امریکہ تارکینِ وطن کا ملک ہے

5 جولائی 2025ء کو ہم نے اپنے سوشل میڈیا پیج ''Al-Munib‘‘ پر ''ایسی بلندی‘ ایسی پستی!‘‘ کے عنوان سے یہ پوسٹ اَپلوڈ کی: ''امریکی صدر ڈونلڈ ٹرمپ خود بینی‘ خود ستائی اور خود پرستی کا شاہکار ہیں۔ معاشی حُجم اور سپر پاور ہونے کے اعتبار سے دنیا کا سب سے بڑا ملک‘ رقبے اور آبادی کے اعتبار سے دنیا کا تیسرا بڑا ملک امریکہ انہیں اپنے قدو قامت سے چھوٹا نظر آتا ہے اور اُن کی خواہش ہے کہ دنیا میں رقبے کے اعتبار سے دوسرا بڑا ملک کینیڈا بھی امریکہ کی 51ویں ریاست بن جائے‘ یہ اُس کی بلندی کا عالَم ہے اور دوسری طرف اُن کی ذہنی پستی کا عالَم یہ ہے کہ جب ایک جواں عمر شخص زہران ممدانی ڈیمو کریٹک پارٹی کی طرف سے نیویارک سٹی کی میئرشپ کا امیدوار بننے میں کامیاب ہو گیا تو اُس نے ممدانی پر تبصرہ کرنا ضروری سمجھا اور کہا: ''یہ پاگل شخص ہے‘ کمیونسٹ ہے‘ اگر نیویارک کے لوگ اسے منتخب کریں گے تو یہ اُن کا پاگل پن ہو گا اور جب وہ پیسے مانگنے وائٹ ہائوس آئے گا تو میں اُسے پیسے نہیں دوں گا‘‘۔ یہ خاندان اصلاً ہندوستان کے صوبہ گجرات سے تعلق رکھتا ہے‘ پھر ہجرت کر کے یوگنڈا گیا اور وہاں سے امریکہ آیا۔ امریکہ اپنی آبادی کی ساخت کے اعتبار سے ٹرمپ سمیت تارکینِ وطن کا ملک ہے اور ٹرمپ کو تارکینِ وطن ہی سے بہت نفرت ہے۔ صدیق ضیا نے کہا تھا:
تمہاری زلف میں پہنچی تو حُسن کہلائی
وہ تیرگی جو مرے نامہ سیاہ میں تھی‘‘
اس پرایک صاحب نے لکھا: ''آپ کو ممدانی کی تعریف اور اس کی سائیڈ لینے کی کچھ ضرورت نہیں‘ کیونکہ یہ ہم جنس پرستوں کا نام نہاد وکیل ہے‘ اس طرح کی بہت سے قباحتیں اس میں پائی جاتی ہیں‘ یعنی آپ سمجھ لیں کہ یہ نیم ملحد ہے‘ ہمیں ضرورت نہیں کہ ٹرمپ اور ممدانی کے آپسی پھڈے میں پڑیں‘‘۔ ہم نے انہیں جواب دیا: ''ہمیں ممدانی کی سائیڈ لینے کی کوئی ضرورت نہیں ہے‘ نہ میں اُسے جانتا ہوں‘ میں نے اُس کا نام صرف ٹرمپ کی ذہنیت کو اجاگر کرنے کے لیے استعمال کیا ہے‘ اصل مُدّعا سمجھنے کی کوشش کیا کریں‘ ورنہ کیا آپ کو لندن کے تیسری مرتبہ میئر منتخب ہونے والے صادق خان کے نظریات کا علم ہے‘ اندھیرے میں تیر چلانے کے بجائے مطالعے میں وسعت پیدا کریں‘‘۔
ہمارے نوجوان علماء اور طلبہ درسیات میں علمِ معانی کی کتابیں پڑھتے ہیں‘ اُن میں بتایا جاتا ہے کہ جب کسی چیز کو کسی چیز سے تشبیہ دی جائے تو تمام وجوہ سے تشبیہ مراد نہیں ہوتی‘ بلکہ ایک خاص قدرِ مشترک سے تشبیہ دینا مراد ہوتا ہے‘ جیسے: ''زید شیر ہے‘‘ تو اس سے شَجاعت میں تشبیہ دینا مراد ہوتا ہے‘ اس کے معنی یہ نہیں کہ زید کے پنجے بھی ہیں اور سامنے کے دانتوں سے شکار بھی کرتا ہے۔ اللہ تعالیٰ نے تشبیہات وتمثیلات قرآنِ کریم میں بھی بیان فرمائی ہیں مثلاً: جب کفار ومشرکین کے عقائدِ باطلہ کی کمزوری کو مچھر یا مکڑی سے تشبیہ دی تو اُس دور کے منکرین نے اعتراض کیا: بھلا اللہ کو مچھر یا مکڑی سے تشبیہ دینے کی کیا حاجت! تو اللہ تعالیٰ نے فرمایا: ''بیشک اللہ (کسی چیز کی حقیقت سمجھانے کیلئے) کسی بھی مثال کے بیان کو ترک نہیں فرماتا‘ خواہ وہ مچھرکی مثال ہو یا اُس سے بھی زیادہ حقیر چیز کی‘ پس وہ لوگ جو ایمان لائے ہیں‘ وہ جانتے ہیں کہ یہ مثال اُن کے رب کی طرف سے حق ہے اور رہے وہ لوگ جنہوں نے کفر کیا تو وہ کہتے ہیں: اس (حقیر) مثال سے اللہ کی مراد کیا ہے‘ اللہ اس کے ذریعے بہت سے لوگوں کو گمراہی میں چھوڑ دیتا ہے اور بہت سے لوگوں کو اس سے ہدایت دیتا ہے‘‘ (البقرہ: 26)۔ یہاں مُشَبَّہ یا مُمَثَّل لَہٗ (یعنی جس کو تشبیہ دی گئی ہے یا جس کی مثال بیان کی گئی ہے) کی تحقیر مراد نہیں ہوتی‘ بلکہ ایک حقیر چیز سے تشبیہ یا تمثیل بیان کر کے اُن کے باطل عقائد کا بودا پن ظاہر کرنا مقصود ہوتا ہے۔ ایک اور قاری نے لکھا: ''ویسے آپ کو ٹرمپ اور ممدانی ہزاروں میل دور نظر آ رہے ہیں‘ مگر پاکستان میں ایک عام پاکستانی پر حکومت اور اداروں کی جانب سے ہونے والا ظلم نظر نہیں آ رہا‘مگر آپ کو امریکہ نظر آرہا ہے‘‘ جواباً عرض ہے: ''ہمیں تو بہت کچھ نظر آ رہا ہے‘ لیکن ہر شخص اپنے مطلب کی بات پڑھنا اور سننا چاہتا ہے۔ ہمارے رفیقِ سفر وہ ہیں جو ہر حال میں حق کے طرفدار ہوں‘ اگر آپ کے کسی ممدوح کی خلافِ شرع کسی بات پر گرفت کریں تو آپ آگ بگولا ہو جاتے ہیں‘ مگر حق ہمیشہ ایک ہی ہوتا ہے‘ وہ افراد کی نسبت سے بدلتا نہیں ہے۔ 2017ء سے اعلیٰ عدالتوں میں جو کچھ ہوتا رہا‘ تب تو آپ کو پسند تھا‘ اب ناپسند ہو گیا ہے‘ لہٰذا یہ آپ کا مسئلہ ہے‘ ہمارے نزدیک جو غلط ہے‘ وہ کل بھی غلط تھا اور آج بھی غلط ہے‘ آپ حضرات کا طرزِ عمل اس شعر کا مصداق ہے:
پسند وناپسند کا کوئی بھی ضابطہ نہیں؍ کبھی بھلا بھی برا‘ کبھی بُرا بُرا نہیں
ایک اور صاحب نے لکھا: ''تعجب ہوا کہ ٹرمپ بھی تارکین وطن میں سے ہے‘‘ اس مسئلے کی مزید وضاحت درج ذیل ہے:
''امریکہ کو جب کولمبس نے دریافت کیا تو اس کے اصل باشندوں کو ریڈ اِنڈین کا نام دیا گیا‘ اب انہیں Native Americans یعنی امریکہ کے اصل باشندے کہا جاتا ہے۔ AI معلومات کے مطابق اب امریکہ میں اُن کی آبادی ستانوے لاکھ ہے‘ جبکہ امریکہ کی کل آبادی تقریباً پینتیس کروڑ ہے۔ سفید فام لوگوں سمیت باقی سارے تارکینِ وطن ہیں۔ یہ الگ بات ہے کہ اب سفید فام تارکینِ وطن اپنے آپ کو اصل مالک سمجھتے ہیں اور باقیوں کو تارکینِ وطن قرار دیتے ہیں اور آج کل صدر ٹرمپ تارکینِ وطن کے پیچھے پڑے ہوئے ہیں‘ حالانکہ امریکہ کی ریاستیں کیلیفورنیا‘ نیواڈا‘ یوٹا‘ نیو میکسیکو اور ایریزونا پہلے میکسیکو کا حصہ تھیں اور کولوراڈو‘ وائیومِنگ‘ ٹیکساس اور اوکلاہاما جزوی طور پر میکسیکو کا حصہ تھیں۔ آج کل امریکہ میں میکسیکن تارکین وطن کو سپینش کہا جاتا کیونکہ میکسیکو ماضی میں سپین کی کالونی تھا اور میکسیکو کی سرکاری زبان سپینش ہے۔ اسی طرح کینیڈا‘ آسٹریلیا اور نیوزی لینڈ کے سفید فام باشندے بھی دراصل تارکینِ وطن ہی ہیں۔ بحرِہند میں واقع ایک جزیرہ ماریشس ہے‘ اس غیر آباد جزیرے کو یورپی نوآبادیاتی حکمرانوں نے بھارتی تارکینِ وطن کو لا کر آباد کیا تھا۔ یہ سطور اس لیے لکھیں کہ گزشتہ ایک پوسٹ میں ٹرمپ کو ''تارکِ وطن‘‘ لکھا تو بعض لوگوں کو اس پر حیرت ہوئی۔ یہ الگ بات کہ بعض سفید فام تارکینِ وطن کی کئی نسلیں گزر چکی ہیں‘ لیکن اصلاً تو وہ برطانیہ‘ سکاٹ لینڈ و دیگر یورپی ممالک اور جنوبی افریقہ وزمبابوے وغیرہ سے آئے تھے‘ کیونکہ امریکہ برطانیہ کی نوآبادی تھا۔ 1760ء میں برطانوی استعمار سے آزادی کی تحریک چلی اور جولائی 1776ء میں ٹامس جیفرسن نے آزادی کا اعلان کیا اور دستور کی منظوری کے بعد جارج واشنگٹن امریکہ کا پہلا صدر بنا۔ امریکی پرچم میں پچاس ستارے ہیں‘ 13 بڑے ستارے اُن ریاستوں کی نشاندہی کرتے ہیں‘ جنہوں نے برطانیہ کے خلاف جنگِ آزادی میں حصہ لیا اور 37 چھوٹے ستارے اُن ریاستوں کی نشاندہی کرتے جنہوں نے جنگ میں حصہ لیے بغیر امریکہ میں شمولیت اختیار کی۔
جب ہم اُن ممالک کے غلبے یا ترقی کے اسباب کے بارے میں لکھتے ہیں تو اس کا مطلب یہ نہیں کہ آپ مرعوب ہو جائیں‘ بلکہ اس کا مطلب یہ ہے کہ ترقی کے راستے سب کیلئے کھلے ہیں‘ کسی پر بند نہیں ہیں‘ آپ اپنے اندر عزم‘ حوصلہ‘ ولولہ‘ استقامت اور ترقی کا جذبہ پیدا کریں اور معیار پر اپنے آپ کو دنیا کی قیادت کا اہل بنائیں‘ مشہور ضرب المَثَل ہے: ''کسبِ کمال کُن کہ عزیزِ جہاں شوی‘‘۔ صحابۂ کرام وتابعینِ کرام اور مابعد کے ادوار میں مسلمانوں کو اُس وقت کی سپر پاورز کے مقابلے میں برتری اُن کی شجاعت اور اہلیت کے باعث ملی‘ کسی نے خیرات میں یہ سوغات عطا نہیں کی۔ آخر انہی مشکلات میں پاکستان نے چاہا تو ایٹم بم بنا لیا اور اس میں ذوالفقار علی بھٹو مرحوم کے دور سے لے کر نواز شریف تک تمام حکمرانوں اور بالخصوص ڈاکٹر عبدالقدیر خان مرحوم ودیگر سائنسدانوں کا حصہ ہے۔ حالیہ پاک بھارت چار روزہ جنگ میں پاکستان نے اپنی حربی اہلیت‘ صلاحیت‘ عزم‘ حوصلہ اور شجاعت ثابت کی تو دنیا نے اسے تسلیم کیا۔