قومی مفاد کی عینک

اخباری رپورٹ کے مطابق وزیر اعظم عمران خان نے حکومتی قانونی ٹیم کی کارکردگی کو قابلِ ستائش قرار دیتے ہوئے کہا ہے کہ قانونی ٹیم نے عدالت عظمیٰ کو مطمئن کرنے میں اہم کردار ادا کیا، اور عدالتی فیصلہ قانونی ٹیم کی فتح ہے۔ مزید فرمایا گیا ہے کہ فیصلے سے ملکی اداروں میں تصادم چاہنے والوں کو شکست ہوئی، اپنا پیسہ بچانے والے اس مافیا کو آئندہ بھی مایوسی ہو گی۔ 15 ماہ تک زور لگانے والا مافیا ناکام ہو گیا۔ جس بھی شخص نے گزشتہ چند روز کے دوران اٹارنی جنرل انور منصور اور ان کی حوصلہ افزائی کے لیے موجود بیرسٹر فروغ نسیم کے دلائل سنے ہیں، اور اس سے پہلے چیف آف آرمی سٹاف کی مدتِ ملازمت میں توسیع کے حوالے سے جاری کیے جانے والے اعلانات کی تفصیل سے بھی کچھ واقفیت حاصل کی ہے، وہ وزیر اعظم کی اس ''شاباش‘‘ پر مسکرائے بغیر نہیں رہ سکتا۔ سپریم کورٹ کے سامنے جو کچھ کہا گیا، اور اس سے پہلے ایوانِ صدر اور ایوانِ وزیر اعظم میں جو نوٹیفکیشن، نوٹیفکیشن کھیلا جاتا رہا، اس پر ایک اچٹتی سی نظر ہی ڈال لی جائے تو وزیر اعظم کے حوصلے کی داد دینا پڑتی ہے کہ جن لوگوں کو مرغا بنانا چاہیے تھا، وہ ان کی پیٹھ تھپک رہے ہیں۔ اس سے اندازہ لگایا جا سکتا ہے کہ میرٹ اور کارکردگی کی تعریف ان کی نظر میں کیا ہے؟ چیف جسٹس آصف سعید کھوسہ نے تو ایک موقع پر یہاں تک کہہ دیا کہ جن لوگوں نے نوٹیفکیشن نمبر3 جاری کیا ہے، ان کی ڈگریاں چیک کی جانی چاہئیں کہ ایسا تو اسسٹنٹ کمشنر کی تعیناتی کے ساتھ بھی نہیں ہوتا، جو کچھ چیف آف آرمی سٹاف کے ساتھ کیا جا رہا ہے۔ یاد رہے کہ وزیر اعظم کی طرف سے از سر نو تقرری کی سمری بھجوائی گئی تھی، جبکہ ایوانِ صدر سے نوٹیفکیشن توسیع کا جاری ہو گیا۔ اٹارنی جنرل سپریم کورٹ کے سامنے جس طرح بوکھلاتے اور گھگھیاتے رہے، وہ تو تاریخ کا حصہ بن چکا ہے۔ کبھی کہا کہ جنرل ریٹائر نہیں ہوتا، اور کبھی کہا کہ وزیر اعظم چاہے تو ریٹائرڈ جرنیل کو بھی آرمی چیف بنا سکتا ہے۔ ان کے جو ارشادات اخبارات میں چھپتے رہے، اور ٹیلی ویژن پر جگمگاتے رہے، انہیں یکجا کر لیا جائے تو قانون کے طالب علموں کی تفننِ طبع کے لئے ایک اچھا خاصہ کتابچہ تیار ہو سکتا ہے۔

سپریم کورٹ کا مختصر حکم نامہ جاری ہونے کے بعد بیرسٹر فروغ نسیم نے ایک پریس کانفرنس میں فرمایا کہ اب اگر اپوزیشن اس معاملے پر قانون سازی کے لیے تعاون نہیں کرے گی تو اس پر توہین عدالت بھی عائد ہو سکتی ہے۔ عدالتی فیصلے کی اس نادر تشریح پر کئی قانونی ماہرین کے نزدیک ان کو خود توہینِ عدالت کا نوٹس جاری کیا جا سکتا ہے۔ یہ درست ہے کہ چیف آف آرمی سٹاف کی مدتِ ملازمت اور توسیع کے حوالے سے سپریم کورٹ نے قانون سازی کی ہدایت کی ہے۔ اس کا یہ مطب نہیں کہ وہ پارلیمنٹ کے کسی رکن کو کسی خاص نوعیت کا قانون بنانے پر مجبور کر سکتی ہے یا اس کی ہدایت دے سکتی ہے۔ سپریم کورٹ کے حکم کی بنیاد اس حکومتی یقین دہانی پر ہے کہ یہ معاملہ چھ ماہ میں طے کر لیا جائے گا۔ دلچسپ بات یہ ہے کہ توسیع کا اعلان کرنے والی حکومت کے نمائندے نے عدالت کے سامنے واضح اقرار کیا کہ اس حوالے سے کوئی قانون موجود نہیں ہے۔وزیر اعظم اپنی قانونی ٹیم کو شاباش دے رہے ہیں تو ان کی مرضی...

خرد کا نام جنوں پڑ گیا جنوں کا خرد

جو چاہے آپ کا حسنِ کرشمہ ساز کرے

ان کی اپنی ٹیم ہے، وہ جس طرح چاہیں اس کی بلائیں لیں، یہی لیل و نہار رہے تو حکومت اور عوام لڑھکنیوں سے لطف اندوز ہوتے رہیں گے۔ کسی کو لکی ایرانی سرکس میں جا کر وقت ضائع کرنے کی ضرورت نہیں ہو گی۔

وزیر اعظم نے یہ بھی کہا ہے کہ: ملکی اداروں میں تصادم چاہنے والوں کو شکست ہوئی، اپنا پیسہ بچانے والے مافیا کو آئندہ بھی مایوسی ہو گی۔ تیری آواز مکے اور مدینے، اداروں میں تصادم کی کوشش کرنے والوں پر تین حرف بھیجے جا سکتے ہیں، لیکن وہ ''مافیا‘‘ کون ہے، جو اپنا پیسہ بچانے کے لئے یہ سب پاپڑ بیل رہا تھا؟ اگر اس سے مراد اپوزیشن ہے، تو وہ تو گزشتہ دِنوں چُپ سادھ کر بیٹھی رہی۔ اس معاملے میں تو یوں لگ رہا تھا کہ اس کے منہ میں زبان ہی نہیں ہے۔ نوٹیفکیشن وزیر اعظم ہائوس میں تیار ہوتے رہے، جوہر وزارتِ قانون کے کھلتے رہے، متضاد بیانات ایوانِ صدر سے منسوب ہوتے رہے، اٹارنی جنرل عدالت کے سامنے لرزتے کانپتے رہے۔ درخواست گزار کا کوئی تعلق کسی اپوزیشن جماعت سے نہ تھا۔ سوالات پر سوالات سپریم کورٹ کے فاضل جج صاحبان اٹھاتے رہے۔ اس سب میں اپوزیشن کہاں سے آ گئی؟ مافیا کون سا تھا اور کیا کر رہا تھا؟ اگر اس بارے میں تفصیلی بیان جاری کر دیا جائے تو قانون اور سیاست کے طالب علموں کا کچھ نہ کچھ بھلا ہو سکتا ہے۔

وزیر اعظم کی نگاہ سے یہ بات اوجھل نہیں ہو گی کہ معاملہ پارلیمنٹ میں جانا ہے، وہاں قانون سازی کے لیے انہیں اپوزیشن سے معاونت درکار ہو گی۔ عام بل منظور کرانے کے لیے بھی دونوں ایوانوں میں مطلوب اکثریت حکومت کے پاس نہیں ہے، اس لیے ایک انتہائی اہم ادارے کے معاملات کو گروہی سیاست کی نذر نہیں ہونا چاہیے۔ سیاسی جماعتوں کو وسیع تر اتفاق کے ذریعے قانون بنانا چاہیے۔ چیف آف آرمی سٹاف کا تقرر، مدتِ ملازمت یا توسیع کا معاملہ سیاسی یا جماعتی نہیں، قومی ہے، اور اسے قومی مفاد کی عینک لگا کر ہی دیکھنا ہو گا۔ جنرل قمر جاوید باجوہ کو زیر بحث لائے بغیر مستقبل کے لیے قانون سازی کرنا ہو گی۔ انہیں تو توسیع مل چکی، لیکن وہ پہلے آرمی چیف ہیں، نہ (خدانخواستہ) آخری۔ ان سے پہلے کا ماضی بھی طویل ہے، اور بعد کا مستقبل بھی طویل ہو گا (انشاء اللہ) دور تک دیکھنے کی کوشش کر گزریے، بینائی یہ کچھ زیادہ زور نہیں پڑے گا ؎

اے اہلِ نظر، ذوق نظر خوب ہے لیکن/ جو شے کی حقیقت کو نہ سمجھے وہ نظر کیا

وقت کی پابندی: ایک محیرالعقول مظاہرہ

پاکستان میں وقت کی پابندی کا تصور ہی ختم ہوتا جا رہا ہے۔ عدالتوں اور افواج پاکستان کے علاوہ اگر کہیں وقت کا تصور باقی رہ گیا ہے، تو وہ تعلیمی ادارے ہیں۔ وہاں بھی تقریبات میں اس طرف کم ہی توجہ ہوتی ہے، صرف پیریڈ وقت پر شروع ہو جاتے ہیں۔ سیاسی جماعتوںکے جلسوں نے تو ریکارڈ توڑ رکھا ہے، چار، پانچ گھنٹے کی تاخیر معمول بن چکی ہے۔ تحریک انصاف، مسلم لیگ (ن) یا پیپلز پارٹی میں سے کسی کو اعلان کردہ وقت یاد تک نہیں ہوتا۔ جماعت اسلامی اس حوالے سے مختلف تھی کہ اس کے بانی مولانا ابوالاعلیٰ مودودی مرحوم وقت کی انتہائی پابندی کرتے تھے۔ قائد اعظم محمد علی جناح ؒ کے بارے میں تو کہا جاتا ہے کہ ان کی آمد و رفت کے ساتھ لوگ گھڑیاں ٹھیک کرتے تھے، گھڑی کا وقت غلط ہو سکتا تھا، ان کے دیئے گئے وقت میں کسی غلطی یا کوتاہی کا کوئی امکان نہیں تھا۔ سماجی تقریبات میں جتنا وقت ہمارے ہاں ضائع کیا جاتا ہے، اس سے ہر شخص آگاہ ہے۔ مجھے اپنی شادی یاد ہے کہ بارات کو کراچی سے حیدر آباد جانا تھا۔ جماعت اسلامی سندھ کے سیکرٹری جنرل اور بعد ازاں امیر حیدر آباد میاں محمد شوکت مرحوم کے ہاں جانا تھا، ایک بجے دوپہر کا وقت مقرر تھا۔ ہم پون بجے ان کی رہائش گاہ کے قریب پہنچ گئے اور گلی کے نکڑ پر دس منٹ کھڑے رہے تاکہ ٹھیک ایک بجے ''شادی گاہ‘‘ میں داخل ہوں۔ اس طرح کا ایک محیرالعقول واقعہ ایک روز پیشتر فیصل آباد میں پیش آیا۔ میرے کالج کے کلاس فیلو شیخ محمودالحسن کے بیٹے اور ممتاز صنعت کار شیخ اعجاز کی بیٹی کی شادی کی تقریب تھی۔کارڈ میں بارات کی آمد کا وقت ساڑھے آٹھ بجے اور کھانے کا نو بج کر دس منٹ لکھا تھا۔ ٹھیک 9 بج کر دس منٹ پر کھانا پیش کر دیا گیا، حیرت کی انتہا نہ رہی۔ میرے رفقائِ سفر محمد فاروق اور ڈاکٹر الیاس قمر نے بھی انگلیاں دانتوں میں دبا لیں۔ یہ ایک ایسا واقعہ ہے کہ بھلائے نہیں بھول رہا، کاش سب اہلِ وطن یہ شعار بنا لیں کہ اس کے لیے نہ آئی ایم ایف کی امداد کی ضرورت ہے، نہ کسی اندرونی قرضے یا سرمایے کی۔

(یہ کالم روزنامہ ''دنیا‘‘ اور روزنامہ ''پاکستان‘‘ میں بیک وقت شائع ہوتا ہے)