امریکی معرکہ: کیا ہونے والا ہے؟

ڈونلڈ ٹرمپ اور کملا ہیرس کے مابین امریکی صدارتی دوڑ کے آخری مرحلے نے امریکی عوام کو مسحور کر دیا ہے۔ امریکی لوگ قیادت‘ پالیسی اور امریکی اقدار کی تعریف کے مسائل پر گہری تقسیم کا شکار ہو رہے ہیں۔ یہ دونوں امیدوار فائنل لائن کے قریب ہیں۔ امریکہ کے لیے ان لیڈروں کے تصورات مستقبل کے لیے ڈرامائی طور پر مختلف جہتوں کی نشاندہی کرتے ہیں‘ جس کی وجہ سے یہ انتخابات جدید امریکی تاریخ کے سب سے زیادہ نتیجہ خیز انتخابات میں سے ایک بننے جا رہے ہیں۔ فتح مند کون ہو گا؟ اور یہ فتح امریکی عوام اور پوری دنیا کے لیے کیا معنی رکھتی ہے؟
اپنے حامیوں کے لیے ڈونلڈ ٹرمپ جس چیز کو ''حقیقی امریکہ‘‘ سمجھتے ہیں اس کی طرف واپسی کا نقشہ بھی بنا کر دکھا رہے ہیں ۔ ایک ایسی قوم جو روایتی اقدار‘ محدود حکومتی مداخلت اور قومی خود مختاری کی حامی ہے۔ بہت سے لوگ ایک مضبوط قومی شناخت کو بحال کرنے کے اس کے وعدے کی طرف متوجہ ہیں۔ انہوں نے امیگریشن‘ ڈی ریگولیشن اور اقتصادی پالیسیوں پر مہم چلائی ہے جس کا مقصد صنعتی مراکز کو بحال کرنا ہے۔ تاہم ٹرمپ کے ناقدین کا کہنا ہے کہ وہ جمہوری اصولوں اور عالمی اتحاد کے لیے خطرے کی نشاندہی کرتے ہیں اور ان کے پولرائزنگ انداز نے سماجی تقسیم کو بڑھاوا دیا ہے۔ اس کے برعکس‘ کملا ہیرس نے سب کی شمولیت اور ترقی پسند اصلاحات کے مستقبل کے نظریے پر توجہ مرکوز کی ہے۔ انہوں نے صحت کی دیکھ بھال میں توسیع‘ آب وہوا اور مساوی اقتصادی ترقی جیسے مسائل کو ترجیح دی ہے‘ جن کا مقصد عالمی اتحادیوں کے ساتھ مل کر کام کرنا اور بین الاقوامی تعاون میں امریکی کردار کو بحال کرنا ہے۔ اپنے حامیوں کے لیے وہ تفرقہ انگیز بیان بازی سے وقفے کی علامت ہیں‘ جو نسلی اور صنفی تنوع‘ دونوں کی نمائندگی کرتی ہیں۔ تاہم ناقدین ان کی پالیسیوں کو ذاتی آزادیوں اور مالی ذمہ داری کے لیے خطرہ سمجھتے ہیں‘ اس ڈر سے کہ ان کے منصوبے بہت زیادہ بائیں جانب نہ جھک جائیں۔ ڈونلڈ ٹرمپ کی معاشی پالیسی ٹیکسوں میں کٹوتی‘ ڈی ریگولیشن اور تحفظ پسندانہ اقدامات پر منحصر ہے‘ جس کا مقصد مقامی صنعتوں کو فروغ دینا ہے۔ اگرچہ یہ مخصوص طبقات‘ جیسا کہ مینوفیکچررز اور چھوٹے کاروباروں کے لیے پُرکشش ہے‘ مگر ماہرین اقتصادیات اس کے طویل مدتی خطرات سے خبردار کرتے ہیں۔ امریکہ کے بڑھتے ہوئے خسارے اور اتحادیوں کے ساتھ تجارتی تناؤ کا مطلب عالمی منڈیوں کے ساتھ براہ راست تصادم اور معاشی قوم پرستی کی طرف ممکنہ تبدیلی ہو سکتی ہے۔ کملا ہیرس کے معاشی منصوبوں میں سماجی اخراجات‘ گرین ملازمتوں میں سرمایہ کاری اور کارپوریشنوں اور امیر ترین افراد پر ٹیکس کے بڑھتے ہوئے بوجھ کے ذریعے دولت کو دوبارہ تقسیم کرنے والی پالیسیاں شامل ہیں۔ بظاہر یہ نقطہ نظر آمدنی کی عدم مساوات کو دور کرنے کی صلاحیت رکھتا ہے لیکن اس سے وال سٹریٹ کو خطرہ لاحق ہے اور اس سے چھوٹے کاروباروں کے اخراجات پر بھی دباؤ پڑ سکتا ہے۔ کملا ہیرس کی صدارت ممکنہ طور پر ماحولیات اورآب و ہوا سے جڑے اقدامات اور ملازمتوں کی تخلیق پر توجہ مرکوز کرے گی۔
ڈونلڈ ٹرمپ اپنے ''امریکہ فرسٹ‘‘ کے بیانیے کی وجہ سے مشہور ہیں۔ اگر وہ دوبارہ منتخب ہو جاتے ہیں تو ان کی انتظامیہ اس رجحان کو جاری رکھے گی اورکثیر جہتی پر یکجہتی کی حمایت کرے گی۔ یہ پالیسی فوجی اخراجات میں اضافہ اور محاذ آرائی کا باعث بن سکتی ہے‘ خاص طور پر چین کے ساتھ۔ ناقدین کا کہنا ہے کہ یہ تبدیلی عالمی سطح پر امریکی اثر ورسوخ کو ختم کر سکتی ہے۔ کملا ہیرس ممکنہ طور پر خارجہ پالیسی کے لیے زیادہ روایتی انداز اپنائیں گی اور نیٹو‘ اقوام متحدہ اور دیگر کثیر القومی اداروں کے ساتھ دوبارہ انگیج ہوں گی۔ اس کا مقصد امریکہ کو آب وہوا اور انسانی حقوق پر ایک عالمی لیڈر کے طور پر دوبارہ کھڑا کرنا ہے‘ حالانکہ ایسا کرنے کا مطلب تجارت جیسے دیگر شعبوں پر سمجھوتا ہو سکتا ہے۔ کملا ہیرس کا خارجہ پالیسی ایجنڈا ممکنہ طور پر سفارت کاری کو ترجیح دے گا لیکن انہیں ان اقوام کی مزاحمت کا سامنا بھی کرنا پڑ سکتا ہے جنہوں نے حالیہ برسوں میں چین اور روس کے ساتھ دو طرفہ تعلقات کو مضبوط کیا ہے۔
ڈونلڈ ٹرمپ کی قدامت پسند بنیاد وسیع پیمانے پر سماجی اصلاحات کے سخت خلاف ہے‘ ان میں بندوق رکھنے کا حق‘ امیگریشن کنٹرول اور حکومتی مداخلت پر پابندی جیسے مسائل ترجیحاً شامل ہیں۔ بہت سے تجزیہ کاروں کا خیال ہے کہ ڈونلڈ ٹرمپ کا دوبارہ انتخاب تعلیم‘ شہری حقوق اور صحت کی دیکھ بھال سے متعلق اوباما دور کی پالیسیوں کے رول بیک کو تیز کرے گا۔ کملا ہیرس کا پلیٹ فارم نسلی انصاف‘ صنفی مساوات اور ووٹنگ کے حقوق پر توجہ کے ساتھ سماجی مساوات پر زور دیتا ہے۔ انہوں نے عدم مساوات کو دور کرنے کا وعدہ کیا ہے‘ قانون کے نفاذ‘ صحت کی دیکھ بھال اور تعلیم میں اصلاحات کا وعدہ کیا ہے۔ یہ ترقی پسندوں کے نعروں کے ساتھ زیادہ گونجتا اور میل کھاتا ہے لیکن اسے قدامت پسند پالیسیوں کی حمایت کرنے والی ریاستوں کی طرف سے سخت مزاحمت کا سامنا کرنا پڑ سکتا ہے۔ اصل سوال مگر یہ ہے کہ انتخابات کا کیا بنے گا؟ اس سوال کا جواب پیچیدہ ہے کیونکہ یہ دوڑ گہری جڑوں والی سماجی‘ اقتصادی اور ثقافتی تقسیم کو ظاہر کرتی ہے۔ ٹرمپ کے حامی اپنی وفاداری اور ٹرن آؤٹ کے لیے جانے جاتے ہیں۔ دیہی‘ محنت کش طبقے اور قدامت پسند امریکیوں میں ان کی اپیل کو نظر انداز نہیں کیا جا سکتا۔ تاہم ان کی تفرقہ انگیز پالیسیوں نے مخالفت کو بھی تقویت بخشی ہے‘ خاص طور پر خواتین‘ نوجوان ووٹرز اور اقلیتوں کو‘ جو سماجی انصاف اور مساوات کے لیے کملا ہیرس کی پالیسیوں کے ساتھ زیادہ میل کھاتے ہیں۔ کملا ہیرس کا اتحاد وسیع لیکن زیادہ نازک ہے۔ وہ شہری طبقے سے براہ راست اپیل کرتی ہیں۔ دوسری طرف زیادہ تر کالج سے تعلیم یافتہ نوجوانوں اور اقلیتی ووٹرز سے‘ لیکن دیہی اور محنت کش طبقے کے سفید فاموں کے دل جیتنے کے لیے بھی جدوجہد کر رہی ہیں جو ڈیمو کریٹک پارٹی کے بائیں جانب جھکاؤ سے مایوسی کا شکار ہیں۔ اگر وہ کامیاب ہو جاتی ہیں تو اس کی وجہ یہ ہو سکتی ہے کہ ان کا پلیٹ فارم کافی حد تک اعتدال پسندوں اور ترقی پسندوں کو اکٹھا کرنے کی کوشش کر رہا ہے اور ان کی پالیسیوں کے ذریعے نئے ووٹروں کے ٹرن آؤٹ میں اضافہ ہو رہا ہے۔
تو کیا ان انتخابات میں امریکہ کی اندرونی سیاست میں دائیں اور بائیں بازو کی روز بروزز گہری ہوتی تقسیم میں اضافہ ہو رہا ہے یا یہ تقسیم روایتی ڈگر سے ہٹ کر ایک نیا رنگ روپ اختیار کر رہی ہے؟ مسائل واضح ہیں۔ مسائل کی تقسیم بھی واضح ہے۔ دائیں اور بائیں بازو دونوں نے اپنے لیے ایشوز کا انتخاب بہت پہلے کر لیا تھا‘ جن کو وہ اپنا انتخابی ایجنڈا یا منشور بنانا چاہتے تھے۔ اب ان کو اس ایجنڈے کو ساتھ لے کر آخر تک چلنا ہو گا کیونکہ رائے عامہ کی صورت گری انہی خطوط پر ہو چکی ہے۔ اب سیاست کار اسے بدلنے پر قادر نہیں۔ اس سے ووٹرز میں کنفیوژن پھیل سکتی ہے۔ لیکن جو لوگ یہ سمجھتے ہیں کہ امریکہ میں دائیں اور بائیں بازو کی روایتی تقسیم میں کمی واقع ہوئی ہے‘ شاید ان کو اپنے خیال پر نظرثانی کی ضرورت محسوس ہو۔ البتہ دائیں اور بائیں بازوں کی سیاست کی شدت میں کمی کے کچھ آثار ضرور نظر آتے ہیں۔