انڈین نیشنل آرمی اور آزادی کا سفر

راولپنڈی سے لاہور کی طرف جی ٹی روڑ پر سفر کرتے ہوئے سب سے پہلا مقام روات ہے‘ جو ایک مصروف تجارتی مرکز ہے‘ لیکن اس کی اصل پہچان روات کا قلعہ ہے‘ جو یہاں کے مقامی گکھڑ سردار سلطان سا رنگ خان کی جولاں گاہ تھا‘ جس نے شیر شاہ سوری کے مقابلے میں مغلوں کا ساتھ دیا تھا اور جس کی قبر اب بھی قلعہ کی شکستہ عمارت کے صحن میں موجود ہے ۔یہاں سے تقریباً آٹھ کلو میٹر کے فاصلے پر میری والدہ کا گائوں تھا۔ یہ ان دنوں کی بات ہے جب گائوں کی زندگی بہت سادہ تھی۔ شہر سے گائوں تک ایک گاڑی چلتی تھی۔گاؤں میں ابھی بجلی نہیں آئی تھی۔ گھروں میں سرِشام تندور تپ جاتے اور رات کا کھانا جلدی کھا لیا جاتا۔ رات ہوتے ہی لوگ ہاتھوں میں لالٹینیں لیے چوپالوں میں گپ شپ کے لیے اکٹھے ہوتے ۔جہاں دن بھر کی خبریں اور آس پاس کے گاؤں کی باتیں مزے لے لے کے سنائی جاتیں۔کیسی سادہ اور خوب صورت زندگی تھی۔ میں اُن دنوں سکول میں پڑھتا تھا اور مجھے کہانیاں پڑھنے اور سننے کا جنون تھا۔ان دنوںقلعہ روات کے سلطان سا رنگ خان کا کردار مجھے بہت پسند تھا۔ سارنگ خان ‘جس نے شیر شاہ کی فوج کے سامنے ہار نہیں مانی تھی اور اپنے سولہ بیٹوں کے ساتھ جان قربان کر دی تھی۔

اس زمانے میں ہر گائوں میں ایک نمبردار ہوا کرتا تھا‘ یہ ایک اہم عہدہ ہوتا۔ گائوں کے نمبردار کی سب عزت کرتے اور اس کی رائے کا احترام کرتے ۔ ہمارے گائوں کے نمبردار کا نام چوہدری یعقوب تھا ۔اونچا لمبا قد‘ ہونٹوں پر ایک دلآویز مسکراہٹ‘ وجاہت کا سرتا پا نمونہ۔ محبت میں گندھی ہوئی شخصیت ایسی کہ دلوں میں گھر کر جائے۔ان دنوں میں لال کرتی کے سی بی ٹیکنیکل ہائی سکول کا طالب علم تھا۔سکول میں گرمیوں کی چھٹیاں تھی اور ہم والدہ کے ہمراہ گائوں آئے ہوئے تھے ۔گائوں کی پگڈنڈیاں جیسے آزادی کی شاہراہیں ہوتیں‘جن پر قدم رکھتے ہی ہم گائوں کی آزاد فضائوں کا حصہ بن جاتے ۔یہ آزادی بھی کیا چیز ہے۔ انسان کی سب سے بڑی خواہش۔ قوموں کی تاریخ کا سب سے بڑا سرمایہ!

ایسی ہی آزادی‘ ہم نے 1947ء میں حاصل کی تھی‘ جب فرنگیوں کے جبر کا طویل دور ختم ہوا تھا‘ لیکن آزادی کی اس جدوجہد کے پیچھے کتنی ہی قربانیوں کتنی ہی تحریکوں کا ہاتھ تھا ۔کیسے کیسے لوگ آزادی کے خواب کی تعبیر پانے کے لیے ان وادیوں میں اتر گئے‘ جہاں جا کر کوئی واپس نہیں آتا۔اس رات گاؤں میں میں نے آزادی کے متوالوں کی کہانی سنی تھی۔اس رو ز میں گائوں کے نمبردار چوہدری یعقوب کے ڈیرے پر اپنے ماموں کے ساتھ گیا تھا‘کیوں کہ مجھے پتا چلا تھا کہ چوہدری یعقوب کسی زمانے میں فوج میں تھے اور پھر وہ انڈین نیشنل آرمی کا حصہ بن گئے تھے۔ میں نے کسی کتاب میں پڑھا تھا کہ انڈین نیشنل آرمی جاپان کی مدد سے بنائی گئی تھی‘ یہ 1942 ء کی بات ہے ؛دوسری جنگ عظیم کا آغاز1939ء سے ہو چکا تھا ۔برٹش آرمی کا سامنا جاپان سے تھا ۔جاپانی فوج کے میجر فوجی وارا جس کا تعلق انٹیلی جینس سے تھا۔ انڈین نیشنل آرمی (آئی این اے )کا تصور اسی کے ذہن رسا کا نتیجہ تھا۔انڈین نیشنل آرمی کے بانیوں میں موہن سنگھ کا شماربھی ہوتا ہے ۔اس کے قیام کا بڑا مقصد اہلِ عالم کو باور کرانا تھا کہ ہندوستانی شہری ہندوستان میں برطانوی حکمرانی سے تنگ آ چکے ہیں اور انہوں نے آخری کوشش کے طور پر برطانوی فوج کے خلاف لڑنے کے لیے اپنی فوج تشکیل دی ہے ۔اس کا دوسرا مقصد جاپان کا امیج ایک ایسے ملک کے طور پر دنیا کے سامنے پیش کرنا تھا‘ جو آزادی سے محبت کرتا ہے اور جسے محکوم قوموں کی آزادی کی فکر ہے۔

اس روز گاؤں میں چوہدری یعقوب صاحب کے گھر میں نے ان سے کہا تھا؛مجھے بڑا اشتیاق ہے کہ میں آپ سے انڈین نیشنل آرمی کے بارے میں جانوں ۔مجھے پتا چلا ہے کہ آپ بھی اس آرمی کا حصہ رہے۔ چوہدری صاحب نے اپنی گہری روشن آنکھوں سے مجھے دیکھا‘ پھر خلا میں گھورتے ہوئے بولے؛ پرانا قصہ ہے‘ لیکن یوں لگتا ہے‘ جیسے کل کی بات ہو۔ اس وقت پوٹھوہار کی ریت تھی‘ ہوش سنبھالتے ہی لڑکوں کا پہلا انتخاب فوج ہوتا تھا‘ میں بھی فوج میں چلا گیا۔ دوسری جنگ عظیم جاری تھی۔ ہمیں برما کے محاذ پر بھیج دیا گیا ۔ میں اکثر سوچتا یہ توجاپان اور برطانیہ کی لڑائی ہے‘ ہم کس کے لیے لڑ رہے ہیں؟ وطن سے دورمجھے اپنا گائوں شدت سے یاد آتا تھا‘ پھر ایک روز محاذ پر شدید گولا باری ہوئی میں ایک گولی لگنے سے زخمی ہو گیا‘ خون تیزی سے بہنے لگا اور پھر مجھے کچھ ہوش نہ رہا ‘معلوم نہیں کتنی میں دیر بے ہوش پڑا رہا۔ہوش آیا تو معلوم ہو ا میں جاپانیوں کی قید میں ہوں‘ تب مجھے انڈین نیشنل آرمی کے بارے میں معلوم ہوا۔ میرے پاس اپنے علاقے کے پنجابی بولنے والے فوجی آئے اور بتایا کہ وہ انڈین نیشنل آرمی میں شامل ہو گئے ہیں‘ یہ آرمی انگریزوں کی ہندوستان میں ناجائز حکمرانی کیخلاف بنائی گئی ہے ‘میں بھی اس میں شامل ہو گیا۔انڈین نیشنل آرمی کے کمانڈر ان چیف سبھاش چندر بوس تھے۔ میں نے دیکھا کہ اس آرمی میں کچھ تو وہ فوجی تھے‘ جو جاپان کی قید میں آ گئے تھے‘ لیکن ایک بڑی تعداد ان فوجیوں کی بھی تھی‘ جو اپنی مرضی سے فرنگی حکمرانوں سے لڑنے کے لیے سبھاش چندربوس کی قیادت میں جمع ہوئے تھے۔بوس ایک سخت گیر منتظم تھا ۔ 1943 ء میں آئی این اے میں شامل ہونے کے بعد بوس نے تنظیم میں نئی جان ڈال دی تھی۔ بوس نے آزاد ہندوستانی عارضی حکومت کے قیام کا اعلان کر دیا۔ جاپان نے اس کے لیے انہیں جزیرہ انڈیمان اور نیکو بار کا علاقہ دے دیا۔ ہندوستان میں برطانوی اقتدار کو چیلنج کرنے کے لیے یہ ایک اہم اقدام تھا ۔

بوس نے پوری کوشش کی کہ آئی این اے کو نظم و ضبط‘ تربیت ‘ اور سازو سامان کے لحاظ سے ایک پیشہ ور فوج میں تبدیل کیا جائے۔ آئی این میں فوج کے 10 ہزار کے قریب جوان موجود تھے ۔ان کے علاوہ ہزاروں شہریوں نے اپنے نام لکھوائے تھے۔ بوس نے جاپانیوں کو راضی کر لیا کہ آئی این آئی کو محض نمائشی فوج کی بجائے باقاعدہ جنگ میں حصہ لینے کا موقع فراہم کیا جائے۔ یہ موقع اس وقت ملا جب آئی این اے نے ایک محاز پر جنگ لڑی اس جنگ میں جاپانیوں اور آئی این اے کو ناکامی ہوئی۔ بعد کے دنوں میں آئی این اے کو ملایا اور سنگاپورمیں تعینات کیا گیا ۔ آئی این اے کی کامیابی کے بارے میں مختلف آرا ہو سکتی ہیں ‘لیکن اس نے ہندوستانی عوام کے حوصلے بلند کرنے میں نمایاں کردار ادا کیا۔ اس کی ایک اہم وجہ گاندھی کی ہندوستان چھوڑ دو تحریک کا اچانک خاتمہ تھا۔ گاندھی کا مصالحت پسند رویہ سبھاش چندر بوس کے لیے نا قابل قبول تھا اس کا خیال تھا کہ فرنگیوں پر آخری ضرب لگانے کا موقع آ گیا ہے۔ 18اگست1945ء کو سبھاش چندر بوس ایک ہوائی حادثے میں ہلاک ہو گیا۔آئی این اے کے متعدد ارکان پر مقدمے چلائے گئے اور انہیں سخت سزائیں دی گئیں ۔ مقدموں کے دوران بھی آئی این اے کے ارکان کے دلیرانہ بیانات سے لوگوں میں ایک نیا جذبہ بیدار ۔ آئی این اے کی قربانیوں نے ایک طرف تو لوگوں میں آزادی کی جوت جلادی اور دوسری طرف ان کی کاروائیوں سے فرنگی حکمرانوں پر زبردست دبائو پڑاکہ وہ ہندوستان کی آزادی کے عمل کو تیز کریں ۔

اچانک مجھے احساس ہوا کہ میں برما کے محاذ پر نہیں‘ اپنے گائوں کے نمبردار چوہدری یعقوب کے گھر بیٹھا تھا ‘رات ڈھل رہی تھی اور میں آزادی کی جدوجہد میں جان دینے والے ان ہزاروں لوگوں کے بارے میں سوچ رہا تھا‘ جن کی قربانیوںنے ہمیں آزادی کی دولت سے روشنا س کرایا تھا۔