سیلف میڈ لوگوں کا المیہ

میں اس کا اصل نام نہیں بتائوں گا۔ ویسے بھی نام میں کیا رکھا ہے۔ فرض کریں اس کا نام کاشف تھا۔ اس کے چہرے کا رنگ گندمی تھا، سر پر سیاہ گھنے بال تھے، ہونٹوں پر ہر وقت ایک مسکراہٹ کھیلتی رہتی اور آنکھوں میں ایک غیر معمولی چمک تھی جو اسے دوسروں سے ممتاز کرتی تھی۔ میں جس تعلیمی ادارے میں کام کرتا تھا وہ اسی ادارے کے ایک شعبے میںکلرک کے طور پر کام کر رہا تھا۔ سچ پوچھیں تو اس کے سربراہ کے وارے نیارے تھے۔ کلرک تو وہ تھا ہی لیکن اس کے ساتھ ساتھ نائب قاصد کے فرائض انجام دیتا اور بوقت ضرورت سویپر بھی بن جاتا۔ ہر ڈیپارٹمنٹ چاہتا تھا کہ وہ اس کے ساتھ کام کرے کیونکہ وہ کام سے نہ گھبراتا تھا‘ نہ تھکتا تھا۔ جو بھی اسائنمنٹ دی جاتی اپنی روایتی مسکراہٹ سے اسے قبول کرتا اور اس کی بجا آوری کے لیے دن رات ایک کر دیتا۔ پھر مجھے وہ ادارہ چھوڑ کر ایک طویل عرصے کے لیے تلاشِ روزگار میں کراچی اور پھر لاہور جانا پڑا۔ کئی سال بیت گئے، تقریباً 26 سال۔ اس دوران راولپنڈی اور اسلام آباد میں بہت سی تبدیلیاں آ گئیں۔ 26 سال ایک طویل عرصہ ہوتا ہے۔ بچے بڑے اور نوجوان ادھیڑ عمری میں داخل ہو جاتے ہیں۔ جب میں اتنے سالوں بعد اسلام آباد آیا تو دنیا ہی بدل چکی تھی۔ ایک عجیب سا احساس تھا۔ میں اپنے ہی شہر میں اجنبی تھا۔

مجھے اسلام آباد میں ایک جگہ نوکری مل گئی تھی اور میں مناسب کرائے پر کسی گھر کی تلاش میں تھا۔ اسلام آباد کے مہنگے سیکٹرز میں کرائے بہت زیادہ تھے‘ اس لیے میں نسبتاً کم کرائے والی جگہوں کی تلاش میں تھا۔ وہ اتوار کا دن تھا اور میں کرائے کے لیے صبح سے دو گھر دیکھ چکا تھا لیکن دونوں گھروں کا مسئلہ یہ تھا نیچے والے پورشن میں مالکِ مکان رہتا تھا‘ جو مسلسل دردِ سر ہو سکتا تھا۔ ایک نسبتاً ویران سڑک پر گاڑی چلاتے ہوئے اچانک میں نے سڑک کے کنارے چائے کا ایک ڈھابہ دیکھا۔ پلاسٹک کی کچھ کرسیاں اور دو چارپائیاں پڑی تھیں۔ عرصے بعد مجھے نوکری کے جھمیلوں سے فراغت ملی تھی۔ نئی نوکری اگلے ہفتے سے شروع ہونی تھی۔ یہ نومبر کا مہینہ تھا اور ہلکی ہلکی دھوپ چاروں طرف پھیلی ہوئی تھی۔ سردیوں کی دھوپ یوں بھی بھلی معلوم ہوتی ہے۔ میں نے سوچا‘ کیوں نہ کچھ دیر یہاں بیٹھا جائے اور چائے پی کر مکان کی تلاش پھر سے شروع کی جائے۔ میں نے گاڑی ڈھابے کے سامنے جا کر روک دی۔ یہ ایک کشادہ جگہ تھی جہاں کا زیادہ حصہ کچی زمین تھی اور ایک کمرے پر مشتمل ڈھابہ تھا۔ میں پلاسٹک کی ایک کرسی پر بیٹھ گیا اور چائے کا آرڈر دیا۔ میرے سامنے سڑک تھی اور دوسری طرف خال خال آبادی تھی۔ کہنے کو تو یہ اسلام آباد کا ایک حصہ تھا‘ لیکن ابھی تک اس علاقے میں ساری سہولتیں نہیں پہنچی تھیں۔ اتوار کو اسلام آباد میں لوگ دیر سے بیدار ہوتے ہیں لہٰذا سڑک پر گاڑیوں کی وہ روانی نہیں تھی جو عام دنوں میں ہوتی ہے۔ میں نے کرسی کی پشت سے ٹیک لگا کر آنکھیں بند کر لیں۔ کچھ ہی دیر میں ویٹر کی آواز نے مجھے چونکا دیا۔ وہ چائے لے آیا تھا۔ میں نے آنکھیںکھول کر دیکھا۔ ویٹر میری میز پر چائے رکھ کر چلا گیا تھا‘ لیکن میری میز کی ایک کرسی پر ایک ادھیڑ عمر شخص بیٹھا تھا۔ اس کے سرکے بال سفید تھے اور داڑھی میں بھی سفید بالوں کی تعداد زیادہ تھی۔ پتہ نہیں وہ کب سے یہاں تھا۔ میں نے آنکھیں کھولیں تو اس نے مسکراتے ہوئے کہا ''سر جی آپ نے مجھے پہچانا؟‘‘ میں یہی سمجھا‘ اسے کوئی غلط فہمی ہوئی ہے۔ میں نے اُسے ایک بار پھر غور سے دیکھا۔ اس کی آنکھوں میں ایک عجیب سی چمک تھی۔ اچانک مجھے چمکتی آنکھوں والا وہ لڑکا یاد آ گیا جسے میں بہت پہلے ملا تھا اور جو اس تعلیمی ادارے میں کام کرتا تھا‘ جہاں میں تھا‘ جس کے ہونٹوں پر ہر وقت مسکراہٹ کھیلتی رہتی تھی‘ جس کے بال گھنے اور سیاہ تھے۔ میں نے کہا ''کاشف؟‘‘ وہ ہنس پڑا اور کہنے لگا ''سر جی آپ نے مجھے یاد رکھا ہے آپ کا بہت شکریہ‘‘ میں نے اٹھ کر اسے گلے لگا لیا۔ میں نے کہا ''تم یہاں کیسے؟‘‘ حالانکہ میں اس سے پوچھنا چاہ رہا تھا کہ وقت نے تمہارا چہرہ کتنا بدل دیا ہے؟ وہ مسکراتے ہوئے بولا ''سر جی بڑی لمبی کہانی ہے‘ پر اب اس کہانی کا انجام بہت قریب آ گیا ہے‘‘۔ میں نے کہا ''انجام تو بعد کی بات ہے مجھے تو اس کہانی کا آغاز بھی معلوم نہیں‘‘۔ وہ ہنس پڑا ''سر جی آپ کو واقعی میری کہانی میں دلچسپی ہے؟‘‘ میں نے کہا ''کیوں نہیں تمہاری کہانی تمہاری طرح دلچسپ ہو گی‘‘۔ یہ کہہ کر میں نے ویٹرکو بلایا اور کاشف کے لیے چائے لانے کو کہا۔

''سر جی ہم غریبوں کی کہانی کیا ہو گی لیکن آپ نے کہا تو میں ضرور سنائوں گا‘‘ کاشف نے بولنا شروع کیا ''میں وسطی پنجاب کے ایک گائوں میں پیدا ہوا تھا۔ میرا باپ اینٹوں کے ایک بھٹے پر مزدوری کرتا تھا اور ماں گائوں کی دائی تھی‘ ہم جس گھر میں رہتے تھے وہ ڈھائی مرلے پر مشتمل تھا۔ لیکن سر جی کہتے ہیں غریبوں پر خدا کی مار ہوتی ہے۔ 1973 کا سیلاب آیا تو ہمارا گھر بھی بہا لے گیا۔ میں ان دنوں پہلی کلاس میں پڑھتا تھا۔ مجھے اندازہ ہی نہیں تھا کہ میرا گھر ختم بھی ہو سکتا ہے۔ ماں ہمیں کچھ دنوں کے لیے ایک اور محلے میں لے آئی۔ جب بارشیں ختم ہوئیں تو ہم نے مل کر اینٹ اینٹ جوڑ کر پھر چھوٹا سا گھر بنا لیا۔ میری ماں کو بہت شوق تھا کہ میں پڑھوں۔ وہ افلاس کے اس چنگل سے مجھے نکالنا چاہتی تھی۔ مجھے بھی پڑھنے کا شوق تھا۔ دوسری کلاس میں میری دوسری پوزیشن آئی تو میری ماں نے سارے محلے کو میری کامیابی کے بارے میں بتایا۔ میں سکول میں پڑھتا تھا لیکن دوسرے بچوں کی طر ح شام کو کھیلنے کودنے کے بجائے مزدوری کرتا تھا۔

والدہ مارچ سے اکتوبر تک کے گرم مہینوں میں تندور پر روٹیاں لگاتی تھیں۔ گرمیوں کے مہینوں میں جب آگ کے نزدیک بیٹھنا مشکل ہوتا تو لوگ تندور پر روٹیاں لگواتے۔ مجھے یاد ہے میری ماں کیسے گرمیوں کے تپتے ہوئے دنوں میں جلتی، دہکتی آگ کے قریب بیٹھ کر سینکڑوں روٹیاں لگاتی تھی۔ میرا ننھا سا ذہن اکثر یہ سوچتا‘ ماں دہکتے ہوئے تندور میں کیسے روٹیاں لگاتی ہے ؟ اس کا چہرہ اور پورا بدن پسینے سے تر ہو جاتا‘ وہ اپنا دوپٹہ کس کر اپنی پیشانی پر باندھ لیتی۔ مسلسل دہکتی آگ میں جھک کر جب وہ تندور میں روٹیاں لگاتی تو لپکتے ہوئے شعلے اس کے چہرے اور آنکھوں کے قریب ہوتے آہستہ آہستہ ماں کے چہرے کی رنگت بدلنے لگی۔ اس کی خوب صورت آنکھیں سرخ ہو جاتیں اور پھر اس کی آنکھوں کی بینائی متاثر ہونے لگی۔ میں مزدور خاندان کا بچہ تھا۔ مجھے بھی مزدوری میں اپنا حصہ ڈالنا تھا۔ میں لوگوں کے گھروں سے گندھا ہوا آٹا لے آتا۔ تندور پر ماں روٹیاں لگاتی اور میں روٹیاں لوگوں کے گھروں میں پہنچا دیتا۔ مہینے کے آخر میں مجھے پانچ روپے ملتے جو میں گھر دے دیتا۔ اس کے ساتھ ساتھ میں روٹیاں لے کر بازار بھی جاتا اور بیچ آتا۔ ہمارے محلے میں ایک صاحبِ دل ڈی سی صاحب کے ریڈر تھے۔ انھوں نے پڑھائی کے لیے میرا شوق دیکھا تو مجھے شہر کے قریب گورنمنٹ ہائی سکول میں داخل کرا دیا۔ مجھے اچھی طرح یاد ہے‘ میں ساتویں جماعت میں تھا تو سکول یونیفارم کا رنگ بدل کر خاکی کر دیا گیا تھا۔ ہمارے پاس نئے کپڑے خریدنے کے پیسے نہیں تھے۔ ماں نے خود ہی گھر میں کپڑے رنگ دیے۔ اگلے روز میں سکول گیا تو ماسٹر صاحب نے ساری کلاس کے سامنے ہنستے ہوئے کہا: کیا یہ کپڑے گھڑے سے نکال کر لائے ہو؟ میں سب کے سامنے جھینپ گیا، لیکن خاموش رہا۔ شاید ہمارے استاد کو معلوم نہیں تھا کہ مفلسی انسان کو کیسے کیسے رنگ دکھاتی ہے۔ لیکن سچ پوچھیں تو مجھے کسی کی پروا نہیں تھی۔ میرے دل میں میری ماں کی آرزو کا چراغ جل رہا تھا۔ میرے ذہن میں ہر وقت ماںکی آواز گونجتی رہتی۔ بیٹے تم نے آگے بڑھنا ہے۔ آگے، بہت آگے۔ اسی دوران میرا میٹرک کا امتحان ہوا اور ہم سب نتیجے کا انتظار کرنے لگے۔ اس نتیجے نے میری زندگی کا فیصلہ کرنا تھا۔ (جاری)