A fraud on the constitution

آئینی تنازعات اور مو شگافیوں کی دنیا میں (Constitutional Practice)کرنے والے وکیل صاحبان اور جج حضرات(Fraud on Statutes) کی اصطلاح سے اچھی طرح آگاہ ہیں۔ جس کا مطلب ہے ایسی قانون سازی‘ جس کے ذریعے قانون کے نام پر قانون کو دھوکا دیا جاسکے۔ معلوم تاریخ میں اس دھوکہ دہی اور نوسر بازی کی کئی مثالیں ملتی ہیں‘ مگر ایک مثال ایسی ہے‘ جو مودی کے ''شائننگ انڈیا‘‘ کے علاوہ آئینی ممالک میں کہیں اور نہیں ڈھونڈی جاسکتی ۔ ہم اسے (A fraud on the constitution) کا نام دے سکتے ہیں۔اس انوکھے فراڈکی کئی مثالیں آپ بھی Constitution of India 1950میںدیکھ سکتے ہیں‘لیکن انڈیا کی کرم فرمائیوں کے آگے'' کوٹی کوٹی‘‘ پرنام کرکے جھکے ہوئے امن کی بھاشا کے کارندے بھارتی آئین کو سیکولر کہتے ہوئے نہیں تھکتے ۔

حالیہ دنوں میں آرایس ایس کی حکومت نے بھارتی مقبوضہ کشمیر میںاسی آئین کے آرٹیکل نمبر370اور آرٹیکل-A 35 کے نام پہ جغرافیائی فراڈکیا‘ جسے پہلے دن سے ہی عالمی طور پر مذمت اور مزاحمت دونو ں کا سامنا ہے ۔ اسی تناظر میں بھارت کے چہرے سے پہلا نقاب یہ اُترا کہ وہ سیکولر ریاست نہیںرہی ‘کیونکہ سارے حقوق صرف ہندوؤں کے لیے ہی ہیں‘جنہیں انڈیا میںاکثریتی مذہب سمجھا جاتا ہے ۔یہی آج کے وکالت نامے کا دوسرا موضوع ہے۔کیا بھار ت میں ہندو مذہب کے ماننے والے اکثریت میںہیں یا دوسرے تمام مذاہب کو ہندوؤںپر عددی برتری حاصل ہے؟ دوسرے مذاہب کی اس مجموعی اکثریت کو اقلیت میں بدلنے اور ہندوؤں کی اکثریت دکھانے کے لیے آئینی اور قانونی فراڈ کس طرح کہاں کہا ں ہوتے ہیں۔ آئیے اس کا سراغ لگائیں:

سب سے پہلے بھارتی آئین1950ء کا آرٹیکل 25دیکھنا ضروری ہے۔ ا س کی ذیلی(Explanation)(ii)پر نظر ڈالیے۔

In sub-clause (b) of clause (2), the reference to Hindus shall be construed as including a reference to persons professing the Sikh, Jaina or Buddhist religion, and the reference to Hindu religious institutions shall be construed accordingly.

آرٹیکل 25کا یہ حصہ ہر اعتبار سے کھلم کھلا فراڈ نہیں ‘کئی نوسر بازیوں کا مجموعہ ہے۔

٭پہلا فراڈ اوپر مذکورسب آرٹیکل آئین میں موجود لفظ ہندو کی تشریح فراہم کرتا ہے‘جس میںکہا گیا ہے کہ جہاں جہاں لفظ ہندو کا ریفرنس آئے گا‘ اس میں وہاں ‘ وہاں سکھ مذہب کے ماننے والے بھی ہندو تصورہوں گے۔ کون نہیںجانتا کہ سکھ ہندو مت کا سیکشن‘ ذیلی شاخ یافرقہ نہیں جو ہزاروںسال پرانا مذہب ہے ‘بلکہ سکھ مت کی بنیاد گرو نانک (29 نومبر22-1469ستمبر(1539نے ڈالی۔ جو پاکستان کے ضلع ننکانہ کے گاؤں رائے بھوئی کی تلونڈی میں 1469 ء میں پیدا ہوئے ۔پھر پاکستان میں ہی کرتارپور کے مقام پر1539ء میںزندگی کی آخری سانس لی۔ہندوبُت پرست ہیں ‘جبکہ سکھ مذہب کی بنیاد ایک رب کی عبادت پر رکھی گئی ۔ہندو کے رام کی جنم بھومی انڈیا میں ہے‘ جبکہ تقریباً پانچ سو پچاس سال پرانے سکھ مذہب کے بانی کا جنم استھان پاکستان میں ہے۔ ہندو مذہب کی کتابیں ویداس‘رامائین اور مہا بھارت ہیں‘جبکہ سکھ مذہب کی واحد کتاب گرنتھ صاحب ہے‘ ہندو مذہبی کتابیں پرانے زمانے کی مذہبی جنگوں اور مذہبی پیشین گوئیوں پر رکھی گئی ‘ جبکہ سکھوں کی گرو گرنتھ صاحب مسلم صوفیانہ کلام اور گورو نانک کے اشلوک پر مشتمل ہے۔ ہندوؤں کا ہیرو رام نامی بادشاہ ہے‘ جس کے برعکس سکھ مذہب کے ماننے والے دس گروؤں کو مانتے ہیںاور آخری جگت گرو اپنی مذہبی کتاب گرنتھ صاحب کو کہتے ہیں۔ہندوؤں کی مذہبی نشانیاں کشکول ‘قشقہ‘سیندور اور بن واس ہے۔ سکھ مذہب کے پیروکار کڑا ‘ کاچھا‘ کیس‘ کرپان اور کنگھا کو پانچ ککے مانتے ہیں ۔

٭دوسرا فراڈیہ کہ آرٹیکل 25کے سب آرٹیکل 2کا پارٹ (b)یوں فریم ہوا۔

(b) (providing for social welfare and reform or the throwing open of Hindu religious institution of a public character to all classes and sections of Hindus.)

جس کا سادہ مطلب ہے کہ سکھ برادری ‘جین مت یا بدھ مت کی جتنی بھی جائیدادیں ہیں ‘وہ ہندو اوقاف ہی میںشامل ہوگئیں۔ ا سی طرح گوتم بدھ اور گورونانک کی نشانیاں اُن کے ماننے والوں کی عطیہ کردہ پراپرٹی تمام گُردوارے‘جین مت کے سارے ٹیمپل اور بدھ ازم کے پگوڈا ہندوؤں کی ملکیت میںچلے گئے۔ اس فراڈ کے خلاف بھارتی آئین کے فائنل ڈرافٹ پر ہندوستان کے سکھ ممبرانِ دستور ساز اسمبلی نے دستخط کرنے سے انکا ر کر دیاتھا۔ اُن کاکہنا تھا‘ سکھ مذہب ہندو مت کے خلاف بغاوت کے طور پہ معرضِ وجود میں آیا۔

٭تیسرا فراڈکائستھ کمیونٹی کے خلاف ہوا ‘جن کو ہندو قرار دیا گیا۔ انہوںنے اس فراڈ کے خلاف بھرپور احتجاج کیا۔ بھارتی ریاستوں کرناٹیکااور مہاراشٹرا میں کائستھ آباد ہیں جن کی آبادی ساڑھے سات کروڑ افراد پر مشتمل ہے۔کرناٹیکاکی سیاست میں ان کا کردار فیصلہ کن ہے۔ دو سو سالہ فرنگی راج میںکائستھوں کو ہندوؤں سے الگ قوم ماناگیا۔ 1947ء سے آج تک ساٹھ مرتبہ اُن کے دھرم گرو اور جگت گرو سنٹرل گورنمنٹ کے خلاف احتجاج کر چکے ہیں ۔ا ن کا مذہبی لٹریچر الگ ہے ۔ کائستھ مذہبی لٹریچر کا انگریزی زبان میں بھی ترجمہ ہو چکا۔کائستھ مذہب تقریباً آٹھ سو سال پہلے ویدک دھر م کے خلاف بغاوت کے نتیجے میں معرض وجودآیا۔ کائستھ مذہب میں مورتی کی پوچا‘ بُت پرستی کو ناجائز سمجھا جاتا ہے۔

٭چوتھا فراڈآدھی واسی مذہب کے پیروکاروں کے ساتھ کیا گیا۔ انڈیا میںان کی آبادی ساڑھے گیارہ کروڑ سے زیادہ ہے۔ سکھ اور کائستھ مذہب کے ماننے والوں کی طرح آدھی واسی بھی چلّا چلّاکر کہتے ہیں‘ ہم ہندو نہیںہیں۔ بھارت کی ہندو سرکار منہ سے کچھ نہیں بولتی‘ لیکن قانونی طور پر آدھی واسی کو ہندو کہتی ہے۔ اس وجہ سے آدھی واسی بھارتی ریاستوں جھاڑ کھنڈ ‘چھتیس گڑھ‘ مدھیاپردیش اور گجرات میں منظم جدوجہد کر رہے ہیں۔ خاص طور سے جھاڑ کھنڈ میں لاکھو ں آدھی واسی بہت بڑ ی بڑی ریلیوں میں ہندو مت سے بریت کا اعلان کر رہے ہیں۔

٭پانچواں فراڈبھارتی محکمہ مردم شماری کے ذمہ ہے۔ ہندوؤں کے علاوہ بھارتی محکمہ مردم شماری کے کاغذات میں سارے مذاہب کے ماننے والوںکو(OBC)کہاجاتاہے۔جن کی آبادی کی تعداد کو آزاد ادارے 52 پرسنٹ کہتے ہیں۔ OBC کا مطلب (Other backward classes) ہے۔ انڈین مردم شماری کا ریکارڈ گواہ ہے ‘چاہے شمار کردہ گھرانہ کسی مذہب سے تعلق رکھتا ہو (OBC) کے خانے میں لفظ ہندو لکھا جاتاہے۔

٭چھٹا فراڈبھارت کے طول وعرض میں ٹرائبل ایریاز ہیں‘ جن کی اکثر آبادی کے اپنے چھوٹے چھوٹے مذاہب ہیں ۔ ٹرائبل ایریاز میںبُت اور مورتیوں کے پوجنے والے نہ ہونے کے برابر ہیں۔ ان کو بھی گاؤرکھشا کے مسلح جتھوں نے کاغذوں میں ہندو لکھا۔؎

سوگواری ساتھ کیا دیتی مرا / غم سوا نیزے سے بھی نزدیک تھا

٭نیا فراڈ محمڈن عائلی قوانین کے بارے میں کیا گیا‘ جس کا موضوع تین طلاق کے شورپر ڈرامے کی صورت میں چُنا گیا۔مودی حکومت نے تاثر دیا جیسے وہ مسلمان عورت کا بڑا ہمدردہے‘ جبکہ بھارت خواتین کے لیے دنیا کا خطرناک ترین ملک اور ورلڈ ریپ کیپٹل ہے۔ ٹرانسپورٹ کا کوئی ذریعہ محفوظ نہیں۔حال ہی میں ایک مسلم خاتون کو چلتی ٹرین میں سارے ہندوؤں نے مل کر اجتماعی طور پر بے آبروکیا۔اس آبرو باختہ نظام میں آئین سے فراڈ چھوٹا سا جرم دکھائی دیتا ہے۔فرحت عباس یُوں نوحہ گر ہیں۔؎

وہ مجھ سے پوچھتی ہے کون لاوارث ہے مقتل میں

میں کہتا ہوں وہی جو قتل کرنے کے لیے آئے

وہ بولی درد کے اس پار بھی اک درد ہوتا ہے

میں اس کے بعد کتنی دیر تک کچھ بھی نہیں بولا