پانچ سال میں 28ارب ڈالر

اگر آپ کو پتہ چلے کہ وزیر اعظم عمران خان کو اپنے پانچ سالہ اقتدار میں آصف علی زرداری اور میاں نواز شریف کی حکومتوں کے دس برسوں میں پاکستان کی گردن پر لادے ہوئے58 ارب ڈالر میں سے 38 ارب ڈالر کا قرضہ واپس کرنا ہو گا تو آپ اس پر شاید یقین نہ کرسکیں۔ مگر یہ سچ بتانے کی تو ضرورت نہیں کہ کراچی کا جناح انٹرنیشنل ائیر پورٹ ‘ پشاور اسلام آباد موٹر وے‘ فیصل آباد پنڈی بھٹیاں موٹر وے‘ اسلام آباد پشاور موٹر وے اور اسلام آباد لاہور موٹر وے تمام ہائی ویز ‘ ٹیلی ویژن اور ریڈیو پاکستان کی ملکیت تمام اثاثے ان قرضوں کے عوض اسحاق ڈار کی مہربانیوں سے گروی رکھے ہوئے ہیں۔ عمران خان صاحب آئی ایم ایف کے پاس نہیں جانا چاہتے تھے لیکن ان کی مجبوری یہ بنی کہ ان واجب الادا قرضوں کی بر وقت ادائیگی نہ کرنے سے آئی ایم ایف اور ورلڈ بینک ہمارے ان قومی اثاثوں کی قرقی کر سکتے ہیں۔ آج جو بھی اٹھتا ہے اس کی زبان پر یہی ہے کہ وزیر اعظم عمران خان اور ان کی ٹیم نا تجربہ کار ہیں ‘ان کی وجہ سے ملک میں مہنگائی ہو گئی‘ بجلی ‘ گیس اور تیل مہنگا ہو گیا لیکن ایسے لوگوں سے کوئی یہ نہیں پوچھتاکہ نواز شریف کا1180 ارب روپے آئی پی پیز کا گردشی قرضہ اور گیس کا157 ارب روپے کا خسارہ عمران خان کہاں سے ادا کریں۔اور پھرپانچ برسوں میں قرض لئے ہوئے28 ارب ڈالر کیسے اور کہاں سے ادا کریں؟ حکومت پاکستان اور سٹیٹ بینک کے ریکارڈ کے مطا بق جون2018ء میں عمران خان کے اقتدار سنبھالنے سے قبل پاکستان 96.7ارب ڈالر کا مقروض ہو چکا تھا۔ جنرل مشرف دور تک پاکستان کاکل بیرونی قرضہ37.2 ارب ڈالر تھا لیکن زرداری نواز کے دس برسوں میں لئے جانے والے58 ارب ڈالر کون کھا گیا؟ میثاقِ جمہوریت کے دونوں بھائیوں کی حکومتوں کے دس برسوں میں ایسا کیا ہوا؟پاکستان کے بیس کروڑ لوگوں کی وہ کونسی مشکلات تھیں جو 60 ارب ڈالر قرضہ لینے کے بعد دور کر دی گئیں؟کوئی بہتر تعلیمی ادارہ‘ کوئی چار پانچ نئے اور قابل تعریف ہسپتال اور کوئی ایسا صنعتوں کا جال جس سے ملک بھر میں خوش حالی آ گئی ہو؟ پانی اور بجلی کا کوئی منصوبہ؟ بجلی‘ گیس‘ پانی کی قیمتوں میں کمی؟ آٹا‘ چاول‘ لباس سستے کر دیئے گئے ہوں؟بتایا جائے ان ساٹھ ارب ڈالرز سے کیا گیا؟اگر میٹرو ٹرین کے ڈھائی سو ارب کی بات کریں تو یہ سی پیک کے حصے سے لیا گیا ہے۔

8 دسمبر1958 ء سے2018ء کے مالیاتی سال تک پاکستان آئی ایم ایف سے 21 قرضے لے چکا ہے ‘موجودہ حکومت آئی ایم ایف سے 22 واں قرض لے رہی ہے ۔اپریل2018 ء میںایک انگریزی روزنامے میں شائع ہونے والی رپورٹ کے مطا بق پاکستان کے پہلے سے لئے گئے قرضوں اور ان پر واجب الادا سود کی مدکے علا وہ بجلی‘ گیس ‘ تیل او ر خسارے کو پورا کرنے کے لیے مزید28 ارب ڈالر کی ضرورت ہے۔اس رپورٹ کی اس وقت تردید کیوں نہیں کی گئی؟ قیام پاکستان سے اب تک آئی ایم ایف‘ عالمی بینک اور ایشیائی ترقیاتی بینک سے لئے گئے قرضوں کی تفصیلات کے مطا بق سب سے پہلا قرضہ 8 دسمبر 1958 کو لیاگیا‘ دوسرا 16 مارچ 1965ء کو آئی ایم ایف نے پاکستان کو37 ہزار پانچ سو ڈالر کی صورت میں دیا۔ ذوالفقار علی بھٹو نے دسمبر1971 ء میں اقتدار سنبھالنے سے پانچ جولائی1977 ء تک حکومت کی اور اپنے دور اقتدار میں چار مرتبہ آئی ایم ایف سے قرض لیا ۔ذوالفقار علی بھٹو نے18 مئی1972کو84 ہزار ڈالر‘11 اگست1973 کو75 ہزار ڈالر‘11 نومبر1974 ء کو 75 ہزار اور 19 مارچ1977ء کو 80 ہزار ڈالر آئی ایم ایف سے قرضہ لیا۔ پی پی پی کے چیئرمین ذوالفقار علی بھٹو کی حکومت کے خاتمے کے بعدجنرل ضیا الحق کے عرصہ اقتدار جس میں جونیجو مسلم لیگ کا اقتدار بھی شامل ہے 3 لاکھ49 ہزار ڈالر24 نومبر1980ء میںلئے گئے اور2 دسمبر1981 ء کو پاکستان نے آئی ایم ایف سے سات لاکھ تیس ہزار ڈالرقرضہ حاصل کیا اور پھر17 اگست1988 ء کی شام بہاولپور میں جنرل ضیا الحق کے طیارہ حادثے میں مارے جانے کے بعد پی پی پی حکومت نے دسمبر1988ء میںآئی ایم ایف سے 19 لاکھ4 ہزار چار سو اسی ڈالر حاصل کئے ‘پھردسمبر88 کی بے نظیر حکومت میں ہی ایک بار پھر3 لاکھ82 ہزار چار سو دس ڈالر حاصل کئے گئے اس کے بعد 16 ستمبر93 کو 88 ہزار ڈالر مزید قرض لیا۔ 22 فروری94 کو محترمہ بے نظیر بھٹو حکومت نے 123,200 ڈالر اسی تاریخ کو ایک مرتبہ پھر172,200ڈالر اس کے بعد13 دسمبر95 کو بے نظیر بھٹو حکومت نے آئی ایم ایف سے 294,690 ڈالر اور پھر دو مرتبہ265,370 ڈالر قرض لئے۔ بے نظیر بھٹو کے بعد جب میاں نواز شریف نے اقتدار سنبھالا تو ان کی حکومت کو 113,740 ڈالر کی دو قسطیں آئی ایم ایف نے 20 اکتوبر1997ء کو مہیا کیں۔ پھر چار لاکھ پینسٹھ ہزار ڈالر جنرل مشرف کی حکومت نے29 نومبر2000ء کو آئی ایم ایف سے قرضہ لیا۔ جنرل مشرف نے6 دسمبر2001 ء کو861,420ڈالر اور پھر24 نومبر2008ء کو پی پی پی کی زرداری حکومت نے آئی ایم ایف سے 4,93,6035ڈالر قرضہ حاصل کیا اور میاں نواز شریف نے اقتدار حاصل کرنے کے بعد چار ستمبر2013ء کو آئی ایم ایف سے4,320,000ڈالر قرضہ وصول کیا ۔آئی ایم ایف سے لیے گئے قرضوں کی فہرست آئی ایم ایف کی ویب سائٹ پر موجود ہے۔ آئی ایم ایف سے قرضے لینے کے بعد نواز شریف حکومت نے ورلڈ بینک سے12 ارب ڈالر علیحدہ قرضہ حاصل کیا ‘جس کا اعلان وزیر خزانہ اسحاق ڈار نے23 اپریل2013ء کو اسلام آباد میں3Gموبائل نیٹ ورک کی پہلی نیلامی کے موقع پر ایک نیوز کانفرنس کے دوران کیا تھا۔سکوک بانڈز کی صورت میں گردن توڑ لیا گیا قرض اس کے علا وہ ہے۔

جولائی2013ء سے جون2017ء تک میاں نواز شریف کی مسلم لیگ کے دور اقتدارمیں آئی ایم ایف کی جاری کردہ رپورٹ کے مطا بق پہلے سے لئے گئے قرضوں کے مقابلے میں پاکستان پر بیرونی قرضے مزید 30 فیصد بڑھ جاتے ہیں اور اس اضافے کے نتیجے میں پاکستان پر بیرونی قرضہ79.2ارب ڈالرہو جاتا ہے۔

عمران خان کے سامنے اس وقت 99108ملین ڈالر کا غیر ملکی قرضہ ہے جس کی وصولی اور انہیں خرچ کرنے میں اس کا دور دور تک کوئی ہاتھ اور کردار نہیں۔ جب انہوں نے اقتدار سنبھالا تو ملکی خزانے کی صورت حال کا اندازہ اس سے کیجئے کہ نواز شہباز حکومت نے تاجروں‘ صنعت کاروں حتیٰ کہ گاڑیوں کی رجسٹریشن کی مد میں بھی دو سال کی ایڈوانس رجسٹریشن اور ٹیکسز2018ء میں ہی وصول کر رکھے ہیں...فیصلہ خود ہی کیجئے کہ اس مہنگائی اور کمزور معیشت کے ذمہ دار کون ہیں؟وہ جو ملک پر قرضوں کا پہاڑ لادنے کا رونا رو رہے ہیں یا وہ جو مہنگائی کا شور مچا رہے ہیں ؟