مقامِ محمود

سیدنا محمد رسول اللہﷺ کے مقاماتِ عالیہ اور خصائصِ کبریٰ میں سے ایک اہم اعزاز ''مقامِ محمود‘‘ ہے‘ اس کی بابت اللہ تعالیٰ نے فرمایا: ''اور رات کے کچھ حصے میں تہجد پڑھا کیجیے ‘جو خاص آپ کے لیے اضافی عبادت ہے‘یقینا آپ کا رب آپ کو مقامِ محمود پر فائز فرمائے گا‘‘ (بنی اسرائیل:79)۔

مندرجہ بالا آیت میں لفظِ ''عَسیٰ‘‘آیا ہے ‘جو امید کے معنی میں ہوتا ہے ‘ لیکن جب اس کلمے کی نسبت اللہ کی طرف ہو تو پھر وجوب کے معنی میں آتا ہے ‘یعنی یقینا آپ کا رب آپ کو مقامِ محمود پر فائز فرمائے گا‘کئی مفسرین نے یہ معنی مراد لیاہے۔ لغوی اعتبار سے محمود کے معنی ہیں '' ہر اعتبار اور ہر جہت سے ایسا مقامِ رفیع جو سب کے لیے مرکز ومحور بن جائے ‘ سب کی نظریں اُسی کی طرف اٹھیں اور ہر ایک بے اختیار مدح وستائش پر مجبور ہوجائے‘‘ تاہم شریعت کی اصطلاح میں اس سے مراد ''مقامِ شفاعتِ کبریٰ‘‘ ہے۔

شفاعت کا اُردومتبادل سفارش ہے‘ یہاں ہم نے شفاعت کے لغوی معنی سے دانستہ اعراض کیاہے‘ تاکہ تحریر عام قارئین کے لیے ثقیل نہ ہوجائے ۔شریعت میں شفاعت کے معنی ہیں:''رسول کریم ﷺ کا مقبولین بارگاہِ خداوندی کی بلندیِ درجات اورصغیرہ گناہوں کی معافی ‘گناہگاروںکے لیے کبیرہ گناہوں کی مکمل معافی یا عذاب میں تخفیف کے لیے اللہ تعالیٰ کے حضور دعا ‘استغفار اور سفارش کرنا ‘‘۔پس یہ سفارش ہر ایک کے حسب ِحال ہوگی۔ محشر میں اولیاء وصلحاء‘ عام مومنین ‘فساق وفجار ‘ کفار ومشرکین الغرض سارے انسان جمع ہوں گے اور میزانِ عدل قائم ہونے میں تاخیر ہوگی ‘ یہ مرحلہ سب کے لیے انتہائی کُلفت کا باعث ہوگااور سب کی تمنا ہوگی کہ اللہ تعالیٰ کے حضور کوئی وسیلہ بنے اور یہ عبوری مرحلہ آگے کی طرف بڑھے ۔قرآنِ کریم میں میدانِ حشر کی ہولناکی کو بیان کیاگیا ہے:

(۱)''بے شک تمہارے رب کے نزدیک ایک دن ایسا ہے‘ جو تمہاری گنتی کے مطابق‘ ایک ہزار سال کی مانند ہے‘‘ (الحج:47)۔ (۲)''اُس دن کی مقدار پچاس ہزار برس ہے‘‘ (المعارج:4)۔ ان آیات کا ایک معنی تو یہ ہے کہ قیامت کے دن کی طوالت کو ایک ہزار سال یا پچاس ہزار سال سے تعبیر کیا گیا ہے یا یہ کہ یومِ قیامت کا گزرنا ہر ایک کے حسب ِ حال ہوگا۔ انسان کی فطرت ہے کہ انتہائی کرب کے عالَم میں ایک لمحہ بھی برسوں کے برابرمحسوس ہوتاہے اور عیش وراحت کے عالَم میں لگتا ہے کہ کئی برس پلک جھپکتے میں گزر گئے۔ اللہ تعالیٰ کا ارشاد ہے ''اور قیامت کا معاملہ صرف ایک پلک جھپکنے کی مانند یا اُس سے بھی قریب ہوگا‘ ‘(النحل:77)۔ رسول کریم ﷺ سے المعارج:4کے حوالے سے پوچھا گیا:پھریہ دن تو بہت ہی طویل ہوگا‘آپ ﷺ نے فرمایا ''اس ذات کی قسم جس کے قبضہ وقدرت میں میری جان ہے‘ مومن پر اسے ہلکا کردیا جائے گا؛حتیٰ کہ اُسے اتنا خفیف محسوس ہوگا‘ جیسے دنیا میں ایک فرض نماز کا وقت ہوتا ہے‘ ‘(مشکوٰۃ:5564)۔

الغرض زمان ومکان ایک ہوگا‘ لیکن ہر ایک پر اپنے اعمال کے مطابق بیت رہی ہوگی۔آپ ﷺ نے فرمایا'' قیامت کے دن سورج مخلوق کے قریب ہوگا ‘ لوگ اپنے اعمال کے اعتبار سے اپنے پسینے میں ڈوبے ہوں گے‘ کسی کا پسینہ ٹخنوں تک‘ کسی کا گھٹنوں تک ‘ کسی کا کمر تک اور کسی کالگام کی مانند منہ تک پہنچا ہوگا‘‘( مسلم: 2864)۔پس‘ ایسا ممکن ہے کہ انبیائے کرام علیہم السلام اور اللہ تعالیٰ کے مقربین ومحبوبین کے لیے وہ دن پل بھرکی مانند ہوگا ‘ تاہم انسان چاہتا ہے کہ عبوری منزل سے گزر کر اپنے مستقل مقام پر جاپہنچے۔

صحیح بخاری کی ایک طویل حدیث کا خلاصہ ہے '' اہلِ محشر مصیبت کے عالم میں کسی شفیع اور وسیلے کی تلاش میں سرگرداں ہوں گے ‘ وہ بالترتیب حضراتِ آدم ‘ابراہیم ‘موسیٰ اور عیسیٰ علیہم السلام سے رجوع کرتے ہوئے بالآخر سید المرسلین کی بارگاہ میں حاضر ہوں گے ‘ کیونکہ ہر نبی یہ کہے گا '' آج بارگاہِ جلالت میں مجھے کچھ عرض کرنے کی مجال نہیں ہے‘‘ جبکہ آپ ﷺ فرمائیں گے : اس منصب کا اہل میں ہی ہوں‘ پھر آپ ﷺ کو اذنِ شفاعت عطا ہوگا ‘اس عظیم منظر کو آپ یوں بیان فرماتے ہیں ''مجھے حمدِ باری تعالیٰ کے خاص کلمات اِلقا کیے جائیں گے ‘میں ان کلمات سے اللہ کی حمد بیان کروں گا‘پھر مجھ سے کہا جائے گا: اے محمد! سر اٹھائیے ‘آپ کا کہا سنا جائے گا‘ آپ جو مانگیں گے‘ عطاکیا جائے گا‘ آپ کی شفاعت قبول ہو گی ‘‘ آخر میں ہے :آپ بنی اسرائیل:79کی تلاوت کرکے فرمائیں گے ''یہ وہ مقامِ محمود ہے‘ جس کا اللہ نے تمہارے نبی سے وعدہ کیا ہے‘‘۔ایک اور حدیث میں آپ ﷺ نے فرمایا '' ہر نبی سے اللہ نے قبولیتِ دعا کا ایک وعدہ فرمایا ہے۔پس ‘ہر نبی نے جلدی سے اپنی مراد مانگ لی اور میں نے اس وعدۂ ربانی کو قیامت کے دن اپنی امت کی شفاعت کے لیے بچا کر رکھ لیا ہے‘ان شاء اللہ میرا جو بھی امتی اللہ کے ساتھ کسی کو شریک نہیں ٹھہرائے گا‘ وہ (کسی نہ کسی مرحلے پر)اس دعا سے مستفید ہوگا‘ ‘( مسلم:199)۔ یہ بھی مقامِ محمود کی طرف اشارہ ہے : رسول کریم ﷺ اجابتِ دعا کے وعدۂ ربانی کا حوالہ دے کر قیامت کے دن گنہگارانِ امت کی شفاعت فرمائیں گے۔آپ ﷺ نے فرمایا: ''مجھے دوباتوں میں سے ایک کا اختیار دیا گیا:میں شفاعت کو اختیار کروں یا یہ کہ میری آدھی امت جنت میں داخل ہوجائے‘ پس میں نے شفاعت کو اختیار کیا‘ کیونکہ یہ عام ہے ‘ اس میں سب کے لیے کفایت ہے‘ تم سمجھ رہے ہوگے کہ صرف متقین کے لیے نہیں!بلکہ گناہگاروں‘ خطاکاروں اور معصیت میں آلودہ سب کے لیے ہے‘‘ (ابن ماجہ:4311)۔

اللہ تعالیٰ کا ارشاد ہے: ''عنقریب آپ کا رب آپ کو اتنا عطا فرمائے گا کہ آپ راضی ہوجائیں گے‘‘ (الضحیٰ:5)۔ علامہ قرطبی نے اس آیت کی تفسیر میں لکھا ہے ''جب یہ آیت نازل ہوئی تو نبی کریم ﷺ نے فرمایا: پھر تو جب تک کہ میرا ایک بھی امتی جہنم میں ہے‘ میں راضی نہیں ہوں گا‘‘پھر فرمایا: ''اللہ تعالیٰ جبرائیل ؑ سے فرمائے گا: محمد ﷺ کے پاس جائواور کہو:بے شک ہم آپ کو آپ کی امت کے بارے میں راضی کریں گے اور آپ کو رنج نہیں پہنچائیں گے‘ ‘( مسلم:202)۔

قرآنِ کریم میں شفاعت کی نفی اور اثبات دونوں طرح کی آیات موجود ہیں ‘ کالم میں ماہرینِ علم العقائد کی طویل بحثوں کی گنجائش نہیں ہوتی ۔اللہ تعالیٰ نے فرمایا: ''سو ‘اُن (مجرموں) کو شفاعت کرنے والوں کی شفاعت نفع نہ پہنچائے گی‘‘ (المدثر:48)۔ پھر فرمایا:(۱) ''کس کی مجال ہے کہ اس کی بارگاہ میں سفارش کرے ‘مگر جسے وہ اِذن عطا فرمائے‘‘ (البقرہ:255)۔ (۲) ''اُس دن کسی کی شفاعت نفع نہیں پہنچائے گی‘ مگر جسے رحمن نے اجازت دی ہو اور اس کی بات سے وہ راضی ہو‘‘ (طہٰ:109)۔

اس مفہوم کی دیگر آیات بھی موجود ہیں کہ اللہ کے حضور اس کے اذن سے شفاعت کی جائے گی‘مگر جب تک رسول اللہ ﷺ مقامِ محمود پر فائز نہیں ہوں گے‘ بابِ شفاعت نہیں کھلے گا‘ اس کے بعد انبیائے کرام ورُسلِ عُظام ‘ اولیاء وصُلَحاء حسب ِ مرتبہ سفارش کریں گے ‘یہاں تک کہ حدیث پاک میں ہے :رسول کریم ﷺ نے فرمایا: ''بے شک ناتمام پیدا ہونے والا بچہ اپنے رب سے بر بنائے ناز جھگڑے گا‘تو اس سے کہا جائے گا:اپنے رب سے جھگڑنے والے ناقص بچے ! اپنے ماں باپ کو جنت میں لے جا‘ وہ اُن دونوں کو اپنی نال کے ساتھ باندھ کر کھینچے گا‘یہاں تک کہ اُن دونوں کو جنت میں داخل کردے گا‘‘ (ابن ماجہ:1608)۔

رسول کریم ﷺ نے اپنے فضائل وخصائص خود بیان کیے‘ہم کئی احادیثِ مبارکہ میں بیان کردہ فضائل کو یکجا کر کے درج کر رہے ہیں۔ آپ ﷺ نے فرمایا: ''میں قیامت کے دن اولادِ آدم کا سردار ہوں گااوریہ میرے لیے کوئی فخر کی بات نہیں‘آدم علیہ السلام سے لے کر عیسیٰ علیہ السلام تک سب انبیاء میرے پرچم تلے ہوں گے‘میں رسولوں کا قائد ہوں گا‘ میں خاتم النَّبِیّٖن ہوں ‘ میں سب سے پہلے شفاعت کرنے والا اور مقبولُ الشفاعۃ ہوں گا اور یہ میرے لیے فخر کی بات نہیں‘ قبر سے باہر آنے والا پہلا شخص میں ہی ہوں گا‘جب انسانیت اللہ کے حضور حاضر ہوگی ‘تو اُن کا قائد میں ہی ہوں گااور جب جلالِ الٰہی کے آگے سب لوگ مہر بہ لب ہوں گے ‘تو اُن کا ترجمان میں ہوں گا‘ جب انہیں حشر میں روک دیا جائے گاتو اُ ن کا وسیلۂ شفاعت میں بنوں گا‘ جب نجات کی ساری امیدیں ٹوٹ جائیں گی تو بشارت دینے والا میں ہی ہوں گا‘ساری عزتیں اور ربّ کے خزانوں کی کنجیاں میرے ہاتھ میں ہوں گی۔ حمد باری تعالیٰ کا پرچم میرے ہاتھ میں ہوگا ‘۔اللہ کی بارگاہ میں اولادِ آدم میں سب سے معزز میں ہی ہوں گا۔ہزاروں خدام چمکتے ہوئے موتیوں کی طرح میرے گردوپیش ہوں گے‘‘۔

شفاعت کی کئی صورتیں ہیں :(۱)شفاعت بالاذن: جنہیں اللہ تعالیٰ اپنی بارگاہ میں شفاعت کا اذن عطا فرمائے گا‘ (۲) شفاعت بالوجاہت:جنہیں اللہ تعالیٰ نے اپنی بارگاہ میں عِزّوشرَف سے نوازا ہے‘ وہ کسی کی شفاعت کریں گے تو اللہ ان کی لاج رکھے گا‘ قرآنی آیات میں انبیائے کرام کی وجاہت کا ذکر ہے ‘(۳) شفاعت بالمحبت:محبوبین باری تعالیٰ کواس کی بارگاہ میں شفاعت کا اعزاز نصیب ہوگا‘ (۴)شفاعت کی ایک صورت دعا واستغفار ہوگی ۔

نبی ﷺ نے فرمایا ''جب مؤذن اذان کہے تو تم بھی کلماتِ اذان کو دہرائو‘ پھر مجھ پر درود بھیجو‘ کیونکہ جو مجھ پر ایک بار درود بھیجے گا‘ اللہ تعالیٰ اس پر دس رحمتیں نازل فرمائے گا‘ پھر میرے لیے مقامِ وسیلہ کی دعا مانگو ‘ یہ جنت میں ایک ایسا مقام ہے ‘جو اللہ تبارک وتعالیٰ اپنے بندوں میں سے کسی ایک خاص بندے کو عطا فرمائے گا‘ مجھے یقین ہے کہ وہ میں ہی ہوں گا‘سو جو میرے لیے ''مقامِ وسیلہ ‘‘ کی دعا مانگے گا‘ اس کیلئے میری شفاعت واجب ہوجائے گی‘‘ ( مسلم:384)۔ ہم نے اپنے مجموعۂ فتاویٰ ''تفہیم المسائل‘‘ کی جلد اول میں یہ ثابت کیا ہے کہ دعا بعد الاذان کے تمام کلمات احادیثِ مبارکہ سے ثابت ہیں ‘ اُس میں یہ بھی ہے ''اور اے اللہ! انہیں مقامِ محمود پر فائز فرما‘جس کا تو نے اُن سے وعدہ فرمایا ہے‘‘۔ رہا یہ سوال کہ جب اللہ نے اپنے حبیبِ مکرم ﷺ سے ''مقامِ وسیلہ‘‘اور ''مقامِ محمود‘‘ کا وعدہ فرمارکھا ہے ‘تو ہماری دعا کی کیا ضرورت ہے‘تو جواباً عرض ہے '' ہماری دعا ہماری اپنی سعادت کے لیے ہے ‘ رسول کریم ﷺ کے مقاماتِ رفیعہ ہماری دعا کے محتاج نہیں ‘‘۔