سائنس اور مذہب

سائنس اور مذہب میں کیا کچھ مشترک ہے اور کس قدر وہ متصادم ہیں ؟یہ سوال بار بار اٹھتا ہے‘ لیکن ہزاروں سالہ تاریخی پسِ منظر سمجھے بغیر اس کا جواب دیا نہیں جا سکتا۔ ملائیت اور الحاد کی دو انتہائیں ہیں ‘ مذہب اور سائنس کی اس بحث میں‘ جو اپنے فائدے ڈھونڈتی رہی ہیں ۔ اس وقت ‘ جب یہ تحریر لکھی جا رہی ہے ‘ دنیا پر مغرب کا غلبہ ہے ‘ امریکہ اور یورپ کا ۔ مغرب والوں کی اکثریت بظاہر عیسائی ‘لیکن حقیقت میں سیکولر ہے ۔ پوری مغربی دنیا میں آپ نے ہم جنس پرستی کے قوانین منظور ہوتے دیکھے۔ ان لوگوں کا کہنا یہ ہے کہ ہم خدا پر ایمان رکھ سکتے ہیں ؛ بشرطیکہ ہم اپنی روزمرہ زندگیوں میں شراب اور ہم جنس پرستی سمیت ہر قسم کی آوارگی کے لیے آزاد ہوں ۔ اس آوارگی کا نتیجہ یہ ہے کہ پوری مغربی دنیا میں ایسا کوئی گھر ڈھونڈنا انتہائی مشکل ہو چکا ‘ جہاں ماں باپ نے پوری زندگی اکھٹے گزاری ہو اور بچوں نے بڑھاپے میں اپنے والدین کو اولڈ ہوم میں داخل نہ کروا دیا ہو۔ زیادہ تر لوگ شادی نہیں کرتے۔ جو شادی کرتے ہیں ‘ وہ دو تین بار طلاق کے مراحل سے گزرتے ہیں ۔ یہ ایک الگ بحث ہے‘ لیکن سب سے اہم نکتہ یہ ہے کہ مغرب میں چرچ والوں کوحکومت کرنے کا موقع ملا‘ جیسے افغانستان میں طالبان کی صورت میں ملائوں کو ملا تھا۔ چرچ نے ہر قسم کے جبر سے کام لیا‘ سائنس کا گلا گھونٹ دیا ۔ گیلی لیو گیلی لی کی مثال سب کے سامنے ہے۔ سب سے پہلے اس نے مشاہدہ کیا کہ مشتری کے گرد بہت سے چاند گردش کر رہے ہیں ۔ اس نے کہاکہ کرّہ ٔ ارض کائنات کا مرکز و محور نہیں ہے ۔ اس پر وہ نظر بند کر دیا گیا اور نظربندی کے دوران ہی مرگیا۔ چرچ کی اس جابرانہ حکومت نے ردّعمل کو جنم دیا ۔ وقت گزرنے کے ساتھ ساتھ مذہبی طبقے نے مذہبی کتابوں میں بہت سی تبدیلی کر دی تھی ۔ سائنس والوں کے لیے یہ آسان تھا کہ مسخ شدہ الہامی کتابوں کی کسی بات کو غلط ثابت کیا جا سکے ۔ ایک اور اہم بات یہ تھی کہ سائنس اور مذہب mutually exclusiveتھے ۔ لوگ صرف دو قسم کے تھے۔ وہ جو اندھا دھند ‘ بغیر کسی دلیل کے مذہب کو مانتے تھے یا وہ جو دلائل کے ساتھ اس کا انکار کرتے تھے ۔

مذہب کیا ہے ؟ خدا کی طرف سے انسان سے کلام‘ جس میں وہ فرماتا ہے کہ ہم نے یہ دنیا بنائی ۔ اس کے ساتھ ہی ساتھ بہت سی ہدایات ‘ مثلاً: یہ کہ چوری نہ کرو‘ قتل کرنے والے کو سزا کے طور پر قتل کردو‘وغیرہ وغیرہ۔سائنس کیا ہے ؟کائنات جن اصولوں پر چل رہی ہے ‘ انسان جیسے جیسے انہیں سمجھتا گیا‘ انہیں سائنس کے طور پر اپنے پاس درج کر تا گیا۔ یہ وہ اصول تھے‘ جنہیں ہر بار تجربہ کر کے درست ثابت کیا جا سکے ۔ ان اصولوں کے تحت انسان نے یہ بات سمجھی کہ کششِ ثقل کی وجہ سے چیزیں زمین پر گرتی ہیں ۔سائنسز نے سورج اور اس کے سیاروں کی تخلیق کو سمجھا۔ایڈون ہبل نے 1925ء میں یہ ثابت کیا کہ کائنات ایک دھماکے سے وجود میں آئی ۔ یہ دھماکہ اس قدر خوفناک تھاکہ آج بھی ستاروں کے بڑے بڑے شہر (کہکشائیں ) خوفناک رفتار سے ایک دوسرے سے دور بھاگ رہے ہیں ‘ جیسے بم پھٹے تواس کے ذرات دور دور تک بکھر جاتے ہیں ۔

کچھ لوگوں کا کہنا یہ تھا کہ سائنس اور مذہب کو الگ الگ رکھنا چاہیے ۔ ان سے میں یہ کہنا چاہوں گا کہ ایک ذات ہے ‘ جو کہتی ہے کہ میری عبادت کرو ۔ اس لیے کہ میں نے یہ دنیا بنائی ہے ۔ اس کے بعد جہاں اس کا دل چاہتا ہے ‘ وہ بہت بڑی statementدیتا ہے ۔ وہ فرماتا ہے کہ زمین اور آسمان جڑے ہوئے تھے‘ ہم نے انہیں پھاڑ کر جدا کر دیا ۔ پھر یہ کہ ہم نے پانی سے ہر زندہ چیز کو پیدا کیا ‘پھر وہ فرماتا ہے کہ آسمان کو ہم نے اپنے زور ِ بازو سے پیدا کیا اور ہم ہی اسے پھیلا رہے ہیں ۔ کیا کسی میں اتنی جرأت ہے کہ خدا کو آسمان اور زمین کی تخلیق پر بات کرنے سے روک سکے۔زمین و آسمان کی یہی تخلیق تو سائنس ہے۔ فرق یہ ہے کہ قرآن اور حدیث صرف سائنس پہ مشتمل نہیں‘بلکہ یہ تو زیادہ تر ان ہدایات پر مشتمل ہیں ‘ جو کہ خالق انسان کو دیتا ہے ۔ اسے بتاتا ہے کہ والدین کا احترام کرنا ہے ۔ محتاجوں کی مدد کرنی ہے ۔

اب جن لوگوں کا کہنا یہ ہے کہ قرآن کے نزول سے پہلے کے کچھ سائنسی نظریات تھے‘ جو کہ قرآن میں درج ہوئے۔ ان سے میرا یہ سوال : پچھلے ڈیڑھ ہزار سال میں سائنس میں اَن گنت Improvementsہو چکی ہیں ‘ مثلاً ارسطو اور بطلیموس کے یہ نظریات مکمل طور پر رد ہو چکے کہ کرّہ ٔ ارض کائنات کا محور و مرکز ہے ۔ یونانی فلسفے کے بہت سے تھیسز مسترد ہو چکے ہیں ؛ اگر قرآن ادھر ادھر سے نظریات نقل کر رہا تھا تو بہت سارے غلط نظریات بھی نقل ہونا چاہیے تھے‘ مثلاً :خدا یہ کیوں نہیں فرما دیتا کہ ہم آسمان کو سکیڑ رہے ہیں ۔ وہ یہ کیوں فرماتا ہے کہ ہم اسے پھیلا رہے ہیں ۔ خدا یہ کیوں نہیں کہہ دیتا کہ زمین و آسمان شروع سے ہی ایسے تھے۔ بہت آرام سے اور بہت امن سے انہیں ایک لمحے میں پیدا کر دیا گیا تھا۔ وہ یہ کیوں فرماتا ہے کہ وہ تو جڑے ہوئے تھے اورانہیں پھاڑ کر ایک دوسرے سے الگ کر دیا گیا۔ اس وقت کے رائج سائنسی نظریات تو یہ تھے کہ زمین کائنات کا مرکز ہے ۔ ساری دنیا اس کے گرد گھوم رہی ہے ۔ خدا یہ کیوں کہتا ہے کہ ہر چیز اپنے مدار میں ایک وقتِ مقررہ تک گردش کر رہی ہے ۔

خدا نے سائنس پر ہمیں لیکچر نہیں دیا‘بلکہ قرآن زیادہ ترہدایات (Instructions)پر مشتمل ہے۔ ڈیڑھ ہزار سال پہلے خدا؛ اگر فلکیات پر ایک لیکچر دیتا تو پیغمبرؐ اور انؐ کے قریب ترین ساتھیوں کے علاوہ ایک عام ذہن کس طرح سے اسے سمجھتا۔ اس زمانے تک انسان خلا میں نہیں گیا تھا۔ کوئی مصنوعی سیارہ تو دور کی بات‘ ایسی دوربین بھی نہیں تھی ‘ جو نظامِ شمسی سے باہر دیکھ سکتی ۔ اس کے باوجود آخری زمانے والوں کے لیے جو آیات نازل ہوئیں ‘ انہیں پڑھیں تو دماغ بھک سے اڑجاتا ہے ۔ صرف یہی نہیں ‘ جب اختتام کا ذکر ہوتا ہے تو وہ فرماتا ہے : ''سورج اور چاند یکجا ہو جائیں گے ۔ پہاڑ ایسے اڑیں گے ‘ جیسے روئی کے گالے اڑتے ہیں‘‘ ۔

اس کے باوجود لوگ کیوں نہیں سمجھتے ؟ اس کی وجہ یہ ہے کہ وہ آزادی چاہتے ہیں ۔ جیسے یورپ اور امریکہ میں ہم جنس پرستی سمیت ساری آزادیاں دی گئیں۔ لوگ شراب پینا چاہتے ہیں اور وہ یہ چاہتے ہیں کہ انہیں روکنے ٹوکنے والا کوئی نہ ہو۔بہت سے ذاتی محرومیوں کی بنا پر ردّعمل کا شکار ہیں ‘ تو کرتے رہیں ‘ اپنی مرضی۔ خدا کو اس سے کیا فرق پڑتا ہے ؟ پانچ ارب مخلوقات اپنی جبلتوں کے بل پر زندگی گزار چکی ہیں ۔ آپ بھی عقل کی بجائے جبلت پر زندگی گزار لیں ۔ خدا کی شان میں ایک ذرّہ برابر کمی اس سے واقع نہیں ہوتی ۔ وہ آپ سے درخواست نہیں کر رہا کہ آپ اس پر ایمان لائیں ؛ اگر وہ جبراً یہ کرنا چاہتا تو آپ کو choiceکا حق کیوں دیتا ؟