ہماری بھی سمجھ نہیں آتی!

بابا بلھے شاہؒ کی دھرتی قصور کے نواحی گاؤں بھکی ونڈ کے ایک ڈیرے پر محفل جمی ہوئی تھی۔ڈیرے کے سامنے ایک چھوٹی سی سڑک تھی‘ جس کے بالکل ساتھ‘ چڑھا ہوا دریائے ستلج پوری آب وتاب کے ساتھ بہہ رہا تھا۔ یوں تو درجنوں مرتبہ قصور جانے کا موقع مل چکا‘ لیکن یہ تو خواب میں بھی نہیں سوچا تھا کہ کبھی قصور سے تقریباً 18کلومیٹر دُور بھکی ونڈ میں بھی جا پہنچیں گے۔ یہاں آنے کا مقصد پیشہ وارانہ اُمور کی انجام دہی تھا۔ جاننا مقصود تھا کہ دریائے ستلج میں بھارت کی طرف سے چھوڑے جانیوالے سیلابی ریلے کے بعد علاقے کی کیا صورتحال ہے۔کلنجرہ‘ گاؤں چندا سنگھ اور دوسرے دیہاتوں سے گھومتے گھماتے بھکی ونڈ پہنچے تو پھر کئی گھنٹوں کیلئے یہیں کے ہورہے۔ ماحول ہی کچھ ایسا خوب صورت تھا ۔طرح طرح کے پرندے فضا میں اُڑانیں بھر رہے تھے۔ دیہاتی اپنے ڈھورڈنگروں کو چراگاہوں سے واپس لا رہے تھے‘ اسی ماحول میں گاؤں کے ڈیرے پر محفل جمی ہوئی تھی۔ موضوع گفتگو لامحالہ دریائے ستلج میں آنیوالا سیلابی ریلا تھا۔ دریامیں چڑھنے والے پانی پر گفتگو ضرور ہورہی تھی‘ لیکن یقین جانیے کہ ان میں سے کسی ایک بھی شخص کے چہرے پر پریشانی کے آثار نہیں تھے۔ چاٹی کی لسی کے دور چل رہے تھے اور ساتھ میں حقے کی گڑگڑاہٹ بھی بلند ہورہی تھی۔قہقہے بھی لگائے جارہے تھے اور یوں محسوس ہورہا تھا کہ جیسے سب کچھ نارمل ہے۔چڑھے دریا کودیکھنے کے باوجود ان دیہاتیوں کا یہ رویہ ہمارے لیے بھی حیران کن تھا۔ وجہ اس کی یہ تھی کہ ہمارے لیے یہ اندازہ لگانا مشکل نہیں تھا کہ دریا میں پانی آنے سے یہ لوگ پریشان نہیں ‘بلکہ خوش ہیں ۔ یہ لوگ جانتے ہیں کہ تھوڑی بہت مشکل تو ضرور پیش آئے گی‘ لیکن ہر مشکل کے بعد راحت بھی ہوتی ہے۔ یہ جانتے تھے کہ ہلکے پھلکے سیلاب کا یہ پانی اپنے ساتھ تازہ اور طاقتور مٹی لے کر آئے گا۔اسی تازہ اور نئی مٹی سے شاندار فصلیں اُگیں گی۔ دریا کے اردگرد کے علاقوں میں زیرزمین پانی کی سطح بلند ہوگی۔اس پانی کافی حصہ ہیڈ سلیمانکی اور پنجند کے مقامات پر جمع کرلیا جائے گا‘ جو کافی عرصے کیلئے دریا کے اردگرد رہنے والوں کی ضروریات کو پورا کرے گا۔یہاں کے رہنے والوں نے یہ منظرکئی سال کے بعد دیکھا تھا‘ ورنہ تو ہمارے ملک کا یہ دوسرا سب سے بڑا دریا برسوں سے خشک پڑا تھا اور اب اگر یہاں پانی آیا تھاتو ان کیلئے اس میں کچھ زیادہ پریشانی کی بات نہیں تھی۔ اس حد تک پریشانی ضرور تھی کہ اگر پانی کی مقدار میں اضافہ ہواتو پھر حالات قدرے خراب ہوسکتے ہیں۔ماحول اور گفتگو ‘ دونوں ہی یہاں سے اُٹھنے نہیں دے رہے تھے‘ لیکن چاروناچار واپس آنا ہی پڑا۔

راستے بھر یہ سوچیں ذہن میںآتی رہیں کہ طویل عرصے بعد دریا میں آنیوالے پانی کی زحمت قرار دیا جائے یا نعمت؟اسے بھارت کی آبی جارحیت کا نام دیا جائے یا پھر اس بات پر شکر ادا کیا جائے کہ چلو کچھ تو ہاتھ لگا؟1960ء میں پاکستان اور بھارت کے درمیان ہونے والے سندھ طاس معاہدے کے تحت ‘ دریائے ستلج ‘ بیاس اور راوی ہندوستان کو بیچ دئیے گئے۔دریائے بیاس سرحد کے اُس پار ہی دریائے ستلج میں ضم ہوجاتا ہے ۔ سندھ طاس معاہدے کے بعد ہندوستان نے بتدریج دونوں دریاؤں کا پانی روکنے کی صلاحیت حاصل کرلی۔ یاد پڑتا ہے کہ دریائے راوی میں آخری مرتبہ سیلاب1990ء میں آیا تھا اور دریائے ستلج میں غالباً1992ء میں دیکھا گیا تھا۔ اُس کے بعد سے تو دونوں ہی دریا بتدریج خشک ہوتے چلے گئے۔ چار سال قبل دریائے ستلج میں آخری مرتبہ تقریباً ایک لاکھ کیوسک کے قریب سیلابی ریلا آیا تھا۔اب اگر ان دونوں دریاؤں میں کبھی پانی آجائے تو بلاشبہ اِسے نعمت سے کم قرار نہیں دیا جاسکتا۔ دریائے راوی میں بھی بہت طویل عرصے کے بعد کافی مقدار میں پانی آیا‘ ورنہ بھارت کی طرف دریائے راوی پر تین ڈیم تعمیر کیے جانے کے بعد تو اب سرحد پار سے پانی کا ایک قطرہ بھی اس طرف نہیں آتا۔اب اگر اتنا پانی آہی گیا کہ اس سے کم از کم دریا کی گندگی ختم ہوگئی تو اسے بھی ہم آبی جارحیت کا نام دے رہے ہیں۔کیسی بات ہے کہ ہم ہمیشہ پانی کی کمی کا رونا روتا رہتے ہیں‘ لیکن دریائے ستلج میں آنیوالے پانی کی بڑی مقدار بھی دریائے سندھ میں گرکر بالآخرسمندر برد ہو گئی۔ اگر ہمارے پاس کوئی مناسب انتظام موجود ہوتا تو اس پانی کو ملک کے صحرائی علاقوں میں تقسیم کیا جاسکتا تھا۔چولستان اور تھل کا بڑا رقبہ اس سے سیراب ہوسکتا تھا ‘لیکن ہمارے پاس کوئی انتظام ہی نہیں سوائے اس کے کہ ہاتھ لگنے والے پانی کو ضائع کردیا جائے۔

آج یہ دور ہے کہ دنیا کے کئی ایک ممالک نے کم از کم ایک سال تک پانی ذخیرہ کرنے کے منصوبوں پر کام شروع کررکھا ہے اور ہم 30دن سے آگے نہیں بڑھ پا رہے۔یہ ملکی واٹر پالیسی میں شامل ہے کہ پانی ذخیرہ کرنے کی صلاحیت کو بڑھایا جائے گا ‘لیکن عملًا اس حوالے سے ایک قدم بھی آگے نہیں بڑھا یا جارہا۔اُلٹا ہمارے پاس پہلے سے موجود ڈیمز سلٹ سے بھرتے جارہے ہیں ۔ سلٹ کے باعث ان ڈیمز میں پانی ذخیرہ کرنے کی صلاحیت بتدریج کم ہوتی چلی جارہی ہے اور ہم ہیں کہ چندے سے ڈیمز بنانے چلے ہیں۔کوئی نہیں سوچتا کہ وقتی ڈرامے کس طرح سے صورت حال کو خراب کرتے ہیں۔ایک اُٹھتا ہے اور کہتا کہ آپ کو اسلام چاہیے؟اب کون مسلمان کہے گا کہ وہ اسلام نہیں چاہتا۔ اچھا اگر آپ اسلام چاہتے ہیں تو پھر میں پانچ سال کیلئے صدر ہوں۔ یوں تو ہماری تاریخ ہی قسم قسم کے ڈراموں سے بھری پڑی ہے ‘لیکن زیادہ دور جانے کی ضرورت نہیں۔ دیکھ لیجئے کہ تبدیلی کے دعویداروں نے ملک کا کیا حال کردیا ہے۔ 365دن گزر گئے‘ لیکن کوئی ایک بھی مثبت تبدیلی دیکھنے میں نہیں آرہی۔ بس احتساب کا ڈھونڈرا پیٹا جارہا ہے۔ ملک کو قرض سے نجات دلانے کے دعوے بھی ہوا ہوچکے۔ غیرملکی سرمایہ کاری لانے کے دعویدار ‘ اپنے ملک کے سرمایہ کاروں کو ہی سرمایہ کاری کیلئے آمادہ نہیں کرپارہے۔ چینی سے لے کر خوردنی تیل‘ پٹرول سے لے کر دیگر اشیائے ضروریہ کی قیمتیں آسمان سے باتیں کررہی ہیں ۔ بے روزگاری کی شرح میں بتدریج اضافہ ہورہا ہے ۔ صرف ایک چیز وافر مقدار میں میسر آرہی ہے اور وہ بہتری کے دعوے ہیں۔ حقائق کو اتنی ڈھٹائی سے جھٹلایا جارہا ہے کہ سچ پر سے اعتبار ہی اُٹھ گیا ہے۔

یوں محسوس ہوتا ہے کہ گویا احساس کی تو موت ہی واقع ہوچکی۔انسان کم از کم اپنی غلطی کو تسلیم ہی کرلے تودکھ کا احساس کسی قدر کم ہوجاتا ہے لیکن یہ تو ہم نے شاید سیکھا ہی نہیں ۔ یہی صورت حال ہم نے پانی کے حوالے سے پیدا کررکھی ہے۔ ہم یہ بات کیوں تسلیم نہیں کرتے کہ ہم نے دریاؤں میں تجاوزات قائم کرلی ہیں۔ ہم یہ ماننے کیلئے تیار ہی نہیں کہ بیشتر صورتوں میں ہماری اپنی کوتاہیاں ہی ہمارے لیے نقصان کا باعث بنتی ہیں۔مان لیجئے کہ ہم نے پاکستان کیلئے زندگی اور موت کا روپ دھارتے ہوئے پانی کی کمی کے مسئلے کی سنگینی کا ادارک ہی نہیں کیا۔ ہمارا شمار ایسے ممالک میں ہوتا ہے‘ جو دنیا میں سب سے زیادہ پانی استعمال کرنیوالے ممالک کی فہرست میں چوتھے نمبر پر ہے۔ ہمارے ملک میں ہرسال بارشوں سے قریباً 145ملین ایکٹر فٹ پانی آتا ہے‘ لیکن ہم بمشکل 13.7ملین ایکٹر فٹ پانی بچا پاتے ہیں۔اب جو پانی ہمارے مشرقی دریاؤں میں آیا تو اسے بھارت کی آبی جارحیت کا نام دے لیں یا کچھ اور؟الغرض ہماری بھی سمجھ نہیں آتی‘ پانی نہ ہوتو بھی رونا اور اگر ہو تو تب بھی رونا۔