسائیوں کے حقوق کے تحفظ کے لئے بھارتی قانون کو آئین کا حصہ بنایا گیا‘ لیکن اس پر عملدرآمدآج تک نہ ہو سکا۔ صدارتی حکم نامہ کے تحت سکھوں‘ بدھ متوں اور ہندوؤں کو آئینی فوائد دیے گئے‘ لیکن دلت عیسائیوں کو اس حق سے محروم رکھا گیا۔ آئین کی رو سے مساوی حقوق کی بات کی جائے تو دلت عیسائیوں کے ساتھ انصاف نہیں کیا گیا۔ شیڈولڈ کاسٹس کے بارے میں بھارت کے آئین کا آرٹیکل 14‘15 اور25 اقلیتوں کے حقوق کے تحفظ کا ذکر کرتا ہے ‘جبکہ قانون اس کے متصادم ہے۔

ریاست روزگار فراہم کرنے کا واحد ادارہ ہوتی ہے ‘لیکن بھارتی اقلیتوں کے ساتھ یہاں بھی امتیاز ی سلوک روا رکھاگیا۔ ہندوازم‘ سکھ ازم اور بدھ متوں کو تو آئین کے تحت سرکاری عہدوں کے لئے اہل قرار دیاگیا ‘لیکن عیسائیوں کودور رکھا گیا ۔ایسا صرف مذہب کی بنیاد پرہوا‘۔شیڈولڈ کاسٹ کے نام پرپریتم سنگھ کو تو ملازمت کے سلسلہ میں آئینی تحفظ حاصل ہے ‘لیکن پریتم مسیح کونہیں۔ مسلمانوں کو آئینی طور پر حاصل حقوق بھی اس کے مترادف ہیں‘ مسلمان آج بھی بھارت میں کسمپرسی کی زندگی گزارنے پر مجبور ہیں۔ انہیں آئین کے تحت حاصل بنیادی حقوق سے بھی دور رکھا گیا ہے۔

بھارت میں اقلیتوں کے مذہبی مقدس مقامات مساجد‘ گرجا گھر اور گوردوارے محفوظ نہیں۔انتہا پسند ہند و تنظیموں کے کارندے آئے روز انہیں نشانہ بنائے رہتے ہیں۔ بابر ی مسجد اور گولڈن ٹیمپل کے واقعات سے کون واقف نہیں؟اب تو سکھ کمیونٹی بھی مکمل طور پر باغی نظر آتی ہے۔ خالصتان تحریک کے بانی اور ورلڈ مسلم سکھ فیڈریشن کے چیئرمین سردار منموہن سنگھ خالصہ نے اپنے بیان میں کہا ''دعا کریں کہ بھارت کے وزیراعظم نریندر مودی اگلی دفعہ بھی بھارت کے وزیراعظم بن جائیں۔ ان کی مزیدبیوقفانہ حرکتوںسے بھارت میں ہی نیا پاکستان اور خالصتان بن جائے گا‘‘۔ عالمی برادری نے بھارت کی پرتشدد کارروائیوں پر خاموشی اختیار کررکھی ہے۔کرنسی بحران بھی وہاں کا ایک بہت بڑا ڈرامہ ہے۔ سکھوں اور کشمیریوں کے حق خود ارادیت کے مطالبے کو دہراتے ہوئے۔ منموہن سنگھ کا کہنا تھا کہ بھارت میں صرف یہی دو قومیں شناخت کے بحران سے دوچار نہیں ‘ بلکہ کئی مذہبی‘ علاقائی قومیت اور دلت اپنے بنیادی حقوق کے حصول کیلئے جدوجہد میں مصروف ہیں۔ سکھ اور کشمیری بھارت سے مکمل آزادی چاہتے ہیں۔سکھ پرامن انداز میں خالصتان ریفرنڈم 2020 ء کی تحریک چلارہے ہیں ‘لیکن بھارتی ایجنسیاں اپنے تربیت یافتہ دہشت گردوں کی مدد سے سکھوں کا عالمی تشخص خراب کررہی ہیں۔ خالصتان ہر سکھ کے دل میں بستا ہے۔بھارت میں سکھوں کو آرٹیکل 25۔B۔2 کے تحت ہندو دھرم کا حصہ بتایا گیا‘جو سکھوں کی منفرد شناخت کو رد کرنے کی سازش قرار دیا جاتا ہے۔ 1984ء میں بھارت میں آپریشن بلیو سٹارکے تحت سکھوں کے قتل عام کے بعدخالصتان کی تحریک کو کچل دیا گیا‘جس کے بعد بہت سے سکھوں نے دوسرے ملکوں میں اپنی زندگیوں کا آغاز کیا۔ ایک عشرے تک خاموشی اختیار کرنے کے بعد اپنی تنظیموں کو دوبارہ منظم کرنا شروع کردیا ہے۔ آج خالصتان کی تحریک کو امریکہ اور کینیڈا کے علاوہ دوسرے یورپی ممالک میں آزادی اور انسانی حقوق کے حوالے سے مقبولیت مل رہی ہے۔کئی سکھ تنظیموں کی کوششوں سے بھارتی سرکار کے خلاف امریکی عدالتوں میں مقدمات دائرہوچکے ہیں‘ جس سے سکھوں اور دوسری اقلیتوں کے ساتھ امتیازی رویوں اور انسانی حقوق کی حق تلفیاں کرنے پر بھارت کا تشخص بُری طرح مجروح ہوا ہے۔