غریب کی آواز سنو!

گزشتہ سال کے آخری ایام میں چیف آف آرمی سٹاف جنرل قمر جاوید باجوہ کی مدتِ ملازمت میں توسیع کے بارے میں سپریم کورٹ کے ایک غیر معمولی فیصلے نے سب کی چولیں ہلا کر رکھ دیں تھیں‘ لیکن سال 2020 کے آغاز میں یہ مسئلہ حل ہوتا ہوا نظر آ رہا ہے؛ البتہ اب بھی فیصلہ سازی کے عمل میں بہت زیادہ کنفیوژن کی وجہ سمجھ سے بالاتر ہے۔ پہلے حکومت نے اعلان کیا تھا کہ وہ سپریم کورٹ سے رجوع کرے گی اور پھر نظرثانی کی درخواست بھی دائر کر دی گئی۔ ابھی اس کا فیصلہ ہونا باقی تھا کہ یکم جنوری کو وفاقی کابینہ کا اچانک ہنگامی اجلاس صرف دو گھنٹوں کے نوٹس پر بلا لیا گیا۔ صرف وفاقی دارالحکومت میں موجود وزرا ہی کابینہ اجلاس میں پہنچ سکے۔ انہیں آرمی ایکٹ میں ترمیمی بِل کے بارے میں بریف کیا گیا اور منظوری حاصل کی گئی۔ طویل وقفے کے بعد قومی اسمبلی اور سینیٹ کا اجلاس بھی اسی روز بلایا گیا۔ تاثر یہ دیا گیا کہ حکومت کی اس بارے میں اپوزیشن کے ساتھ بات ہو چکی ہے‘ لیکن کابینہ سے منظوری کے بعد پرویز خٹک کی سربراہی میں اپوزیشن سے مذاکرات کیلئے کمیٹی بنائی گئی۔ قومی اسمبلی کے اجلاسوں میں ابتدائی دونوں دن کورم پورا نہ ہونے کے باعث اجلاس ملتوی کرنا پڑا۔

ایک طرف پارلیمنٹ سے بِل پاس کروانے کی تیاریاں کی جا رہی ہیں اور دوسری طرف سپریم کورٹ میں ایک اور درخواست دائر کی گئی ہے جس میں آرمی چیف توسیع کیس میں سپریم کورٹ کا فیصلہ معطل کرنے کی درخواست بھی کی گئی ہے۔ سوال یہ پیدا ہوتا ہے کہ اگر قانون سازی ہونی ہے اور آرمی ایکٹ میں ترمیم منظور کروانا ہے تو پھر سپریم کورٹ میں بار بار درخواستیں دائر کرنے کی مشق کیوں کی جا رہی ہے؟ اگر قانون سازی ہونا ہے اور مسلم لیگ (ن) کے غیر مشروط حمایت کے اعلان کے بعد اب اس بِل کے پاس ہونے میں کوئی شک و شبہ نہیں رہا تو پھر فیصلہ ساز قوتوں کی صفوں میں اتنی کنفیوژن کیوں ہے؟ قانون سازی کے بعد تو سپریم کورٹ میں دائر کی گئی تمام درخواستیں ہی غیر مؤثر ہو جاتی ہیں‘ پھر کس بات کا ڈر ہے؟ غالب امکان یہی ہے کہ آرمی چیف کی تقرری‘ دوبارہ تقرری اور توسیع کے بارے میں قانون سازی کے تمام انتظامات مکمل ہیں اور رواں اجلاسوں میں ہی بِل پاس کروا لیا جائے گا‘ جس کے تحت چیئرمین جوائنٹ چیفس آف سٹاف کمیٹی اور آرمی چیف کی تقرری ابتدائی طور پر تین سال کے لئے کی جائے گی اور بعد ازاں اس میں زیادہ سے زیادہ تین سال کی توسیع کی جا سکے گی اور اس کا کُلی اختیار وزیر اعظم کی صوابدید پر ہو گا‘ وزیر اعظم کی ایڈوائس پر صدر مملکت منظوری دیں گے۔ محسوس یوں ہوتا ہے کہ اقتدار کی راہداریوں میں کچھ کھلبلی سی ہے ‘ ہر کوئی اُکھڑا اُکھڑا سا نظر آرہا ہے۔ نیب آرڈیننس کا ترمیمی آرڈیننس ہو یا رانا ثنااللہ کا کیس‘ وفاقی کابینہ کے اختلافات اب کھل کر سامنے آ چُکے ہیں۔ پی ٹی آئی کے وزرا بند کمروں میں اور اتحادی جماعتوں کے وزرا سر عام اپنے خدشات اختلافات کا اظہار کرتے اور یہ کہتے نظر آتے ہیں کہ معاملات چھپائے جا رہے ہیں اور امورِ کار میں پْراسراریت سی پائی جاتی ہے۔ شاید یہی وجہ ہے کہ پی ٹی آئی نے سولہ ماہ بعد اپنے اتحادیوں کی طرف توجہ دینا شروع کر دی ہے اور یکایک ایک کمیٹی بنا دی گئی ہے جو اتحادیوں کے ساتھ رابطے میں آ چکی ہیں۔ بلاول بھٹو زرداری ایم کیو ایم کو دانہ ڈال چْکے ہیں‘ جو کسی بھی وقت چْگا جا سکتا ہے۔ مسلم لیگ (ق) پہلے ہی مولانا کو ایک امانت سپرد کر چکی ہے اور کافی آگے جا کر چند ساعتوں کے لئے رک گئی ہے اور فی الوقت مونس الٰہی وزیر اعظم عمران خان کو اور وزیر اعلیٰ پنجاب عثمان بزدار سے ملاقات کر کے چوہدری پرویز الٰہی ان کو غیر متزلزل حمایت کی یقین دہانی کروا چکے ہیں‘ لیکن سیاسیات کے طالب علم جانتے ہیں کہ سیاسی یقین دہانیاں اپنا کوئی اخلاقی وجود نہیں رکھتیں۔

رانا ثنااللہ کی رہائی کے بعد کی مسکراہٹیں اور مریم نواز سے ملاقات کے بعد کی گفتگو پر توجہ دینا انتہائی ضروری ہے۔ عمران خان کے مخالفین اور سیاست کے تمام چھوٹے بڑے باوے آزاد ہو چکے ہیں اور باقی جو بچے ہیں آزاد ہونے کی طرف گامزن ہیں۔ سیاست کے یہ تمام اعلیٰ دماغ صرف ایک مشن پر یکجا ہیں اور وہ ہے مائنس ون۔ اپوزیشن کی تمام مؤثر آوازیں ایک بات پر یک سْو نظر آتی ہیں کہ تمام مسائل کا حل رواں سال نئے عام انتخابات میں ہے‘ اور اس بیانیے کو وہ آہستہ آہستہ آگے بڑھا رہے ہیں۔ اگر موجودہ حکومت نے اس تاثر کو روکنے کی مؤثر پیش بندی نہ کی تو اپوزیشن اس بیانیے کو مزید آگے بڑھانے کا ارادہ رکھتی ہے کہ خان صاحب کو تمام مسائل کی جَڑ قرار دیا جائے‘ کیونکہ پارلیمنٹ کی اب تک کی کارکردگی قانون سازی کے اعتبار سے صفر رہی ہے‘ سوائے فاٹا اصلاحات اور بجٹ کی منظوری کے‘ اور کوئی قابل ذکر کامیابی نظر نہیں آتی۔ آرڈیننسوں کے اجرا سے کام چلایا جا رہا ہے۔ الیکشن کمشن میں تعیناتیاں نہیں ہو پا رہیں۔ سو معاملات ایک جگہ پر ٹھہر سے گئے ہیں۔ آرمی ایکٹ میں ترمیم پر حمایت کیلئے اپوزیشن کی مرکزی قیادتوں سے رابطے بھی انہوں نے کئے جن کا یہ معاملہ ہے۔ اپوزیشن اگر اس مسئلے پر خوشی خوشی ہاں کرتی ہے تو یہ خبر ہرگز عمران حکومت کے لئے خوشگوار نہیں ہے۔

ان دگرگوں حالات میں حکومت 2020 میں داخل ہو چکی ہے۔ گزشتہ سال دھواں دھار رہا، پاکستان تحریک انصاف کے بجائے اپوزیشن کا بیانیہ حاوی رہا جس کا کریڈٹ اپوزیشن کی میڈیا سٹریٹیجک ٹیم کو جاتا ہے‘ جس نے بڑی چابک دستی سے سوشل‘ الیکٹرانک اور پرنٹ میڈیا میں زیادہ سے زیادہ جگہ بنائی۔ پی ٹی آئی کے وزرا اور ترجمانوں کی ٹیم اپنے وزیر اعظم کا مؤثر دفاع کرنے میں کافی کمزور نظر آئی۔ ملک کو معاشی دلدل سے نکالنے کے لئے کئے گئے سخت اقدامات کو عام آدمی میں پذیرائی نہ مل سکی۔ بجلی‘ سوئی گیس‘ ادویات‘ پٹرولیم مصنوعات اور روزمرہ استعمال کی عام اشیائے ضروریہ کی بڑھتی ہوئی قیمتوں نے کم آمدنی والے طبقے میں عمران خان کی مقبولیت کو متاثر کیا۔ یہاں تک کہ ٹماٹر کی قیمتوں میں اضافے کو بھی، جو سو فیصد صوبائی اور ضلعی حکومتوں کا معاملہ تھا، وفاقی حکومت کے کھاتے میں ڈال دیا گیا اور پی ٹی آئی کے وفاقی ترجمانوں کی ٹیم ناکام وضاحتیں کرتی رہی۔ یہ سب بیان کرنے کا مقصد یہ ہے کہ ابتدائی سولہ ماہ گزرنے کے باوجود پی ٹی آئی کی ٹیم اپنی اچھی باتوں کو بھی کیش نہ کروا سکی۔ اقوام متحدہ میں عمران خان جیسی تقریر اگر نواز شریف یا بلاول بھٹو نے کی ہوتی تو یہ جماعتیں اب تک اسی تقریر کا سیاسی منافع کھا رہی ہوتیں۔ معیشت میں کئے گئے اچھے اقدامات کا چونکہ عام آدمی کو کوئی فائدہ نہیں پہنچا‘ اس لئے وہ صرف اپنے مسائل کا حل چاہتا ہے۔ سب سے بڑے صوبے پنجاب میں عثمان بزدار کی تقرری بھی پورا سال موضوع تنقید رہی اور عمران خان کے سوا عثمان بزدار کا دفاع بھی کسی نے نہ کیا۔

عمران خان صاحب کے پاس وقت کم ہے اور مقابلہ سخت‘ ایک طرف عام آدمی کے مسائل کا فوری حل‘ جس میں مہنگائی کو کم کرنا‘ گیس‘ بجلی اور عام اشیائے ضروریہ کی قیمتوں کو عوامی نقطہ نگاہ سے کم کرنا شامل ہے‘ لازمی ہو گا اور اگر انہوں نے اپنی امپورٹڈ معاشی ٹیم کی نظروں سے چیزوں کو دیکھنا نہ چھوڑا تو پھر ان سے بے پناہ محبت کرنے والے ان کے ووٹرز اور سپورٹرز خان کی محبت سے آزاد ہونے میں اب کْچھ زیادہ دیر نہیں لگائیں گے۔ کرشمہ ساز قیادت کی طاقت عوام ہوتے ہیں اور عوام اس کو اپنا مسیحا مانتے ہیں جو ان کو روٹی کپڑے اور مکان کا آسرا دے نہ کہ ان کو جو ہر مہینے ان کی قوت خرید کو کم کرتے ہوئے نظر آئیں۔