روزے کے چند ضروری مسائل

(1):بلڈ ٹیسٹ کے لیے اپنا خون نکلوانے یاکسی شدید ضرورت مند مریض کو خون کا عطیہ دینے سے روزہ نہیں ٹوٹتا‘ البتہ اگر خون دینے سے اتنی جسمانی کمزوری لاحق ہونے کا اندیشہ ہو کہ روزہ رکھنے کے قابل نہ رہے ‘تو روزے کی حالت میں اس سے اجتناب کرے۔

(2):کان میں دوا یا تیل ٹپکانے یا دانستہ پانی ڈالنے سے روزہ نہیں ٹوٹتا‘سوائے اس کے کہ خدانخواستہ کسی شخص کے کان کا پردہ پھٹا ہواہو اور اس سے مواد رِس کر دماغ تک پہنچ جاتاہو ‘تو اس کا روزہ ٹوٹ جائے گا۔

(3):ہماری تحقیق کے مطابق آنکھ میں دواڈالنے یا کسی بھی قسم کا انجکشن لگانے سے روزہ فاسد ہوجاتاہے ‘بعض علما کے نزدیک اِس سے روزہ نہیں ٹوٹتا۔ جس مسئلے کے بارے میں قرآن وحدیث میں صریح حکم نہ ہو ‘وہ مسئلہ اجتہادی کہلاتاہے‘ اس میں لوگوں کو جس عالم پر اعتماد ہو ‘اُس کے فتوے پر عمل کریں ‘ ڈاکٹر وھبہ الزوحیلی لکھتے ہیں: ''انجکشن پٹھوں میں جلد کے اندر (Inter Muscular)لگانا ہو یا رگوں میں (Inter Vein)لگانا ہو‘بہتر یہ ہے کہ روزے کی حالت میں نہ لگائے اور افطار کے وقت تک انتظار کرے ‘اگر رگوں میں خون چڑھائے گا ‘توروزہ فاسد ہوجائے گا ‘(فقہ الاسلامی وادِلّتہ‘جلد3ص: 1412)‘‘۔

(4):روزے کی حالت میں قَے آنے کی فقہائے کرام نے24ممکنہ صورتیں بیان کی ہیں‘ان میں سے صرف دو صورتوں میں روزہ ٹوٹ جاتاہے :(الف) بے اختیار منہ بھر کر قَے آئے اور اُس میں سے کچھ مواد واپس نگل لے‘ (ب): طبعی مجبوری کے تحت جان بوجھ کر قَے کرے ‘ جسے عربی میں ''اِسْتِقَائ‘‘ کہتے ہیں‘ اگر ایسی قَے منہ بھر کرآجائے تو خواہ واپس حلق میں کچھ بھی نہ نگلے ‘روزہ ٹوٹ جائے گا‘(ج): باقی صورتوں میں روزہ نہیں ٹوٹتا۔

(5):نیت دل کے ارادے کا نام ہے ‘زبانی نیت ضروری نہیں ہے ‘مستحب ہے ۔اگر رات ہی سے نیت کرنا چاہے تو کرسکتاہے‘ اِس صورت میں ان الفاظ کے ساتھ نیت کرے '' میں اللہ تعالیٰ کے لیے کل کے روزے کی نیت کرتاہوں ‘‘۔ صبح صادق یعنی سَحری کے وقت یا سَحری کے بعد کرنا چاہے ‘تو ان الفاظ کے ساتھ نیت کرے '' میں اللہ تعالیٰ کے لیے آج کے روزے کی نیت کرتاہوں ‘‘ اگر نصف النہار شرعی سے پہلے نیت کرے تو یہ کہے ''میں آج صبح سے روزے سے ہوں‘‘۔اگر دل میں نیت ہے اور زبان سے روزے کی نیت کے الفاظ ادانہیں کیے ‘ تو اس سے روزے کی صحت پر کوئی اثر نہیں پڑتا‘اگررات سے روزے کی نیت کی ہے تو تب بھی سحری کرسکتا ہے۔

(6):سَحری سے پہلے غسلِ جنابت واجب ہوچکاتھامگر سَحری ختم ہونے سے پہلے غسل نہ کرسکا یا دن میں روزے کے دوران نیند کی حالت میں جنبی ہوجائے تو اس سے روزہ فاسد نہیں ہوتا اور نہ ہی اِس سے اجر میں کمی واقع ہوتی ہے ‘البتہ واجب غسل کو اتنی دیر تک مؤخر کرنا کہ ایک فرض نماز کا وقت گزرجائے ‘ مکروہ تحریمی ہے‘کیونکہ اِس سے نماز قضا ہوجائے گی ۔

(7):وضو کے دوران مسواک کرنا عام دنوں میں بھی سنّت ہے اور رمضان المبارک کے دوران روزے کی حالت میں بھی سنّت ہے‘خواہ عصر کے وقت یا عصر کے بعد کرے ‘حضرت عامر بن ربیعہ ؓبیان کرتے ہیں'' میں نے بہت مرتبہ نبی ﷺ کو روزے میں مسواک کرتے ہوئے دیکھا‘ (سُنن ترمذی:725)‘‘۔روزے کی حالت میں فقہائے احناف نے مسواک کی اجازت دی ہے ‘خواہ وہ خشک ہو یاتریا اس میں کوئی ذائقہ محسوس ہوتا ہو ۔مسواک کی تری یا اس کی لکڑی کاکوئی ریزہ یا ریشہ حلق میں چلاگیا تو روزہ فاسد ہوجائے گا۔منجن ‘ٹوتھ پاؤڈر اور پیسٹ اس سے مختلف ہے کہ اس میں ذائقہ بہت محسوس ہوتاہے‘نہ اس پر مسواک کااطلاق ہوتاہے اورنہ مسواک کی سنت اداکرنے کے لیے اس کی ضرورت ہے ‘حتی الامکان روزے کی حالت میں اس کے استعمال سے اجتناب کرنا چاہیے‘ کیونکہ اگر اس کے ذرّات حلق میں واضح طورپر محسوس ہوں اور اس کا قوی اندیشہ بھی ہوتاہے ‘تو ایسی صورت میں روزہ فاسد ہوجائے گا ‘الغرض منجن یا ٹوتھ پاؤڈر یا پیسٹ سے ممانعت کا مشورہ احتیاط کی بناپر ہے کہ بعض اوقات غیر ارادی طورپراس کے ذرات حلق میں چلے جانے کا امکان رہتاہے۔

(8):روزے کی حالت میں خوشبو استعمال کرسکتے ہیں‘ناخن کاٹ سکتے ہیں‘ بالوں کو تیل لگاسکتے ہیں‘اس کی کوئی ممانعت نہیں ہے۔

(9):دَمَہ یا ضیق النفس کا مریض (Asthmamatic) جو آلۂ تَنَفُّس (Inhaler)کے استعمال کے بغیر دن نہیں گزارسکتا‘وہ معذور ہے اور اس کو اس بیماری کی بناپر روزہ چھوڑنے کی اجازت ہے ‘اگر یہ مرض دائمی ہے ‘تووہ فدیہ اداکرے ۔اگرروزہ رکھ لیاہے اورمرض کی شدّت کی بناپر انہیلراستعمال کیاتوروزہ ٹوٹ جائے گا‘روزہ رکھنے کی استطاعت ہوتو بعد میں قضاکرے ‘ورنہ فدیہ اداکرے۔ انہیلر میں اگرچہ گیس ہوتی ہے اور ہوا حلق میں جاتی بھی رہتی ہے اور خارج بھی ہوتی ہے ‘ آکسیجن پر تو زندگی کا مدار ہے ‘لیکن انہیلر میںآکسیجن کے ساتھ ایک کیمیکل بھی ہوتاہے ‘ جوحلق کے راستے معدے تک پہنچ سکتاہے ‘کیونکہ اس کے لیے کوئی رکاوٹ نہیں ہے۔

(10):انتہائی درجے کے ذیابیطس کے مریض(Diabetic) یا ایسے تمام اَمراض میں مبتلا مریض جن کو خوفِ خدا رکھنے والا کوئی دین دار ماہر ڈاکٹر مشورہ دے کہ وقفے وقفے سے دوااستعمال کرو یا پانی پیو یا خوراک استعمال کرو‘ ورنہ مرض بے قابو ہوجائے گا یاکسی عضو یاجان کے تلف ہونے کا اندیشہ ہے ‘تو ایسے تمام لوگ شرعی معذور ہیں ‘اُنہیں شریعت نے رخصت دی ہے کہ روزہ نہ رکھیں اورفدیہ اداکریں ‘ایسے لوگ ''دائمی مریض‘‘ کہلاتے ہیں۔لیکن اگر فدیہ اداکردیاہے اور بعد میں اللہ نے اپنے فضل وکرم سے اُس بیماری سے صحت عطاکردی ‘ تو قضا بھی کرے ‘ فدیہ میں دیے ہوئے مال کا ثواب اُسے مل جائے گا ۔

(11):قرآن مجید میں اللہ تعالیٰ نے ایک روزے کا فدیہ ایک مسکین کا (دووقت کا) کھانا مقرر کیاہے ‘ہر روزے دار اپنے معیار اور مالی استطاعت کے مطابق فدیہ اداکرے ‘اللہ تعالیٰ کا فرمان ہے: ترجمہ''سو جو شخص خوش دلی کے ساتھ فدیے کی مُقرر ہ مقدار سے زیادہ اداکرے ‘ تو یہ اُس کے لیے بہتر ہے ‘(البقرہ:184)‘‘۔

(12):اِسی طرح اللہ تعالیٰ نے رمضان المبارک کے دوران مسافر یا عارضی مریض کو عذر کی بنا پرروزہ چھوڑنے کی رخصت دی ہے‘ لیکن یہ بھی فرمایا:ترجمہ''اور اگر تم روزہ رکھ لو تو یہ تمہارے لیے بہتر ہے‘ اگر تم جانتے ہو‘ (البقرہ:184)‘‘‘احادیثِ مبارکہ میں ہے:

(1):''حضرت حمزہ بن عمر واسلمیؓ نے بارگاہِ رسالت میں عرض کی: میں سفر میں روزہ رکھتا ہوں اور وہ کثرت سے روزہ رکھنے والے تھے‘ آپ ﷺ نے فرمایا ''تمہیں اختیار ہے چاہو تو روزہ رکھو اور چاہو تو چھوڑ دو‘(بخاری:1943)‘‘۔ (2):انس بن مالکؓ بیان کرتے ہیں:ہم (سفرِ جہاد میں)رسول اللہ ﷺ کے ساتھ سفر کررہے تھے‘ ہم میں سے بعض نے روزہ رکھا اور بعض نے چھوڑ دیا‘ دونوں نے ایک دوسرے کو ملامت نہیں کیا ‘ (بخاری:1947)‘‘۔مسافر یا عارضی مریض فدیہ دے کر روزے کی فرضیت سے عہدہ بر آ نہیں ہوں گے ‘ بلکہ انہیں رمضان المبارک کے بعد صحت یاب ہونے پر عذر کی بناپر چھوٹے ہوئے روزوں کی قضا کرنی ہوگی ۔

(13):حاملہ عورت یا دودھ پلانے والی عورت اپنی یا بچے کی صحت کے بگڑنے سے بچنے کے لیے رمضان کا روزہ چھوڑ سکتی ہے ‘لیکن اِس کی تلافی فدیے سے نہیں ہوگی بلکہ بعد میں قضاروزے رکھنے ہوں گے ۔اِسی طرح ایامِ مخصوص (Menses) کے دوران عورت روزہ نہیں رکھ سکتی ‘ایام ختم ہونے پرغُسلِ واجب کرکے پاک ہوجائے اورروزے رکھے ۔جتنے دنوں کے روزے چھوٹ گئے ہیں‘ اُن کی تلافی فدیے سے نہیں ہوگی بلکہ بعد میں اتنے دنوں کے قضا روزے رکھنے ہوں گے ۔(15):نوجوان اور جوان عمر حضرات روزے کے دوران بیوی کے ساتھ بوس وکنار سے اجتناب کریں‘ اگرچہ یہ جائز ہے‘ لیکن شَہوت کے غلبے کے پیش نظر روزے کے فاسد ہونے کا خدشہ رہتاہے ‘ اس لیے احتیاط کرنا بہتر ہے۔

(14):گزشتہ رمضان کے روزوں کی قضا اس کے ذمے باقی ہے ‘تو اگلا رمضان آنے سے پہلے اس کی قضا رکھے ۔تمام فقہائے کرام کا اس بات پر اتفاق ہے کہ ماہِ رمضان کے روزوں کی قضا علی الفور واجب نہیں ہے ‘لیکن بلا عذر اتنی تاخیر کرنا گناہ ہے کہ اگلا ماہِ رمضان شروع ہوجائے ۔ ترجمہ'' حضرت ابوہریرہ ؓبیان کرتے ہیں رسول اللہ ﷺ نے فرمایا: جس نے رمضان کا مہینہ پایا اور اس پر گزشتہ رمضان کے روزوں کی قضا باقی ہے ‘اس کے اس رمضان کے روزے قبول نہیں ہوں گے اورجس نے نفلی روزے رکھے ‘جبکہ اس پر رمضان کے روزوں کی قضاباقی تھی‘ اس کے نفلی روزے قبول نہیں ہوں گے حتّٰی کہ وہ قضا روزے رکھ لے ‘(مسنداحمد : 8621)‘‘۔

(15):رمضان المبارک کے قضا روزوں کا کسی وقفے کے بغیر لگاتار رکھنا ضروری نہیں ہے‘ بیچ میں وقفہ بھی کرسکتے ہیں۔ نیز یہ بھی ضروری نہیں ہے کہ گرمی کے روزوں کی قضا گرمی کے دنوں میں رکھی جائے اور نہ یہ ضروری ہے کہ سردیوں میں قضاشدہ روزوں کی قضا سردی کے موسم میں رکھی جائے‘ اس میں شریعت نے وسعت اور آسانی رکھی ہے‘سال کے دوران اپنی سہولت کے مطابق قضا روزے رکھ سکتے ہیں۔

(16):جس نے بشری کوتاہی کی بناپر روزہ نہ رکھا یا رکھنے کے بعد عذر کی بنا پر توڑ دیا ‘اس پر صرف قضا لازم ہے‘ البتہ جس نے روزہ رکھ کر کسی عذر کے بغیر جان بوجھ کر توڑ دیا تو اس پر کفارہ لازم ہے ‘یہ ساٹھ روزے مسلسل اور ایک قضا کا روزہ رکھناہے۔

(17):غیبت کرنا ‘جھوٹ بولنا ‘ چغلی کھانا ‘کسی پر بہتان لگانا ‘کسی کی عیب جوئی کرنا ‘لوگوں کو ایذا پہنچانا ‘بیہودہ یا جنسی تَلذّذ کی باتیں کرنا عام حالات میں بھی منع ہیں اور روزے کی حالت میں ان کی ممانعت وحُرمت اورزیادہ ہوجاتی ہے۔ان باتوں سے فقہی اعتبارسے توروزہ فاسد ہونے کا حکم نہیں لگایا جاتا ‘لیکن روزہ مکروہ ہوجاتاہے اور روزے دار روزے کے کامل اجرسے محروم ہوجاتاہے ۔

(18):اس سال محکمۂ موسمیات نے ماہِ رمضان میں شدید گرمی کی پیش گوئی کی ہے اوراسے ''Heat Stroke‘‘یا ''Heat Wave‘‘ کا نام دیا ہے‘بہت زیادہ پسینہ نکلنے کی وجہ سے انسانی جسم میں پانی اور نمکیات کی کمی واقع ہوجاتی ہے‘ جسے طبی زبان میں Dehiderationکہتے ہیں۔ ہماری رائے میں ایسے حالات میں جب کسی شخص کے لیے بیماری کے خطرناک بن جانے یا روزے دار کی جان تلف ہونے کا ظَنِّ غالب ہوجائے تو روزہ توڑنے یا چھوڑنے کی شرعی رخصت پر عمل واجب سمجھا جائے ‘ کیونکہ اس کی تائید میں احادیثِ مبارَکہ‘ آئمۂ مجتہدین اور فقہائے امت کے اقوال موجود ہیں ‘ ایسی صورت میں روزہ توڑنے پر صرف قضا لازم ہوگی‘ کفارہ لازم نہیں ہوگا‘ اس حوالے سے چند احادیث پیشِ خدمت ہیں:

(1):حضرت جابرؓ بیان کرتے ہیں رسول اللہ ﷺ نے فرمایا:'' اللہ نے تمہارے لیے جو رخصت دی ہے ‘اُس رخصت پر عمل کرنا تم پر واجب ہے‘(صحیح مسلم:1115 )‘‘۔(2):حضرت ابن عمرؓبیان کرتے ہیںرسول اللہ ﷺ نے فرمایا''جس شخص نے اللہ تعالیٰ کی دی ہوئی رخصت کو قبول نہیں کیا ‘اُس کو میدانِ عرفات کے پہاڑوں کے برابر گناہ ہوگا‘(مسند احمد:5392)‘‘ ۔(3):حضرت ا بن عمر ؓبیان کرتے ہیں رسول اللہ ﷺ نے فرمایا'' بے شک اللہ تعالیٰ جس طرح اپنی معصیت کو ناپسند فرماتا ہے ‘اسی طرح اپنی دی ہوئی رخصت پر عمل کرنے کوپسند فرماتاہے‘(مسند احمد : 5866)‘‘۔

علامہ ابن عابدین شامی لکھتے ہیں:ترجمہ'' اگرروزہ رکھنے کی صورت میں ہلاکت کا اندیشہ ہو‘تو روزہ توڑنا واجب ہے‘(حاشیہ ابن عابدین شامی ‘جلد6ص:356)‘‘‘علامہ کاسانی حنفی لکھتے ہیں:ترجمہ''امام ابوحنیفہ سے روایت ہے:اور(عذر کی بناپر) روزہ توڑنے کی مُطلق اباحت بلکہ وجوب اُس صورت میں ہے کہ روزے دار کی ہلاکت کا اندیشہ ہو‘کیونکہ اس میں اپنے آپ کو ہلاکت میں ڈالنا ہے‘اللہ کے حق کو قائم رکھنے کے لیے نہیں جوکہ واجب ہے‘اس حالت میں روزے کا وجوب باقی نہیں رہتااوریہ حرام ہے‘تو ایسی صورت میں روزہ توڑنا مباح بلکہ واجب ہوگا ‘(بدائع الصنائع‘جلدثانی ‘ص: 142)‘‘۔

علامہ مرغینانی حنفی لکھتے ہیں: ترجمہ''اورہم کہتے ہیں: بیماری کی زیادتی اوراس کا لمبا ہونا کبھی ہلاکت کا سبب بنتاہے‘تواس سے بچنا واجب ہے‘(ہدایہ‘جلدثانی‘ص:119)‘‘‘ڈاکٹر وھبہ زحیلی لکھتے ہیں : ترجمہ'' اور اگر روزے کے سبب ہلاکت کا غالب گمان ہویا شدید تکلیف جیسے کسی حِس کے معطل ہونے کا گمان ہو تو اس صورت میںروزہ توڑنا واجب ہے‘‘۔ مزید لکھتے ہیں''بیماری کی حالت میں روزہ توڑنے کے بارے میں حنفیہ شافعیہ کا قول ہے: یہ مباح ہے‘ حنابلہ کے نزدیک بیماری کی حالت میں روزہ رکھنا مکروہ ہے اور مالکیہ کے نزدیک اگر بیماری یا ضعف کی وجہ سے ہلاکت کا اندیشہ ہو تو روزہ توڑنا واجب ہے‘(الفقہ الاسلامی وادلتہ‘جلد3ص:1698-99)‘‘۔