’’پیار‘‘ زیادہ ہے‘ زندگی کم ہے

جمعہ کی شام تک قیاس آرائیاں شروع ہوگئی تھیں کہ عالمی مالیاتی فنڈ سے بات چیت مکمل اور کامیاب ہوگئی ہے۔ اور یہ کہ اب کسی بھی وقت معاہدے کا اعلان کیا جاسکتا ہے۔ ٹی وی چینلز کے ٹِکرز میں بتایا گیا کہ حکومت نے آئی ایم ایف کی تمام شرائط تسلیم کرلی ہیں۔ ''تمام‘‘ کے لفظ پر غور کیجیے اور پھر اس بات پر بھی کہ تین چار گھنٹے تک لوگ انتظار ہی کرتے رہے کہ اسلام آباد میں آئی ایم ایف کی ٹیم اپنے ہیڈ کوارٹرز سے رابطے کے بعد کسی باضابطہ معاہدے کا اعلان کرے۔ انتظار لاحاصل رہا۔ رات گئے اطلاع آئی کہ آئی ایم ایف کو منانے میں مزید دو تین دن لگیں گے۔ جب تمام شرائط تسلیم کرلی گئی تھیں تو مزید دو تین دن تک بات چیت کس کھاتے میں ہوئی؟ قومی معیشت شدید بحرانی کیفیت سے دوچار ہے اور اس کا قبلہ درست کرنے کیلئے آئی ایم ایف کا پیکیج ناگزیر سمجھا جاتا رہا ہے۔

ہر حکومت کا یہی معاملہ رہا ہے۔ اقتدار سنبھالتے ہی پہلی فکر یہ لاحق ہوتی ہے کہ آئی ایم ایف سے پیکیج لیا جائے۔ یہ تصور کرلیا گیا ہے کہ معاملات کو صرف قرضوں کے ذریعے درست کیا جاسکتا ہے۔ بیرون ملک مقیم پاکستانی قومی معیشت کی خرابیاں دور کرنے میں اپنا حصہ کماحقہ ڈالنے کے لیے تیار ہیں۔ کئی مواقع پر غیر مقیم پاکستانیوں نے وطن کے حالات درست کرنے کے حوالے سے اپنا کردار ادا کرنے کی کوشش کی ہے مگر ایسا لگتا ہے کہ آئی ایم ایف کی جڑیں ہمارے سیاسی و معاشی نظام میں بہت گہری ہیں۔ اگر اُس کی زیادہ ضرورت نہ ہو تب بھی اُس کی طرف دیکھنا پڑتا ہے۔ ایک زمانے سے قوم یہ تماشا دیکھ رہی ہے۔ قرضوں ہی سے خرابیاں پیدا ہوتی ہیں اور اُن خرابیوں کو دور کرنے کے لیے مزید قرضے لیے جاتے ہیں۔ گویا زہر پینے کے بعد جان بچانے کے لیے مزید زہر پیا جاتا رہا ہے! کہتے ہیں قوم حکمرانوں کی روش پر چلتی ہے۔ معاشرے یا ریاست کے سیاہ و سفید کا معاملہ جن کے ہاتھوں میں ہوں اُن جیسا بننے کی کوشش میں لوگ اپنی اصلیت بھی بھول جاتے ہیں۔ یہ بات افسوس ناک ضرور ہے‘ حیرت انگیز نہیں۔ جنہیں حکومت ملتی ہے‘ وہ قرضوں پر قرضے لیے جاتے ہیں۔ یہ روش اب پوری قوم نے اپنالی ہے۔ اپنی حیثیت سے بڑھ کر خرچ کرنا عوام کا بھی وتیرہ بن چکا ہے۔ اگر وسائل پورے نہ پڑ رہے ہوں تو قرض لینے میں کوئی قباحت محسوس نہیں کی جاتی۔ ؎

قرض پیتے تھے مَے لیکن سمجھتے تھے کہ ہاں

رنگ لائے گی ہماری فاقہ مستی ایک دن!

ہمارے ہاں کئی حکومتیں آئی ایم ایف کے چُنگل میں پھنس کر اپنے وجود ہی کو داؤ پر لگاچکی ہیں۔ آئی ایم ایف کی طرف سے دیئے جانے والے پیکیجز واضح طور پر عوام دشمن ثابت ہوتے رہے ہیں۔ پیکیج دیتے وقت آئی ایم ایف کا سارا زور اس نکتے پر ہوتا ہے کہ بنیادی سہولتوں کے نرخ بڑھائے جائیں۔ یوٹیلٹیز کے کھاتے میں عوام پر اس قدر بوجھ ڈال دیا جاتا ہے کہ وہ ڈھنگ سے عمومی طرز کی زندگی بسر کرنے کے قابل بھی نہیں رہتے۔ اب تک کی صورتِ حال یہ ہے کہ حکومت نے آئی ایم ایف کے آگے گھٹنے ٹیک دیئے ہیں۔ اُسے منانے کی بھرپور کوشش بہت حد تک رنگ لے آئی ہے۔ ڈیل پر اتفاق رائے ہوگیا ہے۔ اب واشنگٹن میں آئی ایم ایف کے ہیڈ کوارٹرز سے منظوری باقی ہے۔ ایک طرف خود انحصاری کے دعوے کیے جارہے ہیں اور دوسری طرف وزیر اعظم عمران خان نے ایک تقریب سے خطاب کرتے ہوئے کہا ہے کہ پاکستان ایک عظیم ملک بننے والا ہے۔ یہ بات اُنہوں نے کیا دیکھ کر کہی ہے یقین سے کچھ نہیں کہا جاسکتا۔ پے در پے قرضے لینے والا ملک عظمت کا حامل کیسے ہوسکتا ہے؟ وزیر اعظم اگر تصریح فرمائیں تو عنایت ہوگی۔ کسی پس ماندہ یا ترقی پذیر ملک کے لیے لازم ہے کہ اپنے پیروں پر کھڑا ہونے کی کوشش کرے۔ آئی ایم ایف کے در پر جاکر بھیک مانگنا انتہائی حالت میں تو درست ہوسکتا ہے‘ عمومی حالت میں کبھی نہیں۔ یہاں معاملہ یہ ہے کہ جیسے ہی کوئی بحرانی کیفیت ابھرتی ہے‘ ذہنوں میں آئی ایم ایف کی گھنٹیاں بجنے لگتی ہیں۔ گویا آئی ایم ایف سے ہٹ کر کوئی جائے پناہ نہیں جبکہ حقیقت یہ ہے کہ آئی ایم ایف نے قدم قدم پر ثابت کیا ہے کہ ؎

یہ فتنہ آدمی کی خانہ ویرانی کو کیا کم ہے

ہوئے تم دوست جس کے دشمن اُس کا آسماں کیوں ہو

ذرائع بتاتے ہیں کہ پاکستان نے تمام شرائط تسلیم کرلیں مگر آئی ایم کی ٹیم ''ڈو مور‘‘ کا مطالبہ کرتی رہی۔ یہ کم بخت ڈو مور جان نہیں چھوڑ رہا۔ اس ایک مطالبے نے ڈیڑھ عشرے سے ناک میں دم کر رکھا ہے۔ کچھ بھی کر گزریے‘ مزید بہت کچھ کرنے کا مطالبہ ہی سامنے دھرا رہتا تھا۔ امریکا نے سمجھایا نہ ہم آج تک سمجھ پائے کہ یہ ڈو مور ہے کیا۔ اِس کی حدود کا تعین

کس طور کیا جائے؟ اب آئی ایم ایف نے بھی ڈو مور کا ٹنٹا کھڑا کردیا ہے۔ ٹیکس وصولی کا ہدف ایک ہزار ارب روپے تک بڑھانے کا مطالبہ سامنے آچکا ہے۔ اس ہدف کا حصول یقینی بنانے کیلئے لازم ہے کہ لوگوں کی جیب مزید خالی کرائی جائے۔ بالواسطہ ٹیکس دیتے دیتے لوگ پہلے ہی تنگ آچکے ہیں۔ پٹرولیم مصنوعات بھی خاصی مہنگی کی جاچکی ہیں۔ ایسے میں تان پھر یوٹیلٹیز پر آکر ٹوٹی ہے۔ بجلی اور گیس مزید مہنگی کرنے کی ''نوید‘‘ سنائی جارہی ہے۔ آئی ایم ایف کے آگے اتنی تیزی اور بے تابی کے ساتھ سر تسلیم خم کرنا حکومت کے خلاف جارہا ہے۔ اپوزیشن کے لیے تنقید کا اِس سے اچھا موقع اور کون سا ہوسکتا ہے؟ خواجہ آصف کہتے ہیں کہ حکومت نے قومی وقار بیچ دیا۔ معترضین کہتے ہیں کہ معیشت سے متعلق اہم فیصلوں پر حکومت کا اختیار اب عملاً اِتنا کم ہو جائے گا کہ کسی بہتری کے بارے میں خوش گمان رہنے کی گنجائش نہیں۔

عمران خان اگر کچھ نہیں سمجھ پائے تو حیرت ہے۔ اور اگر سمجھنے کے بعد بھی مجبوری کی حالت میں بہت کچھ جھیلنا پڑ رہا ہے تو اِس پر صرف افسوس کیا جاسکتا ہے۔ عمران خان نے پورے ٹیسٹ کیریئر میں کوئی نو بال نہیں کی۔ ایسا لگتا ہے کہ تمام نو بالز اُنہوں نے سیاسی پچ کے لیے بچاکر رکھی تھیں! عمران خان کی حکومت نے ابتدائی اوورز ہی میں اچھے خاصے ایکسٹرا رنز دے دیئے ہیں۔ اب باؤلنگ کا معیار بلند کرکے ایک طرف تو ایکسٹرا رنز دینے سے گریز کرنا ہے اور دوسری طرف فیلڈنگ کا معیار بھی بلند کرنا ہے۔ یہ سب کیسے ہوسکے گا یہی عمران خان کی اصل آزمائش ہے۔ آئی ایم ایف کے سامنے خود کو بے بس تسلیم کرکے اُنہوں نے جو سیاسی غلطی کی ہے اُس کے ازالے لیے کے لیے اُنہیں اب ایک ایک قدم پُھونک پُھونک کر رکھنا ہوگا۔ کچھ ڈلیور کرنے کے لیے اُن کے پاس زیادہ وقت نہیں رہا۔

اور آئی ایم ایف کے لیے صرف اتنا کہ ؎

مل گئے تم تو اِک یہی غم ہے

''پیار‘‘ زیادہ ہے‘ زندگی کم ہے!

٭٭٭